``ಆಜಿ ಆಪಣೇಕ ೭೭ ಫೀಟಾಚೆ ಶ್ರೀ ರಾಮ ಪ್ರತಿಮಾ ಅನಾವರಣ ಕೊರಚೆ ಸುಅವಕಾಶ ಮೆಳ್ಳೆ. ಹಾಜೇನ ಪರ್ತಗಾಳಿಕ್ಷೇತ್ರ ಮುಖಾರಚೆ ದಿವಸಾಂತು ಯವ್ಚೆ ಪೀಳ್ಗಿಚಾಂಕ ಸಾಧನೆಚೆ, ಪ್ರೇರಣೆಚೆ ಕೇಂದ್ರ ಜಾವಚೆ ಆಸ್ಸಾ. ಯುಗ ಬದಲ ಜಾಲ್ಲಾ, ಸಮಾಜ, ದೇಶ, ಜೀವನ ಕ್ರಮಾಂತು ಮಸ್ತ ಬದಲಾವಣ ಜಾಲ್ಲ್ಯಾ. ಜಾಲಯಾರಿಚಿ ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠ ಮಾಕಸಿಚೆ ಪರಂಪರಾಗತ ಮಾರ್ಗ ಬದಲ ಕರನಾಶಿ ಸಕಡಾಂಕ ಚಾಂಗ ವಾಟ ದಾಖಯಚೆ ಆಪಣೇಲೆ ಲಕ್ಷ ಮುಖಾರ್ಸುನು ಘೇವ್ನು ಎತ್ತಾ ಆಸ್ಸಾ ಅಶ್ಶಿ ಮ್ಹೊಣು ಪ್ರಧಾನಿ ನರೇಂದ್ರ ಮೋದಿನಿ ತಾರೀಪು ಕೊರನು ಸಾಂಗ್ಲೆ. ತಾನ್ನಿ ಆಜಿ ಗೊಂಯ್ಚೆ ಪರ್ತಗಾಳಿಂತು ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಚೆ ೫೫೦ವೇಂ ವರ್ಷಚರಣೆಚೆ ಭಾಗ ಜಾವ್ನು ಜಗಾಂತೂ ಅತ್ಯಂತ ಉಂಚ ೭೭ ಫೀಟಾಚೆ ಶ್ರೀ ರಾಮಾಲೆ ಕಾಂಸ್ಯ ಮೂರ್ತ ಅನಾವರಣ ಕೊರನು ಉಲಯತಾಲೆ.
ಮುಖಾರಸೂನುಪರ್ತಗಾಳಿಚೆ ಶ್ರೀ ರಾಮಮಂದಿರ, ಶ್ರೀ ವೀರವಿಠ್ಠಲ ಮಂದಿರಾಚೆ ದೈವಿಕ ಪರಿಸರಾನಿ ಮೆಗೆಲೆ ಮನಾಂತು ಮಸ್ತ ಶಾಂತಿ ಭರಲೀಲೆ ವರಿ ಜಾಲ್ಲ್ಯಾ. ಘೆಲೀಲೆ ೫೫೦ ವರ್ಷ ಕಾಳ ಸಮಾಜಾಕ ಏಕತ್ರ ಮೆಳೋನು ದವರಚೆ ಶಕ್ತಿ ಮಹಾಗುರು ಪರಂಪರೆನಿ ಮೆಳ್ಳಾ, ೧೯೭೫ಕ ಸಂಸ್ಥಾಪಿತ ಹೇ ಮಠಾಚೆ ಸಕ್ಕಡ ಯತಿವರ್ಯಾಂಗೆಲೆ ಚರಣಾಂಕ ಹಾಂವ ನಮಸ್ಕಾರ ಕರತಾ. ಖಂಚೇಯಿ ಸಂಸ್ಥೋ ಸತ್ಯ, ಸೇವಾ ಆನಿ ಸಾಧನೆ ಬರಶಿ ಚಮಕೂನು ಎತ್ತಕಿ, ತ್ಯಾ ಕೆದನಾಂಯಿ ರಾಬ್ನಾ, ಚಲತಾ ಆಸ್ತಾ. ಹೇ ಮಠ ನವೀನ ಪೀಳ್ಗಿಚಾಂಕ ಪರಂಪರೆ ಬರಶಿ ಮೆಳಯತಾ, ತಾನ್ನಿ ಆಯೋಜನ ಕೆಲೀಲೆ ಶ್ರೀ ರಾಮನಾಮ ಜಪ ಅಭಿಯಾನ, ಶ್ರೀ ರಾಮ ದಿಗ್ವಿಜಯ ಯಾತ್ರಾ ಪರಂಪರೆಕ ಪೀಳ್ಗಿಚಾಂಕ ಮೆಳಯಚೆ ಪ್ರೇರಣ ದಿತ್ತಾ. ಧರ್ಮ ಬರಶಿ, ಮಾನವತಾ, ಸೇವಾಕಾರ್ಯ ತಶೀಚಿ ಸಂಸ್ಕೃತಿಚೆ ರಾಕವಣ ಹೇ ಮಠಾನಿ ರಾಕೂನು ಘೇವ್ನು ಆಯ್ಲ್ಯಾ. ಆಧ್ಯಾತ್ಮ ಆನಿ ಸೇವಾ ಮೇಳ್ನೂ ವಚ್ಚೆ ಮ್ಹೊಣು ದಾಖೋನು ದಿಲ್ಲ್ಯಾ. ಮುಖಾವಯ್ಲೆ ದಿವಸಾಂತು ಹೇ ಮಠಾ ತರಪೇನಿ ಯವಚೆ ನವನವಿನ ಪೀಳ್ಗಿಚಾಂಕ ಸಂಘಟನ ಕೊರನು ವಾಟ ದಾಖಯಚೆ ಕಾರ್ಯ ಜಾಂವೊ ಮ್ಹೊಣು ಶುಭ ಹಾರೈಕೆ ಕೆಲ್ಲೆ. ಆನಿ ದೇಶಾಚೆ ಸಂಸ್ಕೃತಿ, ಪರಂಪರಾ ರಾಕಚಾಕ, ದೇಶಾಚೆ ಉದರ್ಗತಿ ಖಾತೇರಿ ಆಮ್ಮಿ ಉದ್ದಾಕ, ನಂಯಿ ವ್ಹರೋಕಾ, ಸ್ವಚ್ಛತಾ ರಾಕ್ಕಾ, ಸ್ವದೇಶಿ ಪದಾರ್ಥ ವಾಪರಕಾ, ದೇಶ ದರ್ಶನ ಕೊರನು ವೆಗವೆಗಳೆ ಕಡೆಚೆ ಸಂಸ್ಕೃತಿಚೆ ಒಳಕ ಕೊರನು ಘೆವ್ಕಾ, ಆರೋಗ್ಯಕರ ಜೀವನ ಚಲಯಕಾ, ಯೋಗ ಆನಿ ಖೇಳ ಜೀವಾನಾಚೆ ಅವಿಭಾಜ್ಯ ಅಂಗ ಜಾವ್ಕಾ, ಗರೀಬಾಂಕ ಮದತ್ ಕೊರಕಾ ಇತ್ಯಾದಿ ಜನ ಸಂಕಲ್ಪ ಸಕಡ್ಯಾನಿ ದವರೂನು ಘೆತಲೇರಿ ಆತ್ಮನಿರ್ಭರ ಭಾರತ ನಿರ್ಮಾಣ ಜಾವಚಾಂತು ಖಾಂಯಿ ಸಂಶಯು ನಾ. ಮ್ಹೊಣು ಪ್ರಧಾನಿ ಶ್ರೀ ನರೇಂದ್ರ ಮೋದಿನಿ ಮ್ಹಳ್ಳೆ. ಉಲಯಚೆ ಸುರವೇಕ ತಾನ್ನಿ ಕೊಂಕಣಿಂತೂಚಿ ಪರ್ತಗಾಳಿ ಜೀವೋತ್ತಮ ಮಠಾಚೆ ಭಕ್ತಾಂಕ ಆನಿ ಅನುಯಾಯಿಂಕ ನಮಸ್ಕಾರು ಮ್ಹೊಣು ಕೊಂಕಣಿಂತು ಮ್ಹೊಣು ಜಮಿಲೆ ಹಜಾರಗಟ್ಲೆ ಸಮಾಜ ಬಾಂದವಾನಿ ಪುಳಕಿತ ಕೆಲ್ಲಿ. ಸಕಡ್ಯಾನಿ ಹರ್ಷೋದ್ಗಾರ ಕೆಲ್ಲಿ.
ತಾಜ್ಜೆ ಪಯ್ಲೆ ತಾನ್ನಿ ಬಟನ್ ಅಡಚೂನು ಶ್ರೀ ರಾಮ ವಿಗ್ರಹಾಚೆ ಅನಾವರಣ ಕೆಲ್ಲೆ, ಪರ್ತಗಾಳಿಚೆ ಶ್ರೀ ಗೋಕರ್ಣ ಮಠಾಕ ಭೆಟ್ಟುನು ಶ್ರೀ ರಾಮದೇವಾಲೆ, ವೀರವಿಠ್ಠಲಾಲೊ ದರ್ಶನ ಘೆತ್ಲೆ. ತಾಂಗೆಲೆ ಬರಶಿ ಆಶ್ಶಿಲೆ ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾನಿಂ ಮಠಾ ಖಾತೇರಿ ಪ್ರಧಾನಿಂಕ ಮಾಹಿತಿ ದಿಲ್ಲಿ. ಸಮಾರಂಭಾಚೆ ಸಾನಿಧ್ಯ ಘೆತ್ತಿಲೆ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾನಿಂ ಆಪಣೇಲೆ ಆಶೀರ್ವಚನಾಂತಆಯ್ಚೆ ದಿವಸು ಪರ್ತಗಾಳಿ ಮಠಾಚೆ ಇತಿಹಾಸಾಂತು ಸ್ವರ್ಣಾಕ್ಷರಾಂತು ಬರೋನು ದವರಚೆ ತಸ್ಸಾಲೆ ದಿವಸು. ತಾಕ್ಕಾ ಪ್ರಧಾನಿ ನರೇಂದ್ರ ಮೋದಿಂಗೆಲೆ ಆಗಮನಾಚಿ ಕಾರಣ. ಸಂತಾವರಿ ಶ್ರೀ ನರೇಂದ್ರ ಮೋದಿ ಚಾತುರ್ಮಾಸ ವ್ರತ ಆಚರಣ ಕರತಾತಿ, ನವರಾತ್ರಿಂತು ಉಪಾಸಿ ವ್ಹರತಾತಿ, ಅಸ್ಸಾಲೆ ಶ್ರೀ ಕೃಷ್ಣ ಪರಮಾತ್ಮಾ ಮ್ಹಣಕೆ ದೇಶಾ ಖಾತೇರಿ ವಿಚಾರ ಕೊರಚೆ ಶ್ರೀ ನರೇಂದ್ರ ಮೋದಿ ನಿಮಿತ್ತ್ಯಾನಿ ರಾಷ್ಟ್ರ ಕಿತ್ತುಲೆ ಉದರ್ಗತಿ ಪಾವ್ಲ್ಯಾ ಮ್ಹಣ್ಚೆ ತುಮಕಾ ಸಕಡಾಂಕ ಗೊತ್ತಽಆಸ್ಸಾ. ಶ್ರೀ ನರೇಂದ್ರ ಮೋದಿಂಗೆಲೆ ಯಶಾಂತು ತಾಂಗೆಲೆ ಅವಯಿಲೆ ಯೋಗದಾನ ವರೇನ ಆಸ್ಸಾ. ತಾನ್ನಿ ಅಸ್ಸಾಲೆ ವಜ್ರಾ ತಸ್ಸಾಲೆ ಧರ್ಮಪುತ್ರಾಕ ದಿಲೇಲೆ ನಿಮಿತ್ತ್ಯಾನಿ ದೇಶಾಕ ಚಾಂಗ ಜಾಲ್ಲೆ. ಶ್ರೀ ಮೋದಿ ನಿಮಿತ್ತ್ಯಾನಿ ದೇಶಾಕ ಆನ್ನಿಕೆ ಮಸ್ತ ಸೇವಾ ಪಾವ್ಚೆ ವರಿ ಜಾಂವೊ ಮ್ಹೊಣು ಹಾಂವ ದೇವಾಲೆಂ ಮಾಗ್ತಾ ಮ್ಹೊಣು ಸಾಂಗ್ಲೆ.
ಗೋಂಯ ಮುಖ್ಯಮಂತ್ರಿ ಡಾ|| ಪ್ರಮೋದ ಡಿ. ಸಾಮಂತಾನಿ ಗೊಂಯ್ಚೆ ಮಹತ್ವ, ಇತಿಹಾಸ, ವಿಶೇಷತಾ ಸಾಂಗೂನು “ಶ್ರೀ ಗೋಕರ್ಣ ಮಠ ತರಪೇನಿ ಘೆಲೀಲೆ ೫೫೦ ವರ್ಷಕಾಳ ಧಾರ್ಮಿಕ ಜಾಗೃತಿ ಕರತಾ ಆಯಲೀಲೆ ಕಾರಣಾಕ ಆಪ್ಪಣ ಸ್ವಾಮೀಜಿಕ ಅಭಿನಂದನಾ ಕರತಾ. ಹೇ ಕಾರ್ಯಕ್ರಮಾಕ ಆಯಲೀಲೆ ಪ್ರಧಾನಿಂಕ ಹಾರ್ದಿಕ ಜಾವ್ನು ಯವಕಾರ ಕರತಾ ಮ್ಹಳ್ಳೆ.
ತಾಜ್ಜಪಶಿ ಪಯ್ಲೆ ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಚೆ ೫೫೦ ವರ್ಷಾಚರಣೆ ಪ್ರಯುಕ್ತ ಪ್ರಧಾನಿ ಮೋದಿನಿ ವಿಶೇಷ ಪಾವಲಿ(ನಾಣ್ಯ) ಆನಿ ವಿಶೇಷ ಫೋಸ್ಟಲ್ ಸ್ಟಾಂಪ ಉಗ್ತಾವಣ ಕೆಲ್ಲಿ.
ಶ್ರೀ ದೇಂಪೋ ಮಾಮ್ಮಾನಿ ಯೆವಕಾರ ಕೆಲ್ಲಿ, ಗೊಂಯ್ಚೆ ರಾಜ್ಯಪಾಲ, ಕೇಂದ್ರ ಸಮಿತಿ ಉಪಾಧ್ಯಕ್ಷ ಶ್ರೀ ಆರ್. ಆರ್. ಕಾಮತ ಆದಿ ಗಣ್ಯ ಲೋಕ ಹೇ ವೇಳ್ಯಾರಿ ಸಮಾರಂಭಾಂತು ಉಪಸ್ಥಿತ ವ್ಹರಲೀಲೆ. ಜಗಾಂತು ಅತ್ಯಧಿಕ ಉಂಚ ಶ್ರೀ ರಾಮಾಲರ ಮೂತಿಘಚೆ ನಿರ್ಮಾಣ ಪದ್ಮಭೂಷಣ ಪುರಸ್ಕೃತ ರಾಮ ಸುತಾರ್ ತಾನ್ನಿ ಕೆಲೀಲೆ. ಹಾನ್ನಿ ಗುಜರಾತ್ತಾಚೆ ನಾಮಾಧಿಕ ಸರ್ದಾರ್ ವಲ್ಲಭಬಾಯಿ ಪಟೇಲ್ ತಶೀಚಿ ಬೆಂಗಳೂರ್ಚೆ ನಾಡಪ್ರಭು ಕೆಂಪೇಗೌಡಾಂಗೆಲೆ ಮೂರ್ತಿ ವಿನ್ಯಾಸ ಕೆಲೀಲೆ ಹಾಂಗಾ ಸ್ಮರಣ ಕೊರನು ಘೆವಯೇತ. ಕರ್ನಾಟಕ, ಗೋಂಯ ಆನಿ ಮಹಾರಾಷ್ಟ್ರ ಸಹಿತ ದೇಶಾದ್ಯಂತಾಚಾನ ಪಂದ್ರ – ವೀಸ ಹಜಾರ ಸಮಾಜ ಬಾಂದವ ಹೇ ಸಮಾರಂಭಾಕ ಆಯ್ಯಿಲೆ.