ಮುನಿಯಾಲ್ ಕೌಂಡಿಣ್ಯ ಗೋತ್ರ ನಾಯಕ್ ಕುಲಪುರುಷ ಸಮಿತಿ (ರಿ.), ಉಡುಪಿ ಹಾಂಚೆ ವತಿನ, ಶ್ರೀ ಯಾದವೇಂದ್ರ ಆಯುರ್ವೇದ ವೈದ್ಯಶಾಲಾ, ಅನಂತ ಜ್ಯೋತಿ ನೇತ್ರಾಲಯ, ಉಡುಪಿ, ಶ್ರೀ ಗಜಾನನ ನಾಯಕ್ I-Needs Optical Udupi ಆನಿ ಶ್ರೀ ಭುವನೇಂದ್ರ ಪಂಚಕರ್ಮ ಕೇಂದ್ರ, ಕೋಟೇಶ್ವರ ಹಾಂಚ್ಯಾ ಸಹಯೋಗಾನಿ ಸಮಾಜಾಚ್ಯಾ ಆರೋಗ್ಯಾಚ್ಯಾ ಹಿತದೃಷ್ಟೀನ್, ಮೋಫತ್(ಉಚಿತ) ದೋಳ್ಯಾಂಚಿ ತಪಾಸಣ ಆನಿ ಆರೋಗ್ಯ ಶಿಬಿರ್ ಆರತಾಂ ಮುನಿಯಾಲಚ್ಯಾ ಶ್ರೀ ವೆಂಕಟರಮಣ ದೇವಳಾಚ್ಯಾ ಸಭಾಭವನಾಂತ್ ಘಡೋವನ್ ಹಾಡ್ಲೆಂ.
ಹೇ ವೇಳ್ಯಾರಿ ೧೫೦ ಪಶಿ ಚಡ್ ಲೋಕಾಂನಿ ಶಿಬಿರಾಂತ್ ವಾಂಟೊ ಘೆತ್ಲೊ ಆನಿ ಮೋಫತ್ ದೋಳ್ಯಾಂಚಿ ತಪಾಸಣಿ, ಆರೋಗ್ಯ ಸಲ್ಲೊ ಆನಿ ವೈದ್ಯಕೀಯ ಮಾರ್ಗದರ್ಶನ ಹಾಂಚೊ ಫಾಯ್ದೊ ಕರೂನ್ ಘೆತ್ಲೊ.
ಶಿಬಿರಾಂತ್ ದೋಳ್ಯಾಂಚಿ ತಪಾಸಣಿ ಅನಂತ ಜ್ಯೋತಿ ನೇತ್ರಾಲಯ, ಉಡುಪಿ ಹಾಂಚೆ ಡಾ. ನರೇಂದ್ರ ಶೆಣೈ ಹಾಂಣಿ ಕೆಲೀ. ಶಿಬಿರಾರ್ಥ್ಯಾಂಚ್ಯಾ ನಜರೇಚಿ ಆನಿ ದೋಳ್ಯಾಂಚ್ಯಾ ಆರೋಗ್ಯಾಚಿ ತಪಾಸಣಿ ಕರೂನ್, ಗರಜ್ ಆಶಿಲ್ಲ್ಯಾಂಕ್ ಯೋಗ್ಯ ವೈದ್ಯಕೀಯ ಸಲ್ಲೊ ಆನಿ ಫುಡ್ಲ್ಯಾ ಉಪಚಾರಾಂವಿಶೀಂ ಮಾರ್ಗದರ್ಶನ ದಿಲೆಂ.
ತಪಾಸಣೇಚ್ಯಾ ವೆಳಾರ್ ನಜರೇಂತ್ ದೋಶ್ ದಿಸೂನ್ ಆಯಿಲ್ಲ್ಯಾ ೯೦ ಜಣಾಂಕ್ ಗರಜೆಪ್ರಮಾಣ್ ಚಷ್ಮೆ ದಿವಪಾಚಿ ವೆವಸ್ತಾ ಕೆಲೀ. ತಶೆಂಚ್, ೯ ಜಣಾಂಕ್ ದೋಳ್ಯಾಂತ್ ಮೋತಿಬಿಂದು (Cataract) ಆಶಿಲ್ಲ್ಯಾಚೆಂ ದಿಸೂನ್ ಆಯ್ಲೆಂ. ತಾಂಕಾ ಚಡ್ ತಪಾಸಣ ಆನಿ ಗರಜ್ ಪಡ್ಲ್ಯಾರ್ ಶಸ್ತ್ರಕ್ರಿಯೆ ಕರಪಾಖಾತೀರ್ ಯೋಗ್ಯ ವೈದ್ಯಕೀಯ ಕೇಂದ್ರಾಂತ್ ಧಾಡಪಾಚೆಂ ಮಾರ್ಗದರ್ಶನ ದಿಲೊ.
ಅಶೆಂ ಕರೂನ್, ಹೆಂ ಶಿಬಿರ್ ಫಕ್ತ ದೋಳ್ಯಾಂಚ್ಯಾ ತಪಾಸಣೇಪುರತೆಂ ಮರ್ಯಾದಿತ್ ಉರ್ಲೆಂ ನಾ, ತರೀ ಗರಜ್ ಆಶಿಲ್ಲ್ಯಾ ಲೋಕಾಂಕ್ ಫುಡ್ಲ್ಯಾ ಉಪಚಾರಾಂಖಾತೀರ್ ಯೋಗ್ಯ ಮಾರ್ಗದರ್ಶನ ದಿವನ್ ಏಕ್ ಮಹತ್ವಾಚೀ ಸಮಾಜಸೇವಾ ಕೆಲೀ.
ಶ್ರೀ ಗಜಾನನ ನಾಯಕ್ I-Needs Optical Udupi ಹಾಂಚ್ಯಾ ವತಿನ ಆಪ್ಟಿಕಲ್ ಸೇವಾ ಆನಿ ಚಷ್ಮ್ಯಾಂಚೀ ವೆವಸ್ತಾ ಕರಪಾಖಾತೀರ್ ಆವಶ್ಯಕ್ ತೇ ಸಹಕಾರ್ ಮೆಳ್ಳೆಂ.
ಶಿಬಿರಾಂತ್ ಶ್ರೀ ಯಾದವೇಂದ್ರ ಆಯುರ್ವೇದ ವೈದ್ಯಶಾಲೇಚೆ ಡಾ. ದಿನೇಶ್ ಕಾಮತ್ ಆನಿ ಡಾ. ಎನ್. ಎಸ್. ಕಾಮತ್, ತಶೆಂಚ್ ಶ್ರೀ ಭುವನೇಂದ್ರ ಪಂಚಕರ್ಮ ಕೇಂದ್ರ, ಕೋಟೇಶ್ವರ ಹಾಂಚ್ಯಾ ವತಿನ ಆಯುರ್ವೇದಿಕ್ ಉಪಚಾರ, ಶಾರೀರಿಕ್ ಆರೋಗ್ಯ ಆನಿ ಫಿಸಿಯೋಥೆರಪಿ ಹಾಂಚೆವಿಶೀಂ ಸಲ್ಲೊ ಆನಿ ಮಾರ್ಗದರ್ಶನ ದಿಲೆಂ.
ನಿರೋಗೀ ಜೀವನಶೈಲೀ, ಆಯುರ್ವೇದಿಕ್ ಉಪಚಾರಾಂಚೆಂ ಮಹತ್ವ್ ಆನಿ ವೇಗವೇಗ್ಳ್ಯಾ ಶಾರೀರಿಕ್ ತ್ರಾಸಾಂಖಾತೀರ್ ಘೆವಪಾಚ್ಯಾ ಯೋಗ್ಯ ಕಾಳಜೀವಿಶೀಂ ಲೋಕಾಂಕ್ ಆವಶ್ಯಕ್ ಮಾಹಿತೀ ದಿವಪಾಂತ್ ಆಯ್ಲೀ.
ಕಾರ್ಯಕ್ರಮಾಚ್ಯಾ ವ್ಯಾಸಪೀಠಾಚೆರ್ ಮುನಿಯಾಲ್ ಶ್ರೀ ವೆಂಕಟರಮಣ ದೇವಳಾಚೆ ಟ್ರಸ್ಟಿ ಶ್ರೀ ಶ್ರೀಧರ್ ಪೈ ಆನಿ ಶ್ರೀ ಗಣೇಶ್ ಪೈ ಹಾಜೀರ್ ಆಶಿಲ್ಲೆ. ತಾಂಣಿ ಶಿಬಿರಾಕ್ ಶುಭೇಚ್ಛಾ ದಿಲ್ಯೊ.
ತಶೆಂಚ್, ಅಜೆಕಾರುಚೆ ಪ್ರೇಮಾನಂದ ನಾಯಕ್, ಉಡುಪೀಚೆ ಉಮೇಶ್ ನಾಯಕ್, ಕುಕ್ಕುಂದೂರುಚೆ ಎಸ್. ಕಮಲಾಕ್ಷ ನಾಯಕ್, ಮಣಿಪಾಲಾಚೆ ಚಂದ್ರಕಾಂತ ನಾಯಕ್, ಉಡುಪೀಚೆ ಕೆ. ರಾಧಾಕೃಷ್ಣ ನಾಯಕ್, ಕಾರ್ಕಳಾಚೆ ಶ್ರೀಪತಿ ನಾಯಕ್, ಶ್ರೀ ಸತೀಶ ನಾಯಕ್, ಅಜೆಕಾರಾಚೆ ಅರವಿಂದ ನಾಯಕ್, ಹೆಬ್ರಿಚೆ ಶ್ರೀ ಸುಧೀರ್ ನಾಯಕ್, ಕೌಂಡಿಣ್ಯ ಗೋತ್ರ ನಾಯಕ್ ಕುಲಪುರುಷ ಸಮಿತಿ (ರಿ.)ಚೆ ಪದಾಧಿಕಾರಿ ಆನಿ ದೇವಳಾಚ್ಯಾ ಮಹಿಳಾ ಮಂಡಳಾಚ್ಯಾ ಸದಸ್ಯಾಂನಿ ಶಿಬಿರಾಚ್ಯಾ ಯೆಶಸ್ವಿ ತೇಖಾತೀರ್ ಪ್ರೋತ್ಸಾಹನ್ ಆನಿ ಸಹಕಾರ್ ದಿಲೆಂ.
ಕಾರ್ಯಕ್ರಮಾಚ್ಯಾ ಸಮನ್ವಯ್ ಆನಿ ವೆವಸ್ತಾಪನಾಂತ್ ಡಾ. ಕೃಷ್ಣಾನಂದ ನಾಯಕ್ ಹಾಂಣಿ ಮಹತ್ವಾಚೀ ಭೂಮಿಕಾ ಘೆತ್ಲೀ. ಮುಂಬಯಿಚ್ಯಾ ಶ್ರೀ ವರದೇಂದ್ರ ಚಾರಿಟೇಬಲ್ ಟ್ರಸ್ಟ್ ಹಾಂಚೆ ವೈದ್ಯಕೀಯ ಸಹಕಾರ್ ಲೆಗಿತ್ ಶಿಬಿರಾಕ್ ಮೆಳ್ಳೆಂ.
ಹ್ಯಾ ಅರ್ಥಪೂರ್ಣ ಸಮಾಜಸೇವೀ ಕಾರ್ಯಕ್ರಮಾಕ್ ಯೆಶಸ್ವೀ ಕರಪಾಖಾತೀರ್ ಸಹಕಾರ್ ಕೆಲ್ಲ್ಯಾ ಸಕ್ಕಡ ಡಾಕ್ಟರಾಂಕ್, ವೈದ್ಯಕೀಯ ಸಿಬ್ಬಂದೀಂಕ್, ಶ್ರೀ ವೆಂಕಟರಮಣ ದೇವಳಾಚ್ಯಾ ಟ್ರಸ್ಟೀಂಕ್, ಸಹಕಾರ್ ಕರಪೀ ಸಂಸ್ಥಾಂಕ್, ಸಮಿತೀಚ್ಯಾ ಪದಾಧಿಕಾರ್ಯಾಂಕ್, ಸ್ವಯಂಸೇವಕಾಂಕ್ ಆನಿ ಶಿಬಿರಾಂತ್ ವಾಂಟೊ ಘೆತಿಲ್ಲ್ಯಾ ಸಕ್ಕಡ ಸಮಾಜಬಾಂದವಾಂಕ್ ಕೌಂಡಿಣ್ಯ ಗೋತ್ರ ನಾಯಕ್ ಕುಲಪುರುಷ ಸಮಿತಿ (ರಿ.), ಉಡುಪಿ ಜಿಲ್ಲಾ ಸಮಿತೀಚ್ಯಾ ವತಿನ ಹಾರ್ದಿಕ್ ಕೃತಜ್ಞತಾ ವ್ಯಕ್ತ್ ಕೆಲ್ಯಾ.