ಕೊಂಕಣಿ ಸಿನೇಮ ಮ್ಹಳ್ಳ ಸತ್ತಾ ಪ್ರಪ್ರಥಮ ಜಾವ್ನು ಉಡ್ಗೋಸು ಜಾವ್ಚೆ ಬೆಂಗಳೂರ್ಚೆ ಡಾ|| ರಮೇಶ ಕಾಮತ್ ಮಾಮು. ತಾನ್ನಿ ೧೯೮೧ ಇಸ್ವೆಂತು ಜನಮನ ಮ್ಹಣಚೆ ಕೊಂಕಣಿ ಸಿನೇಮಾ ನಿರ್ಮಾಣ ಕೆಲಯಾರಿ ೨೦೧೬ ಇಸ್ವೆಂತು ಆವೈಜಸಾ ಮ್ಹಣಚೆ ಆನ್ನೇಕ ಕೊಂಕಣಿ ಸಿನೇಮಾಚೆ ನಿರ್ಮಾಣ ಕೆಲ್ಲಿ. ಉಪರಾಂತ ೨೦೧೯ ಇಸ್ವೆಂತು ಅಪ್ಸರ ಧಾರಾ ಮ್ಹಣಚೆ ತೀಸರೇಚೆ ಕೊಂಕಣಿ ಸಿನೇಮಾ ನಿರ್ಮಾಣ ಕೊರನು ೨೦೨೪ ಇಸ್ವೆಂತು ಚಾರೀಚೆ ಜಾವ್ನು ಅಂತ್ಯಾರಂಭ ಮ್ಹಣಚೆ ಕೊಂಕಣಿ ಸಿನೇಮಾ ನಿರ್ಮಾಣ ಕೆಲ್ಲ್ಯಾ. ಅಂತ್ಯಾರಂಭ ಘೆಲೀಲ ವರ್ಷ ಬೆಂಗಳೂರಾಂತು ಚಲೀಲೆ ಅಂತಾಃರಾಷ್ಟ್ರೀಯ ಚಲನಚಿತ್ರೋತ್ಸವಾಂತು ವಾಂಟೊ ಘೇವ್ನು, ವೀಕ್ಷಕ ತಾಕೂನು ಮಸ್ತ ತಾರೀಪು ಪಾವ್ವಿಲೆ ಆಸ್ಸಾ. ಡಾ. ಕೆ. ರಮೇಶ್ ಕಾಮತ್ ಮಾಮು, ಪೂನಾ ಫಿಲ್ಮ್ ಇನ್ಸ್ಟಿಟ್ಯೂಟ್ (ಎಫ್ಟಿಐಐ) ಹಾಜ್ಜೆ ಪೊರನೆ ವಿದ್ಯಾರ್ಥಿ ಜಾವ್ನಾಸ್ಸತಿ. ಹಾಂಕಾ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚಾನ ಕಲಾ ಸೇವೆ ಖಾತೇರಿ ಗೌರವ ಪುರಸ್ಕಾರ ದಿವನು ಗೌರವ ಕೆಲ್ಲ್ಯಾ.
ಆರತಾಂ ೨೦೨೬ಂತು ತಾನ್ನಿ ಆನ್ನೇಕ ಕೊಂಕಣಿ ಸಿನೇಮಾನಗ್ನಸತ್ಯ ತಯಾರ ಕೆಲ್ಲ್ಯಾ. ಹಾಜ್ಜೆ ವಿಶೇಷ ಪ್ರೀಮಿಯರ್ ಶೋ ದಿನಾಂಕ. ೨೬-೦೧-೨೦೨೬ ದಿವಸು ಸಾಂಜವಾಳಾ ೦೫-೦೦ ಘಂಟ್ಯಾಕ ಸಮ್ಮ ಜಾವ್ನು ಸೌತ್ ಎಂಡ್ ಸರ್ಕಲ್ ಹಾಜ್ಜೆ ಲಾಗ್ಗಿ ಆಸ್ಸುಚೆ ಪೈ ವಿಸ್ಟಾ ಕನ್ವೆನ್ಷನ್ ಹಾಲ್, ನಂ. ೩೪, ಜಿಎಸ್ಬಿ ಭವನ, ಪಟಾಲಮ್ಮ ದೇವಸ್ಥಾನ ರಸ್ತೆ, ಬಸವನಗುಡಿ, ಬೆಂಗಳೂರು- ೫೬೦೦೦೪ ಹಾಂಗಾ ಆಯೋಜನ ಕೆಲೀಲೆ ಆಸ್ಸಾ.
ಹೇ ವಿಶೇಷ ಪ್ರೀಮಿಯರ್ ಶೋ ಕ ಮಹಾನ್ ದಾರ್ಶನಿಕ ಸೆಂಚುರಿ ಗ್ರೂಪ್ಸ್ ಹಾಜ್ಜೆ ಡಾ. ಪಿ. ದಯಾನಂದ ಪೈ ಮಾಮ್ ಆನಿ ಪೈ ಗ್ರೂಪ್ಸ್ ಆಫ್ ಹೋಟೆಲ್ ಹಾಜ್ಜೆ ಶ್ರೀ ಜಗನ್ನಾಥ್ ಪೈ ಮಾಮ್ ಹಾನ್ನಿ ಯವಚಾಕ ಒಪ್ಪುನು ಘೆತ್ಲ್ಯಾ. ಮಹಾನ್ ಪರಿಸರವಾದಿ ಶ್ರೀಮತಿ ರೇವತಿ ಕಾಮತ್ ತಾನ್ನಿ ಮುಖೇಲ ಸೊಯರೆ ಜಾವ್ನು ಹೇ ಪ್ರೀಮಿಯರ್ ಶೋ ಕ ಎತ್ತಾಲೆ.
ನಗ್ನ ಸತ್ಯ ಹೇ ಸಿನೇಮಾಚೆ ನಿರ್ದೇಶಕ ಡಾ|| ರಮೇಶ ಕಾಮತ್ ಮಾಮು ಆನಿ ನಿರ್ಮಾಪಕಿ ಶ್ರೀಮತಿ ಕಿರಣ್ಮಯಿ ಕಾಮತ ಮಾಮಿ ಜಾವ್ನಾಸ್ಸತಿ.ನಗ್ನ ಸತ್ಯ ಸಿನೇಮಾಚೆ ಪ್ರೀಮಿಯರ್ ಶೋ ವೀಕ್ಷಣ ಕೊರಚಾಕ ಹರ್ಯೇಕ ಕೊಂಕಣಿಗಾಂಕ ಉಚಿತ ಪ್ರವೇಶ ಆಸ್ಸುನು, ಪಯ್ಲೇಕ ಆಯ್ಯಿಲ್ಯಾಂಕ ಪಯ್ಲೇಚೆ ಅವಕಾಶು. ಖಂಚೇಯಿ ವಿಶೇಷ್ ಪಾಸ್ ಘೆವ್ಚೆ ಗರಜ ನಾ. ಪ್ರೀಮಿಯರ್ ಶೋಕ ಯವ್ಚೆ ಕೊಂಕಣಿ ಕಲಾಪ್ರೇಮಿಂಕ ಹೈ ಟೀ ವ್ಯವಸ್ಥಾ ಕೆಲೀಲೆ ಆಸ್ಸುನು. ಡಾ|| ರಮೇಶ ಕಾಮತ್ ಆನಿ ತಾಂಗೆಲೆ ತಂಡಾಚೆ ಹೇ ಆವಯಿ ಭಾಸ ಕೊಂಕಣಿ ಮ್ಹೋಗಾಕ ಹರ್ಯೇಕ ಕೊಂಕಣಿ ಬಾಂದವಾನಿ ಪ್ರೋತ್ಸಾಹ ದಿವ್ಕಾ. ತನ್ಮೂಲಕ ಕೊಂಕಣಿ ಪ್ರಚಾರಾಚೆ ತಾಂಗೆಲೆ ವಾವರೇಕ ಹಾತು ಮೆಳೋಕಾ ಮ್ಹಣ್ಚೆ ಆಮ್ಗೆಲೆ ವಿನಂತಿ. ಚಡ್ತೆ ಖಂಚೇಯಿ ಮಾಹಿತಿಕ ಮೊ. ನಂ. 9845193432 ಸಂಪರ್ಕ ಕೊರಯೇತ.