ಗುರು ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಖಾತೇರಿ ಜಿ.ಎಸ್.ಬಿ. ಸಮಾಜಾಂತು ಶಿಷ್ಯವರ್ಗಾಂತು ಮ್ಹೋಗು, ಶ್ರದ್ಧಾ, ಭಾವಗಾನ ಸೇವೆಚೆ ರೂಪಾಂತು ಸಮರ್ಪಣೆ ಜಾಲ್ಲ್ಯಾ. ಮನಾಚೆ ಕನ್ನಡಿವರಾಸ್ಸುಚೆ ಸಕಡಾಲೆ ಮುಖಭಾವಾಂತು ಗುರುಂಗೆಲೆ ಖಾತೆರಿ ಭಾವ ಪ್ರೀತಿ, ತಾಂಗೆಲೆ ಅನುಗ್ರಹ ಪ್ರೀತ್ಯರ್ಥ ಹಜಾರಗಟ್ಲೆ ಅಂಕ್ಟ್ಯಾರಿ ಮೇಳ್ನು ಪಾವಯಿಲೆ `ಗಾನೋಪಾಸನ ಮಂಗಳೂರ್‍ಚೆ ರಥಬೀದಿಂತು ಆನ್ನೇಕ ಕೋಡಿಯಾಳ ತೇರಾಚೆ ಅವಿಸ್ಮರಣೀಯ ಸಂಭ್ರಮು, ಮಾತ್ರ ನ್ಹಂಹಿ ಜಿ.ಎಸ್.ಬಿ ಸಮಾಜಾಚೆ ಕುಂಭ ಮೇಳ ಜಾವ್ನು ಉದೋನು ಆಯಲಾ. ಮ್ಹೊಣು ಶ್ರೀ ಸಂಸ್ಥಾನ ಕಾಶೀಮಠಾಧೀಶ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾನಿಂ ಸಾಂಗ್ಲೆ. ತಾನ್ನಿ ಮಂಗಳೂರು ರಥಬೀದಿ ಶ್ರೀ ವೆಂಕಟರಮಣ ದೇವಳಾಚೆ ಆವಾರಾಂತು ೨೬-೦೧-೨೦೨೫ಚೆ ಆಯ್ರವಾರ ತೀನ್ಕತ್ರೆ ವೇಳ್ಯಾರಿ ಶ್ರೀ ಕಾಶೀಮಠ ಸಂಸ್ಥಾನಾಚೆ ಪರಮಗುರು ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಜನ್ಮಶತಾಬ್ದಿ ಅಂಗ ಜಾವನು ಸಮಾಜಾಚೆ ಶಂಬರ ಭಽರಿ ಪ್ರತಿಭಾನ್ವಿತ ಗಾಯಕಾನಿ, ೨೫ ಸಹ ಕಲಾವಿದಾಂಕ ಮೆಳೋನು ಘೇ‌ಔನು ಚಲಾಯಿಸಿಲೆಶ್ರೀ ಸುಧೀಂಧ್ರ ಶತ ನಮನ ಶತ ಸ್ಮರಣ ವಿಶಿಷ್ಠ ಗಾನೋಪಾಸನಾ ಕಾರ್ಯಕ್ರಮಾಂತು ಪೂಜ್ಯ ಸ್ವಾಮೆಂ ಆಶೀರ್ವಚನ ದಿವನು ಸಂತೋಷ ವ್ಯಕ್ತ ಕೆಲ್ಲೆ.
ಶತ ನಮನ, ಸ್ಮರಣ:
ಮ್ಹಾಲ್ಗಡೆ, ನಾಮಾಧಿಕ ಗಾಯಕ ಪುತ್ತೂರು ನರಸಿಂಹ ನಾಯಕ್ ನೇತೃತ್ವಾರಿ ಶಂಬರಿ ಗಾಯಕಾನ ದೇವಳಾಚೆ ಮುಖಾವಯಲೆ ಆಕರ್ಷಕ ವೇದಿಕೆರಿ ಗುರು ಸುಧೀಂದ್ರಾಲೆ ಖಾತ್ತಿರಿ ಒಟ್ಟು ೧೦ ಪದ ಮ್ಹಳ್ಳೆ. ದೇಡ ಘಂಟ್ಯಾಚೆ ಹೇ ಮನಪಸಂದ ಗಾನೋಪಾಸನ ಆಯಕುಚಾಕ ರಥಬೀದಿಂತು ಜಾಗೋ ನಾತ್ತಿಲ ವರಿ ಗಚಾಗಚ್ ಜಾವ್ನು ಪ್ರೇಕ್ಷಕ ಭರಲೀಲೆ. ಗಾಯತಾಲೆಂ ಒಟ್ಟೂ ತಾನ್ನೀ ಸ್ವರು ಮೆಳಯಿಲೆ.
ಅಚ್ಯುತದಾಸಾಂಗೆಲೆ ಜಯನಾರಾಯಣಪದಾ ಬರಶಿ ಆರಂಭ ಜಾಲೀಲೆ ಕಾರ್ಯಕ್ರಮಾಂತು ಉಪೇಂದ್ರ ಭಟ್ ತಾಂಗೆಲೆ ಶ್ರೀ ಸ್ವಾಮಿ ನಮೋ ನಮಃ, ಕೊಚ್ಚಿ ಶ್ರೀನಿವಾಸ ಪ್ರಭು ತಾಂಗೆಲೆ `ನುತಿಸಳವೇ ಯತಿ ಸುಧೀಂದ್ರರರನು.. ಮಾಗಿರಿ ಕೊಚ್ಚಿ ಅನಂತ ಭಟ್ ತಾಂಗೆಲೆ ವಂದನ ಸುಧೀಂದ್ರ ಯತಿ ರಾಯಾಂಕ ಪದ ಭಾವಪೂರ್ಣ ಜಾವ್ನು ಸಾಂಗ್ಲೆ. ಭಾರತಿ ಪ್ರಕಾಶ್ ಶೆಣೈ ತಾಂಗೆಲೆ ವ್ಯಾಸನ ಒಲಿಸಿದ ಸಾಧಕ, ಎ. ಮಾಧವ ಕಾಮತ್ ತಾಂಗೆಲೆ ಸುಧೀಂದ್ರ ಸದ್ಗುರು ಜೈ ಜೈ, ಪಂ. ನರಸಿಂಹ ಆಚಾರ್ಯಾಂಗೆಲೆ ರಚನಾ ದೇವ ದೇವ ಸದ್ಗುರು ದೇವ ಭಾವಗಾನ ಜಾವನು ಪ್ರಸ್ತುತ ಜಾಲ್ಲೆ. ಕೇಶವದಾಸಾಂಗೆಲೆ ಶ್ರೀ ಸುಧೀಂದ್ರ ಪಾಹಿಮಾಂ, ಅಚ್ಯುತದಾಸಾಂಗೆಲೆವೇದವ್ಯಾಸಾ ವಿಷ್ಣು ವ್ಯಾಪಕಾ.ಅಖೇರಿಕ ಪುರಂದರ ದಾಸಾಂಗೆಲೆ ವೆಂಕಟಾಚಲ ನಿಯಲಂ ಸಮೂಹ ಗಾಯನ ಬರಶಿ ಸಮಾಪ್ತ ಜಾಲ್ಲೆ.
ಹೇ ಕಾರ್ಯಕ್ರಮಾಂತು ಉದ್ಯಮಿ ಡಾ. ಪಿ.ದಯಾನಂದ ಪೈ , ಪಿ. ಸತೀಶ್ ಪೈ, ದಂಪತಿ, ಪ್ರದೀಪ್ ಜಿ ಪೈ, ಶಾಸಕ ಡಿ.ವೇದವ್ಯಾಸ ಕಾಮತ್, ಸುಬ್ರಾಯ ಪೈ, ಗಿರೀಶ್ ಪೈ,ದೀಪಕ್ ಶೆಣೈ ವಾಶಿ, ನರಸಿಂಹ ಶೆಣೈ, ವೀರೇಂದ್ರ ಹೆಗ್ಡೆ, ದೇವಳಾಚೆ ಟ್ರಸ್ಟಿ ಜಾಲೀಲೆ ಎ. ಬಾಲಕೃಷ್ಣ ಶೆಣೈ, ಸಾಹುಕಾರ್ ಕಿರಣ್ ಪೈ, ಸತೀಶ್ ಪ್ರಭು ಆದಿ ಗಣ್ಯ ಲೋಕ ಉಪಸ್ಥಿತ ವ್ಹರಲೀಲೆ. ಗಾಯಕಾಂಗೆಲೆ ತರಪೇನ ಶಂಕರ್ ಶ್ಯಾನುಭಾಗ್, ತಿಮ್ಮಪ್ಪ ಹೆಗ್ಡೆ, ಪುತ್ತೂರು ಪಾಂಡುರಂಗ ನಾಯಕ್ ತಾನ್ನಿ ತಾಂಗೆಲೆ ಅಭಿಪ್ರಾಯ ವ್ಯಕ್ತ ಕೆಲ್ಲಿ. ಬೆಂಗಳೂರ್‍ಚೆ ಚರಕೋ ಶ್ರೇಷ್ಠ ಪ್ರಭು ರೂಬ್ರಿಕ್ಸ್ ಕ್ಯೂಬ್ಂತು ಥಂಯಿಚಿ ಸೊಡಯಿಲೆ ಗುರೂಂಗೆಲೆ ಚಿತ್ರ ಸಕಡಾನಿ ತಾರೀಪು ಕೆಲ್ಲಿ.
ದೇವಳಾಚೆ ಟ್ರಸ್ಟಿ ಜಗನ್ನಾಥ ಕಾಮತ್ ತಾನ್ನಿ ಯೇವ್ಕಾರ ಕೆಲ್ಲಿ. ಗುರು ಸುಧೀಂದ್ರ ತೀರ್ಥರ ಜನ್ಮ ಶತಾಬ್ದಿ ಸಂಭ್ರಮಾಂತು ಗುರೂನಿ ದಿಲೀಲೆ ಸೇವಾ ಅವಕಾಶಾಕ ಸಂತಸ ವ್ಯಕ್ತ ಕೊರನು ೨೦೨೬ಂತು ಶತಾಬ್ದಿ ಸಮಾರೋಪ ಮಂಗಳೂರಾಂತು ಚಲಾಯಿಸುಚಾಕ ಅವಕಾಶ ಮಾಗ್ಗುನು, ಏಕ್ಕಽಚಿ ವೇದಿಕೆರಿ ಶಂಬರಿ ಕಲಾಕಾರಾಂಗೆಲೆ ನೃತ್ಯೋಪಾಸನೆಚೆ ಚಿಂತನ ಆಸ್ಸಾ ಮ್ಹೊಣು ಸಾಂಗಲೆ. ಶತಾಬ್ದಿ ಸಂಭ್ರಮಾಚೆ ಅಂಗಜಾವ್ನು ಕೋಟೇಶ್ವರ ದೇವಳಾಂತು ಶಂಬರ ದಿವಸಾಚೆ ಅಹೋರಾತ್ರಿ ಭಜನಾ ಕಾರ್ಯಕ್ರಮ ಜುಲೈ ೧೭ತಾಕೂನು ಅಕ್ಟೊಬರ್ ೨೪ ಪರ್ಯಂತ ಚಲ್ತಾ ಮ್ಹಣ್ಚೆ ಪ್ರಕಟಣ ಕೆಲ್ಲಿ. ಯೂತ್ ಆಫ್ ಜಿ.ಎಸ್.ಬಿ ನೇತೃತ್ವಾರಿ, ದಾನಿಂಗೆಲೆ ಸಹಕಾರಾರಿ ಚಲೀಲೆ ಹೇ ವಿಶಿಷ್ಠ ಕಾರ್ಯಕ್ರಮಾಂತು ಕಿರಣ್ ಶೆಣೈ ತಾನ್ನಿ ಕಾರ್ಯಕ್ರಮಾಚೆ ನಿರೂಪಣ ಕೆಲ್ಲಿ.
ವರದಿ : ಗಣೇಶ ಕಾಮತ, ಮೂಡುಬಿದಿರೆ.