ಆಮ್ಚಗೆಲೆ ಅಸ್ಮಿತಾ ಕೊಂಕಣಿ. ಆಪ್ಪಣ ಕೊಂಕಣಿಗ ಮ್ಹೊಣು ಅಭಿಮಾನ ಪೊಡಚೇಚಿ ಭಾಸ ವ್ಹರೋಚೆ ಪಯಲೇಚೆ ಹೆಜ್ಜೊ. ಆಯಚೆ ಝೆನ್ ಜೀ ಪೀಳ್ಗಿಚಿ ಜಾಲೀಲೆ ತುಮ್ಮಿ ಖಂಚೇಯಿ ಸಮಾಜಾಚಿ ಜಾಲಯಾರೀಚಿ, ಧರ್ಮಾಚಿ ಜಾಲಯಾರಿಚಿ ಸಕಟ್ಯಾಂಕ ಜೋದಪಾಚೆ ಸೇತು ಕೊಂಕಣಿ ಮ್ಹೊಣು ಕೋಳ್ನು, ವಾಡಯಲೇರಿ ಕೊಂಕಣಿ ಭಾಸ, ಕಲಾ ಸಂಸ್ಕೃತಿ, ಪರಂಪರೊ ಮುಖಾವಯಲೆ ಪೀಳ್ಗಿಚಾಂಕ ವ್ಹರಯಚೆ ಪ್ರತಿಜ್ಞಾ ಘೆತಲೇರಿ ಆನಿ ತಾಕ್ಕ ಜಾವ್ನು ವಾವರೋ ಘಾಲಯಾರಿ ಆಮ್ಗೆಲೆ ಭಾಸ ಖಂಡಿತ ವ್ಹರತಾ, ವಾಡತಾ ಮ್ಹೊಣು ವಿಶ್ವವಿದ್ಯಾನಿಲಯ ಕಾಲೇಜು ಹಂಪನಕಟ್ಟೆ ಹಾಂಗಾಚೆ ಪ್ರಾಂಶುಪಾಲ ಡಾ ಜಯವಂತ ನಾಯಕ್ ತಾನ್ನಿ ೨೦.೦೮.೨೦೨೬ ದಿವಸು ಶಕ್ತಿನಗರಾಚೆ ಕಲಾಂಗಣಾಂತು ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನಿ ಮಾಂಡ್ ಸೊಭಾಣ್ ಮೆಳಾವಟ್ಟಾರಿ ಚಲಯಿಲೆ ೩೫ ವ್ಯಾ ಕೊಂಕಣಿ ಮಾನ್ಯತಾ ದಿನಾಚರಣೆಚೆ ಸಮಾರೋಪ ಸಮಾರಂಭಾಂತು ಜಿಕ್ಕಿಲ್ಯಾಂಕ ಇನಾಮು ವಾಂಟೂನು ಉಲಯತಾಲೆ.
ಮಾನಾಚೆ ಸೊಯರೆಂ ಮಾಂಡ್ ಸೊಭಾಣ್ ಅಧ್ಯಕ್ಷ ಲುವಿ ಪಿಂಟೊ ಸ್ಪರ್ಧೆಚೆ ತೀರ್ಪುದಾರಾಂಕ ಗೌರವ ಕೊರನು ಉಲಯತಾಲೆ. ನಗರೀಕರಣಾಚೆ ಭರಾಟೆಂತು ಆಮ್ಗೆಲೆ ಮ್ಹಾಲ್ಗಡೆ ಆನಿ ಆಮ್ಮಿ ಕೊಂಕಣಿ ಭಾಷೆಕ ಆಮ್ಗೆಲೆ ಚರಡುವಾಂಕ ಪಾವಯಚಾಂತು ಹಾರೂನು ಘೆಲ್ಲೆ, ಜಾಲಯಾರಿ ಆಲತಾಚೆ ವರಸಾಂತು ಕೊಂಕಣಿ ಭಾಷೆ ಖಾತ್ತಿರಿ ಉಮೇದ ಎತ್ತಾ ಆಸ್ಸಾ. ಮ್ಹೊಣು ತಾನ್ನಿ ಹರ್ಷ ವ್ಯಕ್ತ ಕೆಲ್ಲಿ.
ಪ್ರಾಸ್ತಾವಿಕ ಉತ್ರ ಉಲೋನು ಸಕಡ್ಯಾಂಕ ಯೆವಕಾರ ಕೆಲೀಲೆ ಅಕಾಡೆಮಿ ಅಧ್ಯಕ್ಷ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ತಾನ್ನಿ ಇಸ್ಕೂಲಾಂತು ಓಣಂ, ಕ್ರಿಸ್ಮಸ್, ದೀಪಾವಳಿ ಆದಿ ಪರಬ ಆಚರಣ ಕೊರಚೆ ವರಿ ಕೊಂಕಣಿ ಮಾನ್ಯತಾ ದಿನಾಚರಣ ವರೇನ ಆಚರಣ ಕೊರಕಾ ಮ್ಹಳ್ಳೆ.
ಪ್ರೌಢಶಾಲಾ ವಿಭಾಗಾಂತು ಏಳು ಆನಿ ಪಿಯು-ಡಿಗ್ರಿ ವಿಭಾಗಾಂತು ಧಾ ತಂಡಾ ಮಧೇ ಚಲೀಲೆ ವಿವಿಧ ವಿನೋದಾವಳಿ ಸ್ಪರ್ಧೆಂತು ಜಾಲೀಲ್ಯಾಂಕ ಬಹುಮಾನ ವಾಂಟಪ ಚಲ್ಲೆ. .
ಮಾಂಡ್ ಸೊಭಾಣ್ ಪಿಆರ್ಒ ವಿಕ್ಟರ್ ಮತಾಯಸ್ ತಾನ್ನಿ ಕಾರ್ಯಕ್ರಮ ನಿರೂಪಣ ಕೆಲ್ಲಿ. ಅಕಾಡೆಮಿ ಸದಸ್ಯ ಜಾಲೀಲೆ ನವೀನ್ ಲೋಬೊ, ರೊನಾಲ್ಡ್ ಕ್ರಾಸ್ತಾ, ಅಕ್ಷತಾ ನಾಯಕ್, ಸಮರ್ಥ್ ಭಟ್, ಜೇಮ್ಸ್ ಲೋಪಿಸ್ ಉಪಸ್ಥಿತ ವ್ಹರಲೀಲೆ.