ಕಾದಂಬರಿ ಚರಿತ್ರಾ ನ್ಹಯ್‌, ಪೂಣ್‌ ಕಾದಂಬರಿಂತ್‌ ಚರಿತ್ರಾ ಆಟಾಪುಂಯೆತಾ. ಕಾದಂಬರಿ ಜಿಣಿಯೆಚೆಂ ವಿಶ್ಲೇಷಣ್ ಕರ್ತಾ. ಆಂಜೆಲ್‌ ಕಾದಂಬರಿ 75 ವರ್ಸಾಂ ಆದ್ಲೆಂ ಜಿವಿತ್‌ ಬಾಂದುನ್‌ ದಿಂವ್ಚ್ಯಾಂತ್‌ ಯಶಸ್ವಿ ಜಾಲಾಂ. ಕೊಂಕ್ಣಿ ಅಕಾಡೆಮಿನ್‌ ಏಕ್‌ ಅಪುರ್ಬಾಯೆಚೆಂ ಕಾರ್ಯೆಂ ಮಾಂಡುನ್‌ ಹಾಡ್ಲಾಂ. ಅಶೆಂ ಕೆಲ್ಲ್ಯಾನ್‌ ಫುಡೆಂ ಸಾಹಿತ್ಯ್ ರಚ್ತಲ್ಯಾಂಕ್‌ ಪ್ರೇರಣ್‌ ಮೆಳ್ತಲೆಂ. ಅಕಾಡೆಮಿನ್‌ ಸಾಹಿತ್ಯಾಸಕ್ತ್‌ ಯುವಜಣಾಂಕ್‌ ಆನಿ ವಿದ್ಯಾರ್ಥಿಂಕ್‌ ತರ್ಬೆತಿ ದಿಲ್ಯಾರ್‌ ಹಿ ಪರಂಪರಾ ಫುಡೆಂ ವೆತಲಿ. ಮ್ಹಣ್‌ ಡಾ. ಶಿವರಾಮ ಕಾರಂತ ಟ್ರಸ್ಟಾಚೊ ಅಧ್ಯಕ್ಷ್‌ ಡೊ ಗಣನಾಥ ಶೆಟ್ಟಿ ಎಕ್ಕಾರು ಹಾಣೆಂ ಸಾಂಗ್ಲೆಂ. ತೊ 13.07.2025 ವೆರ್‌ ಮಂಗ್ಳುರ್‌ಚ್ಯಾ ಸಂದೇಶ ಸಭಾಭವನಾಂತ್‌ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿನ್‌ ಮಾಂಡುನ್‌ ಹಾಡ್ಲಲ್ಯಾ ಕನ್ನಡ ಲಿಪಿಯೆಂತ್ಲಿ ಪಯ್ಲಿ ಕಾದಂಬರಿ ಆಂಜೆಲ್‌ 75 ಸಂಭ್ರಮ್‌ ಸುವಾಳ್ಯಾಚೊ ಮುಕೆಲ್‌ ಸಯ್ರೊ ಜಾವ್ನ್‌ ಕಾದಂಬರಿಚ್ಯಾ ಸ್ವರೂಪಾವಿಶಿಂ ಉಲಯ್ಲೊ.
ಆಂಜೆಲ್‌ ಸಾಹಿತಿ ದೆ. ಜೊ.ಸಾ. ಆಲ್ವಾರಿಸ್‌ ಹಾಚಿ ಪತಿಣ್‌ ಮೊನಿಕಾ ಆಲ್ವಾರಿಸ್‌ ಹಿಣೆಂ ಸಾಹಿತಿಚ್ಯಾ ಆನಿ ಪ್ರಥಮ್‌ ಮುದ್ರಿತ್‌ ಪ್ರತಿಯೆಕ್‌ ಫುಲಾಂ ಅರ್ಪುನ್‌ ಕಾರ್ಯೆಂ ಉಗ್ತಾಯ್ಲೆಂ. ಹ್ಯಾ ವೆಳಿಂ ಜೊ. ಸಾ ಆಲ್ವಾರಿಸಾಚಿಂ ಭುರ್ಗಿಂ ಆನಿ ಕುಟ್ಮಾದಾರಾಂ ಹಾಜರ್‌ ಆಸ್ಲಲಿಂ. ಅಧ್ಯಕ್ಷ್‌ ಜೋಕಿಂ ಸ್ಟ್ಯಾನಿ ಆಲ್ವಾರಿಸಾನ್‌ ಕೊಂಕ್ಣಿ ಅಕಾಡೆಮಿಂತ್‌ ಸಾಹಿತಿಕ್‌ ವಾವ್ರಾಚಿ ಬದ್ಧತಾ ಪರತ್‌ ಉಚಾರುನ್‌, ಮ್ಹಾಲ್ಗಡ್ಯಾ ಸಾಹಿತಿಂಕ್‌ ಮಾನ್ ಪಾಟೊಂವ್ಚ್ಯಾ ಯೆವ್ಜಣೆವಿಶಿಂ ಮಾಹೆತ್‌ ದಿಲಿ. ಸಾಹಿತ್ಯಾ ಬಾಬ್ತಿನ್‌ ನವಿಂ ಆನಿ ವಿಶಿಶ್ಟ್‌ ವಾವ್ರಾ ಯೆವ್ಜಣಾಂ ಆಸಾತ್‌ ತರ್‌ ಅಕಾಡೆಮಿಕ್‌ ಕಳೊಂವ್ಕ್‌ ಉಲೊ ದಿಲೊ. ಅಕಾಡೆಮಿ ಸದಾಂ ಸಾಹಿತಿಂಕ್‌ ಸಹಕಾರ್‌ ದಿತಲಿ ಮ್ಹಣ್‌ ಕಳಯ್ಲೆಂ.
ಹ್ಯಾ ಸಂದರ್ಭಾರ್‌ ಪಯ್ಲ್ಯಾ ಮುದ್ರಿತ್‌ ಪ್ರತಿಯೆಚಿ ಇ-ಬೂಕ್‌ ಆವೃತ್ತಿ ಕೊಂಕ್ಣಿ ನಾಟಕ್‌ ಸಭೆಚೊ ಅಧ್ಯಕ್ಷ್‌ ಮಾ|ಬಾ| ರೊಕಿ ಡಿಕುನ್ಹಾ ಹಾಣೆಂ ಮೆಕ್ಳಿಕ್‌ ಕೆಲಿ. ಇ ಬೂಕ್‌ ತಯಾರ್‌ ಕೆಲ್ಲ್ಯಾ ಸೊಫ್ಟ್‌ವೇರ್‌ ಇಜ್ನೆರ್‌ ಕೇರನ್‌ ಮಾಡ್ತಾನ್‌ ಪ್ರಸ್ತುತ್‌ ಪರಿಗತೆಂತ್‌ ಸಂಸಾರಾಚ್ಯಾ ಕೊನ್ಶಾ ಕೊನ್ಶಾಂಕ್‌ ಖಿಣಾನ್‌ ಸಾಹಿತ್ಯ್ ಪಾವೊಂವ್ಚಿ ಸಾಧ್ಯತಾಯ್ ಆಸ್ಚ್ಯಾ ಇ-ಬುಕಾಚಿ ಗರ್ಜ್‌ ಆನಿ ಉಪಲಬ್ದಿ ವಿಶಿಂ ಆನಿ ವಾಪರ್ಣೆವಿಶಿಂ ಮಾಹೆತ್‌ ದಿಲಿ. ಡೊ. ಡಿಂಪಲ್‌ ಫೆರ್ನಾಂಡಿಸ್‌ ಹಿಣೆಂ ಆಂಜೆಲ್‌ ಕಾದಂಬರಿಂತ್ಲ್ಯಾ ಸಾಹಿತ್ಯಾವಿಶಿಂ ಆನಿ ಲೇಖಕ್‌ ರಿಚಾರ್ಡ್‌ ಆಲ್ವಾರಿಸ್‌ ಹಾಣೆಂ ಜೊ ಸಾ ಚ್ಯಾ ವ್ಯಕ್ತಿತ್ವಾವಿಶಿಂ ಉಲೊವ್ಪ್‌ ದಿಲೆಂ.
ಅಕಾಡೆಮಿ ಸಾಂದೆ ಸಪ್ನಾ ಕ್ರಾಸ್ತಾನ್‌ ಯೆವ್ಕಾರ್‌ ಮಾಗುನ್‌ ನವೀನ್‌ ಲೋಬೊನ್‌ ಆಭಾರ್‌ ಮಾಂದ್ಲೊ. ವಿತೊರಿ ಕಾರ್ಕಳಾನ್‌ ಕಾರ್ಯೆಂ ಚಲಯ್ಲೆಂ. ಅಕಾಡೆಮಿ ಸಾಂದೆ ರೊನಾಲ್ಡ್ ಕ್ರಾಸ್ತಾ, ಸಮರ್ಥ್ ಭಟ್ ಆನಿ ಸಾಹಿತ್ಯ್ ಮೊಗಿ ಕಾರ್ಯಾಂತ್‌ ಹಾಜರ್‌ ಆಸ್ಲಲೆ.
ʼಆಂಜೆಲ್‌ʼ ಪುಸ್ತಕವನ್ನು ಓದಲು ಅನುಕೂಲ ಮಾಡಿಕೊಡುವ ಲಿಂಕ್‌ ಲಗತ್ತೀಕರಿಸಿದೆ.
https://play.google.com/store/books/details?id=S2drEQAAQBAJ