`ಆಂಟಿ, ಹೊರಡೋಣ್ವಾ ಮ್ಹಣತಾ ಚೈತ್ರಾ ಆಯಲಿ. ಭರತನಾಟ್ಯ ಡ್ರೆಸ್ಸಾಂತು ಚಂದ ಜಾವ್ನು ದಿಸ್ತಾ ಆಶ್ಶಿಲೆ ತಿಗೆಲೆ ಬರಶಿ ಆಟೋರಿಕ್ಷಾಂತು ಬಯಸೂನು ನಾಟ್ಯಾಂಜಲಿ ಕಲಾಮಂದಿರ ಆನಿ ಕನ್ನಡ ಸಂಸ್ಕೃತಿ ಇಲಾಖೋ ಹಾಜ್ಜೆ ಸಹಯೋಗಾಂತು ಚಲ್ತಽ ಆಶ್ಶಿಲೆನೃತ್ಯಾರ್ಪಣ ಕಾರ್ಯಕ್ರಮ ಚಲ್ತಾ ಆಶ್ಶಿಲೆ ಸವಾಯಿ ಗಂಧರ್ವ ಹಾಲಾಕ ಯವ್ನು ಪಾವ್ಲೆ. ೪ ಘಂಟ್ಯಾಕ ಶೂರ ಜಾವ್ಚೆ ಕಾರ್ಯಕ್ರಮಾಕ ೩-೩೦ ಘಂಟ್ಯಾಕಚೀ ಸಗಳೇ ಸಭಾಂಗಣ ಗಿಚಾಗಿಚ್ ಜಾವ್ನು ಭೊರನು ಘೆಲೀಲೆ. ಥಂಯ್ಕ ಆಯಲೀಲೆ ೨೦೦-೨೫೦ ಪ್ರತಿಭಾವಂತ ಚರಡುಂವ, ತಾಂಗೆಲೆ ಪೋಷಕ ಸಗಳ್ಯಾಲೆ ಸಂಭ್ರಮು, ಸಂತೋಷು, ಅಭಿಮಾನು ಭರಲೀಲೆ ತೋಂಡ ಪಳೋನು ಮನಾಕ ಮಸ್ತ ಆನಂದ ಜಾಲ್ಲೋ.
ನಮ್ ನಮೂನೇ ರಂಗಾಚೆ ಭರತನಾಟ್ಯ ನೃತ್ಯಾಚೆ ನೆಸ್ಸಣಿ ನೆಸ್ಸುನು ಘೇವ್ನು, ಮೇಕಪ್ ಕೊರನು ಅಭಿಮಾನಾನಿ ತೆಕ್ಕಡೆ ಹೆಕ್ಕಡೆ ಭೋವಂತ ಆಶ್ಶಿಲೆ ಚರಡುವಾಂಕ ಪೊಳೋವಚೇಚಿ ಏಕ ಚಂದಾಯಿ. ನಾಟ್ಯ ಕಾರ್ಯಕ್ರಮ ಶೂರ ಜಾಲ್ಲೆ. ಸರ್ವ ವ್ಯವಸ್ಥೆಶೀರ ಚಲ್ಲೆ. ಸಾನ ಬಾಲ ಕಲಾವಿದಾ ಧೊರನು ಭರತನಾಟ್ಯಾಂತು ವಿದ್ವತ್ ಪೂರ್ಣ ಅನುಭವ ಜೊಡಲೀಲೆ ವಿದ್ಯಾರ್ಥಿ ಪರಿಯಂತ … ವೆಗವೆಗಳೆ ನಮೂನ್ಯಾಚೆ ಗಣಪತಿ, ಕೃಷ್ಣಾ, ಅಷ್ಟಲಕ್ಷ್ಮೀ ಇತ್ಯಾದಿ ನೃತ್ಯ ದಾಖಯಿಲೆ. ಸಗಳ್ಯಾಂತು ತಾಳಾಕ ಸಮ್ಮ ಜಾಲೀಲೆ ಪಾವಲ, ತೊಂಡಾ ವಯ್ರಿ ವೆಗವೆಗಳೆ ಭಾವಾ ಪ್ರದರ್ಶನ ಕರತಾ, ಖುಷಿ ಆನಿ ಶೃದ್ಧೇನಿ ನೃತ್ಯ ಪ್ರದರ್ಶನ ಕೆಲ್ಲೆ. ಹರ್ಯೇಕ ಚರಡುಂವಾನಿ ದಾಖಯಿಲೆ ಪ್ರದರ್ಶನ ಪಳಯತಾನಾ ತ್ಯಾ ಚರಡುಂವಾನಿ ಕೆಲೀಲೆ ಪ್ರಾಕ್ಟೀಸ್, ತಾಜ್ಜೆ ಮಾಕಶಿ ಆಶ್ಶಿಲೆ ತಾಜ್ಜೆ ರೂವಾರಿ ಗುರು ವನಿತಾ ಮಹಾಲೆ ಹಿಗೆಲೆ ಪರಿಶ್ರಮು ಕಿತ್ತುಲೆ ಉರ್ತಾಲೆ ಮ್ಹೊಣು ಯವಜೂನು ವಿಸ್ಮಯ ಜಾಲ್ಲೆ.
ಮುಖಾರಿ ಸಭಾ ಕಾರ್ಯಕ್ರಮಾ ಚಲ್ಲೆ. ಮುಖೇಲ ಸೊಯರೆ ಜಾವನು ಮಹಿಳಾ ವಿದ್ಯಾಪೀಠಾಚೆ ಅಧ್ಯಕ್ಷೆ ಕೀರ್ತಿ ತಂಬದ, ಬಿಜೆಪಿ ಶಿಸ್ತು ಸಮಿತಿ ಅಧ್ಯಕ್ಷ ಲಿಂಗರಾಜ ಪಾಟೀಲ, ಕನ್ನಡ ಆನಿ ಸಂಸ್ಕೃತಿ ಇಲಾಖೋ ಹಾಜ್ಜೆ ಸಹಾಯಕ ನಿರ್ದೇಶಕ ಕುಮಾರ ಚಿಕ್ಕೇರಿ, ಕಥಕ ಭರತ ನಾಟ್ಯ ಕಲಾವಿದೆ ಡಾ|| ಸೀಮಾ ಉಪಾಧ್ಯಾಯ, ಮಹಾನಗರ ಪಾಲಿಕೆಚೊ ಸದಸ್ಯೆ ರೂಪಾ ಶೆಟ್ಟಿ ಹಾನ್ನಿ ಸಕ್ಕಡ ಯವ್ನು ಸಂದರ್ಭೋಚಿತ ಜಾವ್ನು ಪ್ರೇಕ್ಷಕಾಂಕ ಬೇಜಾರ ಜಾಯನಾ ತಶ್ಶಿ ಗರಜ ಆಶ್ಶಿಲೆ ತಿತ್ಲೇಚಿ ಉಲಯಿಲೆ.
ಮಾಗಿರಿ ಗುರುವಂದನಾ ಕಾರ್ಯಕ್ರಮಭಿ ಚಂದಾಯೇರಿ ಚಲ್ಲೊ. ಹೇ ಸಗಳೆ ನಾಚ, ನೃತ್ಯ ಪಳೋನು ಆನಂದ ಪಾವ್ಚೆ ಭಿತ್ತರಿ ಮುಖಾವಯಲೋ ನೃತ್ಯ ಕಾರ್ಯಕ್ರಮ ಆಶ್ಶಿಲೊ. ತ್ಯಾ ಡ್ಯಾನ್ಸಾಂತು ತರೀ ಮೆಗೇಲಿ ಸ್ವತಃ ನಾತಿ ಆಶ್ಶಿಲೆ ಪೊಳೋನು ಹಾಂವ ಖುರ್ಚಿ ಮುಕಾರ ಕೊರನು ಬಸ್ಲಿ!
ಸಗಳೇ ನೃತ್ಯ ಏಕ್ಕಾ ಪಶಿ ಏಕ ಚಂದ ಆಶ್ಶಿಲೆ. ಸಗಳೇ ಪೊಳೋನು ದೋಳೆಂ ಭೊರನು ಆಯ್ಲೆ. ತ್ಯಾ ಭರತನಾಟ್ಯಾಚೆ ಆವಡಿ ಆಸ್ಸುಚೆ ಹರ್ಯೇಕ್ಲ್ಯಾನಿ ಪೂರ್ತಿ ಆತ್ಮಸಂತೋಷ ಪಾವ್ಚೆ ತಸ್ಸಾಲೆ ಕಾರ್ಯಕ್ರಮ ಜಾವ್ನಾಶ್ಶಿಲೆ ಮ್ಹಳಯಾರಿ ಚ್ಹೂಖ ಜಾಯಸನಾ.
ಅಖೇರಿಕ ತರೀ ಸಕ್ಕಡ ೨೫೦ ಚರಡುಂವ ಸ್ಟೇಜಾರಿ ಯೇವ್ನು ಮಂಗಳ ಡ್ಯಾನ್ಸ್ ಕೊರನು, ನಟರಾಜಾಲೆ ಸ್ಮರಣ ಕೊರನು ನಾಟ್ಯ ಕಾರ್ಯಕ್ರಮ ಸಂಪಯತಾತಿ. ಚಾರ ತಾಸ ಏಕ್ವೀಸ ನಮೂನ್ಯಾಚೆ ಭರತನಾಟ್ಯ ಪಳೋನು ನಾಟ್ಯಲೋಕಾಂತು ವಿಹರಸೂನು ಆಯ್ಯಿಲೆ ಸಂತೃಪ್ತಿಚೆ ಅನುಭವ ಘೇವ್ನು ಚಂದ ಬೊಂಬೆ ವರಿ ದಿಸ್ತಾ ಆಶ್ಶಿಲೆ ನಾತ್ತಿಲೀ ಬರಶಿ ಪೋಟೋ ಕಾಣುಘೇವ್ನು ಘಽರಾಕ ಆಯ್ಲಿ. ನೀರಸ ಜೀವನಾಂತುಲಿ ಏಕ ಸಾಂಜ ಖುಷಿ, ಆನಂದ, ಸಮಾಧಾನಾನಿ ಘೆಲ್ಲಿ.
ನಾಟ್ಯಗುರು ಕಲಾವಿದೆ ಶ್ರೀಮತಿ ವನಿತಾ ಮಹಾಲೆಲೆ ಆನಿ ತಿಗೆಲೆ ಶಿಷ್ಯವೃಂದಾಚೆ ಪರಿಶ್ರಮಾನ ಇತ್ಲೆ ಚಂದಾಯೇರಿ ಕಾರ್ಯಕ್ರಮ ದಿಲೀಲೆ ಬದಲ ತಾಂಕಾ ಸಕಡಾಂಕ ಅಭಿನಂದನ ಪಾವಯತಾ ಹೇ ಲೇಖನ ಸಂಪಯತಾ.
- ಶ್ರೀಮತಿ ಜ್ಯೋತಿ ಸುಧೀರ ಶೇಟಿಯಾ, ಹುಬ್ಬಳ್ಳಿ.