ಹೇ ಸಾಮಾಜಿಕ ಕುಟುಂಬ ಆಧಾರಿತ ಸಿನೇಮ. ನಗ್ನಸತ್ಯ ಸಿನೇಮಾಂತು ಪ್ರಥಮ ಜಾವ್ನು ಜಿಎಸ್ಬಿ ಕೊಂಕಣಿ, ಸರಸ್ವತ್ ಕೊಂಕಣಿ ಆನಿ ಆರ್ಎಸ್ಬಿ ಕೊಂಕಣಿ ಲೋಕಾನಿ ಉಲಯಚೆ ತೀನಿ ಶೈಲಿಚೆ ಕೊಂಕಣಿ ಉಪಭಾಸ ವಾಪರೂನು, ಕೊಂಕಣಿ ಭಾಸೆಂತುಲಿ ವೈವಿಧ್ಯತೆಂತು ಏಕತಾ ಹಾಡಚೆ ಪ್ರಯತ್ನ ಕೆಲ್ಲ್ಯಾ. ಹೇ ಸಿನೇಮಾಂತುಲೆ ಕೆಲವ ದೃಶ್ಯಗಳನ್ನು ಯುಎಸ್ಎ, ಸ್ಟ್ಯಾನ್ಫೋರ್ಡ್ ವಿಶ್ವವಿದ್ಯಾಲಯಾಚೆ ಕ್ಯಾಂಪಸ್ಸಾಂತು ಚಿತ್ರೀಕರಣ ಕೆಲೀಲೆ ಆನ್ನೇಕ ವಿಶೇಷ.
ಸಿನೇಮಾ ಶ್ರೀಮತಿ ಕಿರಣ್ಮಯಿ ಕಾಮತ್ ತಾನ್ನಿ ನಿರ್ಮಾಣ ಕೆಲಯಾರಿ ಎಫ್ಟಿಐಐ ಮ್ಹೊಣು ನಾಮಾಧಿಕ ಜಾಲೀಲೆ ಪ್ರತಿಷ್ಠಿತ ಪುಣೆಚೆ ಚಲನಚಿತ್ರ ಆನಿ ದೂರದರ್ಶನ ಸಂಸ್ಥೆ ತಾಕೂನು ಪದವೀಧರ ಜಾಲೀಲೆ ೭೫ ವರ್ಷಾಚೆ ತರ್ನಾಟೆ ಡಾ. ರಮೇಶ್ ಕಾಮತ್ ಮಾಮ್ಮಾನಿ ನಗ್ನಸತ್ಯಾಚೆ ನಿರ್ದೇಶನ ಕೆಲ್ಲ್ಯಾ. ಆಜಪರಿಯಂತ ಸಾರಸ್ವತ ಶೈಲಿಚೆ ಭಾಸ ವಾಪರೂನು ಕೇವಲ ೧೦ ಸಾರಸ್ವತ್ ಕೊಂಕಣಿ ಸಿನೇಮ ಮಾತ್ರ ನಿರ್ಮಾಣ ಕೆಲೀಲೆ ಆಸ್ಸುನು, ತಾಂತು ೫ ಕೊಂಕಣಿ ಸಿನೇಮ ಡಾ. ರಮೇಶ ಕಾಮತ್ ಮಾಮ್ಮಾನಿ ನಿರ್ದೇಶನ ಕೊರನು ತಾಂಕಾ ಆವಯಿ ಭಾಸ (ಮಾತೃಭಾಷೆ) ಕೊಂಕಣಿ ಖಾತ್ತಿರಿ ಆಸ್ಸುಚೆ ಮ್ಹೋಗಿ ಕಿತ್ಲೆ ಮ್ಹೊಣು ದಾಖೋನು ದಿಲ್ಲ್ಯಾ.
೭೫ ವೇಂ ವಯಾಂತು ತಾನ್ನಿ ಕೊಂಕಣಿ ಸಿನೇಮ್ರ ‘ನಗ್ನ ಸತ್ಯ’ ನಿರ್ದೇಶನ ಕೆಲ್ಲ್ಯಾ. ಆನಿ ೫೦ ಪಶಿ ಚ್ಹಡ ಕಲಾವಿದಾಂನಿ ಹೇ ಸಿನೇಮಾಂತು ನಟನ ಕೆಲ್ಲ್ಯಾ, ತಶೀಚಿ ೩೮ ಪಶಿ ಚ್ಹಡ ವೆಗವೆಗಳೆ ಜಾಗೆಂತು ಶೂಟಿಂಗ್ ಕೆಲ್ಲ್ಯಾ. ಸಗಲೇ ಸಿನೇಮಾಚೆ ಸುರವೇಚಾನ ಅಖೈರಿ ಪರಿಯಂತ ಕೇವಲ ದೋನಿ ಮ್ಹಹಿನ್ಯಾಂತು ಪೂರ್ಣ ಕೊರನು ದಾಖಲ ವರೇನ ಕೆಲ್ಲ್ಯಾ. ಜಾಲಯಾರಿ ಕ್ವಾಲಿಟಿಂತು ಖಂಚೇಯಿ ರಾಜಿ ಕೊರನು ಘೇನಿ. ಸಿನೇಮಾಕ ಸೆನ್ಸಾರ್ ಮಂಡಳಿ ತಾಕೂನು ಯುಎ ಪ್ರಮಾಣಪತ್ರ ದಿಲ್ಲ್ಯಾ.
ಆಮ್ಗೆಲೆ ಆಲ್ತಾ ಪೆಲ್ತಾಂತು ಚೊಲ್ಚೆ ನಿಜ ಜೀವನಾಚೆ ಘಟನೆ ಆಧರ್ಸುನು `ನಗ್ನಸತ್ಯ ಸಿನೇಮ ತಯಾರ ಜಾಲ್ಲ್ಯಾ. ಮಧ್ಯಮ ವರ್ಗಾಚೆ ಬಾಯ್ಲೆಮನ್ಶೆಕ ಏಕಳ್ಯಾಕ ಪ್ರೀತಿಂತು ಮೋಸ ಕೊರನು ಸಮಾಜಾಚೆ ಗಣ್ಯ ಮನುಷ್ಯಾ ತಾಕೂನು ಚಿತ್ರಹಿಂಸಾ ದಿತ್ತಾತಿ. ತಿಕ್ಕಾ ನ್ಯಾಯಾಂಗ, ಶಾಸಕಾಂಗ ಆನಿ ಕಾರ್ಯಂಗಾಂತು ಕಿತ್ತುಲೆ ವಾವರೋ ಕೆಲಯಾರೀಚಿ ನ್ಯಾಯ ಮೇಳ್ನಾ. ತೀ ಚೆಲ್ಲಿಯಾ ಚರಡಾಕ ಜನ್ಮು ದೀವನು ಮರಣ ಪಾವ್ಲಿ. ತ್ಯಾ ಚರಡು ವ್ಹಡ ಜಾವನು ಪತ್ರಕಾರ ಜಾಲ್ಲಿ. ಆವಯಿನ ಮೊರನು ೨೦ ವರ್ಷ ನಂತರ, ತೀ ತನಿಖಾ ಕೊರನು ಅಖೇರಿಕ ಅಪರಾದಿಂಕ ಸೊದ್ದಿತಾ, ತಾಜ್ಜೇನ ಪತ್ರಿಕೋದ್ಯಮ ಚಾರಿಚೆ ಸ್ತಂಭ ಜಾವಕಾ ಮ್ಹೊಣು ತೀ ಜಗಾಕ ದಾಖಯಲಿ. ಪತ್ರಕೋದ್ಯಮಾನಿ ಸಮಾಜಾಕ ಖರೇ ಜಾಲೀಲೆ ನ್ಯಾಯು ಮೆಳ್ತಾ.
ಸಿನೇಮಾಂತು ಮುಖೇಲ ಪಾತ್ರವರ್ಗಾಂತು ಬಹುಭಾಷಾ ನಾಮಾಧಿಕ ಹಿರೋಯಿನಿ ಅಧ್ಯ ನಾಯಕ್ ಹಾನ್ನಿ ಹೇ ಸಿನೇಮಾಂತು ಆವಯಿ ಆನಿ ಧೂವ ಜಾವ್ನು ದ್ವಿಪಾತ್ರಾಂತು ಅಭಿನಯ ಕೆಲ್ಲ್ಯಾ. ಬಹುಭಾಷಾ ಸಿನಿಮಾ ತಾರೆ ಗೋಪಿನಾಥ್ ಭಟ್ (ತೆಲುಗು ಚಿತ್ರ ಅರ್ಜುನ್ ರೆಡ್ಡಿ ಖ್ಯಾತಿ) ಭ್ರಷ್ಟ ಪೊಲೀಸ್ ಅಧಿಕಾರಿ ಜಾವ್ನು ಅಭಿನಯ ದಿಲ್ಲ್ಯಾ. ಗ್ರೀಷ್ಮಾ ಪ್ರಭು ಹೀಣೆ ಪಯ್ಲೆ ಪಂತಾ ಬಾಲನಟಿ ಜಾವ್ನು ನಟನ ಕೆಲ್ಲಿಯಾ. ಕರ್ನಲ್ ಅಶೋಕ್ ಕಿಣಿ (ದಿವಂಗತ ಅಬ್ದುಲ್ ಕಲಾಂ ತಾಂಗೆಲೆ ಪರ್ಸನಲ್ ಭದ್ರತಾ ಅಧಿಕಾರಿ), ಲೋಕೋಪಕಾರಿ ಆನಿ ಸೆಂಚುರಿ ಗ್ರೂಪ್ ಸಿಇಒ ಡಾ. ದಯಾನಂದ ಪೈ, ಉದ್ಯಮಿ ಬಿ.ವಿ. ಗಣೇಶ್ ಪ್ರಭು, ಆನಂದ್ ನಗರ್ಕರ್, ಮೀರಾ ನಾಯಂಪಳ್ಳಿ ಹಾನ್ನಿ ಸಿನೇಮಾಂತು ಮುಖೇಲ ಪಾತ್ರಾಂತು ಆಸ್ಸಾತಿ.
ಜನವರಿ ೨೬ ದಿವಸು ಸಾಂಜವಾಳಾ ೫ ಘಂಟ್ಯಾಕ ಸೌತ್ ಎಂಡ್ ಸರ್ಕಲ್ ಲಾಗ್ಗಿಚೆ ಪೈ ವಿಸ್ಟಾ ಕನ್ವೆನ್ಷನ್ ಹಾಲಾಂತು ಫಿಲ್ಮ್ ಪ್ರೀಮಿಯರ್ ಶೋ ಚೆಲ್ತಾ.
ಸೆಂಚುರಿ ಗ್ರೂಪ್ನ ಸ್ಥಾಪಕ ಡಾ. ದಯಾನಂದ ಪೈ, ಪೈ ಗ್ರೂಪ್ ಆಫ್ ಹೋಟೆಲ್ಸ್ ಸ್ಥಾಪಕ ಶ್ರೀ ಜಗನ್ನಾಥ ಪೈ ಆನಿ ನಾಮಾಧಿಕ ಪರಿಸರವಾದಿ ಶ್ರೀಮತಿ ರೇವತಿ ಕಾಮತ್(ಜೆರೋಧಾದ ದೊಗ್ಗ ಶತಕೋಟ್ಯಾಧಿಪತಿ ಪುತ್ರ ಜಾಲೀಲೆ ನಿಖಿಲ್ ಕಾಮತ್ಆನಿ ನಿತಿನ್ ಕಾಮತ್ ತಾಂಗೆಲಿ ಆವಯಿ) ತಾನ್ನಿ ಮಾನಾಚೆ ಸೊಯರೆ ಜಾವ್ನು ಎತ್ತಾಲೆ. ಪ್ರದರ್ಶನಾಕ ಸಕಡಾಂಕ ಉಚಿತ ಪ್ರವೇಶ. ಚಡ್ತೆ ಮಾಹಿತಿಕ ನಿರ್ದೇಶಕ ಡಾ. ರಮೇಶ್ ಕಾಮತ್ ತಾಂಕಾ ಸಂಪರ್ಕ ಕೊರಯೇತ. ಮೊಬೈಲ್ ನಂ. 9845193432