ಮಂತ್ರಜಪಾಚೆ ಪ್ರಭಾವು ಸಾನ ಮ್ಹೊಣು ಲೆಕ್ಕುನಾಕ್ಕಾತಿ, ಧಾರ್ಮಿಕತಾ, ಆಧ್ಯಾತ್ಮಿಕ ಸಾಧನಾ ಹೇಂಚಿ ಮೆಗೆಲೆ ದಾನ, ಧರ್ಮಾಕ ಕಾರಣ. ಮಂತ್ರಜಪಾಚೆ ಮಹತ್ವಾ ಖಾತೇರಿ ಪುರಾಣ, ಶಾಸ್ತ್ರಾಂತೂ ವರೇನ ಸಾಂಗಿಲೆ ಆಸ್ಸಾ. ಆಪ್ಪಣ ಸಂಕಲ್ಪ ರಹಿತ ಜಾವನು ಶೃದ್ಧಾ-ಭಕ್ತಿನಿ ಪ್ರತಿದಿವಸು ೫೦,೦೦೦ ಮಂತ್ರಜಪ ವರ್ಷಾನುಗಟ್ಲೆ ಕೆಲೀಲೆ ನಿಮಿತ್ತ್ಯಾನಿ ವಿಶೇಷ ಶಕ್ತಿ ಸಂಚಯನ ಜಾವಚಾಕ ಸಾಧ್ಯ ಜಾವನು ದಾನ-ಧರ್ಮಕಿ, ಅತ್ರೇಕ ಚಾಂಗ ಕಾಮ ಕೊರಚಾಕ ಮಾಜ್ಜೇನ ಸಾಧ್ಯ ಜಾಲ್ಲೆ. ಆಮ್ಗೆಲಿಂ ಆವಯಿ ಕೊಂಕಣಿ ತಿಕ್ಕಾ ಕೆದನಾಂಯಿ ಮಾನ ದಿವಕಾ, ತಿಕ್ಕಾ ಸೇವಾ ಪಾವಯಚೆ ವರೇನ ವ್ಹಡ ಭಾಗ್ಯ ಆಶ್ಶಿ ಮ್ಹೊಣು ಶ್ರೀ ಕೆ. ಜನಾರ್ಧನ ಭಟ್ ತಾನ್ನಿ ಸಾಂಗಲೆ ತಾನ್ನಿ ಜೂನ್ 8ಕ ಆಯ್ತವಾರು ಬೆಂಗಳೂರ್‍ಚೆ ಉತ್ತರಹಳ್ಳಿ ದೇವೇಗೌಡ ಪೆಟ್ರೋಲ್ ಬಂಕ್ ಲಾಗ್ಗಿ ಆಸ್ಸುಚೆ ಬನಗಿರಿ ಶ್ರೀ ವರಸಿದ್ಧಿ ವಿನಾಯಕ ದೇವಳಾಚೆ ಸಮುದಾಯ ಭವನಾಂತು ಆಯೋಜಿತ ಸರಸ್ವತಿ ಪ್ರಭಾ ಕೊಂಕಣಿ ಮಾಸಿಕ ತರಪೇನಿ ಪ್ರಧಾನ ಕೆಲೀಲೆ ಸರಸ್ವತಿ ಪ್ರಭಾ ಪುರಸ್ಕಾರ -೨೦೨೫ ಸ್ವೀಕಾರ ಕೊರನು ಉಲಯಾಶ್ಶಿಲೆ. ಹೇ ಕಾರ್ಯಕ್ರಮು ಜಿ.ಎಸ್.ಬಿ. ಪರಿವಾರು ಉತ್ತರ ಹಳ್ಳಿ ಆನಿ ಸರಸ್ವತಿ ಪ್ರಭಾ ಕೊಂಕಣಿ ಮಾಸಿಕ ಹುಬ್ಬಳ್ಳಿ ಹಾಂಗೆಲೆ ಸಹಯೋಗಾನಿ ಚಲ್ಲೆ.
ಹೇ ವೇಳ್ಯಾರಿ ಜಿ.ಎಸ್.ಬಿ. ಪರಿವಾರು ಉತ್ತರಹಳ್ಳಿ ಹಾಜ್ಜೆ ಕಾರ್ಯದರ್ಶಿ ಶ್ರೀ ಅಣ್ಣಪ್ಪ ಪ್ರಭು ಹಾನ್ನಿ ಉಲೋನುಶ್ರೀ ಕೆ. ಜನಾರ್ಧನ ಭಟ್ ಮಾಮ್ಮಾಲೆ ದಾನಗುಣ ಸಕ್ಕಡ ಸಮಾಜ ಬಾಂದವಾಂಕ ಮಾದರಿ, ತಾಂಕಾ ಹಾಂಗಾ ಸನ್ಮಾನ ಘಡ್ತಾ ಆಸ್ಸುಚೆ ಆಮಕಾ ಸಕಡಾಂಕ ಮಸ್ತ ಅಭಿಮಾನಾಚೆ ವಿಷಯು ಜಾವ್ನಾಸ್ಸಾ. ಆಮ್ಗೆಲೆ ಜಿ.ಎಸ್.ಬಿ. ಉತ್ತರಹಳ್ಳಿ ಹೇ ಪ್ರದೇಶಾಚೆ ಜಿ.ಎಸ್.ಬಿ. ಬಾಂದವಾಲೊ ಉನ್ನತಿ ಖಾತೇರಿ ಆನಿ ಗರಜ ಆಸ್ಸುಚೆ ದುರ್ಬಲಾ ಖಾತೇರಿ ವಾವರೋ ಕರತಾ ಆಸ್ಸಾ. ಆನಿ ದೋನ ದಿವಸಾನಿ ತೀನ ಚಾರ ಲಾಕ ರೂಪಯಾಚೆ ನೋಟ್ ಬುಕ್ ಗರಜ ಆಸ್ಸುಚೆ ದುರಬಳೆ ಚರಡುವಾಂಕ ಪರಿವಾರ ತಾಕೂನು ವಾಂಟುಚೆ ಕಾರ್ಯಕ್ರಮ ಆಸ್ಸಾ, ತಶೀಚಿ ಇಸ್ಕೂಲಾಚಾನ ಭಾಯರಿ ವ್ಹರಲೀಲೆ ಶಂಬರ ಬಽರಿ ಗರೀಬ ಚರಡುವಾಲೆ ಬಿ.ಡಿ.ಎ. ಶಾಳೆಚೆ ವರ್ಷಾಚೆ ಶುಲ್ಕ ವರೇನ ಬಾಂಚಾಕ ಠರಯಿಲೆ ಆಸ್ಸುನು ಹಾಜ್ಜೆ ಕಾರ್ಯ ಚಲ್ತಾ ಆಸ್ಸಾ. ಬೆಂಗಳೂರು ಬಿ.ಡಿ.ಎ. ತರಪೇನ ಜಿ.ಎಸ್.ಬಿ. ಪರಿವಾರು ಉತ್ತರ ಹಳ್ಳಿಕ ಕೋಟಿಗಟ್ಲೆ ಮೌಲ್ಯಾಚೆ ಏಕ ಎಕರೆ ಜಾಗೋ ಮೆಳಚೆ ಸಾಧ್ಯತಾಂಯಿ ಆಸ್ಸ, ತ್ಯಾ ಖಾತೀರಿ ಆಮಕಾ ಕೋಟಿಗಟ್ಲೆ ರೂಪ್ಪಯಿ ಜಾವಕಾ ಪಡ್ತಾ ಸಮಾಜಾಚೆ ಅಸ್ಮಿತಾಂಯಿ ವ್ಹರೋಚಾಕ ಹೇ ಮಹಾಕಾರ್ಯಾಂತು ಸರ್ವಾನಿ ಹಾತು ಮೆಳೋಕಾ. ಹೇ ಪ್ರದೇಶಾಂತು ಆಸ್ಸುಚೆ ಹರ್‍ಯೇಕ ಸಮಾಜ ಬಾಂದವಾನಿ ಜಿ.ಎಸ್.ಬಿ. ಪರಿವಾರು, ಉತ್ತರಹಳ್ಳಿ ಹಾಜ್ಜೆ ಮೆಂಬರ ಜಾವ್ಕಾ ಮ್ಹೊಣು ತಾನ್ನಿ ಆಪೋವ್ಣಿ ದಿಲ್ಲಿ.
ಜಿ.ಎಸ್.ಬಿ. ಪರಿವಾರು ಉತ್ತರಹಳ್ಳಿ ಹಾಜ್ಜೆ ಅಧ್ಯಕ್ಷ ಶ್ರೀ ಸುರೇಂದ್ರ ನಾಯಕ್ ಹಾನ್ನಿ ಶ್ರೀ ಕೆ. ಜನಾರ್ಧನ ಭಟ್ ಮಾಮ್ಮಾಲೆ ಸೇವೆಚೆ ಗುಣಗಾನ ಕೆಲ್ಲಿ. ಆನಿ ಸರಸ್ವತಿ ಪ್ರಭಾ ಕೊಂಕಣಿ ಮಾಸಿಕ ತಾಕೂನು ಶ್ರೀ ಕೆ. ಜನಾರ್ಧನ ಭಟ್ ಹಾಂಕಾ ಹಸ್ತಾಂತರ ಕೆಲೀಲೆ ಸನ್ಮಾನ ಪತ್ರ ವಾಚ್ಚಿಲೆ. ಪ್ರಾಸ್ತಾವಿಕ ಜಾವನು ಉಲಯಿಲೆ ಸರಸ್ವತಿ ಪ್ರಭಾ ಪತ್ರಿಕೆಚೆ ಸಂಪಾದಕ ಆರಗೋಡು ಸುರೇಶ ಶೆಣೈ ಹಾನ್ನಿ “ಗೋಂಯಾಂತು ಪಂದ್ರಾವೇಂ ಶೇಕಡ್ಯಾಚೆ ಸುಮಾರಾಕ ಸೂರು ಜಾಲೀಲೆ ಮತಾಂತರ ಪ್ರಕ್ರಿಯಾ ಅಡ್ಡೇಶಿ(೨೫೦) ವರ್ಷಕಾಳ ಚಲ್ಲೆ. ತೆದ್ನಾ ಆಮ್ಗೆಲೆ ಸಂಸ್ಕೃತಿ, ಸಂಸ್ಕಾರ ಆನಿ ಮಾತೃಭಾಸ ವ್ಹರೋಚೆ ಖಾತ್ತಿರಿ ಆಮ್ಗೆಲೆ ಮ್ಹಾಲ್ಗಡ್ಯಾನಿ ತಾಂಗೆಲೆ ಮ್ಗಾಲ್ಗಡ್ಯಾ ತಾಕೂನು ಆಯಲೀಲೆ ಶಂಬರ ಬಽರಿ ಎಕ್ರೆ ಆಸ್ತಿ, ಪಾಸ್ತಿ, ಗಾಯ-ಗೊರವಾಂಕ ಸಕ್ಕಡ ತ್ಯಾಗ ಕೊರನು ವೆಗವೆಗಳೆ ಜಾಗೇಕ ಯವ್ನು ನವೀನ ಜೀವನ ಬಾಂದೂನು ಘೆತ್ಲಿ. ಕಿತ್ಲೀಕಿ ಲೋಕಾಲೆ ಬಲಿದಾನ ವರೇನ ಚಲ್ಲೆ. ೪೦ ವರಸಾ ಮಾಗಶಿ ತ್ಯಾ ಘಟನಾ ವಾಜ್ಜಿಲಿ ತೆದ್ನಾ ಮಾಕ್ಕಾ ದೋಳ್ಯಾಂತು ಉದ್ದಾಕ ಆಯಲೆ. ತಾನ್ನಿ ಕೆಲೀಲೆ ತ್ಯಾಗು, ಬಲಿದಾನ ವ್ಯರ್ಥ ಜಾವಚಾಕ ನಜ್ಜ ಮ್ಹೊಣು ಮೆಗೆಲೆ ಅಖೇರಿಚೆ ಶ್ವಾಸ ಆಸ್ಸುಚೆ ಪರಿಯಂತ ಮಾತೃಭಾಷಾ ಸೇವಾ ಪಾವಯಕಾ ಮ್ಹಣ್ಚೆ ಆಶಾ ಮಾಕ್ಕ ಆಸ್ಸಾ. ಶ್ರೀ ಕೆ. ಜನಾರ್ಧನ ಭಟ್ ಮಾಮ್ಮಾಲೆ ತಸ್ಸಾಲೆ ಸಮಾಜಾಕ ಅಪರಿಮಿತ ಸೇವಾ ಪಾವೋನು, ಪ್ರಚಾರ, ಪುರಸ್ಕಾರಾಕ ಆಶಾ ಪಾವ್ನಾತ್ತಿಲೆ ಹಜಾರಗಟ್ಲೆ ಸಮಾಜ ಬಾಂದವ ಆಮ್ಗೆಲೆ ಮಧೇ ಆಸ್ಸಾತಿ. ತಾನ್ನಿ ಆಮ್ಗೆಲೆ ಹೇ ಪ್ರಶಸ್ತಿ ಸ್ವೀಕಾರ ಕರಚಾಕ ಆಯಲೀಲೆ ಆಮ್ಗೆಲೆ ಪುಣ್ಯ, ಹಾಕ್ಕ ಸಕಡಾಕ ಪರಮಾತ್ಮಾಲೆ ಪ್ರೇರಣಾಚಿ ಕಾರಣ ವಿನಃ ಹಾಂತು ಮೆಗೆಲೆ ಹೋಡಪಣ ಕಸಲೇಯಿ ನಾ ಮ್ಹೊಣು ಮ್ಹಳ್ಳೆ.
ಹೇ ವೇಳ್ಯಾರಿ ಬಸವನಗುಡಿ ಗೌಡ ಸಾರಸ್ವತ ಸಮಾಜಾಚೆ ಉಪಾಧ್ಯಕ್ಷ ಶ್ರೀ ಎಮ್.ಜಿ. ನಾಯಕ್, ಜಿ.ಎಸ್..ಬಿ. ಪರಿವಾರು ಉತ್ತರಹಳ್ಳಿ ಹಾಜ್ಜೆ ಅಧ್ಯಕ್ಷ ಶ್ರೀ ಎಮ್. ಸುರೇಂದ್ರ ನಾಯಕ್, ಜಿ.ಎಸ್.ಬಿ. ಪರಿವಾರು ಉತ್ತರಹಳ್ಳಿ ಹಾಜ್ಜೆ ಕಾರ್ಯದರ್ಶಿ ಶ್ರೀ ಅಣ್ಣಪ್ಪ ಪ್ರಭು, ಪರಿವಾರು ಹಾಜ್ಜೆ ಉಪಾಧ್ಯಕ್ಷ ಶ್ರೀ ಮಧ ಪುರಾಣಿಕ, ಪರಿವಾರು ಹಾಜ್ಜೆ ಖಜಾಂಚಿ ಶ್ರೀ ಕೆ. ದಾಮೋದರ ನಾಯಕ, ಶ್ರೀ ಕೃಷ್ಣಾ ಎನ್. ಕಾಮತ್, ಶ್ರೀ ಎಸ್. ಗುಣ ಪೈ, ಶ್ರೀ ಬಿ. ಪ್ರಕಾಶ ಕಿಣಿ, ಸರಸ್ವತಿ ಪ್ರಭಾ ಕೊಂಕಣಿ ಮ್ಹಹಿನ್ಯಾಳ್ಯಾ ತರಪೇನ ಸಂಪಾದಕ ಆರಗೋಡು ಸುರೇಶ ಶೆಣೈ, ಶ್ರೀ ಮಂಜುನಾಥ ಕಾಮತ್, ಶ್ರೀ ಗಣಪತಿ ಶೆಣೈ ಶ್ರೀ ಜಗದೀಶ ಪೈ ಸಹಿತ ಇನ್ನಿತರ ಗಣ್ಯ, ಸಮಾಜ ಬಾಂದವ ವ್ಹಡ ಅಂಕಡ್ಯಾರಿ ಉಪಸ್ಥಿತ ವ್ಹರಲೀಲೆ.
ಹೇ ವೇಳ್ಯಾರಿ ಸಮಾರಂಭಾಕ ಆಯಲೀಲೆ ಗಣ್ಯ ಆನಿ ಜಿ.ಎಸ್.ಬಿ. ಪರಿವಾರು, ಸರಸ್ವತಿ ಪ್ರಭಾ ಪತ್ರಿಕಾ ಬಳಗಾಚೆ ಸಹಕಾರಾನಿ ಶ್ರೀ ಕೆ. ಜನಾರ್ಧನ ಭಟ್ ಹಾಂಕಾ ಸುರವೇಕ ಮೈಸೂರು ಪೇಟಾ ಘಾಲ್ನು, ಮಾಳ ಘಾಲ್ನು, ಶಾಲ ಪಾಂಗೂರ್ನು, ಸ್ವರಣಿಕಾ, ಸನ್ಮಾನ ಪತ್ರ, ಫಲ-ಪುಷ್ಪ ಸಹಿತ ರೂ. ೫,೦೦೧/- ಚೆಕ್ ದಿವನು ಪ್ರಶಸ್ತಿ ಪ್ರಧಾನ ಕೊರನು ಸನ್ಮಾನ ಕೆಲ್ಲಿ. ತಾಂಗೆಲೆ ಬಾಯಲ ಶ್ರೀಮತಿ ಶ್ಯಾಮಲಾ ಭಟ್ ಹಾಂಕಾ ಶಾಲು ಪಾಂಗೂರ್ನು, ಹಳದಿ ಕುಂಕುಮು ದಿವನು ಹೂಂಟಿ ಭರಲೆ.
ಹೇ ಕಾರ್ಯಕ್ರಮು ಜಿ.ಎಸ್.ಬಿ. ಪರಿವಾರು ಉತ್ತರಹಳ್ಳಿ ಹಾನ್ನಿ ಪ್ರತಿ ಮ್ಹಹಿನ್ಯಾಚೆ ದೊನ್ನೀ ಆಯ್ತವಾರು ಚಲಯಚೆ ಶ್ರೀ ಸತ್ಯನಾರಾಯಣ ಪೂಜಾ ಸಂದರ್ಭಾರಿ ಚಲ್ಲೆ. ತತ್ಸಂಬಂಧ ಸುರವೇಕ ಶ್ರೀ ಸತ್ಯನಾರಾಯಣ ಪೂಜಾ ಮಹಾಮಾಗಣಿ, ಸಂಕಲ್ಪ, ಪೂಜಾ, ಸೇವಾದಾರಾಂಕ ಪ್ರಸಾದ ವಿತರಣೆ ಬರಶಿ ಚಲಯಾರಿ, ಶ್ರೀ ಗಣೇಶ ಪೈ ಹಾನ್ನಿ ಗುರುಮಹತ್ವ ವಿಷಯಾಂತು ಹರಿಕೀರ್ತನ ಚಲೋನು ದಿಲ್ಲಿ. ಮಾಗಿರಿ ಚಲೀಲೆ ಶ್ರೀ ರಾಮನಾಮ ಜಪಯಜ್ಞಾಂತು ವ್ಹಡ ಅಂಕಡ್ಯಾರಿ ಸಮಾಜ ಬಾಂದವ ಉಪಸ್ಥಿತ ವ್ಹರಲೀಲೆ. ಪ್ರಸಾದ ಭೋಜನ ಬರಶಿ ಹೇ ವೈಶಿಷ್ಠ್ಯಪೂರ್ಣ ಕಾರ್ಯಕ್ರಮು ಸಂಪಲೆ.
- ಶೀಘ್ರದಲ್ಲಿಯೇ ಸಮಾರಂಭದ ಸಂಪೂರ್ಣ ದೃಶ್ಯಾವಳಿಗಳ `ಸುದ್ದಿ ಸಮಾಚಾರ ಯೂಟ್ಯೂಬ್ ವಿಡಿಯೋವನ್ನು ನಮ್ಮ ಸರಸ್ವತಿ ಪ್ರಭಾ ಚಾನಲ್‌ನಲ್ಲಿ ವೀಕ್ಷಿಸಿರಿ.