ಅಂತರ್‌ಜಲ ಸಂರಕ್ಷಣೆ ಖಾತೇರಿ ಪಾವಸಾ ಉದ್ದಾಕ ನೀಪಯಚೆ ಜಾಂವೊ ಆಟಯಚೆ ಸುಲಭ ತಂತ್ರಜ್ಞಾನ ಅಭಿವೃದ್ಧಿ ಕೆಲೀಲೆ ಶ್ರೀ ಗಣೇಶ ಶಾನಭಾಗ ಹಾಂಕಾ ಅಂತಾರಾಷ್ಟ್ರೀಯ ಸಂಸ್ಥೊ ಜಾಲೀಲೆ ಕ್ವೆಸ್ಟ್ ಗ್ಲೋಬಲ್‌ಚೆ ಪ್ರಭು ಫ್ಯಾಮಿಲಿ ಚಾರಿಟೇಬಲ್ ಟ್ರಸ್ಟ್ ತರಪೇನಿ ಬೆಂಗಳೂರ್‍ಚೆ ವೈಟ್‌ಫಿಲ್ಡಾಂತು ಆಸ್ಸುಚೆ ತಾಂಗೆಲೆ ಧಪ್ತಾರಾಂತು ಸನ್ಮಾನ ಸ್ವೀಕರಚಾಕ ಆಪಯಲಾ ಮ್ಹಣಚೆ ಮಾಹಿತಿ ಮೆಳ್ಳಾ. ಹುಬ್ಬಳ್ಳಿಚೆ ಶ್ರೀ ಯು. ಉದಯ ಶಾನಭಾಗ ಆನಿ ಶ್ರೀಮತಿ ಸಂಧ್ಯಾ ಶಾನಭಾಗ ಹಾಂಗೆಲೊಂ ಮ್ಹಾಲ್ಗಡೊಂ ಪೂತು ಶ್ರೀ ಗಣೇಶ ಶಾನಭಾಗ. ಹುಬ್ಬಳ್ಳಿಂತು ಬಿ‌ಇಂತು ಕಂಪ್ಯೂಟರ್ ಸೈನ್ಸ್ ಶಿಕ್ಕೂನು, ಮಣಿಪಾಲಾಂತು ಬಿಟೆಕ್ ಶಿಕ್ಕೂನು ಬೆಂಗಳೂರಾಂತು ಇಂಜಿನಿಯರ್ ಜಾವ್ನು ಸೇವಾ ಪಾವಯತಾ ಆಸ್ಸಾತಿ. ಸಾನ್ಪಣಾ ತಾಕೂನು ಅವಯಿ-ಬಾಪಯಿ ವರಿ ಹಾನ್ನಿ ಮಸ್ತ ಪರೋಪಕಾರಿ ಜೀವಿ. ಇಸ್ವಿ ೨೦೧೮ ಉಪರಾಂತ ಗಣೇಶ ಶಾನಭಾಗ ತಾನ್ನಿ ಪ್ರಕೃತಿ ರಾಕವಣಾಚೆ ಕಾಳಜಿ ಘೇವ್ನು ಮುಖಾರಿ ಉದಾಕಾ ಖಾತ್ತಿರಿ ಮಸ್ತ ಸಮಸ್ಯೆ ಯವಚೆ ಖಂಡಿತ ಮ್ಹೊಣು ಖಾತ್ರಿ ಕೊರನು ಘೇವ್ನು ಅಂತರಜಲ ರಾಕವಣಾಚೆ ಸುಲಭ ವಾಟ ಜಾಲೀಲೆ `ಪಾವ್ಸ ಉದಾಕ ಧೊರನು ನೆಲಾ ಭಿತ್ತರಿ ಆಟಯಚೆ ವಿಧಾನಾ ಖಾತ್ತಿರಿ ಮಸ್ತ ಶೋಧ ಕೆಲೀಲೆ. ಸಬಾರ ಕಡೇನ ತ್ಯಾ ಕಾಯಸಾಧು ಕೊರನು ಯಶ ವರೇನ ಪಾವ್ಲಿಂತಿ. ಹಾಂಗೆಲೆ ಸಾಧನಾ ಸಬಾರ ಕಡೇನ ದಾಖಲ ವರೇನ ಜಾಲ್ಲ್ಯಾ. ಘೆಲೀಲೆ ೨೫ ವರ್ಷಾಪಶಿ ಚ್ಹಡ ಕಾಲಾಚಾನ ೨೦ ದೇಶಾಚೆ ೮೫ ಪಶಿ ಚ್ಹಡ ಕೇಂದ್ರಾ ಮುಖಾಂತರ ಇಂಜಿನಿಯರ್ ಸೇವಾ ದಿತ್ತಾ ಆಸ್ಸುಚೆ ಕ್ವೆಸ್ಟ್ ಗ್ಲೋಬಲ್, ನಾವೀನ್ಯತಾ ಆನಿ ತಂತ್ರಜ್ಞಾನ ಆಧಾರಿತ ಕಂಪನಿ ಜಾಲೀಲೆ ಕ್ವೆಸ್ಟ್ ಗ್ಲೋಬಲ್ (www.quest-global.com) ಹಾಜ್ಜೆ ಅಧ್ಯಕ್ಷ ಆನಿ ಪ್ರಭು ಕುಟುಂಬಾಚೆ ಸದಸ್ಯ ಜಾವ್ನಾಸ್ಸುಚೆ ಡಾ. ಅಜಯ್ ಎ. ಪ್ರಭು ತಾನ್ನಿ ಶ್ರೀ ಗಣೇಶ ಶಾನಭಾಗ ಹಾನ್ನಿ ರಾಷ್ಟ್ರಾಕ ದಿಲೀಲೆ ದೇಣಿಗಾ ಸ್ವತಃ ಮನಾಕ ವ್ಹರನು ಅಸ್ಸಾಲೆ ಪ್ರಭಾವಶಾಲಿ ಕಾರ್ಯಾಕ ಕೆದನಾಂಯಿ ಮಾನ ದಿವಚೆ ಕ್ವೆಸ್ಟ್ ಗ್ಲೋಬಲ್ ತರಪೇನಿ ಮಾರ್ಚ್ 26ಕ ತಾಂಗೆಲೆ ಬೆಂಗಳೂರು ಪ್ರಭು ಫ್ಯಾಮಿಲಿ ಚಾರಿಟೇಬಲ್ ಟ್ರಸ್ಟ್ ಧಪ್ತಾರಾಂತು ಚೊಲಚೆ ಪ್ರಭು ಫ್ಯಾಮಿಲಿ ಚಾರಿಟೇಬಲ್ ಟ್ರಸ್ಟ್ ಹಾಜ್ಜೆ ಸಮಾರಂಭಾಂತು ಸನ್ಮಾನಾಕ ಆಪಯಲಾ. ಶ್ರೀ ಗಣೇಶ ಶಾನಭಾಗ ಹಾಂಕಾ ಅಭಿನಂದನ ಪಾವಯತಾ ದೇವು ಬರೆಂ ಕೊರೊ ಮ್ಹಣ್ತಾ. ತಶೀಚಿ ಶ್ರೀ ಗಣೇಶ ಶಾನಭಾಗ ಹಾಂಗೆಲೆ ಸಾಧನಾ ಸಕಾಲಿಕ ಜಾವನು ಪರಿಗಣನ ಕೆಲೀಲೆ ಕ್ವೆಸ್ಟ್ ಗ್ಲೋಬಲ್ ಆನಿ ಪ್ರಭು ಫ್ಯಾಮಿಲಿ ಚಾರಿಟೇಬಲ್ ಟ್ರಸ್ಟ್ ಹಾಂಕಾ ವರೇನ ಅಭಿನಂದನ ಕರತಾ.
ಕ್ವೆಸ್ಟ್ ಗ್ಲೋಬಲ್ ಹಾಜ್ಜೆ ಪ್ರಭು ಫ್ಯಾಮಿಲಿ ಚಾರಿಟೇಬಲ್ ಟ್ರಸ್ಟ್ ತರಪೇನಿ ಗೌಡ ಸಾರಸ್ವತ ಸಮಾಜಾಚೆ ಸಬಾರ ಪ್ರತಿಭಾವಂತ ಚರಡುವಾಂಕ ತಾಂಗೆಲೆ ಉನ್ನತ ವಿದ್ಯಾಭ್ಯಾಸಾಕ ವಿದ್ಯಾರ್ಥಿ ವೇತನ ನಮೂನ್ಯಾನಿ ಮದತ್ ದಿತ್ತಾ ಆಸ್ಸುಚೆ ಆಮ್ಮಿ ಹಾಂಗಾ ಉಡಗೋಸು ಕೊರನು ಘೆವಯೇತ.