ಹುಬ್ಬಳ್ಳಿ ಮ್ಹಣಚೆ ಹೂ ಬಳ್ಳಿಯ ನಾಡು ಏಕ ಕಾಲಾಂತು ಹಾಂಗಾ ಕೇವಲ ಫೂಲ್ಲಾ ಜಾಡ ಮಾತ್ರ ಆಶ್ಶಿಲೆ ನಿಮಿತ್ತ್ಯಾನಿ ಹೇ ಗಾಂವಾಕ ಹುಬ್ಬಳ್ಳಿ ಮ್ಹಣ್ಚೆ ನಾಂವ ಆಯಲ್ಯಾ. ಹುಬ್ಬಳ್ಳಿ ವಾಣಿಜ್ಯ ನಗರ, ಆಜಿ ಪಂದ್ರಾ ಲಾಕಾಪಶಿ ಚ್ಹಡ ಜನಾಂಕಡೆ ಆಸ್ಸುಚೆ ಶಹರ. ಆಪಣೇಲೆ ಸೆರಗಾಂತೂ ಆಸ್ಸುಚೆ ಜಿಲ್ಲಾ ಕೇಂದ್ರ ಧಾರವಾಡಾಕ ಘೇವನು ಹುಬ್ಬಳ್ಳಿ-ಧಾರವಾಡ ಅವಳಿ ಶಹರ ಮ್ಹಣಚೆ ಗೌರವಾಕ ಪಾತ್ರ ಜಾಲ್ಲ್ಯಾ. ಹುಬ್ಬಳ್ಳಿ-ಧಾರವಾಡ ವಾಣಿಜ್ಯ ಆನಿ ವಿದ್ಯಾಕೇಂದ್ರ ಮ್ಹಣಚೆ ಪ್ರಶಂಸೆಕ ಪಾತ್ರ ಜಾಲ್ಲ್ಯಾ. ಅಧ್ವೈತ ತತ್ತ್ವಾಚೆ ಮಹಾಸಾಧಕ ಶ್ರೀ ಸಿದ್ಧಾರೂಢ ಸ್ವಾಮಿ ತಸ್ಸಾಲೆ ಆಧ್ಯಾತ್ಮಿಕ ಸಾಧಕ, ತೀನಿ (ಧಾರವಾಡ, ಕೃಷಿ ಆನಿ ಕಾನೂನು) ವಿಶ್ವವಿದ್ಯಾಲಯ, ಕರ್ನಾಟಕಾಚೆ ಏಕೈಕ ಐ‌ಐಟಿ, ಐ‌ಐ‌ಐಟಿ, ಹೈಕೋರ್ಟ್ ಬೇಂಚ್, ಅಪರೂಪಾಚೆ ಬಿ‌ಎಮ್‌ಟಿಸಿ, ಗಂಗೂಬಾಯಿ ಹಾನಗಲ್ ತಸ್ಸಾಲೆ ಸಬಾರ ಸಂಗೀತ ಕಲಾವಿದಾಲೆ ಇತ್ಯಾದಿ ವೈವಿಧ್ಯತೆ ನಿಮಿತ್ತ್ಯಾನಿ, ಹುಬ್ಬಳ್ಳಿ-ಧಾರವಾಡ ದೇಶ-ವಿದೇಶಾಂತು ನಾಂವ ಪಾವ್ಲ್ಯಾ. ಕರ್ನಾಟಕಾಚೆ ಮುಖ್ಯಮಂತ್ರಿ ಜಾಲೀಲ್ಯಾಂತು ತಿಗ್ಗಲೋಕ ಹುಬ್ಬಳ್ಳಿ ಶಹರಾಚಿ ಮ್ಹಣ್ಚೆ ವರೇನ ಏಕ ಅಭಿಮಾನಾಚೆ ವಿಷಯು. ಅಸ್ಸಲೆ ವೈಶಿಷ್ಠ್ಯಪೂರ್ಣ ಶಹರಾಂತು ಪ್ರಪ್ರಥಮ ಜಾವ್ನು ಆಯ್ಯಿಲೆ ಗೌಡ ಸಾರಸ್ವತ ಬ್ರಾಹ್ಮಣ ಮ್ಹಳಯಾರಿ ತಾನ್ನಿ ತೆದನಾಚೆ ಹುಬ್ಬಳ್ಳಿ ಲೋಕಾಂಗೆಲೆ ತಾಕೂನುಪೈ ಮಹಾರಾಜ ಮ್ಹೊಣು ನಾಂವ ಪಾವ್ವಿಲೆ ದಿ|| ಪಾಂಡುರಂಗ ಪೈ. ಹಾಂಗೆಲೆ ಮೂಳ ಕುಮಟಾ. ಕುಮಟಾಚೆ ಗಿಬ್ ಹೈಸ್ಕೂಲಾಂತು ಶಿಕ್ಷಣ ಘೇವ್ನು ಹಾನ್ನಿ ಆಪಣೇಲೆ ೨೭ ವರ್ಷ ವಯಾಂತು ಮ್ಹಳಯಾರಿ ೧೮೯೦ ಇಸ್ವೆಂತು ಹುಬ್ಳಿಕ ಯವ್ನು ಹತ್ತಿ ವೇಪಾರಾಕ ದೆಂವ್ಲೆ. ಹುಬ್ಳಿಕ ಪ್ರಪ್ರಥಮ ಆಯ್ಯಿಲೆ ಹಾನ್ನೀಚಿ ಮ್ಹಣ್ಚೆ ಅಧಿಕೃತ ದಾಖಲ ಮೆಳ್ತಾ. ತಾಜ್ಜ ಉಪರಾಂತ ಕರಾವಳಿಚೆ ಉತ್ತರ ಕನ್ನಡ, ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲ್ಯಾಚಾನ ಆಮ್ಚಗೇಲೆ ಲೋಕ ವ್ಹಡ ಅಂಕಡ್ಯಾರಿ ಹುಬ್ಳಿಕ ಆಯ್ಲೆ. ೧೯೪೫ ಇಸ್ವೆಚೆ ಸುಮಾರಾಕ ಬಹುಶಃ ಚ್ಹಡ ಊಣೆ ೫೦ ವಯ್ರಿ ಆಮಚಗೇಲೆ(ಜಿ.ಎಸ್.ಬಿ.) ಕುಟುಂಬ ಹುಬ್ಬಳ್ಳಿಂತು ಆಶ್ಶಿಲೆ ಮ್ಹೊಣು ದಿಸ್ತಾ. ಆನಿ ಧಾರವಾಡಾಂತು ತಿತ್ಲೆ ಭಿತ್ತರಿಚಿ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ ಸ್ಥಾಪನ ಜಾಲೀಲೆ. ತ್ಯಾ ಕಾರಣಾನಿ ಹುಬ್ಬಳ್ಳಿ ಶಹರಾಚೆ ವೆಗವೆಗಳೆ ಬಗಲೇನ ಆಸ್ಸುಚೆ ಸಮಾಜ ಬಾಂಧವ ಸಕಡಾಂಕ ಏಕತ್ರ ಕೊರನು ತಾಂಗೆಲೆ ಕಷ್ಟ, ಸುಖಾಕ ವಚ್ಚುನು ಪಾವಚಾಕ ಆನಿ ಸಮಾಜ ಬಾಂದವಾಂತು ಧಾರ್ಮಿಕ ಜಾಗೃತಿ ಆಸ್ಸ ಕೊರಚಾಕ ದಿನಾಂಕ. ೨೪-೦೨-೧೯೪೫ಚೆ ಸಾಂಜವಾಳಾ ೬ ಘಂಟ್ಯಾಕ ಹುಬ್ಬಳ್ಳಿಚೆ ಕೆನರಾ ಬ್ಯಾಂಕಾಚೆ ಮಾಳಿಯೇರಿ ಶ್ರೀ ಆರ್.ಪಿ. ವಾಗಳೆ ಹಾಂಗೆಲೆ ಅಧ್ಯಕ್ಷಪಣಾರಿ ಲಭ್ಯ ಸಮಾಜ ಬಾಂಧವಾಂಕ ಆಪೋನು ಏಕ ಸಭಾ ಕೊರನು, ಥಂಯಿ ಸಮಾಜ ಬಾಂದವಾಲೊ ಏಕ ಸಂಘಟನ ಕೊರಚಾಕ ತೀರ್ಮಾನ ಘೆತ್ಲಿ. ರಾವಬಹಾದ್ದೂರ ಡಾ|| ಎಮ್. ಕೇಶವ ಪೈ ಮಾಮ್ಮಾಲೆ ಸೂಚನೆ ಪ್ರಕಾರ ತ್ಯಾ ಸಂಘಟನೇಕ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ ಮ್ಹೊಣು ನಾಮಕರಣ ಕೆಲ್ಲಿ. ಅಶ್ಶಿ ಹುಬ್ಬಳ್ಳಿ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೆ ಸ್ಥಾಪನ ದಿನಾಂಕ. ೨೪-೦೨-೧೯೪೫ ಕ ಜಾಲ್ಲಿ. ಆನಿ ತಾಜ್ಜೆ ಪಯಲೇಚೆ ಅಧ್ಯಕ್ಷ ಜಾವನು ಡಾ|| ಎಸ್.ಎಮ್.ಕಾಮತ್ ವೆಂಚೂನು ಆಯಲೆ. ತಾಜ್ಜ ಪ್ರಕಾರ ಲ್ಯಾಕ ಕೆಲಯಾರಿ ೨೪-೦೨-೨೦೨೫ಕ ಹುಬ್ಬಳ್ಳಿಚೆ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಕ ೮೦ ವರ್ಷ (ಸಹಸ್ರ ಚಂದ್ರದರ್ಶನ) ಪೂರ್ಣ ಜಾವನು ಸಮಾಜ ೮೧ವೇಂ ವರ್ಷಾಕ ಪಾಯು ದವರತಾ. ಡಾ|| ಎಸ್.ಎಮ್.ಕಾಮತ್ ಸಹಿತ ಘೆಲೀಲೆ ೮೦ ವರ್ಷಾಂತು ಸಮಾಜಾಕ ೧೩ ಲೋಕಾನಿ ಅಧ್ಯಕ್ಷಪಣ ಘೇವ್ನು ಸೇವಾ ಪಾವಯಿಲಾ. ತಾನ್ನಿ ಮ್ಹಳಯಾರಿ ಡಾ|| ಎಸ್.ಎಮ್.ಕಾಮತ್. ಡಾ|| ಬಿ.ಡಬ್ಲ್ಯೂ. ನಾಡಕರ್ಣಿ, ಡಾ|| ಎಮ್.ಬಿ. ಕಿಣಿ, ಶ್ರೀ ಆರ್.ಎಚ್. ಶೆಣೈ, ಶ್ರೀ ಜಿ.ವಿ. ನಾಯಕ, ಶ್ರೀ ಎ.ಎನ್.ಕುಡ್ವಾ, ಶ್ರೀ ಯು.ಬಿ. ಬಾಳಿಗಾ, ಶ್ರೀ ಆರ್.ಪಿ. ಕಾಮತ್, ಶ್ರೀ ಎಮ್.ಆರ್.ಶಾನಭಾಗ, ಶ್ರೀ ಶೇಷಗಿರಿ ಪಾಂಡುರಂಗ ಕಾಮತ, ಶ್ರೀ ಆರ್.ಎನ್.ನಾಯಕ, ಶ್ರೀ ಪವನ ಪ್ರಭು, ಶ್ರೀ ರಮೇಶ ನಾಯಕ. ಹಾನ್ನಿ ಸಕಡ್ಯಾನಿ ಪ್ರಬಲ ಟೀಮ್ ಬಾಂದೂನು ಘೇವ್ನು ಸಮಾಜಾಭಿವೃದ್ಧಿ, ಹುಬ್ಬಳ್ಳಿ ಸಮಾಜ ಬಾಂದವಾಲೊ ಉದರ್ಗತಿ, ಸಮಾಜಾಚೆ ಚರಡುವಾಂಕ ಶಿಕ್ಷಣಾಕ ಮದತ್, ದುರ್ಬಲಾಂಕ, ಹುಷಾರ ನಾತ್ತಿಲ್ಯಾಂಕ ವೆಗವೆಗಳೆ ನಮೂನ್ಯಾಚೆ ಮದತ್ ದಿವಚೆ ಮಾತ್ರ ನ್ಹಂಹಿ ಸಂವ್ಸಾರಪಾಡ್ವೆಚಾನ ಮಕರ ಸಂಕ್ರಾಂತಿ ಪರಿಯಂತ ಹರ್‍ಯೇಕ ಪರಬ ಆಚರಣ ಕೊರನು ಹುಬ್ಬಳ್ಳಿ ಸಮಾಜ ಬಾಂದವಾಂತು ಧಾರ್ಮಿಕ ಜಾಗೃತಿ ಆಸ್ಸ ಕೊರಚಾಕ ಸಬಾರ ನಮೂನ್ಯಾನಿ ವಾವರೋ ಕರೀತ ಆಸ್ಸಾತಿ.
ವಾರ್ಷಿಕ ಖೇಳಾಕೂಟ, ಗಣೇಶಚೌತಿ, ಶಾರದೋತ್ಸವ ವೇಳ್ಯಾರಿ ಸಮಾಜಾಚೆ ಪ್ರತಿಭಾವಂತಾಂಗೆಲೆ ಪ್ರತಿಭಾ ಪ್ರದರ್ಶನಾಕ ಉತ್ತೇಜನ ವರೇನ ದಿವನು ಹುಬ್ಬಳ್ಳಿ ಗೌಡ ಸಾರಸ್ವತ ಸಮಾಜ ಸರ್ವತೋಮುಖ ಜಾವ್ನು ಅಭಿವೃದ್ಧಿ ಪಾವಚಾಕ ಸಾಧ್ಯ ಜಾಲೀಲೆ ಕಾರ್ಯ ಕರೀತ ಆಸ್ಸಾತಿ. ೧೯೪೫ ಇಸ್ವೆಂತು ಸಮಾಜ ಸ್ಥಾಪನ ಜಾಲ್ಲೆ ವ್ಹಯಿ, ತಶ್ಶಿ ಜಾಲ್ಲ ಕೂಡ್ಲೆ ಸಮಾಜ ಅಭಿವೃದ್ಧಿ ಜಾಯ್ನಾ. ಸಮಾಜಾಚೆ ಕಾರ್ಯಚಟುವಟಿಕಾ ಚಲಾಯಿಸುಚಾಕ ಏಕ ಇಮಾರತ್ ನಾಕ್ಕವೇ? ಮೆನೇಜಿಂಗ್ ಕಮಿಟಿ ಸಭಾ ಚಲಯ್ಕಾ, ಪರಬ, ಸತ್ಯನಾರಾಯಣ ಪೂಜಾ ಕೊರಚಾಕ ಮಾಸ, ಮಟನ್ ಕರ್ನಾತ್ತಿಲೆ ಪವಿತ್ರ ಜಾಗೋ ಜಾವ್ಕಾ, ಕುಲಗುರೂಂಗೆಲೆ ಆಗಮನ ಮುಖಾಂತರ ಸಮಾಜ ಬಾಂದವಾಂತು ಧಾರ್ಮಿಕ ಜಾಗೃತಿ ಚಲಾಯಸೂಕಾ. ತೆದ್ನಾ ಶಂಬರಗಟ್ಲ್ಯಾನಿ (ಆತ್ತ ಹಜಾರಗಟ್ಲ್ಯಾನಿ) ಜಮೂಚೆ ಸಮಾಜ ಬಾಂದವಾಂಕ ತಾಂತು ವಾಂಟೊ ಘೆವಚಾಕ ಸೂಕ್ತ ಸೌಲಭ್ಯ ಜಾವ್ಕಾ ಪಡ್ತಾ. ಸ್ವಾಮ್ಯಾಂಕ ಆನಿ ತಾಂಗೆಲೊಟ್ಟು ಯತ್ತಲ್ಯಾಂಕ ರಾಬಯಚಾಕ ಸೂಕ್ತ ವ್ಯವಸ್ಥಾ ಕೊರಕಾ. ಕಾರ್ಯಕ್ರಮ ಚಲಾಯಿಸೂಚಾಕ ವಿಶಾಲ ಸಭಾಭವನ ಜಾವ್ಕಾ ಪಡ್ತಾ. ಸಮಾಜಾಕ ಸ್ವಂತ ಕಟ್ಟಡ ನಾತ್ತಿಲೆ ತೆದ್ದನಾ ಹೇ ಸಕ್ಕಡ ಕಾರ್ಯಕ್ರಮಾಕ ತೆದ್ನಾ ಆಮ್ಗೆಲೆ ಸಮಾಜಾ ವಯ್ರಿ ಸಹಾನುಭೂತಿ ಆಶ್ಶಿಲೆ ಕ್ಯಾನರಾ ಬ್ಯಾಂಕ್ ಮಾಳಿಯೇರಿ, ಭಾರತ ಮಿಲ್ಲಾಚೆ ಬಂಗ್ಲೆಂತು, ಹುಬಳೀಕರ ಹಾಂಗೆಲೆ ಅಂಚಟಗೇರಿಂತು ಆಸ್ಸುಚೆ ಉಪವನಾಂತು, ನಾಂವೆ ನಾರ್ವೇಕರ್ ತಾಂಗೆಲೆ ಬಂಗ್ಲೆಂತು ತಾಕ್ಕಾ ಸಕ್ಕಡ ವ್ಯವಸ್ಥಾ ಕರತಾಲೆ. ಹಾಜೇನ ಸಮಾಜ ಬಾಂದವಾಂಕ ಆನಿ ಕಾರ್ಯಕ್ರಮ ಆಯೋಜನೇಕ ಮಸ್ತ ಅನಾನುಕೂಲತಾ ಜಾತ್ತಾಶ್ಶಿಲೆ. ಹೇ ಸಕ್ಕಡ ವಿಚಾರ ಕೆಲೀಲೆ ತೆದ್ನಾಚೆ ಸಮಾಜಾಚೆ ಗಣ್ಯಾನಿ ಗಂಭೀರ ಜಾವನು ಘೇವ್ನು ಒಟ್ಟು ಜಾವನು ಹುಬ್ಳಿ ಸಮಾಜಾಕ ಏಕ ಸ್ವಂತ ಇಮಾರತ್ ಜಾವ್ಕಾಚಿ ಮ್ಹೊಣು ದೃಢ ನಿರ್ಣಯ ಘೆತ್ಲೆ. ತ್ಯಾ ನಿರ್ಣಯ ಥೊಡೆ ಕಾಲಾಂತೂ ಸಂಕಲ್ಪ ಜಾವನು ಬದಲ್ಲೆ. ಖಂಚೇಯಿ ಕೊರಕಾಚಿ ಮ್ಹೊಣು ಸಂಕಲ್ಪ ಘೆತ್ಲೆ ಮಾಗಿರಿ ಅರ್ಧ ಕಾಮ ಜಾಲೀಲ್ವರಿ ಮ್ಹೊಣು ಶಾಸ್ತ್ರಾಂತೂ ಸಾಂಗ್ನಿವೇ? ತ್ಯಾ ದೈವ ಸಂಕಲ್ಪ ಮ್ಹಣ್ಚವರಿ ತೆದ್ನಾಚೆ ಹುಬ್ಬಳ್ಳಿ ಸಮಾಜಾಚೆ ಗಣ್ಯಾನಿ ಹೇ ಸಂಕಲ್ಪ ವ್ಹರ್ನು ಶ್ರೀ ಕಾಶೀಮಠಾಧೀಶ ಶ್ರೀಮತ್ ಸೂಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಸನ್ನಿಧಿಂತು ದವರಲೆ. ಕೂಡ್ಲೆ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾನಿ `ದೇವು ಚಲಯತಾ ಮ್ಹೊಣು ಪೂರ್ಣ ಮನಾನಿ ಆಶೀರ್ವಾದು ಕೊರಚೆ ಬರಶಿ ಕಟ್ಟಡ ಸ್ಥಾಪನಾ ನಿಧಿ ಸ್ಥಾಪನ ಕೊರಚಾಕ ಸಲ್ಲೋ ದಿವನು ಪ್ರಪ್ರಥಮ ಜಾವನು ಆಪ್ಪಣಽಚಿ ರೂ. ೧೦೧/- ದಿಲ್ಲೆ. ಪೂಜ್ಯಾಂಗೆಲೆ ಆಶೀರ್ವಾದ ರೂಪಾಚೆ ಹೇ ರೂ. ೧೦೧/- ಸ್ಥಾಪನಾ ನಿಧಿಚೆ ನೆಲ್ಕಟ್ ಜಾಲ್ಲೆ. ತಾಜ್ಜ ಉಪರಾಂತ ಏಕ ನಿಧಿ ಸಂಗ್ರಹ ಸಮಿತಿ ರಚನ ಕೊರನು ಖಂಚೇಯಿ ಫಲಾಪೇಕ್ಷಾ ದವರೂನು ಘೇನಾಶಿ ಗಾಂವ ಗಾಂವ ಘೂವ್ನು ಥಂಚೆ ಜಿ.ಎಸ್.ಬಿ. ಸಮಾಜಾಚೆ ದಾನಿ ಲೋಕಾಂಕ ಮೇಳ್ನು ತಾಂಗೆಲೆ ತಾಕೂನು `ಧನ ಸಂಗ್ರಹ ಕೆಲ್ಲಿ. ತೆದ್ನಾ ಆತ್ತಾ ತಸ್ಸಾಲೆ ಸಾರಿಗೆ ಜಾಂವೊ ಸಂಪರ್ಕಾಚೆ ಸೌಲಭ್ಯ ನಾಶ್ಶಿಲೆ. ಫೋನ್, ಕಾರ್ ಸಕಡಾಲ್ಯಾಗ್ಗಿ ನಾಶಿಲೆ, ಮಸ್ತ ಪ್ರಯಾಣ ಬಸ್ಸಾವಯ್ರಿ ಚೊಲ್ಕಾ ಆಶ್ಶಿಲೆ. ತಸ್ಸಾಲೆ ಪರಿಸ್ಥಿತಿಂತೂ ಆಮ್ಗೆಲೆ ಮ್ಹಾಲ್ಗಡ್ಯಾನಿ ಕೆಲೀಲೆ ಸೇವಾ ಕಿತ್ಲೆ ಮೌಲ್ಯಯುತ ನ್ಹಂಹಿವೇ? ತಾಂಗೆಲೆ ತ್ಯಾ ನಿಃಸ್ವಾರ್ಥಪಣಾಕ ಆಮ್ಮಿ ಏಕ್ಪಂತ ಪೂಣಿ ಸಲಾಂ ಕೊರಕಾಚಿ ನ್ಹಂಹಿವೇ? ಪ್ರಪ್ರಥಮ ಜಾವನು ಶ್ರೀ ಎಸ್.ವಾಯ್. ಕಾಮತ ದಡ್ಡೀಕರ ತಾನ್ನಿ ತ್ಯಾ ಕಾಲಾಂತು ರೂ. ೮೦೦೦/- ದೇಣಿಗಾ ದಿವಚೆ ವಾಗ್ದಾನ ಕೆಲ್ಲಿ ಕಂಯಿ. ಆಜಿ ಹುಬ್ಬಳ್ಳಿಚೆ ಸಮಾಜ ಮಂದಿರ ಸರಸ್ವತಿ ಸದನ, ಲಕ್ಷ್ಮೀಸದನ ಆಸ್ಸುಚೆ ಜಯಚಾಮರಾಜ ನಗರಾಕ ತೆದ್ನಾ ಓಲ್ಡ್ ಕಾಟನ್ ಮಾರ್ಕೇಟ್ ಮ್ಹೊಣು ಆಪಯತಾಲೆ ಕಂಯಿ. ಥಂಯಿ ಶ್ರೀ ಆರ್.ಎ.ಕಾಮತ ಮ್ಹಣಚೆ ಮಹನೀಯಾನಿ ಕಿತ್ಲೆಕಿ ವರ್ಷ ಮಾಕಶಿ ಆಪಣೇನಿ ಘೆತ್ತಿಲೆ ಜಾಗೋ ಸುಮಾರ ವರ್ಷಾ ನಂತರ ಜಾಲಯಾರೀಚಿ, ಜಾಗೇಚೆ ಮಾರ್ಕೇಟ್ ಮ್ಹೊಲ ಮಸ್ತ ಮಾರಗಾಯ ಜಾವನು ಆಸಲೇರಿಚಿ ಆಪಣೇನಿ ಘೆತ್ತಿಲೆ ಮೊಲ್ಲಾಕಽಚಿ ದಿಲ್ಲೆ ಕಂಯಿ. ಹಾಜೇನ ಸಮಾಜಾಕ ಸ್ವಂತ ಇಮಾರತ್ತ ಕೊರ್‍ಕಾ ಮ್ಹಣ್ಚೆ ಸಂಕಲ್ಪ ಕಾರ್ಯರೂಪಾಕ ಯವ್ಚೆ ಮೂರ್ತ ಸನ್ನಿಹಿತ ಜಾಲ್ಲೆ. ಸಮಾಜ ಮಂದಿರ ಬಾಂದೂನು ಶುದ್ಧ ಮ್ಹಣ್ತಲ್ಯಾಲೆ ಉಮೇದ ಚ್ಹಡ ಜಾಲ್ಲೆ. ತೆದನಾಂಚೆ ತ್ಯಾ ಮ್ಹಾಲ್ಗಡೆ ಸಮಾಜ ಬಾಂದವಾಲೊ ನಿಃಸ್ವಾರ್ಥಪಣಾಚೆ ಸೇವಾಪ್ರಯತ್ನ ಆನಿ ಕತೃತ್ವ ಶಕ್ತಿಚೆ ಫಲ ಜಾವನು ೧೯೪೭ಚೆ ಜೂನಾಂತು ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ದ್ವಾರಕಾನಾಥ ತೀರ್ಥ ಸ್ರೀಪಾದ ವಡೇರ ತಾಂಗೆಲೆ ಕರಕಮಲಾನಿಶ್ರೀ ಸರಸ್ವತಿ ಸದನಾಚೆ ನೆಲ್ಕಟ್ಟಾಚೆ ಪಾತ್ತೊರು ದವರ್‍ಲೆ. ಮುಖಾರಿ ದೋನ ವರ್ಷಾ ಭಿತ್ತರಿ ಸರಸ್ವತಿ ಸದನ (ಪೊರನೆ ಇಮಾರತ್) ಉಟಾನು ರಾಬಲೆ. ೧೯೪೯ ಜೂನ ೨೪ಚೆ ಶುಕ್ರಾರ ರಕ್ಷಾಘ್ನ, ವಾಸ್ತು ಹೋಮಾದಿ ಚಲಾಯಿಸೂನು ಜಾಲ್ಲ ಮಾಗಿರಿ ತೆದನಾಚೆ ಸಮಾಜಾಧ್ಯಕ್ಷ ಡಾ|| ಎಸ್.ಎಮ್. ಕಾಮತ್ ಮಾಮ್ಮಾನಿ ಧ್ವಜಾರೋಹಣ ಕೆಲ್ಲೆ ಆನಿ ಕೋಡಿಯಾಳ್ಚೆ(ಮಂಗಳೂರು) ಉದ್ಯಮಪತಿ, ಜಿ.ಎಸ್.ಬಿ ಸಮಾಜಾಚೆ ಗಣ್ಯ ಶ್ರೀ ವ್ಹಿ.ಎಸ್. ಕುಡ್ವ ಮಾಮ್ಮಾನಿ “ಶ್ರೀ ಸರಸ್ವತಿ ಸದನ ಲೋಕಾರ್ಪಣ ಕೆಲ್ಲಿ. ತ್ಯಾ ಸಮಾರಂಭಾಕ ಡಾ. ನಾ.ಸು. ಹರ್ಡಿಕರ, ಶ್ರೀ ಆರ್.ವ್ಹಿ. ಶಿರೂರ ಆದಿ ಹುಬ್ಬಳ್ಳಿಚೆ ಪ್ರತಿಷ್ಟಿತ ಗಣ್ಯ ಉಪಸ್ಥಿತ ವ್ಹರಲೀಲೆ. (ಭಾಗ ೨ರಲ್ಲಿ ಮುಖಾರಸಿತಾ.)