ಶ್ರೀ ಲಕ್ಷ್ಮೀ ವೆಂಕಟೇಶ ದೇವಸ್ಥಾನ ತೆಂಕಪೇಟೆ ಉಡುಪಿ ಹಾಂಗಾ ೧೨೫ವೇಂ ವರ್ಷಾಚರಣೆಚೆ ಅಂಗ ಜಾವನು ಚಲ್ತಾ ಆಸ್ಸುಚೆ ೧೨೫ ದಿವಸಾಂಚೆ ಅಖಂಡ ಭಜನಾ ಮಹೋತ್ಸವಾಚೆ ಶತ (೧೦೦) ದಿವಸ ಪೂರ್ನ ಜಾಲೀಲೆ ಸಂಭ್ರಮಾಚರಣ ಮೇ.೮ಕ ವಿಜೃಂಭಣೆರಿ ಚಲ್ಲೆ. ಹೇ ಭಜನಾ ಮಹೋತ್ಸವ ಶ್ರೀ ಕಾಶೀಮಠಾಚೆ ವೀಸಾವೇಂ ಪೀಠಾಧಿಪತಿ ಪರಮಪೂಜ್ಯ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಜನ್ಮ ಶತಮಾನೋತ್ಸವಾಚೆ ಸ್ಮರಣಾರ್ಥ ಜಾವನು ವಿಶೇಷ ಧಾರ್ಮಿಕ ಕಾರ್ಯಕ್ರಮ ಸಹಿತ ಸಂಪನ್ನ ಕೆಲ್ಲಿ.
ಮೇ ೦೮ಕ ಸಕ್ಕಾಣಿ ೮:೦೫ಕ ಶ್ರೀದೇವ ಸನ್ನಿಧಿರಿ ಲಕ್ಷ್ಮೀವೆಂಕಟೇಶ ದೇವಾಲೆಂ ವಿಶೇಷ ಮಾಗಣಿ ಬರಶಿ ಆರಂಭ ಜಾವನು ಸುರವೇಕ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಾಕ ೧೦೦ ವಿಶೇಷ ಪವಮಾನಾಭಿಷೇಕ ಚಲ್ಲೆ. ಧೋಂಪಾರಾ ೧೨:೩೦ಕ ಭಜನಾ ಆರಾಧನಾ ದೇವು ಜಾಲೀಲೆ ಶ್ರೀ ವಿಠೋಭ-ರಖುಮಾಯಿ ದೇವಾಕ ವಿಶೇಷ ಪೂಜಾ ಚೋಲ್ನು ಮಾಗಿರಿ ಸೇವಾದಾರಾಂಕ ಪ್ರಸಾದ ವಾಂಟಪ ಚಲ್ಲೆ.
ಸಾಂಜವಾಳಾ ಸಾಮೂಹಿಕ ಶ್ರೀ ವಿಷ್ಣು ಸಹಸ್ರನಾಮ ಪಠಣ ಮಾಗಿರಿ “ಶ್ರೀಮದ್ ಸುಧೀಂದ್ರ ತೀರ್ಥ ಶತಮಾನ ಸ್ಮರಣ” ವಿಶೇಷ ಭಜನಾ ಸೇವಾ ದೇವಳಾಂತು ವಿಜೃಂಭಣೆರಿ ಚಲ್ಲೆ. ರಾತ್ತಿಕ ಶ್ರೀ ನರಸಿಂಹ ಸ್ತುತಿ ಪಠಣ, ಸಾಮೂಹಿಕ ನಮಸ್ಕಾರ ಸೇವಾ, ಮಾಗಿರಿ ಶ್ರೀ ದೇವಾಕ ವಿಶೇಷ ಫುಲ್ಲಾ ಪೂಜಾ ಆನಿ ರಾತ್ರಿ ಪೂಜಾ ಚಲ್ಲೆ. ಮಾಗಿರಿ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಫೋಟೊಕ ಪುಷ್ಪಾರ್ಚನ, ಗುರು ಗುಣಗಾನ ಆದಿ ಕಾರ್ಯಕ್ರಮ ಚಲ್ಲೆ. ಹಜಾರಬಽರಿ ಭಕ್ತಾದಿಮಾನಿ ಲೋಕಾನಿ ವಾಂಟೊ ಘೇವ್ನು ಶ್ರೀ ದೇವಾಲೆ ಆನಿ ಗುರೂಂಗೆಲೆ ಕೃಪಕಟಾಕ್ಷಾಕ ಪಾತ್ರ ಜಾಲ್ಲೆ.
ರಾತ್ರಿ ೯:೦೦ಕ ನಾಮಾಧಿಕ ಭಜನಾ ಕಲಾವಿದೆ ಜಾಲೀಲೆ ವಿದುಷಿ ಮಹಾಲಕ್ಷ್ಮಿ ಶೆಣೈ ಕಾರ್ಕಳ ತಾನ್ನಿ “ಸುಧಾಮೃತ”, ಭಜನಾ ಸೇವಾ ಚಲಾಯಿಸೂನು ದಿಲ್ಲಿ. ಸಮಾರಂಭಾಂತು ದೇವಳಾಚೆ ಆಡಳಿತ ಮಂಡಳಿ ಸದಸ್ಯ, ಜಿ ಎಸ್ ಬಿ ಯುವಕ ಮಂಡಳಿ ತಶೀಚಿ ಜಿ ಎಸ್ ಬಿ ಮಹಿಳಾ ಮಂಡಳಿ ಸದಸ್ಯ, ಗಾಂವ್ಚೆ- ಪರಗಾಂವ್ಚೆ ಭಜನಾ ಮಂಡಳಿ ಸದಸ್ಯ, ಶಂಬರಬಽರಿ ಸಮಾಜ ಬಾಂಧವ ಮಹೋತ್ಸವಾಂತು ವಾಂಟೊ ಘೆವನು ಹರಿಗುದು ಕೃಪೆಕ ಪಾತ್ರ ಜಾಲ್ಲೆ.