‘ಸಮಾಜ-ಸಂಘಟನೆಂತ ಆನಿ -ಶ್ರೇಯೊಭಿವೃದ್ಧಿಂತ ಆಮಗೆಲೆ ಪಾತ್ರ’ ಮ್ಹೊಣಚೆ ಧ್ಯೇಯವಾಕ್ಯ ದಾಕುನ ‘ಪ್ರೇರಣಾ 2024’, ಏಕ ದಿವಸಾಚೆ ಚಟುವಟಿಕಾ ಬದ್ದಲ, ವ್ಯಕ್ತಿತ್ವ ವಿಕಸನಾ ಶಿಬಿರ 28-07-2024 ವಿಶ್ವ ಕೊಂಕಣಿ ಕೇಂದ್ರಾಂತ ಮಾಂಡುನ ಹಾಳ್ಳೆ. ದ.ಕ. ಜಿಲ್ಲಾ ಕುಡಾಳ್ ದೇಶಸ್ಥ ಆಧ್ಯ ಗೌಡ್ ಬ್ರಾಹ್ಮಣ ಸಂಘ (ರಿ) ಆನಿ ಶ್ರೀ ಪೂರ್ಣಾನಂದ ಸೇವಾ ಪ್ರತಿಷ್ಠಾನ (ರಿ) ವತೀನ ಆಯೋಜನ ಕೆಲೆಲೆ ಶಿಬಿರಾಂತ ಸಮಾಜಾಚೆ ಸುಮಾರ 100 ಜನ ಶಿಭಿರಾರ್ಥಿಂ, ಸಮಾಜ ಸಂಘಟನೆಂತ ಹರ ಎಕಲಾಲೆ ಪಾತ್ರ, ಬಾಯಲಾಂಗೆಲೆ ಪಾತ್ರ, ಧಾರ್ಮಿಕ ಕಾರ್ಯಕ್ರಮಾಕ ಸಾಮಾಜಿಕ ಸ್ಪರ್ಶ, ಮಾಧ್ಯಮಾಚೆ ಯಶಸ್ವೀ ಉಪಯೋಗ, ಆನಿ ಲ್ಹಾನ ಆನಿ ಮ್ಹಾಲ್ಗಡೆ ಹೊಂದಾಣಿಕಾ, ಸಂಪನ್ಮೂಲ ತತ್ವ ವಿಚಾರ, ಸಂಘಸಂಸ್ಥೆಂತ ಯಶ, ಸಭೆ ಕಲಾಪ ಸಮಾರಂಭಾಂತ ಶಿಸ್ತು ಅಶಿಂ ವೆವೆಗಳೆ ವಿಚಾರ ಚರ್ಚಾ ಕಾರ್ಯಾಗಾರಾಂತ ಭಾಗಿ ಜಾವನು ಪ್ರಯೋಜನ ಪಾವಲಿಂತಿ.
ರಾಷ್ಟ್ರ ತರಬೇತುದಾರರ ಪುತ್ತೂರಚೆ ಕೃಷ್ಣ ಮೋಹನ ಪಿ.ಎಸ್., ಪಶುಪತಿ ಶರ್ಮಾ ಕೆ, ಸತೀಶ ಭಟ್, ಹಾನ್ನಿ ಉತ್ತಮ ಜಾವನು ತರಬೇತ ದಿಲೆಂ. ಶಿಬಿರಾಚೆ ಪ್ರಾರಂಭಾಂತ ವಿಶ್ವ ಕೊಂಕಣಿ ಕೇಂದ್ರ ಅಧ್ಯಕ್ಷ ಶ್ರೀ ಸಿ. ಎ. ನಂದಗೋಪಾಲ ಶೆಣೈ ಹಾನ್ನಿ ಸಭೆಚೆ ಅಧ್ಯಕ್ಷತೆ ಘೆತಲೆಂ. ಆಮ್ಮಿ ಆಮಕಾ ದುಸರೆಂಗೆಲೆ ಸಾಂಗಾತಾಕ ತುಲನ ಕರನಾಶಿ ಆಮಗೆಲೆ ಉದ್ಧಾರಾಕ ಆಮ್ಮೀಚಿ ಕಾರಣ ಜಾವಚೆ ತಶಿಂ ಆತ್ಮವಿಶ್ವಾಸಾನ ಆಸುಕಾ. ಹೊಡ ಸೊಪನ ಪೊಳೊವಕಾ ಆನಿ ತೆಂ ಸೊಪನ ಸಾಕಾರ ಕರಚಾಕ ಸಾಧನ ಕರಕಾ ಅಶಿಂ ಮಸ್ತ ಇತಲೆ ಸ್ಫೂರ್ತಿ ದಿವಚೆ ತಸಲೆ ವಿಚಾರ ಸಾಂಗಲೆಂ. ಕೇಂದ್ರಾಚೆ ಕಾರ್ಯದರ್ಶಿ ಡಾ ಕೆ ಮೋಹನ್ ಪೈ ಹಾನಿ ಶಿಭಿರಾರ್ಥಿಂಕ ಶುಭ ಸಾಂಗಲೆಂ. ಕುಡಾಳ್ ದೇಶಸ್ಥ ಆಧ್ಯ ಗೌಡ್ ಬ್ರಾಹ್ಮಣ ಸೇವಾ ಸಂಘಾಚೆ ಅಧ್ಯಕ್ಷ ಕೂಡಿಬೈಲು ಶ್ರೀನಿವಾಸ ಶೆಣೈ, ಕಾರ್ಯದರ್ಶಿ ದಯಾನಂದ ನಾಯಕ್, ಶ್ರೀ ಪೂರ್ಣಾನಂದ ಸೇವಾ ಪ್ರತಿಷ್ಟಾನಾಚೆ ಅಧ್ಯಕ್ಷ ವಿಜಯ ಶೆಣೈ ಕೊಡಂಗೆ, ಕಾರ್ಯದರ್ಶಿ ಮುರಲೀಧರ ಪ್ರಭು ವಗ್ಗ, ವಿಶ್ವ ಕೊಂಕಣಿ ಕೇಂದ್ರಾಚೆ ಕೋಶಾಧಿಕಾರಿ ಬಿ ಆರ್ ಭಟ್, ಸಿಎಒ ಡಾ. ಬಿ ದೇವದಾಸ ಪೈ ಉಪಸ್ಥಿತ ಆಶಿಲಿಂಚಿ. ಕಾರ್ಯಕ್ರಮಾಚೆ ಪ್ರಾಯೊಜಕ ಆನಿ ಕೇಂದ್ರಾಚೆ ಟ್ರಸ್ಟಿ ಶ್ರೀ ಡಿ ರಮೇಶ ನಾಯಕ್ ಹಾನಿ ಪ್ರಾಸ್ತಾವಿಕ ಉತ್ರಂ ಉಲೊವನು ಸ್ವಾಗತ ಕೆಲೆಂ. ವಿಜಯಲಕ್ಷ್ಮಿ ನಾಯಕ್ ಹಾನಿ ಕಾರ್ಯಕ್ರಮ ನಿರೂಪಣ ಕರನು ದೆವು ಬರೆಂ ಕೊರೊ ಸಾಂಗಲೆಂ.