ಆಮ್ಗೆಲೆ ಪೀಠಾಧಿಪತ್ಯಾಕ ಮ್ಹಾಲ್ಗಡೆ ಗುರುಂಗೆಲೆ ಸಂಪೂರ್ಣ ಕೃಪಾಶೀರ್ವಾದ ತಶೀಚಿ ಮಾರ್ಗದರ್ಶನಽಚಿ ಕಾರಣ. ಪರ್ತಗಾಳಿಚೆ ಶ್ರೀರಾಮ ದೇವಾಲೊ ಭವ್ಯ ಕಾಂಸ್ಯಚೆ ಪ್ರತಿಮೆಕ ಮೆಳೀಲೆ ರೆಕಾರ್ಡ್, ಪ್ರಮಾಣಪತ್ರಾಂಕ ಆಪಣೇಳೆ ಮ್ಹಾಲ್ಗಡೆ ಗುರೂಂಕ ಸಮರ್ಪಣ ಕರತಾ. ಹೇ ಗೌರವು ತಾಂಗೆಲೆ ಪಾದಸ್ಪರ್ಶಾಕ ಮೆಳ್ಕಾ. ಮ್ಹೊಣು ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಪರಮ ಪೂಜ್ಯ ಶ್ರೀಮದ್ ಶ್ರೀ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮೀಜಿ ತಾನ್ನಿ ಸಾಂಗ್ಲೆ.
ಗೋಂಯ್ಚೆ ಕಾಣಕೋಣಾಚೆ ಪರ್ತಗಾಳಿ ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಚೆ ಆದರ್ಶ ಧಾಮಾಂತು ಸ್ಥಾಪಿತ ಮರ್ಯಾದಾ ಪುರುಷೋತ್ತಮ ಶ್ರೀರಾಮಾಚಂದ್ರಾಲೆ ಕಾಂಸ್ಯಾಚೆ ಪ್ರತಿಮಾ ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್ ತಶೀಚಿ ಏಷ್ಯಾ ಬುಕ್ ಆಫ್ ರೆಕಾರ್ಡ್ಸ ಹಾಂತು ಅತ್ಯಧಿಕ ಊಂಚ ಕಾಂಸ್ಯಾ ಪ್ರತಿಮಾ ಮ್ಹಣ್ಚೆ ದಾಖಲೆಕ ಪಾತ್ರ ಜಾಲ್ಲ್ಯಾ.
ಪರಮ ಗುರು ಶ್ರೀ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾಂಗೆ ೮೨ವೇಂ ಜನ್ಮತಿಥಿ ಅಂಗ ಜಾವ್ನು ಆ.೨೭ಕ ಚಲೀಲೆ ಕಾರ್ಯಕ್ರಮಾಂತು ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್ ತಶೀಚಿ ಏಷ್ಯಾ ಬುಕ್ ಆಫ್ ರೆಕಾರ್ಡ್ಸ್ನ ಅಧಿಕೃತ ತೀರ್ಪುಗಾರ್ತಿ ಡಾ. ಚಿತ್ರಾ ಜೈನ್ ತಾನ್ನಿ ದಾಖಲೆ ಪ್ರಮಾಣಪತ್ರ ಶ್ರೀ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂಕ ಹಸ್ತಾಂತರ ಕೆಲ್ಲಿ.
ಪರಮ ಪೂಜ್ಯ ಶ್ರೀಮದ್ ಶ್ರೀ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂಗೆಲೆ ದಿವ್ಯ ಮಾರ್ಗದರ್ಶನಾಂತು ನಿರ್ಮಾಣ ಜಾಲೀಲೆ ಹೇ ಭವ್ಯ ಪ್ರತಿಮಾ ಪೀಠಚಾನ ೭೮.೭೪ ಅಡಿ (೨೪ ಮೀಟರ್) ಊಂಚ ಆಸ್ಸಾ. ಭಾರತಾಚೆ ಗೌರವಾನ್ವಿತ ಪ್ರಧಾನಮಂತ್ರಿ ನರೇಂದ್ರ ಮೋದಿ ತಾನ್ನಿ ೨೦೨೫ಚೆ ನ.೨೮ ದಿವಸು ಪ್ರತಿಮಾಕ ಲೋಕಾರ್ಪಣ ಕೆಲೀಲೆ ಹಾಂಗಾ ಯಾದ ಕೊರನು ಘೆವಯೇತ. ಖ್ಯಾತ ಶಿಲ್ಪಿ ಪದ್ಮಭೂಷಣ ದಿವಂಗತ ರಾಮ್ ಸುತಾರ್ ತಶೀಚಿ ತಾಂಗೆಲೊ ಪೂತು ಅನಿಲ್ ಸುತಾರ್ ತಾನ್ನಿ ಶ್ರೀ ರಾಮಪ್ರತಿಮಾ ತಯಾರ ಕೆಲೀಲೆ.
ಹೇ ವೇಳ್ಯಾರಿ ಆಶೀರ್ವಚನ ದಿಲೀಲೆ ಪೂಜ್ಯ ಸ್ವಾಮ್ಯಾನಿ “ಮ್ಹಾಲ್ಗಡೆ ಸ್ವಾಮ್ಯಾನಿಂ ಸಮಾಜಾಚೊ ಬರೇಪಣ ಖಾತ್ತಿರಿ ಆಪಣೇಲೆ ಜೀವನಽಚಿ ಸಮರ್ಪಣ ಕೊರನು ಅನೇಕ ಶಾಖಾ ಮಠ ಸ್ಥಾಪನ ಕೊರಚೆ ಬರಶಿ ಮಠ-ಮಂದಿರಾಂಚೆ ಜೀರ್ಣೋದ್ಧಾರ, ಧಾರ್ಮಿಕ ಯಾತ್ರಾ, ವೆಗವೆಗಳೆ ಧಾರ್ಮಿಕ ಆಚರಣಾ ತಶೀಚಿ ಸಮಾಜಮುಖಿ ಕಾರ್ಯ ಘೆತ್ತಿಲೆ ಮ್ಹೊಣು ಸ್ಮರಣ ಕೆಲ್ಲಿ.
ಗುರುನಿ ಕೆಲೀಲೆ ಸತ್ಕಾರ್ಯ ಕೋಳ್ನು ಘೇವ್ನು, ತ್ಯಾ ಖಾತ್ತಿರಿ ಚಿಂತನಾ ಕೆಲಯಾರಿ ಮನ ಚ್ಹೊಖ ಜಾತ್ತಾ. ತಾಂಗೆಲೆ ಆದರ್ಶ ಕಳೀತಾಕ ಹಾಡ್ನು ಘೇವ್ನು ದುಸರ್ಯಾಂಕ ಕಳಯಚೆ ನಿಮಿತ್ತ್ಯಾನಿ ಪುಣ್ಯ ಪ್ರಾಪ್ತಿ ಜಾತ್ತಾ. ಮ್ಹಾಲ್ಗಡ್ಯಾಲೆ ತಶೀಚಿ ಗುರೂಂಗೆಲೆ ಉತ್ರ ಪಾಲನ ಕೊರಚೆ ನಿಮಿತ್ತ್ಯಾನಿ ಜೀವನಾಂತು ಸನ್ಮಾರ್ಗ ಆಸ್ಸ ಕೊರನು ಬರೋ ಸ್ಥಾನ ಘೆವಚಾಕ ಸಾಧ್ಯ ಮ್ಹೊಣು ಪೂಜ್ಯ ಸ್ವಾಮ್ಯಾನಿಂ ಸಾಂಗ್ಲೆ.
ಹೇಂಚಿ ವೇಳ್ಯಾರಿ ಪರ್ತಗಾಳಿ ಮಠಾಚೆ ೫೫೦ವ್ಯಾ ವರ್ಷಾಚರಣೆ ಪ್ರಯುಕ್ತ ೫೫೦ ಕೋಟಿ ಶ್ರೀರಾಮನಾಮ ಜಪ ಸಂಪನ್ನ ಕೆಲೀಲೆ ಖಾತ್ತಿರಿ ಜಿಎಸ್ಬಿ ಸಮುದಾಯಾಚೆ ನಾಂವಾಂತು ೨೦೨೫ಚೆ ನ.೩೦ಕ ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್, ವರ್ಲ್ಡ್ ಬುಕ್ ಆಫ್ ರೆಕಾರ್ಡ್ಸ್ ತಶೀಚಿ ಏಷ್ಯಾ ಬುಕ್ ಆಫ್ ರೆಕಾರ್ಡ್ಸ ಹಾಂಗಾ ರೆಕಾರ್ಡ್ ನಿರ್ಮಾಣ ಕೆಲೀಲೆ ವಿಷಯು ಹೇ ಸಭಾಂತು ಯಾದ ಕೊರನು ಘೆತ್ಲ್ಯೆ.
ಕಾರ್ಯಕ್ರಮಾಂತು ವಿಠ್ಠಲ ಮಾಸ್ತರ ಗೌರವ ಪುರಸ್ಕಾರ ರಾಮಚಂದ್ರ ಪದ್ಮನಾಭ ಭಟ್ಟ ಗಾಂವ್ಕರ ತಾಂಕಾ ದಿವನು ಗೌರವ ಕೆಲ್ಲಿ. ವೆಗವೆಗಳೆ ಕಡೇಂತು ಶೈಕ್ಷಣಿಕ ಸಾಧನ ಕೆಲೀಲೆ ವಿದ್ಯಾರ್ಥ್ಯಾಂಕ ಸನ್ಮಾನ ಕೆಲ್ಲೆ.
ಮಠಾಚೆ ಕೇಂದ್ರ ಸಮಿತಿ ಅಧ್ಯಕ್ಷ ಶ್ರೀನಿವಾಸ್ ದೆಂಪೊ, ಗೋಂಯ ಲೋಕೋಪಯೋಗಿ ಸಚಿವ ದಿಗಂಬರ ಕಾಮತ, ಚಾತುರ್ಮಾಸ್ಯ ವ್ರತ ಸಮಿತಿ ಅಧ್ಯಕ್ಷ ಅನಿಲ್ ಪೈ ತಶೀಚಿ ಸಮಿತಿ ಸದಸ್ಯ, ಜೀವೋತ್ತಮ ವಿದ್ಯಾಪೀಠಾಚೆ ಶಿಕ್ಷಕ, ವಿದ್ಯಾರ್ಥಿ ಲೋಕ ಆನಿ ಅಪಾರ ಅಂಕಡ್ಯಾಚೆ ಶಿಷ್ಯವರ್ಗ, ಭಕ್ತಾದಿ ಲೋಕ ಉಪಸ್ಥಿತ ವ್ಹರಲೀಲೆ.
- ವರದಿ : ದೇವದಾಸ ಕಾಮತ, ಉಡುಪಿ.