“ವಿದ್ಯಾರ್ಥ್ಯಾಂಚ್ಯಾ ಯಶಸ್ವೀಪಣಾಕ ಆನೀ ತಾಂಗೆಲೆ ಸಾಧನಾ, ಸಾಮರ್ಥ್ಯ ಪ್ರಕಾಶನಾಚೆ ಜವಾಬ್ದಾರಿ ಮಸ್ತರಾಲೆ ಆಸತಾ. ಶಿಕ್ಪಣಾಂತು ಮಾಗಶಿ ವ್ಹರಲೀಲೆ ತೇನ್ನಾ ಚರಡುವಾಂಕ ತಾನ್ನಿ ಹಾತ ಧರೂನ ಮುಖಾರ ಹಾಡ್ಕಾ. ಸಗಳ್ಯಾ ಶಿಕ್ಷಕಾಂನೀ ಏಕ ಪಂಗಡ ಮ್ಹಣೂನ ಕಾಮ ಕರಚೇಂ. ಲ್ಹಾನ ಮಾನ್ಯತಾಯ ಆನೀ ಸಕಾರಾತ್ಮಕ ಅಂಶಾನಿ ಭುರಗ್ಯಾಂಕ ಶಿಕ್ಷಣಾಂತ ಬರೇ ತರೇನ ಸಾಧನಾ ಕರಪಾಕ ಸಾಧ್ಯ ಜಾತ್ತಾ . ಜಾಲಯಾರಿ ಶಿಕ್ಷಕಾಂಕ ಸಾಮಾಜೀಕ ಮಾನ್ಯತಾಯ ನಾಶಿಲ್ಲ್ಯಾನ ತರಣಾಟೇ ಲೋಕ ಶಿಕ್ಷಕ ಜಾವಪಾಕ ಫಾಟೀಂ ಸರತಾತ ಅಶೀ ಶಿಕ್ಷಣತಜ್ಞ ಆನೀ ಉಡುಪೀಚೇ ಡಯಟ್ ಪ್ರಾಚಾರ್ಯ ಡಾ. ಅಶೋಕ ಕಾಮತ್ ಹಾನ್ನಿ ಮ್ಹಳ್ಳೆ.
ತಾನ್ನಿ ಸೋಮಾರಾ, ಜನವರಿ ೨೬ಕ ಸಾಂಜವೇಳಾರ ಉಡುಪೀ ಸಂಸ್ಕೃತೀ ವಿಶ್ವ ಪ್ರತಿಷ್ಠಾನ, ಕನ್ನಡ ಆನೀ ಸಂಸ್ಕೃತೀ ಖಾತ್ಯಾಚಾ ಉಡುಪೀ ಜಿಲ್ಲ್ಯಾಚೆ ಸಹಯೋಗಾನಿ ಉಡುಪಿಂತು ಆಯೋಜಿತ ಸಂಸ್ಕೃತಿ ಉತ್ಸವಕಾರ್ಯಕ್ರಮಾಂತು ಏಕ ಲಾಕ ರೂ. ಮೌಲ್ಯಾಚೆ ವಿಶ್ವ ಪ್ರಭಾ ಪ್ರಶಸ್ತಿ ಸ್ವೀಕಾರ್ನು ಉಲಯತಾಲೆ.
ಜಿಲ್ಲಾ ಕನ್ನಡ ಆನೀ ಸಂಸ್ಕೃತೀ ಖಾತ್ಯಾಚೇ ಸಹಾಯಕ ನಿರ್ದೇಶಕಿ ಪೂರ್ಣಿಮಾ ಹಾನ್ನಿ ಉಲೋನು ಸಂಸ್ಕೃತಿ ವಿಶ್ವ ಪ್ರತಿಷ್ಠಾನಾಚೇಂ ಉಕ್ತಾವಣ ಸಾಲುಮಾರದ ತಿಮ್ಮಕ್ಕಾ ಹಾನ್ನಿ ಕೆಲೀಲೇಂ ಅಭಿಮಾನಾಚೀ ವಿಷಯು. ಹೇ ಸಂಸ್ಥ್ಯಾನಿ ಸಾಂಸ್ಕೃತೀಕ ಜಾವ್ನು ವಿಂಗಡ ವಿಂಗಡ ಕಾರ್ಯಾವಳೀ ಘಡೋವನ ಹಾಡೂನ, ವ್ಹಡ ಮೊತ್ತಾಚೆ ಪುರಸ್ಕಾರ ದಿವನು ತೇ ಕಲಾ ಆನೀ ಕಲಾಕಾರಾಂಕ ಮಾನ ದಿತಾತ. ಹೇ ಆದರ್ಶ ಆನೀ ಅರ್ಥಪೂರ್ಣ ಮ್ಹೊಣು ಸಾಂಗಲೇಂ.
ಶಿಕ್ಷಕ, ರಾಷ್ಟ್ರೀಯ ಪ್ರಶಿಕ್ಷಕ ರಾಜೇಂದ್ರ ಭಟ್ ಕೆ. ಹಾನ್ನಿ ಪುರಸ್ಕಾರ ಘೆತ್ತಿಲ್ಯಾಲೆ ಪರಿಚಯ ಕೊರನು ದಿವನು ತಾಂಕಾ ಅಭಿನಂದನ ಪಾವಯ್ಲೆ. ಸಂಧ್ಯಾ ಶೆಣೈ ಹಾನ್ನಿ ಪುರಸ್ಕಾರ ಪತ್ರ ವಾಚಲೇಂ.
ಕಲಾ ಪೋಷಕ ಸಿ.ಎಸ್. ರಾವ್, ವೋಲ್ವೋ ಕೇರ್ ಉಡುಪಿಚೆ ಕೃಷ್ಣರಾಜ ತಂತ್ರಿ, ಪ್ರತಿಷ್ಠಾನದ ಸಂಸ್ಥಾಪಕ ಯು.ವಿಶ್ವನಾಥ್ ಶೆಣೈ, ಪ್ರಭಾವತಿ ಶೆಣೈ, ಉದ್ಯಮಿ ಪ್ರಶಾಂತ್ ಕಾಮತ್, ಪ್ರತಿಷ್ಠಾನಾಚೆ ಅಧ್ಯಕ್ಷ ಪ್ರೊಫೆಸರ್ ಶಂಕರ್ ಉಪಸ್ಥಿತ ವ್ಹರಲೀಲೆ. ಸುರವೇಕ ಪಾಂಚವೇ ಕ್ಲಾಸಾಚೆ ಕು|| ಧೃತಿ ತೀಣೆ ಪ್ರಾರ್ಥನ ಮ್ಹಳ್ಳೆ.
ಸಂಸ್ಕೃತಿ ವಿಶ್ವ ಪ್ರತಿಷ್ಠಾನಾಚೆ ವಿಶ್ವಸ್ಥ ವಿಘ್ನೇಶ್ವರ ಅಡಿಗ ತಾನ್ನಿ ಯೆವಕಾರ ಕೆಲ್ಲಿ. ಮರವಂತೆ ನಾಗರಾಜ್ ಹೆಬ್ಬಾರ್ ತಾನ್ನಿ ಪ್ರಾಸ್ತಾವಿಕ ಉತ್ರ ಉಲಯಿಲೆ. ಪ್ರಧಾನ ಕಾರ್ಯದರ್ಶಿ ಶಿಲ್ಪಾ ಜೋಶಿ ಕಾರ್ಯಕ್ರಮ ನಿರೂಪಣ ಕೆಲ್ಲಿ. ಪ್ರತಿಷ್ಠಾನಾಚೆ ಸಂಚಾಲಕ ರವಿರಾಜ್ ಎಚ್.ಪಿ. ತಾನ್ನಿ ಆಬಾರ ಮಾನಲೆ.
ವೇದಿಕೆ ಕಾರ್ಯಕ್ರಮ ಉಪರಾಂತ ಶ್ರೀಕಾಂತ್ ಎನ್.ವಿ. ನಿರ್ದೇಶನಾಂತು ಯಕ್ಷ ರಂಗಾಯಣ ರೆಪರ್ಟರಿ ಕಲಾವಿದಾನಿ ‘ಮಹಾತ್ಮಾರ ಬರವಿಗಾಗಿ’ ಮ್ಹಣ್ಚೆ ನಾಟಕ ಪ್ರದರ್ಶನ ಕೆಲ್ಲಿ.