ಸುಮಾರ ೩೩ ಮ್ಹಹಿನ್ಯಾಕ ಏಕಟಿ ಯವ್ಚೆ ಪುರುಷೋತ್ತಮ ಮ್ಹಹಿನ್ಯಾಂತು ಕೊರಚೆ ಧಾರ್ಮಿಕನಿ ದಾನ ಕಾರ್ಯಾಂಕ
ಅಧಿಕಸ್ತ ಅಧಿಕ ಫಲ ಮೆಳ್ತಾ ಮ್ಹೊಣು ಶಾಸ್ತ್ರ, ಪುರಾಣಾಂತು ಉಲ್ಲೇಖ ಆಸ್ಸಾ. ಹೇ ಪರಾಭವ ಸಂವತ್ಸರಾಚೆ ಜ್ಯೇಷ್ಠ ಮ್ಹಹಿನ್ಯಾಂತು
ಪುರುಷೋತ್ತಮ(ಅಧಿಕ) ಮಾಸ ಆಯ್ಯಿಲೆ ಆಸ್ಸುನು ಖಂಚೇಯಿ ಕಾಮ್ಯಕರ್ಮ(ಲಗ್ನ, ಮೂಂಜಿ, ಘಽರಾ ಒಕ್ಕಲ ಇತ್ಯಾದಿ) ಚೇಲ್ನಾತ್ತಿಲೆ ಹೇ ಮ್ಹಹಿನ್ಯಾಂತು ಅಧಿಕಾಧಿಕ ದೇವಳಾಂತು ಧಾರ್ಮಿಕ ಆನಿ ಧರ್ಮ ಜಾಗೃತಿಚೆ ಕಾರ್ಯ ಚಲ್ತಾ. ತಶೀಚಿ ಕುಂದಾಪುರ ತಾ||ಚೆ ಗಂಗೊಳ್ಳಿ ಮಲ್ಯರ ಮಠ ಶ್ರೀ ವೆಂಕಟರಮಣ ದೇವಳಾಂತು ಮೇ ಆನಿ ಜೂನಾಂತು ಮ್ಹಹಿನ್ಯಾಂತು ಯವ್ಚೆ ಅಧಿಕ ಜ್ಯೇಷ್ಠ ಮಾಸಾಂತು ದಿನಾಂಕ. ೧೭-೦೫-೨೦೨೬ ತಾಕೂನು ೧೬-೦೬-೨೦೨೬ ಪರಿಯಂತ ಮಾಸಾವಧಿ ಅಖಂಡ ಭಜನಾ ಸೇವಾ ಆಯೋಜನ ಕೆಲ್ಲ್ಯಾ. ತತ್ಸಂಬಂಧ ಪೂಜ್ಯ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮೆಂ ಮೇ.೧೪ ತಾಕೂನು ಮೇ.೧೮ ಪರಿಯಂತ ಹಾಂಗಾ ವಾಸ್ತವ್ಯ ವ್ಹರತಾತಿ.
ಮೇ೧೪ಕ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯಾಗಮನ ಜಾಲೀಲೆ ತೆದ್ನಾ ದೇವಭೇಟಿ, ಶ್ರೀ ಗುರುಪಾದ್ಯಪೂಜಾ, ಯೇವ್ಕಾರ ಆನಿ ಶ್ರೀ ಗುರು ಆಶೀರ್ವಾದ ಕಾರ್ಯಕ್ರಮ ಚಲ್ತಾ. ಮೇ.೧೫ಕ ಸಕ್ಕಾಣಿಪೂಡೆ ನಿರ್ಮಾಲ್ಯ ವಿಸರ್ಜನ, ಶ್ರೀ ದೇವಾಕ ಗಂಧ ಲೇಪನ ಮಹಾಪೂಜಾ, ಮಹಾಸಮಾರಾಧನ, ಮೇ. ೧೬ಕ ಶ್ರೀ ವೆಂಕಟೇಶ ಮೂಲಮಂತ್ರ ಹವನ, ಉಭಯ ದೇವಾಂಕ ಮಹಾಪೂಜಾ, ಹವನ ಪೂರ್ಣಾಹುತಿ, ಮಹಾ ಸಮಾರಾಧನ ಚಲ್ತಾ. ಮೇ. ೧೭ಕ ಸಕ್ಕಾಣಿ ೮ ಘಂಟ್ಯಾಕ ಮಾಸಾವಧಿ ಅಖಂಡ ಭಜನಾ ಮಹೋತ್ಸವಾ ಖಾತ್ತಿರಿ ಪೂಜ್ಯ ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂಗೆಲೆ ಸಾನಿಧ್ಯಾಂತು ಉಭಯ ದೇವಾಲೆಂ ಶ್ರೀ ಫಳ ದವರೂನು ಮಹಾ ಪ್ರಾರ್ಥನಾ, ಪೂಜ್ಯ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ದೀಪ ಪ್ರಜ್ವಲನ, ಪುರುಷೋತ್ತಮ ಅಷ್ಟೋತ್ತರ ತಾಕೂನು ಶ್ರೀ ದೇವಾಕ ೧೦೮ ಪ್ರದಕ್ಷಿಣ, ಅಪೂಪ ದೀಪದಾನ, ಸಾಂಜವಾಳಾ ದೀಪಾರಾಧನ ಆದಿ ಕಾರ್ಯಕ್ರಮ ಚಲ್ತಾ. ಪ್ರತಿ ದಿವಸು ರಾತ್ತಿಕ ರಾತ್ರಿ ಪೂಜಾ ಚಲ್ತಾ.
ಮೇ ೧೮ಕ ಪೂಜ್ಯ ತಾಂಗೆಲೆ ಮುಖಾವಯ್ಲೆ ವಾಸ್ತವ್ಯ ಖಾತ್ತಿರಿ ಗಂಗೊಳ್ಳಿಚಾನ ನಿರ್ಗಮನ ಕರತಾತಿ. ಜೂನ ೧೫ಕ ಸಾಂಜವಾಳಾ ೫ ಘಂಟ್ಯಾಕ ನಗರ ಭಜನಾ, ರಾತ್ತಿಕ ದೇವಾಕ ವಿಶೇಷ ರಾತ್ರಿ ಪೂಜಾ ಚಲಯಾರಿ ಜೂನ ೧೬ಕ ಪ್ರಾತಃ ದೀಪ ವಿಸರ್ಜನ, ಮಹಾಪೂಜಾ, ಮಹಾಸಮಾರಾಧನ ಚಲ್ತಾ. ಹೇ ವೇಳ್ಯಾರಿ ವೆಗವೆಗಳೆ ಸೇವಾ ಪಾವಯಚಾಕ ಅವಕಾಶ ಆಸ್ಸುನು ಸೇವಾ ಮಾಹಿತಿ ಖಾತ್ತಿರಿ ಶ್ರೀ ನಾಗಾಪ್ರಸಾದ ಪೈ ಮೊ. ೮೭೯೨೬೬೨೬೬೭ ಹಾಂಕಾ ಸಂಪರ್ಕ ಕೊರಯೇತ.