ಬೆಂಗಳೂರ್ಚೆ ಉತ್ತರಹಳ್ಳಿ ಜಿ.ಎಸ್.ಬಿ. ಪರಿವಾರು ತ್ಯಾ ಪ್ರದೇಶಾಚೆ ಜಿ.ಎಸ್.ಬಿ. ಸಮಾಜ ಬಾಂದವಾಲೆ ಅಭಿವೃದ್ಧಿ, ಧಾರ್ಮಿಕ ಜಾಗೃತಿ ಆಸ್ಸ ಕೊರಚೆ ಬರಶಿ ಸರ್ವೇ ಜನ ಸುಖಿನೋ ಭವಂತಿಃ ಮ್ಹಣ್ಚೆ ವರಿ ಬೆಂಗಳೂರ್ಚೆ ಇತರ ಗರೀಬಾಂಕ ವರೇನ ಮಸ್ತ ನಮೂನ್ಯಾನಿ ದಾನ, ಧರ್ಮ ಮುಖಾಂತರ ಸೇವಾ ಪಾವಯತಾ ಆಸ್ಸಾ. ಮಾತ್ರ ನ್ಹಂಹಿ ಬೆಂಗಳೂರು ಮಹಾನಗರ ಸಭೆ ತಾಕೂನು ಆಪಣೇಲೆ ಸೇವಾ ಕಾರ್ಯ ಆನಿ ಚಟುವಟಿಕಾ ವಿಸ್ತರಣ ಕೊರಚಾಕ ಯೋಗ್ಯ ಜಾಗೋ ವರೇನ ಘೆತ್ಲ್ಯಾ.
ಉತ್ತರಹಳ್ಳಿ ಭಾಗಾಚೆ ಲೋಕಾಂಂತು ಧಾರ್ಮಿಕ ಜಾಗೃತಿ ಖಾತ್ತಿರಿ ಘೆಲ್ಲಿಲೆ ಸಬಾರ ವರಸಾಚಾನ ಪ್ರತಿ ಮ್ಹಹಿನೋ ದೊನ್ನೀ ಆಯ್ತವಾರು ಡಿ ಜಿ ಪೆಟ್ರೋಲ್ ಬಂಕ್ ಲಾಗ್ಗಿಚೆ ಔಟರ್ ರಿಂಗ್ ರಸ್ತ್ಯಾರಿ ಆಸ್ಸುಚೆ ಬನಗಿರಿ ಶ್ರೀ ವರಸಿದ್ಧಿ ವಿನಾಯಕ ದೇವಳಾಂತು ಸೇವಾದಾರಾಲೊ ಸಹಕಾರಾನಿ ಜಿಎಸ್ಬಿ ಪರಿವಾರು ಉತ್ತರಹಳ್ಳಿ ತರಪೇನಿ ಶ್ರೀ ಸತ್ಯನಾರಾಯಣ ಪೂಜಾ ಆಯೋಜನ ಕೊರನು ಘೇವ್ನು ಎತ್ತಾ ಆಸ್ಸಾತಿ. ಹೇ ಎಪ್ರಿಲ್ ಮ್ಹಹಿನ್ಯಾಚೆ ಶ್ರೀ ಸತ್ಯನಾರಾಯಣ ಪೂಜಾ ಸಬಾರ ವೆಗಳೆ ಧಾರ್ಮಿಕ ಕಾರ್ಯಾವಳಿ ಬರಶಿ ಏಪ್ರಿಲ್ ೧೨, ೨೦೨೬ ದಿವಸು ಚಲ್ಲೆ.
ಸಕ್ಕಾಣಿಪೂಡೆ ೭.೪೫ ಘಂಟ್ಯಾಕ ಶ್ರೀ ಬನಗಿರಿ ವರಸಿದ್ಧಿ ವಿನಾಯಕ ದೇವಳಾಂತು ಶ್ರೀ ದೇವಾಲೆ ಸನ್ನಿಧಿರಿ ದೇವಮಾಗಣಿ ಆನಿ ನಾರ್ಲುಕೇಳಿ ಸೇವಾ ಪಾವೋನು ಪೂಜಾ ಸಮಾರಂಭ ಸುರುವಾತ ಜಾಲ್ಲೆ. ಸಕ್ಕಾಣಿ ೮ ಘಂಟ್ಯಾಕ ೫ ನಾರಲಾಚೆ ಗಣೋಮು ಸಂಕಲ್ಪಪೂರ್ವಕ ಸೂರು ಜಾಲ್ಲೆ. ತಾಜ್ಜೊಟ್ಟು ಜಿಎಸ್ಬಿ ಪರಿವಾರ ಉತ್ತರಹಳ್ಳಿ ಭಜನಾ ತಂಡಾಚಾನ ಭಜನಾ ಸೇವಾ ಸೂರು ಕೆಲ್ಲೆ. ಮಾಗಿರಿ ಗಂಗಾ ಪೂಜಾ ಚಲ್ಲೆ. ಮಾಗರಿ ಶ್ರೀ ವರದಾಂಜನೇಯ ಭಜನಾ ಮಂಡಳಿ, ಜೆ.ಪಿ.ನಗರ ಹಾಜ್ಜೆ ಸದಸ್ಯಾನಿ ಯವ್ನು ಭಜನಾ ಸೇವಾ ಪಾವಯಿಲಿ. ಸಕ್ಕಾಣಿ ೯.೩೦ ಘಂಟ್ಯಾಕ ಶ್ರೀ ಸತ್ಯನಾರಾಯಣ ಪೂಜಾ ಸೇವಾದಾರಾಂಗೆಲೆ ಉಪಸ್ಥಿತಿರಿ ಸಂಕಲ್ಪ ಪೂರ್ವಕ ಜಾವ್ನು ಸೂರು ಜಾಲ್ಲೆ.
೧೦.೦೦ ಘಂಟ್ಯಾಕ ಸಾಮೂಹಿಕ ಶ್ರೀ ವಿಷ್ಣು ಸಹಸ್ರ ನಾಮ ಪಠಣ ಆರಂಭ ಜಾಲ್ಲೆ. ಜಿ.ಎಸ್.ಬಿ. ಪರಿವಾರು ಉತ್ತರಹಳ್ಳಿ ಆನಿ ವೆಗಳೆ ಕಡೇಚಾನ ಆಯಲೀಲೆ ಸಮಾಜ ಬಾಂದವಾನಿ ಶೃದ್ಧಾ-ಭಕ್ತಿನಿ ಹಾಂತು ವಾಂಟೊ ಘೆತ್ಲೆ. ಉಪರಾಂತ ೧೦.೩೦ ಘಂಟ್ಯಾಕ ಶ್ರೀ ಗಣೇಶ್ ಶಂಕರ್ ಪೈ ತಂಡಾನಿ ತತ್ವ ಸಂಕೀರ್ತನ ಚಲೋನು ದಿಲ್ಲಿ. ಉಪರಾಂತ ಶ್ರೀ ವೆಂಕಟೇಶ ಭಜನಾ ಮಂಡಳಿ ಆನಿ ಮೂಡುಬಿದರೆಚೆ ಶ್ರೀ ಮನೋಹರ ಮಲ್ಯ ತಂಡ ತಾಕೂನು ಭಜನಾ ಸೇವಾ ಚಲ್ಲೆ.
ಹೇ ಪೂಜಾ ಸಮಾರಂಭಾಂತು ವೆಗವೆಗಳೆ ಸೇವಾ ಚಲಯಿಲೆ ಸೇವಾದಾರಾಂಕ ವೈಯಕ್ತಿಕ ದೇವಾ ಸಂಕಲ್ಪ ಚಲಯಿಲೆ. ಸಂಘಟನೆಚೆ ಚಟುವಟಿಕೆ ಖಾತ್ತಿರಿ ಜಿ.ಎಸ್.ಬಿ. ಪರಿವಾರಾಚೆ ಅಧ್ಯಕ್ಷ ಶ್ರೀ ನಾಯಕ್ ಮಾಮ್ಮಾನಿ ಕಳಯಿಲೆ ತಶೀಚಿ ಕಾರ್ಯದರ್ಶಿ ಶ್ರೀ ಕೆ. ಅಣ್ಣಪ್ಪ ಪ್ರಭು ಮಾಮ್ಮಾನಿ ವರೇನ ಕೆಲವು ಪ್ರಕಟಣ ಸಾಂಗ್ಲೆ. ಮಾಗಿರಿ ಮಹಾಮಂಗಳಾರ್ತಿ, ಸಕಡಾಂಕ ತೀರ್ಥ ಪ್ರಸಾದ ವಾಂಟಿಲೆ ನಂತರ ಮಹಾಸಂತರ್ಪಣ ಚಲ್ಲೆ. ಹಜಾರ ಬಽರಿ ಸಮಾಜ ಬಾಂದವ ಹೇ ವೇಳ್ಯಾರಿ ಉಪಸ್ಥಿತ ವ್ಹರ್ನು ಹರಿ ಕೃಪೆಕ ಪಾತ್ರ ಜಾಲ್ಲೆ.