ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿನ್ ಮಾಂಡುನ್ ಹಾಡ್ಲಲೆಂ ಸಾಹಿತ್ಯ್ ಸಂಭ್ರಮ್ ಕಾರ್ಯೆಂ 26 – 4 – 2025 ವೆರ್ ಮ್ಹಾಲ್ಗಡೊ ಸಾಹಿತಿ ಮಾನೆಸ್ತ್ ಮಾಚ್ಚಾ ಮಿಲಾರ್ ಹಾಚ್ಯಾ ಘರ್ಚ್ಯಾ ಆಂಗ್ಣಾಂತ್ ಯಶಸ್ವೆನ್ ಸಾದರ್ ಜಾಲೆಂ.
ಕಾರ್ಯಾಚೆಂ ಅಧ್ಯಕ್ಶ್‌ಪಣ್ ಅಕಾಡೆಮಿ ಅಧ್ಯಕ್ಶ್ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ಹಾಣೆಂ ವಯ್ಶಿಲ್ಲೆಂ. ಆಪ್ಲ್ಯಾ ಪ್ರಾಸ್ತಾವಿಕ್ ಭಾಷಣಾಂತ್ ಅಕಾಡೆಮಿಚ್ಯಾ ಕವಿತಾ ವ್ಹಾಳೊ ತಶೆಂಚ್ ಸಾಹಿತ್ಯ್ ಸಂಭ್ರಮ್ ಕಾರ್ಯಾಂಚೆಂ ಮಹತ್ವ್ ಆನಿ ಫುಡ್ಲ್ಯಾ ದಿಸಾಂನಿ ಜಾಂವ್ಕ್ ಆಸ್ಚ್ಯಾ ಕಾರ್ಯಾಂವಿಶಿಂ ಮಾಹೆತ್ ದೀವ್ನ್ ಜಮ್ಲಲ್ಯಾಂಕ್ ಬರೊ ಯೆವ್ಕಾರ್ ಮಾಗ್ಲೊ.
ಕಾರ್ಯಾಚೆಂ ಉಗ್ತಾವಣ್ ಮುಕ್ತಿ ಪ್ರಕಾಶ್ ನಾಂವಾನ್ ವಳ್ಕಿಚೊ ಮಾನಾಧಿಕ್ ಬಾಪ್ ಫ್ರಾನ್ಸಿಸ್ ಡಿಸೋಜ ಹಾಣಿಂ ಕೊಂಕ್ಣಿಂತ್ಲಿ ಪಯ್ಲಿ ಕಾದಂಬರಿ ಆಂಜೆಲಿನ್ ಹಾಂತ್ಲೊ ಏಕ್ ಕಡ್ವೊ ವಾಚುನ್ ಭೋವ್ ವಿಶಿಸ್ಟ್ ರಿತಿನ್ ಚಲೊವ್ನ್ ವೆಲೆಂ. ಉಪ್ರಾಂತ್ ಉಲೊವ್ನ್ ಆಪ್ಣಾಕ್ ಕೊಂಕ್ಣಿ ಸಾಹಿತ್ಯಾಚಿ ಆವಡ್, ಅಕಾಡೆಮಿಚಿ ಸಳಾವಳ್ ಆನಿ ಕೊಂಕ್ಣಿ ಸಾಹಿತ್ಯಾಚೆಂ ವ್ಹಡ್ಪಣ್ ಹ್ಯಾ ವಿಶಿಂ ಆಪ್ಲೆ ಅನ್ಭೋಗ್ ವಾಂಟುನ್ ಘೆತ್ಲೆ.
ಕಾರ್ಯಾಚೊ ಪ್ರಮುಕ್ ವಾಂಟೊ ಜಾವ್ನ್ ಕೊಂಕ್ಣಿ ವಿಶಿಂ ಆಪ್ಲೆ ವಿಚಾರ್ ಮಾಂಡ್ಲೆ. ಉಪ್ರಾಂತ್ ಮಾಚ್ಚಾ ಮಿಲಾರ್ ಹಾಣಿಂ ಮ್ಹಾಲ್ಗಡ್ಯಾ ಸಾಹಿತಿಲಾಗಿಂ ಭಾಸಾಭಾಸ್ ಚಲೊವ್ನ್ ವೆಲಿ. ಉಪ್ರಾಂತ್ ಜಮ್ಲಲ್ಯಾ ಸಭಿಕಾಂನಿ ಆಪ್ಲಿಂ ಸವಾಲಾಂ ವಿಚಾರ್ನ್ ಆಪಾಪ್ಲೆ ದುಭಾವ್ ನಿವ್ರಾವ್ನ್ ಘೆತ್ಲೆ. ಘರ್ಚಿ ಯೆಜ್ಮಾನ್ ಮಾನೆಸ್ತಿಣ್ ಜೆನೆಟ್ ಡಿಸೋಜ ಹಿಣೆಂ ಸರ್ವಾಂಚೊ ಉಪ್ಕಾರ್ ಆಟಯ್ಲೊ. ಅಕಾಡೆಮಿ ಸಾಂದೊ ರೊನಾಲ್ಡ್ ಕ್ರಾಸ್ತಾನ್ ಕಾರ್ಯೆಂ ಸಾಂಬಾಳ್ನ್ ವೆಲೆಂ. ಅಕಾಡೆಮಿ ಸಾಂದೊ ನವೀನ್ ಲೋಬೊ ಹ್ಯಾ ವೆಳಾ ಹಾಜರ್ ಆಸ್‌ಲ್ಲೊ.