ಜನವರಿ ೨೬ ಕ ಡಾ. ರಮೇಶ್ ಕಾಮತ್ ಹಾಂಗೆಲೆ ೫ ವೇಂ ಕೊಂಕಣಿ ಸಿನೇಮ್ರಾ ” ನಗ್ನ ಸತ್ಯ ” ಲೋಕಾರ್ಪಣ ಜಾಲ್ಲೆ. ಬೆಂಗಳೂರ್ಚೆ ಬಸವನಗುಡಿಂತು ಪೈ ವಿಸ್ತಾ ಸಭಾಂಗಣಾಂತು ಬಸಯಿಲ್ಲೆ ವಿನೂತನ ಐಇಆ ಪರದೆಂತು ಪ್ರದರ್ಶನ ಏರ್ಪಾಟ ಕೆಲೀಲೆ. ೧೦೦೦ ಪಶಿ ಚ್ಹಡ ಲೋಕ ಪ್ರೇಕ್ಷಕ ಸಭಾಂಗಣಾಂತು ಜಮೀಲೆ. ಬೊಸಚಾಕ ಕುರ್ಚಿ ನಾಶಿ ಮಸ್ತ ಪ್ರೇಕ್ಷಕ ನೆಲಾ ವಯ್ರಿ ಬೈಸೂನು ಸಿನೇಮ ಪಳಯಿಲೆ.
ಸಿನೇಮಾಚೆ ಪ್ರದರ್ಶನಾಕಚಿ ಪಯ್ಲೆ ಸಭಾ ಕಾರ್ಯಕ್ರಮ ಏರ್ಪಾಟ ಕೆಲೀಲೆ. ಅಧ್ಯಕ್ಷ ಜಾವ್ನು ಕೊಂಕಣಿ ಸಮಾಜಾಂತು ದಾನ ಶೂರ ಮ್ಹೊಣು ನಾಮಾಧಿಕ ಜಾಲೀಲೆ ಮ್ಹಾಲ್ಗಡೆ ಉದ್ಯಮಿ ಡಾ ದಯಾನಂದ ಪೈ ಉಪಸ್ಥಿತ ವ್ಹರಲೀಲೆ. ಪರಿಸರವಾದಿ ಶ್ರೀಮತಿ ರೇವತಿ ಕಾಮತ್ ಮುಖೇಲ ಸೊಯರೆ ಜಾವ್ನು ಆಯಲೀಲೆ. ಆನ್ನೇಕ್ಳೆ ಮುಖೇಲ ಸೊಯರೆ ಪೈ ಗ್ರೂಪ್ಸ್ ಮಾಲೀಕ ಜಾಲೀಲೆ ಶ್ರೀ ಜಗನ್ನಾಥ್ ಪೈ ತಾನ್ನಿ ಅನಾರೋಗ್ಯ ಕಾರಣಾನಿ ಸಮಾರಂಭಾಕ ಹಾಜರ ಜಾಯನಿ. ಹೇ ಸಮಾರಂಭಾಕ ಮಾನಾಚೆ ಸೊಯರೆ ಜಾವ್ನು ಶ್ರೀ ಉಪೇಂದ್ರ ನಾಯಕ್, ಶ್ರೀ ಜಿ. ಜಿ. ಶೆಣೈ ಆನಿ ಶ್ರೀ ವೆಂಕಟೇಶ್ ಪ್ರಭು ಹಾಜರಾಶ್ಶಿಲೆ.
ದೀಪಜ್ಯೋತಿ ಪ್ರಜ್ವಲನೆ ನಂತರ ಸೊಯರ್ಯಾಲೆ ಪರಿಚಯ ವಾಗ್ಮಿ ಆನಿ ವಕೀಲ ಜಾಲೀಲೆ ಶ್ರೀ ಸುಧಾಕರ್ ಪೈ ತಾನ್ನಿ ಕೆಲ್ಲಿ. ನಿರ್ಮಾಪಕಿ ಕಿರಣ್ಮಯಿ, ನಿರ್ದೇಶಕ ಡಾ ರಮೇಶ್ ಕಾಮತ್ ಆನಿ ಶ್ರೀ ಗಣೇಶ್ ಪ್ರಭು ತಾನ್ನಿ ಸೊಯರ್ಯಾಂಕ ಸನ್ಮಾನ ಕೆಲ್ಲಿ.
ಶ್ರೀಮತಿ ರೇವತಿ ಕಾಮತ್ ಉಲಯತಾ “ಕೊಂಕಣಿ ಸಿನೇಮಾ ಕೊರಚೆ ಮಸ್ತ ಕಷ್ಟಾಚೆ ಕಾಮ, ಕಿತಯಾಕ ಮ್ಹಳಯಾರಿ ಘಾಲೀಲೆ ದುಡ್ಡು ಪರತೂನು ಯವಚೆ ವಿರಳ. ತಶ್ಶಿ ಆಸಲೇರಿಚಿ ಡಾ ರಮೇಶ್ ಕಾಮತ್ ತಾನ್ನಿ ಪಾಂಚ ಕೊಂಕಣಿ ಸಿನೇಮಾ ಕೆಲ್ಲ್ಯಾಂತಿ ಮ್ಹಳಯಾರಿ ತಾಂಕಾ ಸಕ್ಕಡ ಕೊಂಕಣಿ ಸಮುದಾಯಾಚೆ ಸಹಾಯ ಹಸ್ತ ದಿವ್ಕಾ ಆನಿ ಪ್ರೋತ್ಸಾಹ ಜಾವ್ಕಾ ಮ್ಹಳ್ಳೆ. `ಪರಿಸರ ರಾಕಚ್ಯಾಂತು ಆಪಣೇನಿ ೪೦ ವರ್ಷಾಚಾನ ವಾವರೋ ಕೆಲ್ಲಾ, ಹಾಕ್ಕಾ ಲೋಕಾನಿ ಸಹಕಾರ ದಿವ್ಕಾ, ಹರಯೇಕ ಪ್ರಜಾನಿ ಕನಿಷ್ಟ ಏಕ ಜಾಡ ಪೂಣಿ ರೋವ್ನು, ರುಕ್ಕಾಚೆ ಪಾಲನ ಕೊರನು, ಪರಿಸರ ರಾಕ್ಕಾ ಮ್ಹಣ್ಚೆ ಆಪೋವ್ಣಿ ತಾನ್ನಿ ದಿಲ್ಲೆ.
ಡಾ ದಯಾನಂದ ಪೈ ತಾನ್ನಿ ಉಲೋನು “ಆಪಣೇಲೆ ಆನಿ ಡಾ ರಮೇಶ್ ಕಾಮತ್ ತಾಂಗೆಲೆ ಮೈತ್ರಿಕ ೫೦ ವರ್ಷ ಜಾಲ್ಲ್ಯಾ. ಮೈಸೂರಾಂತು ಆಶ್ಶಿಲ ತೆದ್ನಾ ಒಟ್ಟೊಟ್ಟು ನಾಟಕ ಕರತಾಲೆ. ಆಪಣೇಕ ನಾಟಕ ಆನಿ ಸಿನೇಮಾಚೆಂ ವ್ಯಾಸನ ಆಸ್ಸಾ. ಸಬಾರ ನಾಟಕಾಂತು ಅಭಿನಯ ಕೆಲ್ಲ್ಯಾ. ರಮೇಶ್ ಕಾಮತ್ತಾಂಗೆಲೊ ದೋನಿ ಸಿನೇಮಾಂತು ಅಭಿನಯ ಕೆಲ್ಲ್ಯಾ. ಆಯ್ಚೆ ” ನಗ್ನ ಸತ್ಯ ” ಸಿನೇಮಾಂತೂ ಗೌರವ ನಟ ಜಾವ್ನು ಅಭಿನಯ ಕೆಲ್ಲ್ಯಾ. ಕನ್ನಡಾಚೆ “ಆ-ದಿನಗಳು” ಸಿನೇಮಾಂತ್ಲು ಗಿರೀಶ್ ಕಾರ್ನಾಡ್ ಬರಶಿ ಅಭಿನಯ ಕೆಲ್ಲ್ಯಾ.
ಸಾರಸ್ವತ ಶೈಲಿಚೆ ಕೊಂಕಣಿಂತು ಆಜ ಪಾಸೂನು ಆಯಲೀಲೆಚಿ ಖಾಲಿ ೧೦ ಸಿನೇಮಾ. ತಾಂತು ಡಾ ರಮೇಶ್ ಕಾಮತ್ ತಾನ್ನಿ ಪಾಂಚ ಸಿನೇಮಾಚೆ ನಿರ್ದೇಶನ ಕೆಲ್ಲ್ಯಾ. ತಾಂಗೆಲೆ ಬಾಯ್ಲೇನಿ ನಿರ್ಮಾಪಕಿ ಜಾವ್ನು ದುಡ್ಡು ಘಾಲ್ಲ್ಯಾ. ಸೋದರ ಭಾಸ ತುಳುಂತು ೨೫೦ ಪಶಿ ಚ್ಹಡ ಸಿನೇಮಾ ನಿರ್ಮಾಣ ಜಾಲ್ಲ್ಯಾ. ಸಾರಸ್ವತ ಕೊಂಕಣಿ ಭಾಷೆಂತು ಕೇವಲ ೧೦ ಸಿನೇಮಾ ನಿರ್ಮಾಣ ಜಾಲ್ಲ್ಯಾ ಮ್ಹಳಯಾರಿ ಆಮ್ಗೆಲೆ ಭಾಷಿಕಾಂಕ ಭಾಷಾಭಿಮಾನ ನಾ ಮ್ಹೊಣು ಜಾಲ್ಲೆ. ಆಪಣೇನಿ ರಮೇಶ್ ಕಾಮತ್ ತಾಂಕಾ ತಾನ್ನಿ ಕೊಂಕಣಿ ಸಿನೇಮಾ ತಯಾರ ಕೆಲೀಲೆ ತೆದ್ದನಾ ದುಡವಾ ಮದತ್ ದಿಲ್ಲ್ಯಾ. ತಶೀಚಿ ಆಮ್ಗೆಲೆ ದೇಶಾಚೆ ವೆಗಳೆ ಕೊಂಕಣಿ ಸಂಸ್ಥೆಚಾನಿ ಮುಖಾರಿ ಯವ್ನು ರಮೇಶ್ ಕಾಮತ್ ತಸ್ಸಾಲ್ಯಾಂಕ ಪ್ರೋತ್ಸಾಹ ದಿಲೀಲೆ ತೆದ್ದನಾ ಮಾತ್ರ ಮುಖಾವೈಯ್ಲೆ ದಿವಸಾಂತು, ಕೊಂಕಣಿ ಯುವ ಜನಾಂಗ ಸಿನೇಮಾ ತಯಾರ ಕೊರಚಾಕ ಆಸಕ್ತಿ ದಾಖಯಚಾಕ ಪುರೊಂತಿ ಮ್ಹೊಣು ಸಾಂಗ್ಲೆ.
ನಗ್ನ ಸತ್ಯ ಸಿನೇಮಾಚೆ ಪ್ರದರ್ಶನಾಚೆ ಉಪರಾಂತ ಜಮೀಲೆ ಪ್ರೇಕ್ಷಕ ಉಟಾನು ರಾಬ್ಬುನು ಕರತಾಡನ ಕೊರನು, ಚಿತ್ರ ತಂಡಾಕ ತಾರೀಪು ಕೆಲ್ಲೆ. ಹರಯೆಕ್ಲ್ಯಾನಿ ವೇದಿಕೇಕ ಯವ್ನು ನಿರ್ದೇಶಕ ಡಾ ರಮೇಶ್ ಕಾಮತ್ ಆನಿ ನಿರ್ಮಾಪಕಿ ಕಿರಣ್ಮಯಿ ತಾಂಕಾ ಶ್ಲಾಘನ ಕೆಲ್ಲಿ.
ಪ್ರೇಕ್ಷಕಾಲೆ ಪ್ರಕಾರ, ಒಟ್ಟಾರೆ ” ನಗ್ನ ಸತ್ಯ ” ಸಿನೇಮ ಅದ್ಬುತ ಜಾವ್ನು ತಯಾರ ಜಾವ್ನು ಆಯ್ಲ್ಯಾ. ಹರ್ಯೇಕ ಕಲಾವಿದಾನಿ ಪಾತ್ರಾಕ ಸಮ್ಮ ಜಾವ್ನು ಪ್ರಭುದ್ದ ಜಾವ್ನು ಅಭಿನಯ ದಿಲ್ಲ್ಯಾ. ಛಾಯಾಗ್ರಾಹಣ ಖಂಚೇಯಿ ಹಿಂದಿ ಸಿನೇಮಾಕ ತುಲನ ಕೆಲಯಾರೀಚಿ ಕಮ್ಮಿ ಕಾಂಯಿ ನಾ. ಸಂಗೀತ, ಸಂಕಲನ, ಸಂಭಾಷಣ ಸಕ್ಕಡ ಹರಯೇಕ್ಲ್ಯಾಲೆ ನಿರೀಕ್ಷೆ ಪಶಿ ಉನ್ನತ ಜಾವ್ನಾಸ್ಸಾ.
ಆಮ್ಗೆಲೆ ಆಲ್ತಾ ಪೆಲ್ತಾಂತು ಚೊಲ್ಚೆ ನಿಜ ಜೀವನಾಚೆ ಘಟನೆ ಆಧರ್ಸುನು `ನಗ್ನಸತ್ಯ ಸಿನೇಮ ತಯಾರ ಜಾಲ್ಲ್ಯಾ. ಮಧ್ಯಮ ವರ್ಗಾಚೆ ಬಾಯ್ಲೆಮನ್ಶೆಕ ಏಕಳ್ಯಾಕ ಪ್ರೀತಿಂತು ಮೋಸ ಕೊರನು ಸಮಾಜಾಚೆ ಗಣ್ಯ ಮನುಷ್ಯಾ ತಾಕೂನು ಚಿತ್ರಹಿಂಸಾ ದಿತ್ತಾತಿ. ತಿಕ್ಕಾ ನ್ಯಾಯಾಂಗ, ಶಾಸಕಾಂಗ ಆನಿ ಕಾರ್ಯಂಗಾಂತು ಕಿತ್ತುಲೆ ವಾವರೋ ಕೆಲಯಾರೀಚಿ ನ್ಯಾಯ ಮೇಳ್ನಾ. ತೀ ಚೆಲ್ಲಿಯಾ ಚರಡಾಕ ಜನ್ಮು ದೀವನು ಮರಣ ಪಾವ್ಲಿ. ತ್ಯಾ ಚರಡು ವ್ಹಡ ಜಾವನು ಪತ್ರಕಾರ ಜಾಲ್ಲಿ. ಆವಯಿನ ಮೊರನು ೨೦ ವರ್ಷ ನಂತರ, ತೀ ತನಿಖಾ ಕೊರನು ಅಖೇರಿಕ ಅಪರಾದಿಂಕ ಸೊದ್ದಿತಾ, ತಾಜ್ಜೇನ ಪತ್ರಿಕೋದ್ಯಮ ಚಾರಿಚೆ ಸ್ತಂಭ ಜಾವಕಾ ಮ್ಹೊಣು ತೀ ಜಗಾಕ ದಾಖಯಲಿ. ಪತ್ರಕೋದ್ಯಮಾನಿ ಸಮಾಜಾಕ ಖರೇ ಜಾಲೀಲೆ ನ್ಯಾಯು ಮೆಳ್ತಾ.
ಡಾ ರಮೇಶ್ ಕಾಮತ್ ತಾಂಗೆಲೆ ಖಾತ್ತಿರಿ ಸಾಂಕಾ ಮ್ಹಳಯಾರಿ ತಾನ್ನಿ ೭೫ ವರಸಾಚೆ ತರ್ನಾಟೆ, ಎಲೆಕ್ಟ್ರಿಕಲ್, ಸೌಂಡ್ ಆನಿ ಕಂಪ್ಯೂಟರ್ ಇಂಜಿನಿಯರ್. ಪೂನಾ ಫಿಲಂ ಇನ್ಸ್ಟಿಟ್ಯೂಟ್ ಹಾಜ್ಜೆ ಪಧವಿದರರ. ಕರ್ನಾಟಕ ಸರ್ಕಾರಾಚೆ ಸಬಾರ ಇಲಾಖೆಂತು ಉನ್ನತ ಹುದ್ದೆಂತು ಸೇವಾ ಪಾವಯಿಲೆ. ಜವಹರ್ ಲಾಲ್ ನೆಹರು ತಾರಾಲಯಾಚೆ ನಿರ್ದೇಶಕ ಜಾವ್ನಾಶ್ಶಿಲೆ. ಸಾಹಿತಿ, ಸಂಗೀತಕಾರ, ನಾಟಕಗಾರ, ಕೊಂಕಣಿ ಭಾಷೆಂತು ಹಾನ್ನಿ ಪಾಂಚ ಸಿನೇಮಾ ನಿರ್ದೇಶನ ಕೆಲ್ಲ್ಯಾ. ಜನಮನ ( ೧೯೮೦ ), ಆ ವೈ ಜಾ ಸಾ ( ೨೦೧೬ ) ಅಪ್ಸರಧಾರ ( ೨೦೧೯ ) ಅಂತ್ಯಾರಂಭ ( ೨೦೨೪) ಆನಿ ನಗ್ನ ಸತ್ಯ ( ೨೦೨೫ ). ಹಾಂಗೆಲೆ ಸಿನೇಮ ಸಬಾರ ಪ್ರತಿಷ್ಠಿತ ಇಂಟರ್ನ್ಯಾಷನಲ್ ಫಿಲಂ ಫೆಸ್ಟಿವಲ್ಂತು ವೆಂಚೂನು ಯವ್ನು ಪ್ರದರ್ಶಿತ ಜಾಲ್ಲ್ಯಾ.
ಸಬಾರ ರಾಜ್ಯ, ರಾಷ್ಟ್ರ ಆನಿ ಅಂತರರಾಷ್ಟ್ರೀಯ ಪ್ರಶಸ್ತಿ ಜಿಕಲೀಂತಿ. ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡಮಿಚಾನಿ ೨೦೨೨ ಇಸ್ವೆಂತು ಕೊಂಕಣಿ ಭಾಷಾ ಸೇವೆ ಖಾತ್ತಿರಿ ರಮೇಶ್ ಕಾಮತ್ ಮಾಮ್ಮಾಕ ಜೀವಮಾನ ಸಾಧನೆ ಪ್ರಶಸ್ತಿ ದೀವ್ನು ಗೌರವ ಕೆಲ್ಲ್ಯಾ.
ಕುಮಾರಿ ಕಿರಣ್ಮಯಿ ತಾನ್ನಿ ದೋನಿ ಕೊಂಕಣಿ ಸಿನೇಮಾ( ಅಂತ್ಯಾರಂಭ ಆನಿ ನಗ್ನ ಸತ್ಯ ) ನಿರ್ಮಾಣ ಕೆಲ್ಲ್ಯಾ. ದೋನಿ ಕೊಂಕಣಿ ಸಿನೇಮಾಂತು ಅಭಿನಯ ಕೆಲ್ಲ್ಯಾ. ಹಾನ್ನಿ ಬಾಟಾ ಇಂಡಿಯಾ, ಇಂಡೋ ಅಮೆರಿಕನ್ ಹೈ ಬ್ರೀಡ್ಸ್ ಆನಿ ಜಾನ್ ಫೌಲರ್ ಹಾಂತು ಕಾರ್ಯದರ್ಶಿ ಜಾವ್ನು ಕಾಮ ಕೆಲ್ಲ್ಯಾ.
ಹೇ ಸಿನೇಮಾಂತು ನಾಯಕಿ ಜಾವ್ನು ಆದ್ಯ ನಾಯಕ್, ನಾಯಕ ಜಾವ್ನು ವಿಶ್ವನಾಥ್ ಕಿಣಿ, ಗೋಪಿನಾಥ್ ಭಟ್, ಗಣೇಶ್ ಪ್ರಭು, ಆನಂದ್ ನಗರ್ಕರ್, ಮೀರಾ ನಯಂಪಲ್ಲಿ, ಗೋಪಾಲಕೃಷ್ಣ ಭಟ್, ಕುಮಾರಿ ಗ್ರೀಷ್ಮ ಪ್ರಭು, ಕರ್ನಲ್ ಅಶೋಕ್ ಕಿಣಿ, ನಾಗೇಂದ್ರ ನಾಯಕ್ ಪಾಂಗಳ್, ಶೀಲಾ ನಾಯಕ್, ರಮೇಶ್ ಕಾಮತ್, ರಾಹುಲ್ ಕಿಣಿ, ಅನಂತ್ ನಾಯಕ್ ಸಗ್ರಿ, ಕೃಷ್ಣ ನಾಯಕ್, ನಾಗರಾಜ್ ಪಾವಟೆ, ಗೌರಿ ಪ್ರಭು, ಗಣೇಶ್ ನಾಯಕ್ ಆದಿ ಲೋಕಾನಿ ಅಭಿನಯ ಕೆಲ್ಲ್ಯಾ.
ಛಾಯಾಗ್ರಾಹಣ – ಪಿ ವಿ ಆರ್ ಸ್ವಾಮಿ, ಸಂಕಲನ – ಎನ್ ನಾಗೇಶ್, ಸಂಗೀತ – ಶ್ರೀ ಸುರೇಶ, ಹಿನ್ನೆಲೆ ಗಾಯನ – ರಾಜೇಶ್ ಪಡಿಯಾರ್ ಮತ್ತು ಮೇಘನಾ ಹಳಿಯಾಳ್.
ಕಥೆ,ಚಿತ್ರಕಥೆ,ಗೀತೆ,ನಿರ್ದೇಶನ : ಡಾ ಕೆ ರಮೇಶ್ ಕಾಮತ್ . ನಿರ್ಮಾಪಕಿ : ಕಿರಣ್ಮಯಿ ಕಾಮತ್