ಪಯ್ರಿ ಆಗಸ್ಟ್ ೧೫ ಕ ಅಖಿಲ ಭಾರತ ಸಿಎ ಸಂಸ್ಥೆಚೆ ಉಡುಪಿ ಶಾಖೆಚೆ ಸ್ಥಾಪಕ ಸದಸ್ಯಾಂಗೆಲೊ ಸ್ನೇಹ ಸಮ್ಮಿಲನ ಕಾರ್ಯಕ್ರಮ ಮಣಿಪಾಲ್ಚೆ ಮಧುವನ್ ಸೆರಾಯ್ ಹಾಂಗಾ ಚಲ್ಲೆ. ಉಡುಪಿ ಶಾಖಾ ಸೂರು ಜಾವನು ೨೫ ವರ್ಷ ಪೂರ್ತಿ ಕೆಲೀಲೆ ಖಾತ್ತಿರಿ ವಿಶೇಷ ಕಾರ್ಯಕ್ರಮ ಆಯೋಜನ ಕೆಲೀಲೆ. ಕಾರ್ಯಕ್ರಮಾಂತು ಶಾಖಾಚೆ ಸ್ಥಾಪಕ ಸದಸ್ಯ ತಾಂಗೆಲೆ ಕುಟುಂಬಿಕ ಸದಸ್ಯಾಂಗೆಲೆ ಸಮೇತ ಸುಮಾರು ೧೦೮ ಲೋಕಾನಿ ವಾಂಟೊ ಘೆತ್ತಿಲೆ.
ಶಾಖಾಚೆ ಸ್ಥಾಪಕ ಅಧ್ಯಕ್ಷ ಶ್ರೀಯುತ ಸಿಎ ಗುಜ್ಜಾಡಿ ಪ್ರಭಾಕರ ನರಸಿಂಹ ನಾಯಕ್ ತಾನ್ನಿ ಶಾಖಾ ಚೋಲ್ನು ಆಯಲೀಲೆ ವಾಟ ಸಾಂಗ್ಲೆ. ಮ್ಹಾಲಗಡೆ ಸದಸ್ಯ ಜಾಲೀಲೆ ಶ್ರೀ ಸಿಎ ನರಸಿಂಹ ಕಾಮತ್ ತಾನ್ನಿ ಶಾಖಾ ಸೂರು ಜಾವ್ಚೆ ಪಯಲೆ ಆನಿ ನಂತವೈಲೆ ಮಧುರ ಘಡೆಂಕ ಉಡಗೋಸು ಕೆಲ್ಲೆ.
ಶ್ರೀ ಸಿಎ ಅನಂತನಾರಾಯಣ ಪೈ ಕೆ. ಹಾನ್ನಿ ಶಾಖಾ ಸೂರು ಜಾವಚಾಕ ಮದತ್ ದಿಲೀಲೆ ಲೋಕಾಂಗೆಲೆ ಶ್ಲಾಘನ ಕೆಲ್ಲಿ. ಶ್ರೀ ಸಿಎ ದೇವ್ ಆನಂದ ತಾನ್ನಿ ಸರಲೀಲೆ ಸ್ಥಾಪಕ ಸದಸ್ಯಾಂಗೆಲೆ ಸಂಸ್ಮರಣೆ ಕೊರನು, ತಾಂಗೆಲೆ ಕುಟುಂಬಾಚೆ ಸದಸ್ಯಾಂಕ ಗೌರವ ಅರ್ಪಣ ಕೆಲ್ಲೆ. ಜಮೀಲೆ ಸರ್ವ ಸ್ಥಾಪಕ ಸದಸ್ಯಾಂಕ ಅಭಿನಂದನಾ ಪತ್ರ ದಿವನು ಗೌರವ ಕೆಲ್ಲೆ.
ಶಾಖೆಚೆ ಸುರವೇಚೆ ಸ ವರ್ಷಾಂಚೆ ಸಾಧನೆ ಖಾತ್ತಿರಿ ಏಕ ವೀಡಿಯೋ ಪ್ರಸ್ತುತ ಕೆಲ್ಲೆ.
ಶ್ರೀ ಸಿಎ ಮುರುಳೀಧರ ಕಿಣಿ, ಶ್ರೀ ಸಿಎ ಎನ್.ಪಿ. ಪೈ ಹಾನ್ನಿ ಕಾರ್ಯಕ್ರಮ ಚಲೋನು ದಿಲ್ಲೆ.
ಶ್ರೀ ಸಿಎ ಶ್ರೀಧರ ಕಾಮತ್ ಹಾನ್ನಿ ರಸಪ್ರಶ್ನೆ ಕಾರ್ಯಕ್ರಮ ಚಲೋನು ದಿಲ್ಲೆ.
ಮಂಗಳೂರ್ಚೆ ಶ್ರೀ ಪ್ರಹ್ಲಾದ ಆನಿ ಶ್ರೀಮತಿ ಅಖಿಲ ಹಾಂಗೆಲೆ ತಾಕೂನು ಪೊರನೆ ಹಿಂದಿ, ಕನ್ನಡ ಆನಿ ತುಳು ಸಿನೇಮಾ ಪದಾಚೆ ಕಾರ್ಯಕ್ರಮ ಚಲ್ಲೆ. ವಿಶಿಷ್ಟ ಜವಣಾ ಬರಶಿ ಕಾರ್ಯಕ್ರಮ ಮುಕ್ತಾಯ ಜಾಲ್ಲೆ.