ಪ್ರಥಮ ಪೂಜಿತ ಶ್ರೀ ಗಣಪತಿಕ ಸಂಬಂಧ ಪಾವ್ನು ಆಚರಣ ಕೊರಚೆ ಗಣೇಶ ಚೌತಿ ಖಾತ್ತಿರಿ ವಿವರ ಜಾವ್ನು ಸಾಂಗಚಾಕ ಘೆಲಯಾರಿ ತ್ಯಾ ಏಕ್ಕಚಿ ಪರಭ ವ್ಹಡ ಗ್ರಂಥ ಜಾತ್ತಾ. ಗಣೇಶ ಪೂಜಾ ಹಿಂದೂಸ್ತಾನಾಂತು ಮಾತ್ರ ನ್ಹಂಹಿ, ಜಪಾನ, ಚೀನಾ, ಮಲಯಾ, ಜಾವಾ, ಟಿಬೇಟ್ ಇತ್ಯಾದಿ ರಾಷ್ಟ್ರಾಂತು ಆಚರಣ ಕರ್ತಾ ಆಶ್ಶಿಲೆ ಮ್ಹಣತಾತಿ. ಹಿಂದೂಸ್ಥಾನಾಕ ಸ್ವಾತಂತ್ರ್ಯ ಮೆಳಚೆ ಪಯಲೆ ಘರಾಂತೂ ತಿತ್ಲೇಚಿ ಭಕ್ತಿ, ಶ್ರೃದೇರಿ, ಅನ್ವಳಪಣಾಂತು ಚಲ್ತಾ ಆಶ್ಶಿಲೆ ಚೌತಿ ಸಂಭ್ರಮು, ದೇಶ ಪ್ರೇಮಿ ಲೋಕಾಂಕ ದೇಶಾಭಿಮಾನಾಚೆ, ಸ್ವಾತಂತ್ರ್ಯಾಚೆ ಪ್ರೇರಣ ದಿವಚ ಖಾತ್ತಿರಿ ೧೮೯೩ಂತು ಬಾಲಗಂಗಾಧರ ತಿಲಕ ತಾನ್ನಿ ಮಹಾರಾಷ್ಟ್ರಾಂತು ತಾಕ್ಕಾ ಸಾರ್ವಜನಿಕ ಸ್ವರೂಪ ದಿಲ್ಲಿಂತಿ. ಆಜಿ ಹುಬ್ಳಿ, ಬೆಳಗಾಂವ, ಬೆಂಗಳೂರ ತಸ್ಸಾಲೆ ವ್ಹಡ ವ್ಹಡ ಶಹರಾಂತು ಶಂಬರಿಗಟ್ಲೆ ಸಾರ್ವಜನಿಕ ಗಣೇಶ ಮೂರ್ತಿ ಪ್ರತಿಷ್ಠಾಪನ ಕೋರ್ನು ಗಡ್ಜ-ಗೌಜಾಂತು, ಮೋಜ-ಮಸ್ತಿ ಕರ್ತಾ ಗಣೇಶೋತ್ಸವು ಆಚರಣ ಕೊರಚೆ ಉಟೋವ್ನು ದಿಸ್ತಾ.
ಸಾಮಾನ್ಯ ಜಾವ್ನು ಶ್ರೀ ಗಣೇಶೋತ್ಸವ ಸಂದಭಾರಿ ಗಣೇಶಾಲೆ ಮಾತ್ತೆ ವಿಗ್ರಹ ಕೋರ್ನು ಏಕ್ದೀಸು, ದೋನದಿವಸು, ತೀನ ದಿವಸು, ಪಾಂಚ ದಿವಸು, ಸಾತ ದಿವಸು ನಾಂವೆ ಇಕ್ರ ದಿವಸು ದವರೂನು ಪೂಜಾ ಕರತಾತಿ. ಕೆಲವ ಘರ್ಕಡೆ ಅವಂದು ಹಾಡಲೀಲೆ ಗಣೇಶ ವಿಗ್ರಹ ಮುಖಾರಿ ವರ್ಷ ವಿಸರ್ಜನ ಕೊರಚೆ ರಿವಾಜು ವರೇನ ಆಸ್ಸಾ. ಸಾರಸ್ವತ ಜನಾಂಗಾಂತು ಕುಟುಂಬಾಂತು ಪೂಡೆಚಾನ ಚೋಲ್ನು ಆಯಲೀರಿ ಮಾತ್ರ ಚೌತಿ ಗಣೇಶಾಕ ಪ್ರತಿಷ್ಠಾಪನ ಕೋರ್ನು ಪೂಜಾ ಕರತಾತಿ. ಹಾಕ್ಕಾ ಆನ್ಮಳಪಣ ಚ್ಹಡ. ತ್ರಿಕಾಲ ಪೂಜಾ ಚೋಲ್ಕಾ. ಭಾದ್ರಪದ ಚತುರ್ಥಿ(ಚೌತಿ) ದಿವಸು ಶ್ರೀ ಗಣಪತಿ ವಿಗ್ರಹ ಹಾಣು, ದೃಷ್ಟಿ ಸೊಡೋವನು, ದೇವಾ ಕೂಡಾಂತು ಮಾಂಟ್ವೆಂತು ಪ್ರತಿಷ್ಠ್ಠಾ ಕರತಾತಿ. ಪುರೋಹಿತ ಭಟ್ಮಾಮ್ಮಾ ಮುಖೇನ ಪೂಜಾ ಕರತಾತಿ. ಗಣಹೋಮ, ರಂಗಪೂಜಾ ಇತ್ಯಾದಿ ಸೇವಾ ಅರ್ಪಣ ಕರತಾತಿ. ವಿಶೇಷ ಮ್ಹಳಯಾರಿ ನಂವೆ ಫಲ (ನಾರ್ಲು, ಶೀವಾಳ, ಪಾಪ್ಪಳ, ರಾಂದಯ ಕಾಯ ಪೂರಾ) ಆನಿ ನಂವೇ ಫಳ (ಖೇಳೆ, ಮುಸುಂಬಿ ಇತ್ಯಾದಿ) ಫಳಾವಳಿಕ ಲಾಂಬೆಚೆ. ತಾಜ್ಜ ಒಟ್ಟು ಕೆಲವ ಘರಾಣಿಂತು ಗಣಪತಿಕ ಆರ್ತಿ ಜಾತ್ತಾನಾ ಸಾನ್ಸಾನ ಚರ್ಡುವಾಂಕ ಚಾಂಗ ಆಯುಷ್ಯ, ವಿದ್ಯಾ, ಬುದ್ಧಿ ವಿಘ್ನವಿನಾಶಕು ಪ್ರಾಪ್ತ ಕೊರೊ ಮ್ಹೊಣುಮಾಗ್ಗೂನು ತಾಂಕಾಯಿ ಏಕ್ದೊನಿ ಘ್ಹಡಿ ಫಳಾವಳಿ ಲಾಂಬೆತಾತಿ.
ಶ್ರೀ ಗಣೇಶ ಚೌತಿಕ ಕೊರಚೆ ರಾಂದಪ ಮಾತ್ರ ಸಾನ ಸುಮಾರ ನ್ಹಂಹಿ. ಖೊಟ್ಟೊ, ಚಕ್ಕುಲಿ, ಉಂಡೊ, ಪತ್ರಾಡೊ, ಸುಕ್ಕೆ, ಪೋಡಿ, ಗೋಡಿ ರಾಂದಯಿ, ಪಾತ್ತೋಳಿ, ಪೋವಾ ಖೀರು, ಉಂಡ್ಲಕಾಳ ಇತ್ಯಾದಿ ೨೧ ಬಗೆ ಪಂಚಭಕ್ಷ್ಯ ಕೋರ್ನು ದೇವಾ ಮುಖಾರ ವಾಣು ನೈವೇಧ್ಯ ಕೋರ್ನು ಪೂಜೆ ನಂತರ ಪ್ರಸಾದ ರೂಪಾನಿ ಆಯ್ಯಿಲೆ ಭಜಕಾಂಕ ವಾಡತಾತಿ. ಶ್ರೀ ಗಣೇಶೋತ್ಸವ ಸಂದರ್ಭಾರಿ ೨೧ ಆರ್ತಿ, ೫೧ ಆರ್ತಿ, ೧೦೧ ಆರ್ತಿ ಕೊರಚೆ ಸಂಪ್ರದಾಯ ಕೆಲವ ಕಡೇನ ಆಸ್ಸ. ರಂಗಪೂಜೆಕ ಅಂತೂ ೨೧ ಆರ್ತಿ ಕೊರಕಾಚಿ. ತ್ಯಾ ಆರ್ತಿರಿ ನಮ್ನಮೂನೇಚೆ ಆಕರ್ಷಕ ಚಿತ್ತರ ಸೊಡೋಚೆ ಅಂತೂ ದೋಳ್ಯಾಕ ಮಸ್ತ ಸಂತೋಷು ದಿತ್ತಾ. ಕಡೇರ್ಚೆ ದಿವಸು ವಿಸರ್ಜನ ಪೂಜಾ ಕೋರ್ನು ಮಾತ್ತಿಯಾ ಗಣೇಶ ಮೂರ್ತಿ ನಂಯಿಂತು, ಬಾಂಯಿಂತು ಜಾಂವೊ ಥಂಳೆಂತು ಮೆರವಣಿಗೇರಿ ವ್ಹೋರ್ನು ವಿಸರ್ಜನ ಕರತಾತಿ. ಆಮಗೇಲೆ ಸರ್ವ ಗಾಂವ್ಚೆ ಸಮಾಜ ತರಪೇನ ಪ್ರತಿ ವರ್ಷ “ಶ್ರೀ ಗಣೇಶ ಮಹೋತ್ಸವು ವಿಜೃಂಭಣೇರಿ ಆಚರಣ ಕರತಾತಿ.
ಆಮ್ಗೆಲೆ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಂಕ ಅತ್ಯಂತ ಅಭಿಮಾನ ಪಾವ್ಚೆ ವಿಷಯು ಮ್ಹಳಯಾರಿ ಮುಂಬೈಚೆ ಜಿ.ಎಸ್.ಬಿ. ಸೇವಾ ಮಂಡಲಾಚಾನ ಘೆಲೀಲೆ 71 ವರ್ಷಾಚಾನ ಆಚರಣ ಕೊರಚೆ ಶ್ರೀ ಗಣೇಶೋತ್ಸವು. ಅವಂದು 72ವ್ಯಾ ವರಸಾಚೆ ಶ್ರೀ ಗಣೇಶೋತ್ಸವಾಚೆ ಸಂಭ್ರಮು ಸೂರು ಜಾತ್ತಾ ಆಸ್ಸಾ. ಸುಮಾರ 66 ಕೆ.ಜಿ. ಪಶಿ ಚ್ಹಡ ಭಾಂಗಾರ ಆನಿ 335 ಕೆ.ಜಿ ಪಶಿ ಚ್ಹಡ ರುಪ್ಯಾಚೆ ಹಕ್ಕುದಾರ ಜಾಲೀಲೊ ಹಾಂಗಾಚೊ ಶ್ರೀ ಗಣಪತಿ ಅತ್ಯಂತ ಶ್ರೀಮಂತ ಗಣಪತಿ ಮ್ಹೊಣು ನಾಂವ ಪಾವಲಾ. ಮಾತ್ರ ನ್ಹಂಹಿ ಅವಂದು 703 ಕೋಟಿ ಪಶಿ ಚ್ಹಡ ಇನ್ಸುರೆನ್ಸ್ ಕೆಲೀಲೆ ಹೇ ಗಣೇಶೋತ್ಸವಾಚೆ ಆನ್ನೇಕ ವಿಕ್ರಮ. ಸೆ.14 ತಾಕೂನು ಸೆ.18 ಪರಿಯಂತ ಹಾಂಗಾಚೆ ವಿಜೃಂಭಣೇಚೆ ಶ್ರೀ ಗಣೇಶೋತ್ಸವು ಚಲ್ತಾ. ತ್ಯಾ ಪಳಯ್ಚೇಚಿ ಮಹಾಭಾಗ್ಯ.
ಸಿದ್ಧಿದಾಯಕು, ಬುದ್ಧಿದಾಯಕು, ವಿಘ್ನವಿನಾಶಕು ಶ್ರೀ ಗಣಪತಿ ಸರ್ವಾಂಕ ಚಾಂಗ ಕೊರೊ ಮ್ಹೊಣು ಆಶಯ ಕೊರ್ಯಾ.