ಬೆಂಗಳೂರ್‍ಚೆ ಅನಂತನಗರಾಚೆ ಶ್ರೀ ವೆಂಕಟರಮಣಾಲೆ ದೇವಾಲೆ ಸನ್ನಿಧಿರಿ ಶ್ರೀ ಸಂಸ್ಥಾನ ಕಾಶೀಮಠಾಧೀಶ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯ ವಸಂತೋತ್ಸವು ಹೇಂಚಿ ಮಾರ್ಚ್-ಎಪ್ರಿಲಾಂತು ಭವ್ಯ ಜಾವ್ನು ಘಡಲೀಲೆ ಸಕಡ್ಯಾಂಕ ಗೊತ್ತಾಸ್ಸ. ಹೇ ವೇಳ್ಯಾರಿ ದೇಶಾದ್ಯಂತಾಚೆ ಮಾತ್ರ ನ್ಹಂಹಿ ವಿದೇಶಾಚೆ ಶ್ರೀ ಮಠಾಚೆ ಅನುಯಾಯಿ ಲೋಕ ವರೇಕ ಶ್ರೀ ಅನಂತನಗರಾಕ ಯವ್ನು ಪೂಜ್ಯ ಸ್ವಾಮ್ಯಾಂಗೆಲೆ ಆಶೀರ್ವಾದು ಘೆವ್ಚೆ ಬರಶಿ ಕಲಿಯುಗಾಚೊ ಕಲ್ಪವೃಕ್ಷ ಕೃಪಾನಿಶಿ, ಭಕ್ತೀನ ಮಾಗ್ಗಿಲ್ಯಾಲೆ ಇಚ್ಛಾ ಪೂರ್ತಿ ಕೊರಚೊ ಶ್ರೀ ವೆಂಕಟರಮಣ ದೇವಾಲೆ ದಿವ್ಯ ಕೃಪಾಕಪಾತ್ರ ಜಾವ್ನು ಪುನೀತ ಜಾಲ್ಲೆ. ತತ್ಸಂಬಂಧ ಹೇ ಸಮಾರಂಭಾಚೆ ಭವ್ಯತೆಕ ದಿವ್ಯ ಉಡ್ಗಿರೆ ಮ್ಹಣ್ಚೆ ವರಿ ಅತ್ಯಾಧುನಿಕ, ೧೫,೦೦೦+ ಚದರಡಿ ವಿಸ್ತೀರ್ಣಾಚೆ ರಾಜಾಂಗಣ (ಸಾಂಸ್ಕೃತಿಕ ಸಭಾಂಗಣ) ಬಾಂದೂನು ದೇವಳಾಚೆ ಆಡಳಿತ ಮಂಡಳಿ ಕೃತಾರ್ಥ ಜಾಲೀಲೆ. ೨೦೨೬ ಚೆ ವಸಂತೋತ್ಸವಾಚೆ ವೇಳ್ಯಾರಿ ಅತ್ಯಾಧುನಿಕ ಸೌಲಭ್ಯ ಆನಿ ಹರಿ-ಗುರೂಂಗೆಲೆ ದೈವಿಕ ಆಶೀರ್ವಾದ ಬರಶಿ ತಯಾರ ಜಾಲೀಲೆ ಹೇ ವಿಶಾಲ ರಾಜಾಂಗಣ ನಂತವೈಲೆ ದಿವಸಾಂತು ಸಮಾಜಾಚೆ ಮುಖೇಲ ಆಧ್ಯಾತ್ಮಿಕ ಆನಿ ಸಾಂಸ್ಕೃತಿಕ ಸಮಾರಂಭಾಚೆ ಕೇಂದ್ರಬಿಂದು ಜಾವ್ಕಾ ಮ್ಹಣ್ಚೆ ಉದ್ದೇಶು ಆಡಳಿತ ಮಂಡಳಿನಿ ಪಯಲೇಚಿ ದವರೂನು ಘೆತ್ತಿಲೆ.
ಆತ್ತ ೧೫,೦೦೦+ ಚದರಡಿ ವಿಸ್ತೀರ್ಣಾಚೆ ರಾಜಾಂಗಣ (ಸಾಂಸ್ಕೃತಿಕ ಸಭಾಂಗಣ) ಬಾಂದಕಾಮ ಪೂರ್ತಿ ಜಾವ್ನು ಹಾಂಗಾ ಪಾರಾಯಣ, ಹೋಂಟಿ ಸೇವಾ ಆನಿ ಚಂಡಿಕಾ ಹವನ ವರೇನ ಘಡ್ನು ಅವಂದೂಚೆ ನವರಾತ್ರಿ ತಾಕ್ಕ ಸಕಟಾಂಕ ಮೂರ್ತ ಸ್ವರೂಪ ದಿವಚಾಕ ಉದ್ದಯಿಲೆ ಪರ್ವಕಾಲ ಜಾಲ್ಲೆ.
ದಿನಾಂಕ. ೧೧-೧೦-೨೦೨೬ ತಾಕೂನು ೨೧-೧೦-೨೦೨೬ ಪರಿಯಂತ ಅಖಂಡ ಇಕ್ರ ದಿವಸು ಕಾಳ “ಅನಂತ ನಗರ ದಸರಾ ೨೦೨೬ ಮುಖಾಂತರ ವೆಗವೆಗಳೆ ಮನರಂಜನೇಚೆ ರಸದೌತಣ ಹೇ ರಾಜಾಂಗಣಾಂತೂ ಸಂಪನ್ನ ಜಾಲ್ಲೆ. ಹೇ ವೇಳ್ಯಾರಿ ವೆಗವೆಗಳೆ ಸಾಂಸ್ಕೃತಿ ಕಾರ್ಯಾವಳಿಂತು ಭಜನ, ಭಜನಾ ಸಂಧ್ಯಾ, ವೆಗವೆಗಳೆ ನೃತ್ಯ, ಧಾರ್ಮಿಕ ಕಾರ್ಯಕ್ರಮ ಆಯೋಜಿತ ಕೆಲೀಲೆ.
ಅ.೧೧ಕ ಸಾಂಜವಾಳಾ ಸಾಂಸ್ಕೃತಿಕ ಕಾರ್ಯಾವಳಿ ಆನಿ ಅನಂತನಗರ ದಸರಾಚೆ ಉದ್ಘಾಟನಾ ಸಮಾರಂಭ ಚಲ್ಲೆ. ಸಕ್ಕಾಣಿ ವಾಘಾವೇಸಾಚೆ ನಾಚ ಸಾಂಜವಾಳಾ ಡ್ಯಾನ್ಸ್ ಶಿಕ್ಕಾತಿ ಆನಿ ಕರಾತಿ ಮ್ಹಣ್ಚೆ ಕಾರ್ಯಕ್ರಮ ಚರಡುವಾಂಕ ಆನಿ ಯುವಕಾರಾ ಖಾತ್ತಿರಿ ಆಯೋಜನ ಕೆಲೀಲೆ.
ಅ.೧೨ಕ ಸಾಂಜವಾಳಾ ಕರ್ನಾಟಕ ಭಜನಾ ಕಾರ್ಯಕ್ರಮು ಚಲ್ಲೆ. ಅ.೧೩ಕ ಮಹಾಲಕ್ಷ್ಮಿ ಭಜನಾ ಮಂಡಳಿ ಹಾನ್ನಿ ಭಜನಾ ತ್ರಿವೇಣಿ ಚಲಯಾರಿ ಅ.೧೪ಕ ಅನಂತ ನಾದ ಸಂಗೀತಾಲಯ ತಾಕೂನು ಭಜನಾ ಆನಿ ಅನಂತನಗರ ಮಹಿಳಾ ವೃಂದ ತಾಕೂನು ಶ್ಲೋಕ ಸಂಕೀರ್ತನಾ ಚಲ್ಲೆ.
ಅ.೧೫ಕ ರೇಖಾ ಕಿರಣ್ ನಾಯಕ್ ಆನಿ ತಂಡಾಚಾನಿ ಭಜನ್ ಸಂಧ್ಯಾ ಚಲೋನು ದಿಲಯಾರಿ, ಅ.೧೬ಕ ಅನಂತನಗರಾಚೆ ಶ್ರೀ ಭೂ ವೈಕುಂಠ ಭಜನಾ ಮಂಡಳಿ ತರಪೇನಿ ನವವಿಧಾ ಭಕ್ತಿ ಕಾರ್ಯಕ್ರಮು ಸಂಪನ್ನ ಜಾಲ್ಲೆ. ಅ.೧೭ಕ ಸಕಾಣ್ಚಾನಿ ಸಂಸ್ಕೃತಿ ಅನಾವರಣಾಚೆ ಕಲರವ ರಾಜಾಂಗಣಾಂತು ಆರಂಭ ಜಾಲೀಲೆ. ರಂಗೋಲಿ ಸ್ಪರ್ಧಾ, ಲಲಿತಕಲಾ ಆನಿ ಕರಕುಶಲ ಕಲಾ ಸ್ಪರ್ಧಾ ಚಲ್ಲೆ. ಉಮೇದ್ವಾರಿ ಲೋಕಾನಿ ತಾಂಗತಾಂಗೆಲೆ ಘರ್‍ಕಡೆಚಾನ ಕರಕುಶಲ ಪದಾರ್ಥ ಹಾಡ್ನು, ಸಾಂಪ್ರದಾಯಿಕ ಪ್ರತಿಭೆ ಬರಶಿ ಪ್ರದರ್ಶನ ಕೊರನು ಸಕಟಾ ತಾಕೂನು ಸೈ ಮ್ಹಣೋಸೂವ್ನು ಘೆತ್ಲೆ. ಮಾಗಿರಿ ಭಕ್ತಿ ತರಂಗಾಚೆ ಚರಡುಂವ ತಾಕೂನು ಭಜನಾ ಕಾರ್ಯಕ್ರಮು ಚಲ್ಲೆ.
ಅ.೧೮ಕ ಸಕ್ಕಾಣಿ ಚಿತ್ರಕಲಾ ಸ್ಪರ್ಧಾ ಮಾಗಿರಿ ಅನಂತನಗರ ನಿವಾಸಿ ಲೋಕಾನಿ ಅತ್ಯಾಕರ್ಷಕ ದಸರಾ ಗೊಂಬೆ ಪ್ರದರ್ಶನ ಚಲೋನು ದಿಲ್ಲೆ. ಉಪರಾಂತ ಅನಂತನಗರ ನಿವಾಸಿ ತಾಕೂನು ಯಕ್ಷಗಾನ ಪ್ರದರ್ಶನ ಚಲ್ಲೆ. ಅ.೧೯ಕ ಆತ್ಮಿ ಪೈ ಹಾನ್ನಿ ಭರತನಾಟ್ಯ ಪ್ರದರ್ಶನ ಅತ್ಯದ್ಭುತ ಜಾವ್ನು ಸಾದರ ಕೆಲ್ಲೆ. ಉಪರಾಂತ ಅನಂತನಗರಾಚೆ ಚರಡುಂವಾನಿ ತಬಲಾ ಪ್ರದರ್ಶನ ದಾಖಯಲೆ. ಮಾಗಿರಿ ಅನಂತನಗರಾಚೆ ನಿವಾಸಿ ಲೋಕಾನಿ ಆಮ್ಗೆಲೆ ಗಾವಾಂತು ಕಸ ನಾ? ಕೊಂಕಣಿ ಕಾಮಿಡಿ ಸ್ಕಿಟ್ ಪ್ರದರ್ಶಿತ ಕೆಲ್ಲೆ.
ಅ.೨೦ ಸಕ್ಕಾಣಿಪೂಡೆ ಫೂಲ ಬಾಂಚೆ ಸ್ಪರ್ಧಾ ಚಲ್ಲೆ. ಸಾಂಜವಾಳಾ ಸುರವೇಕ ಸಮಾಜಾಚೆ ಮ್ಹಾಲ್ಗಡ್ಯಾಂಕ ಆನಿ ಪ್ರತಿಭಾವಂತ ಚರಡುವಾಂಕ ಸನ್ಮಾನ ಸಮಾರಂಭ ಚಲ್ಲೆ. ಮಾಗಿರಿ ಸ್ವರಾ ನಾಯಕ್ ತಾಕೂನು ಭಕ್ತಿ ರಾಸ್ ಭಜನ್ ತಾಜ್ಜ ಉಪರಾಂತ ಭಗವದ್ಗೀತಾ ಶ್ಲೋಕ ಪಠಣ ಸ್ಪರ್ಧಾ ಸಂಪನ್ನ ಜಾಲ್ಲೆ.
ಅಖೇರಿಚೆ ದಿವಸು ಅ.೨೧ : ತ್ಯಾ ದಿವಸು ವಿಶೇಷ ಚಂಡಿಕಾ ಹವನ ಕಾರ್ಯಕ್ರಮ ಅಪಾರ ಸಮಾಜ ಬಾಂದವಾಲೊ ಉಪಸ್ಥಿತಿರಿ ಭಕ್ತಿ, ಶೃದ್ಧೇರಿ ಚಲ್ಲೆ. ಹೇಂಚಿ ವೇಳ್ಯಾರಿ ಅವಂದೂಚೆ ಅನಂತನಗರಾಚೆ ದಸರಾಂತು ವಾಂಟೊ ಘೆತ್ತಿಲೆ ಸಗಟ್ಯಾಂಕ ಗುರ್‍ತು ಕೊರನು ದಿವಚೆ ವೈಶಿಷ್ಟ್ಯಪೂರ್ಣ ಕಾರ್ಯಕ್ರಮು ಚಲ್ಲೊ. ಸಾಂಜವಾಳಾ ಛದ್ಮ ವೇಷ ಸ್ಪರ್ಧಾ (ಚಂದ ಚಂದ ನೆಸ್ಸಣಿಚೆ ಸ್ಪರ್ಧಾ) ಮಾಗಿರಿ ಅನಂತನಗರಾಚೆ ನಿವಾಸಿ ತಾಕೂನು ಕೋಲಾಟ ನೃತ್ಯ ಚಲ್ಲೆ. ತಾಜ್ಜ ಉಪರಾಂತ ಸಾಂಸ್ಕೃತಿಕ ಉತ್ಸವಾಂಚೆ ಆನಿ ಅನಂತನಗರ ದಸರಾ – ೨೦೨೬ಚೆ ಭವ್ಯ ಸಮಾರೋಪ ಸಮಾರಂಭ ಚಲ್ಲೆ.
ಹೇ ವೇಳ್ಯಾರಿ ಪ್ರತಿ ದಿವಸು ಶ್ರೀ ವೆಂಕಟರಮಣ ದೇವಾಲೆ ಸನ್ನಿಧಿರಿ ದೇವಾಕ ಅಭಿಷೇಕ, ವಿಶೇಷ ಶೃಂಗಾರ, ವಿಶೇಷ ಪೂಜಾ, ಪಾರಾಯಣ ಆನಿ ಆಯ್ಯಿಲೆ ಸಕಟ್ಯಾಂಕ ಅನ್ನದಾನ ವರೇನ ಚಲ್ಲೆ.. ಹೇ ಸಂದರ್ಭ ಚಲೀಲೆ ಚಂಡಿಕಾ ಹವನಾಚೆ ಪ್ರಬಲ ಕಂಪನ ಆನಿ ಸಮಾಜಾಚೆ ಸಾಮೂಹಿಕ ಪ್ರಾರ್ಥನಾ ಸಗಳೇ ಅನಂತನಗರ ಪರಿಸರಾಂತು ಅಪಾರ ಆಧ್ಯಾತ್ಮಿಕ, ದೈವಿಕ ಶಕ್ತಿನಿ ಭರಲೀಲೆ ಆಸ್ಸುನು, ಅಬಾಲವೃದ್ಧಾದಿ ಸರ್ವಾಂಕ ಅಪಾರ ಆನಂದ, ಉಮೇದ, ಸಕಾರಾತ್ಮಕ ಶಕ್ತಿನ ಪರಿಪೂರ್ಣ ಕೆಲ್ಲಿ.
ಹೇ ಸರ್ವ ಕಾರ್ಯಕ್ರಮಾಂತು ಅಧ್ಯಕ್ಷ ಶ್ರೀ ವೆಂಕಟೇಶ ಪ್ರಭು, ಶ್ರೀ ಅರ್ಲಾ ಪ್ರಕಾಶ ಪ್ರಭು ಸಹಿತ ಇತರ ಸಬಾರ ಗಣ್ಯ ಲೋಕ ಉಪಸ್ಥಿತ ವ್ಹರಲೀಲೆ.