೧೬ವೇಂ ಶೇಕಡ್ಯಾ ಪಶಿ ಮಾಕಶಿಚೆ ಇತಿಹಾಸ ಆಸ್ಸುಚೆ ಕಾಪು ವೆಂಕಟರಮಣ ದೇವಳಾಂತು ತೀನಿ ಮುಖೇಲ ದೇವಾಂಕ ಪೂಜ್ಜಿತಾತಿ. ಮೂಲ ದೇವು ಜಾವ್ನು ಹಯಗ್ರೀವ, ತಶೀಚಿ ಶ್ರೀ ಲಕ್ಷ್ಮಿ ವೆಂಕಟರಮಣ ಆನಿ ಮುಖ್ಯಪ್ರಾಣ (ಹನುಮಾನ್). ಉತ್ಸವ ಮೂರ್ತಿ ವರದರಾಜ ವೆಂಕಟರಮಣು.
೧೯೩೬ ಇಸ್ವೆಂತು ಕಾಶಿ ಮಠಾಧೀಶ ಶ್ರೀಮದ್ ಸುಕೃತೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ಶ್ರೀ ವೆಂಕಟರಮಣ ದೇವಾಲೆ ಮೂರ್ತಿಚೆ ಪುನರ್ ಪ್ರತಿಷ್ಠಾಪನ ಚಲ್ಲೆ. ಏಪ್ರಿಲ್ ೧೯೯೪ ಂತು, ಶ್ರೀ ಕಾಶಿ ಮಠಾಚೆ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಉಪಸ್ಥಿತೀರಿ ಸಹಸ್ರ ಕುಂಭಾಭಿಷೇಕ ಅತೀ ವೈಭವಾನಿ ಸಂಪನ್ನ ಜಾಲ್ಲೆ. ೨೦೧೭ ಇಸ್ವೆಂತು ಹೇ ದೇವಳ ಪರತ ನವೀಕರಣ ಜಾಲ್ಲೆ. ಕಾಪುಂತು ಗೌಡ ಸಾರಸ್ವತ ಆಡಳಿತಾಂತು ಶ್ರೀ ವೆಂಕಟರಮಣ ದೇವಳಾಚೆ ಬರಶಿ ಶ್ರೀ ಹಳೇಮಾರಿಯಮ್ಮ ದೇವಳ ವರೇನ ಆಸ್ಸಾ. ಆರತಾ ಶ್ರೀ ಹಳೇಮಾರಿಯಮ್ಮ ದೇವಳಾಂತು ಮಹಾ ವೈಭವಾರಿ ಕಾಲಾವಧಿ ಸುಗ್ಗಿ ಜಾತ್ರಾ ಮಹೋತ್ಸವು ಘಡ್ಲೆ. ಲಾಕಗಟ್ಲೆ ಶೃದ್ಧಾಳು ಲೋಕಾನಿ ಯವ್ನು ಶ್ರೀ ಮಾರಿಯಮ್ಮಾಲೆ ದರ್ಶನ ಘೇವನು ಪುನೀತ ಜಾಲ್ಲೆ.
ತಶೀಚಿ ಶ್ರೀ ವೆಂಕಟರಮಣ ದೇವಳಾಂತು ಶ್ರೀ ದೇವಾಲೆ ಪುನರ್ ಪ್ರತಿಷ್ಠಾ ಮಹೋತ್ಸವು ದಿನಾಂಕ. ೧೨-೦೪-೨೦೨೬ ದಿವಸು ವಿಜೃಂಭಣೆರಿ ಘಡಲೊ. ಸಕ್ಕಾಣಿ ೭.೦೦ ಘಂಟ್ಯಾಕ ಮಹಾ ಪ್ರಾರ್ಥನಾ, ಮಾಗಿರಿ ಶ್ರೀ ದೇವಾಕ ಪಂಚಾಮೃತ, ಶತಕಲಶ ಅಭಿಷೇಕ, ಪಟ್ಟ ಕಾಣಿಕಾ ಆನಿ ಧೋಂಪಾರಾ ೧೨.೩೦ ಕ ಮಹಾ ನೈವೇದ್ಯ, ಮಹಾ ಪೂಜಾ, ಅನ್ನಸಂತರ್ಪಣ ಚಲ್ಲೆ.
ಸಾಂಜವಾಳಾ ೭.೦೦ ಘಂಟ್ಯಾಕ ರಾತ್ರಿ ಪೂಜಾ, ರುಪ್ಯಾಚೆ ಗರುಡ ವಾಹನ ಭಂಡಿ ರಥ ಪೇಂಟಾ ಉತ್ಸವು, ವಸಂತ ಪೂಜಾ, ಪ್ರಸಾದ ವಾಂಟಪ ಆದಿ ಧಾರ್ಮಿಕ ಕಾರ್ಯಕ್ರಮ ಚಲ್ಲೆ. ಭಕ್ತ ಬಾಂದವ ದೇವಾಲೆ ಅಭಿಷೇಕಾಕ ಪಂಚಾಮೃತ ಸಾಹಿತ್ಯ, ಸೀಯಾಳ ಹಾಡ್ನು ದೇವಾಕ ಸಮರ್ಪಣ ಕೊರನು ಪುನೀತ ಜಾಲ್ಲೆ. ಹೇ ವೇಳ್ಯಾರಿ ಗಾಂವ್ಚೆ, ಪರಗಾಂವ್ಚೆ ಸಮಾಜ ಬಾಂದವ ವ್ಹಡ ಅಂಕಡ್ಯಾರಿ ಉಪಸ್ಥಿತ ವ್ಹರಲೀಲೆ.