ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೊ ಶ್ರೀ ಗೋಪಿನಾಥ ಸೇವಾ ವಾಹಿನಿ ತರಪೇನಿ ಹರ ವರ್ಷ ಚಲೋನು ಘೇವ್ನು ಯವ್ಚೆ ಸಹಮಿಲನ ಕಾರ್ಯಕ್ರಮ ಹಳದಿಪುರಾಚೆ ಶ್ರೀ ಮುಖ್ಯಪ್ರಾಣಾಂತರ್ಗತ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಚೆ ಆವಾರಾಂತು ಆರ್ತ ಜನವರಿ 11ಕ ವೈಭವಾರಿ ಸಂಪನ್ನ ಜಾಲ್ಲೆ. ಆಯ್ತವಾರು ಕಾಳ್ಕಾಚೆ ದರಬಾರು ಸೂರು ಜಾವ್ಚೆ ತೀನ್ಕತ್ರೆ ವೇಳ್ಯಾರಿ ರಂಗು ರಂಗಾಚೆ ದೀಪಾಲಂಕಾರಾ ಮಧೇ ತಯಾರ ಕೆಲೀಲೆ ಭವ್ಯ ವೇದಿಕೆರಿ 24ವೇಂ ವರಸಾಚೊ ಸಹಮಿಲನ ಕಾರ್ಯಕ್ರಮಾಕ ರೋಟರಿ ಕ್ಲಬ್ ಹೊನ್ನಾವರ ಹಾಜ್ಜೆ ನಿರ್ದೇಶಕ ಶ್ರೀ ದಿನೇಶ ಯಶವಂತ ಕಾಮತ ಹಾನ್ನಿ ದೀಪ ಪ್ರಜ್ವಲನ ಕೊರನು ಕಾರ್ಯಕ್ರಮಾಕ ಸುರುವಾತ ದಿಲ್ಲೆ.
ಮಾಗಿರಿ ಉಲಯಿಲೆ ತಾನ್ನಿಹರ ವರ್ಷ ಸಹಮಿಲನ ಕಾರ್ಯಕ್ರಮ ಘಡಯತಾ ಯವ್ನು ರುಪ್ಯಾ ಪರಭೆಚೆ ಹುಂಬರಾರಿ ರಾಬ್ಲಿಂತಿ. ಮುಖಾವಯ್ಲೆ ವರ್ಷ ಚೊಲ್ಚೆ ೨೫ ವರಸಾಚೆ ಸಹಮಿಲನ ಕಾರ್ಯಕ್ರಮಾಕ ತುಮಗೇಲೆ ಬರಶಿ ರೋಟರಿ ಸಂಸ್ಥೋ ವಾಂಟೊ ಘೆತ್ತಾ ಮ್ಹಣ್ಚೆ ಭರ್ವಸ ದಿವನು ಆಯ್ಚೆ ಯುವಕಾರ ಸಮಾಜಾಕ ಮಾರಕ ಜಾಲೀಲೆ ದುಶ್ಚಟಾನಿ ದೂರ ವ್ಹರ್ನು, ಆಮ್ಗೆಲೆ ಸಂಸ್ಕೃತಿ ವ್ಹರೋಚೆ ಒಟ್ಟು ಸಮಾಜಾಚೆ ಪ್ರತಿಷ್ಠಾ ರಾಕ್ಕಾ ಮ್ಹಣ್ಚೆ ಆಪೋವ್ಣಿ ದಿಲ್ಲೆ. ಮುಖೇಲ ಸೊಯರೆ ಜಾವನು ಆಯಲೀಲೆ ಯಲ್ಲಾಪುರ್ಚೆ ಉದ್ಯಮಿ ಶ್ರೀ ಬಾಲಕೃಷ್ಣ ನಾಯಕ ತಾನ್ನಿ ಉಲೋನುಯುವಕಾರಾನಿ ಆಪಣೇಲೆ ಸ್ವಂತ ಗಾಂವಾಂತು ಸ್ವಂತ ಉದ್ಯಮ ಚಲಾಯಿಸುಚಾಕ ನಜರ ಘಾಲಯೇರಿ ಆಮ್ಗೆಲೆ ಪೂರ್ವಿಕಾನಿ ಜನ್ಮಿಲೆ, ಘೊಳ್ಳಿಲೆ ಭೂಂಯ್ಚೆ ಪ್ರತಿಷ್ಠಾ ಚಡ್ತಾ ಮ್ಹೊಣು ಸಾಂಗ್ಲೆ. ಕಾರ್ಯಕ್ರಮಾಂತು ಸಮಾಜಾಚೆ ಮ್ಹಾಲ್ಗಡೆ ಜಾಲೀಲೆ ಶ್ರೀ ಗಣೇಶ ರಾಮಚಂದ್ರ ಶಾನಭಾಗ ಹಳದಿಪುರ ತಾಂಕಾ ಸೇವಾ ವಾಹಿನಿ ತರಪೇನಿ ಸನ್ಮಾನ ಪೂರ್ವಕ ಗೌರವ ಕೆಲ್ಲಿ.
ಸಮಾರಂಭ ವೇದಮೂರ್ತಿ ನರಸಿಂಹ ಭಟ್ ಆನಿ ವೇದಮೂರ್ತಿ ಗಿರೀಶ್ ಭಟ್ ಹಾಂಗೆಲೆ ವೇದಘೋಷದ ಮುಖೇನ ಶೂರು ಜಾಲ್ಲೆ. ಕುಮಾರಿ ವೃಂದಾ ಕೃಷ್ಣಮೂರ್ತಿ ಶಾನಭಾಗ ಹೀಣೆ ಧಾಂಚೆ ಅಧ್ಯಾಯಾಚೆ ಭಗವದ್ಗೀತೆಚೆ ಸರ್ವ ಶ್ಲೋಕ ಪಠಣ ಕೆಲ್ಲಿ. ಸೇವಾ ವಾಹಿನಿಚೆ ಅಧ್ಯಕ್ಷ ಜಾಲೀಲೆ ಶ್ರೀ ನಾಗರಾಜ ಶ್ರೀನಿವಾಸ ಪೈ ತಾನ್ನಿ ಯೆವಕಾರ ಕೆಲಯಾರಿ ವೇದಮೂರ್ತಿ ನರಸಿಂಹ ಭಟ್ ತಾನ್ನಿ ಕಾರ್ಯಕ್ರಮಾಚೆ ಖಾತ್ತಿರಿ ಪ್ರಾಸ್ತಾವಿಕ ಉತ್ರ ಉಲಯಿಲೆ. ನುಡಿಗಳನ್ನಾಡಿದರು.
ಶ್ರೀ ಸುಬ್ರಾಯ ನರಸಿಂಹ ಶಾನಭಾಗ ಹಾನ್ನಿ ಸೊಯರ್ಯಾಲೆ ಒಳಕ ಕೊರನು ದಿಲ್ಲಿ. ಸೇವಾ ವಾಹಿನಿಚೆ ಕಾರ್ಯದರ್ಶಿ ಜಾಲೀಲೆ ಶ್ರೀ ಧನಂಜಯ ವಸಂತ ಪೈ ತಾನ್ನಿ ಸೇವಾವಾಹಿನಚೊ ಕಾರ್ಯ ಚಟುವಟಿಕೆ ಖಾತೇರಿ ವರದಿ ವಾಚ್ಚಿಲೆ. ಶ್ರೀಮತಿ ಭಾರತಿ ನರಸಿಂಹ ಭಟ್ ಹಾನ್ನಿ ಮಹಿಳಾ ಸೇವಾ ವಾಹಿನಿಚೆ ವಾರ್ಷಿಕ ವರದಿ ವಾಚನ ಕೆಲ್ಲಿ. ಶ್ರೀ ಶ್ರೀನಿವಾಸ ನಾಗರಾಜ ಪೈ ತಾನ್ನಿ ಸಕಡಾಂಕ ಆಬಾರ ಮಾನಲೆ. ಕಾರ್ಯಕ್ರಮಾಚೆ ನಿರ್ವಹಣ ಶ್ರೀ ಧನಂಜಯ ಪೈ ಆನಿ ಶ್ರೀ ಗಜಾನನ ಶಾನಭಾಗ ತಾನ್ನಿ ಅಚ್ಕಟ್ ಜಾವ್ನು ಚಲೋನು ದಿಲ್ಲಿ.
ಹೇ ವೇಳ್ಯಾರಿ ಸೇವಾವಾಹಿನಿಚೆ ಸದಸ್ಯಾನಿ ಹಾತ್ತಾಕ ಹಾತು ಮೆಳೋನು ಸಹಕಾರ ದಿಲ್ಲಿ. ಸಹಮಿಲನಾಚೆ ನಿಮಿತ್ತ್ಯಾ ಚರಡುವಾಂಕ, ಯುವಕಾರಾಂಕ, ದಾರಲೆಂ ಆನಿ ಬಾಯಲಾಂಕ ವೆಗವೆಗಳೆ ಖೇಳುಧಾಂವ್ಡಿಚೆ ಸ್ಪರ್ಧಾ ಚಲೋನು ವಿಜೇತಾಂಕ ಬಹುಮಾನ ವಾಂಟಿಲೆ. ಮನರಂಜನಾ ಕಾರ್ಯಕ್ರಮಾಂತು ಸಾನ್ಸಾನ ಗೊಡ ಪುಟಾಣಿ ತಾಕೂನು ಛದ್ಮವೇಶ, ಚರಡುವಾಲೆ ನೃತ್ಯ ಕಾರ್ಯಕ್ರಮ, ಕಿರು ನಾಟಕ, ಗಾಯನ ಜಮೀಲೆ ಸಕಡ್ಯಾಲೆ ದೋಳ್ಯಾಕ ಆನಿ ಮನಾಕ ಆನಂದ ದಿಲ್ಲೆ. ಶ್ರೀ ಗೋಪಿನಾಥ ಮಹಿಳಾ ವಾಹಿನಿ ತಾಂಗೆಲೆ ಭಜನಾ ಕಾರ್ಯಕ್ರಮ ವರೇನ ಸಕಡಾಂಕ ಭಕ್ತಿ ಸಾಗರಾಂತು ಬುಡ್ಡಯಿಲೆ. ಕಾರ್ಯಕ್ರಮಾಂತು ದಯಾನಂದ ಶಾನಭಾಗ, ರಾಜೀವ ಶಾನಭಾಗ, ಮಾರುತಿ ಶಾನಭಾಗ, ಕಾಶಿನಾಥ ಬಾಳಗಿ, ಉಮೇಶ ಪೈ, ವೆಂಕಟೇಶ ಶಾನಭಾಗ, ಕೃಷ್ಣಾನಂದ ಪ್ರಭು, ರಾಜೇಶ ಭಟ್, ಗಜಾನನ ಶಾನಭಾಗ ಸಹಿತ ಸಬಾರ ಸಮಾಜ ಬಾಂಧವ ಉಪಸ್ಥಿತ ವ್ಹರಲೀಲೆ.