ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾಂಗೆಲೆ ಮಹಾ ಸಾಧನಾಂ

ಕಾಳ್ಕಿ ದಾಂವ್ಡೊಕಾ ಮ್ಹೊಣು ಹಜಾರಬಽರಿ ಪಣ್ತಿ ಲಾವ್ನು ದವರ್‍ಲ್ಯಾರಿಚಿ ತಾಂತುಲೆ ತ್ಯಾಲ ಖಾಲಿ ಜಾಲಯಾರಿ ನಾಂವೆ ಹೊಡ್ಡಾನ ವಾರೆ ಆಯ್ಯಿಲೆ ಜಾಲಯಾರಿ ಪೂರಾ ಪಣ್ತಿ ನೀವ್ನು ವಚ್ಚುನು ಸೊಡತಾ. ತ್ಯಾಂಚಿ ಸೂರ್ಯ ಭಗವಾನು ಉಟಾನು ಏಕ್ಪಂತ ದೋಳೊ ಸೊಡಲೊ ಮ್ಹಳಯಾರಿ ಏಕದಂ ಸಗಳೆ ಭೂಂಯ್ಚೆ ವಯಚೆ ಕಾಳೋಕು ಧಾವ್ನು ವಚ್ಚುನು ಸೊಡ್ತಾ. ಆನಿ ಹುಜವಾಡಾಚೆ ಸಾಮ್ರಾಜ್ಯ ವೈಭವೋಪೇತ ಜಾವ್ನು ರಾಯಭಾರ ಚಲಯತಾ. ತಶೀಚಿ ಜ್ಞಾನ, ಪಾಂಡಿತ್ಯ, ತಪೋಶಕ್ತಿ, ಬ್ರಹ್ಮಚರ್‍ಯಾಚೆ ಧೀಃಶಕ್ತಿನ ಭರಲೀಲೆ ಶ್ರೇಷ್ಠ ಗುರುಂಗೆಲೆ ಕೃಪಾ ದೃಷ್ಠಿ ಶಿಷ್ಯಾ ವಯ್ರಿ ಪೊಡಚೆ ಭಿತ್ತರಿ ತಾಗೆಲೆ ಜನ್ಮಜನ್ಮಾಂತರಾಚೆ ಪಾಪನಾಶ ಜಾವ್ನು ವತ್ತಾ. ತಾಗೆಲೆ ಉದರ್ಗತಿಚೆ ಅಧ್ಯಾಯು ಆರಂಭ ಜಾತ್ತಾ. ಹೇ ದೃಷ್ಟಾಂತಾಕ ಅನ್ವರ್ಥಕ ಜಾವ್ನು ಆಶ್ಶಿಲೇಚಿ ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಚೆ ಪೂರ್ವ ಪೀಠಾಧಿಪತಿ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಶ್ರೀಪಾದ ವಡೇರ ಸ್ವಾಮೀಜಿ. ಹಾಂಗೆಲೆ ಪೂರ್ವಾಶ್ರಮಾಚೆ ನಾಂವ ಶ್ರೀ ಸೇನಾಪುರ ರಾಘವೇಂದ್ರ ಲಕ್ಷ್ಮೀನಾರಾಯಣ ಆಚಾರ್ಯ.
ಕುಂದಾಪುರ್‍ಚೆ ಲಾಗ್ಗಿ ಆಸ್ಸುಚೆ ಪಂಚಗಂಗಾವಳಿನ ಭರಿಲೆ ಗಂಗೊಳ್ಳಿಚೆ ಸನಾತನ ವೈದಿಕ ಘರಾಣಿಚೆ ವೇದಮೂರ್ತಿ ಸೇನಾಪುರ ಶ್ರೀ ಲಕ್ಷ್ಮೀನಾರಾಯಣ ಆಚಾರ್ಯ ಆನಿ ಶ್ರೀಮತಿ ಬಾ ಹಾಂಗೆಲೆ ಪುಣ್ಯ ಗರ್ಭಾಚಾನ ದಿನಾಂಕ. ೨೨-೦೫-೧೯೪೫ ಹಾಂಗೆಲೆ ಜನ್ಮು ಜಾಲ್ಲೆ. ಗಂಗೊಳ್ಳಿ ಆನಿ ಕುಂದಾಪುರಾಂತು ಪ್ರಾಥಮಿಕ ಆನಿ ಕಾಲೇಜ ಶಿಕ್ಷಣ ಕೆಲ್ಲೆ ಉಪರಾಂತ ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಚೆ ತೆದನಾಚೆ ಪೀಠಾಧಿಕಾರಿ ಜಾಲೀಲೆ ಶ್ರೀ ದ್ವಾರಕಾನಾಥ ತೀರ್ಥ ಸ್ವಾಮ್ಯಾನಿ ಹಾಂಕಾ ಶಿಷ್ಯ ಜಾವ್ನು ಸ್ವೀಕಾರ ಕೊರಚಾಕ ಠರಯಿಲೆ. ಸನಾತನ ಧರ್ಮಾಚೆ ಸಂಸ್ಕಾರ ಚ್ಹೂಖನಾಶಿ ಆಚರಣ ಕೊರನು ಘೆತ್ತಾ ಯತ್ತಾಶ್ಶಿಲೆ ಗಂಗೊಳ್ಳಿ ಸೇವಾಪುರು ಘರಾಣಿಚೆ ಹೇ ಘರಾಂತು ಧಾರ್ಮಿಕ ಸಂಸ್ಕೃತಿಚೆ ವಾತಾವರಣಾಂತು ವಾಡ್ಡಿಲೆಂ ಹೇ ಚರಕ್ಯಾಂಕ ಧಾರ್ಮಿಕ ಸಂಸ್ಕೃತಿ ಜೀವನಾಚೆ ಕಾನ್ನಡಿ ಜಾಲೀಲೆ. ಏಕ್ಕಡೆ ಶ್ರೀ ಪರಶುರಾಮಾಕ ಜಾಗೋ ದಿವನು ಪುನೀತ ಜಾಲೀಲೆ ಸಮುದ್ರಾಚೆ ಲ್ಹಾರಾಚೆ ಇಂಚರ ಜಾಲಯಾರಿ ಆನ್ನೇಕ್ಕಡೆ ತ್ರಿಕಾಲ ಶ್ರೀ ವೆಂಕಟರಮಣ ದೇವಾಕ ಸ್ತುತಿ ಕೊರಚೆ ವೇದಮಂತ್ರಾಂಚೆ ದುಂದುಬಿ. ಅಸ್ಸಾಲೆ ಪರಿಸರಾಂತು ಆಶ್ಶಿಲೆ ಶ್ರೀ ರಾಘವೇಂದ್ರಾಕ ಆಧ್ಯಾತ್ಮಿಕ ಜಾಗೃತಿ, ಶೃದ್ಧಾ, ಭಕ್ತಿ ಆಪಣಿತ್ಲ್ಯಾಕ ಅಂಕುರ್‍ನಾಶಿ ಆಸ್ತವೇ?. ತಸ್ಸಾಲೊ ತೇಜೋವಂತ ಚರಕೋ ಶ್ರೀಮದ್ ದ್ವಾರಕಾನಾಥ ತೀರ್ಥಾಂಗೆಲೆ ದೋಳ್ಯಾಕ ಪಳ್ಳಿಲ್ಯಾಂತು ಆಶ್ಚರ್ಯ ನಾ. ಕಿತಯಾಕ ಮ್ಹಳಯಾರಿ ಶ್ರೀ ರಾಘವೇಂದ್ರ ಆಚಾರ್ಯ ಶ್ರೀಮದ್ ದ್ವಾರಕಾನಾಥ ತೀರ್ಥ ಸ್ವಾಮ್ಯಾಂಗೆಲೆ ಪೂರ್ವಾಶ್ರಮಾಚೆ(ಶ್ರೀ ಗೋವಿಂದ ರಾಮನಾಥ ಆಚಾರ್ಯ) ಬೈಣೆಲೊ ಪೂತು.
ಶಿಷ್ಯಾಂಕ ವೆಂಚಿಲೆ ಪ್ರಕ್ರಿಯಾ : ಶ್ರೀ ರಾಘವೇಂದ್ರ ಆಚಾರ್ಯ ಶ್ರೀದ್ವಾರಕಾನಾಥ ತೀರ್ಥ ಸ್ವಾಮ್ಯಾಂಗೆಲೆ ಬೈಣಿಲೆ ಪೂತು (ಸೋದರಳಿಯ) ಮ್ಹೊಣು ತಾಂಕಾ ಶಿಷ್ಯ ಜಾವ್ನು ವಿಂಚೆಲೆ ನ್ಹಂಹಿ. ಏಕ ಗುರುಪೀಠಾಕ ಪಟ್ಟಶಿಷ್ಯಕ ವೆಂಚಿಚಾಕ ತಾಜ್ಜೇಚಿ ಜಾಲೀಲೊ ಥೊಡೊ ನೇಮು ಆಸ್ತಾ. ಮ್ಹಾಲ್ಯಡ್ಯಾನಿ ಚೋಲ್ನು ಆಯ್ಯಿಲೆ ತ್ಯಾ ಸಾಂಪ್ರದಾಯಿಕ ವಿಧಾನ ಪ್ರಮಾಣೇ ಹಾಂಕಾ ಶಿಷ್ಯ ಮ್ಹೊಣು ವೆಂಚಿಲೆ. ಪಯಲೇಕ ಶ್ರೀಮದ್ ದ್ವಾರಕಾನಾಥ ತೀರ್ಥ ಆಪಣೇಲೆ ಉತ್ತರಾಧಿಕಾರಿ ಜಾವಚಾಕ ಯೋಗ್ಯ ಮ್ಹೊಣು ದಿಶ್ಶಿಲೆ ಪಾಂಚ ಚರಕ್ಯಾಂಕ ವಿಂಚಿಲೆ. ಆನಿ ತಾಂಗೆಲೆ ಜಾತಕ ಘೆತ್ಲೆ. ಉಪರಾಂತ ನಾಮಾಧಿಕ ಜಾಲೀಲೆ ಜ್ಯೋತಿರ್ವಿದ್ವಾನಾಂಕ ಶ್ರೀ ಮಠಾಕ ಆಮಂತ್ರಣ ದಿವನು ಆಪೋನು ಘೇವ್ನು ತಾಂಕಾ ಹೇ ಪಾಂಚ ಚರಕ್ಯಾಲೆ ಜಾತಕ ಹಸ್ತಾಂತರ ಕೆಲ್ಲಿ. ತೆದ್ನಾ ಖಾಲಿ ಜಾತಕ ಮಾತ್ರ ಹಸ್ತಾಂತರ ಕೆಲ್ಲೆ ವಿನಃ ತ್ಯಾ ಕೋಣಾಲೆ ಜಾತಕ ಮ್ಹಣಚೆ ಮಾಹಿತಿ ದೀನಿ ಆನಿ ಅಮ್ಮುಖೆಚಿ ಜಾತಕ ವಿಂಚೂಕಾ ಮ್ಹಣಚೆ ಒತ್ತಾಯು ವರೇನ ಜ್ಯೋತಿರ್ವಿದ್ವಾನಾಂಕ ಕರ್ನಿ.
ತ್ಯಾ ಪಾಂಚ ಜಾತಕ ಪೂರ್ತಿ ಜಾವ್ನು ನಾನಾ ದೃಷ್ಠಿಕೋನಾಂತು ಅಧ್ಯಯನ ಕೆಲೀಲೆ ಉಪರಾಂತ ಜ್ಯೋತಿಷಿನಿ ತ್ಯಾ ಪಾಂಚ ಲೋಕಾಂತು ಸಂನ್ಯಾಸ ಆಶ್ರಮಾಕ ಚ್ಹಡ ಯೋಗ್ಯ ಜಾಲೀಲೆ ಚರಕ್ಯಾಲೆ ಜಾತಕ ವಿಂಚೂನು ಶ್ರೀದ್ವಾರಕಾನಾಥ ತೀರ್ಥ ಸ್ವಾಮ್ಯಾಂಕ ದಿಲ್ಲೆ. ತ್ಯಾ ಜಾತಕ ಶ್ರೀ ರಾಘವೇಂದ್ರ ಆಚಾಯಾಂಕ ಸಂಬಂಧ ಪಾವ್ವಿಲೆ ಮ್ಹೊಣು ತಾನ್ನಿ ಜಾಹೀರ ಕೆಲ್ಲೆ. ಆನಿ ಮಠಾಚೆ ಕಮಿಟಿ ತಶೀಚಿ ಹಿತೈಷಿ ಅನುಯಾಯಿಂಗೆಲೆ ಏಕ ನಿಯೋಗ ಚರಕ್ಯಾಲೆ ಅವಯಿ-ಬಾಪಯಿಲೆ ಘರ್‍ಕಡೆ ಪೆಟೋನು ದಿವನು ಶ್ರೀ ರಾಘವೇಂದ್ರ ಆಚಾರ್ಯ ಹಾಂಗೆಲೊ ಬಾಪಯಿ ಶ್ರೀ ಸೇನಾಪುರ ಲಕ್ಷ್ಮೀನಾರಾಯಣಾಚಾರ್ಯಾಂಕ ಆನಿ ತಾಂಗೆಲಿ ಬಾಯ್ಲ ಶ್ರೀಮತಿ ಬಾಯಿ ಹಾಂಕಾ ಮಠಾಚೆ ವೆಂಚಣೂಕಿ ಕಳಯಲಿ. ತಾನ್ನಿ ದೊಗ್ಗಾಽನಿ ಆಪಣೇಲೆ ನಿಶ್ಚಿತ ಜವಾಬ್ದಾರಿ ಲಕ್ಷಾಂತು ದವರೂನು ಘೇವ್ನು ಆಪಣೇಲೆ ಪುತ್ತಾಕ ಶ್ರೀ ಶ್ರೀಮದ್ ದ್ವಾರಕಾನಾಥ ತೀರ್ಥಾಂಗೆಲೆ ಪಟ್ಟಶಿಷ್ಯ ಜಾವ್ನು ದಿವಚಾಕ ಕಬೂಲ ಜಾಲ್ಲೆ. ಹೇ ಖುಷಿ ಖಬ್ಬರ ಸಕ್ಕಡೆ ಪಸರೂನು ಸರ್ವ ಶಿಷ್ಯ ವರ್ಗ ಖುಷಿ ಪಾವಲೆ.
ಶಿಷ್ಯ ಸ್ವೀಕಾರ : ಅವಯಿ-ಬಾಪಯಿಲೆ ಒಪ್ಪಿಗಾ ಮೆಳ್ಳೆ ಉಪರಾಂತ ಶ್ರೀ ರಾಘವೇಂದ್ರ ಆಚಾರ್ಯ ಧರ್ಮ ಪೀಠಾಚೆ ೨೩ವೇಂ ಪೀಠಾಧೀಪತಿ ಮ್ಹೊಣು ಶ್ರೀ ಸಂಸ್ಥಾನದ ಬಹುಶ್ರುತ ಯತಿವರ್ಯ ಜಾಲೀಲೆ ವೃಂದಾವನಸ್ಥ ಶ್ರೀಮದ್ ದ್ವಾರಕಾನಾಥ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾನಿಂ ಸ್ವಸಮಾಜಾಚೆ ಸರ್ವ ಶಿಷ್ಯ ವರ್ಗ ಸಮಕ್ಷಮ ಆಪಣೇಲೆ ಉತ್ತರಾಧಿಕಾರಿಲೆ ಘೋಷಣ ಕೆಲ್ಲೆ. ಶ್ರೀಶಕೆ ೧೮೮೮ಂತು ಪರಾಭವನಾಮ ಸಂವತ್ಸರ ಮಾಘ ಪುನ್ನವ ಆನಿ ಬಹುಳ ಪ್ರತಿಪದಾ ದಿವಸು ಮುಂಬೈಚೆ ವಡಾಳಾಂತು ಆಸ್ಸುಚೆ ಶ್ರೀ ರಾಮಮಂದಿರಾಂತು ಶ್ರೀ ರಾಘವೇಂದ್ರ ಆಚಾರ್ಯಾಂಗೆಲೆ ಸಂನ್ಯಾಸ ಆಶ್ರಮ ವಿಧಿ-ವಿಧಾನ ವಿಧಿಯುಕ್ತ ಜಾವ್ನು ಪೂರ್ಣ ಕೊರನು ದೀಕ್ಷಾ ಕಾರ್ಯಕ್ರಮಾಚೆ ದುಸರೇ ದಿವಸು ಆಯ್ತವಾರು ದಿನಾಂಕ, ೨೬-೨-೧೯೬೭ಕ ಧೋಂಪಾರಾ ಅಭಿಜಿತ ಶುಭ ಮುಹೂರ್ತಾರಿ ಪ್ರಣವ ಮಂತ್ರೋಪದೇಶ ಪೂರ್ವಕ ತಾಂಕಾ ಶ್ರೀ ವಿದ್ಯಾಧಿರಾಜ ಮ್ಹೊಣು ನಾಮಾಭಿದಾನ ಕೊರನು ಆಪಣೇಲೆ ಪಟ್ಟಶಿಷ್ಯ ಜಾವ್ನು ಸ್ವೀಕಾರ ಕೆಲ್ಲೆ.
ಧಾರ್ಮಿಕ ಶಿಕ್ಷಣ : ಸಂನ್ಯಾಸ ದೀಕ್ಷಾ ಸ್ವೀಕಾರ ಕೆಲ್ಲ ಉಪರಾಂತ ಪೂಜ್ಯ ಗುರು ಶ್ರೀಮದ್ ದ್ವಾರಕಾನಾಥ ತೀರ್ಥಾಂಗೆಲೆಂ ಮಾರ್ಗದರ್ಶನಾರಿ ಸಂಸ್ಕೃತ ಅಧ್ಯಯನ, ವೇದ, ವೇದಾಂಗ, ಕಾವ್ಯ, ಮಧ್ವಾಚಾರ್ಯಾನಿ ಬರೆಯಿಲೆ ೩೬ ಗ್ರಂಥಾಂಚೆ ಅಧ್ಯಯನ, ವಿಶೇಷತಃ ಮೂಹೂರ್ತ ವಿಭಾಗಾಂತು ಗಂಭೀರ ಜಾವ್ನು ಅಧ್ಯಯನ ಕೆಲ್ಲೆ. ಮಾಧ್ವ ಸಂಪ್ರದಾಯಾಚೆ ಆಧಾರ ಜಾಲೀಲೆ ಶ್ರೀಮನ್ನ್ಯಾಸುಧಾ ತಸ್ಸಾಲೆ ಅಸಾಮಾನ್ಯ ಗ್ರಂಥಾಂಚೆ ಅಧ್ಯಯನ ಕೊರನು ಜ್ಞಾನಸುಧೆಚೆ ಆಗರ ಜಾಲ್ಲಿಲೆ.
ಷಟ್ಭಾಷಾ ಪಂಡಿತ : ಅವಯಿ ಭಾಸ ಕೊಂಕಣಿ. ತ್ಯಾ ಕೊಂಕಣಿ ಸಹಿತ ಕನ್ನಡ, ಸಂಸ್ಕೃತ, ಮರಾಠಿ, ಹಿಂದಿ, ಇಂಗ್ಲೀಷ್ ಭಾಷೆಂತೂ ಪಾಂಡಿತ್ಯ ಶ್ರೀ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾನಿ ಆಸ್ಸ ಕೊರನು ಘೇವ್ನು ಷಟ್ಭ್ಭಾಷಾ(೬ಭಾಷಾ) ಪಂಡಿತ ಜಾಲ್ಲೆ.
ಪ್ರಥಮ ಚಾತುರ್ಮಾಸ ವ್ರತ : ಸನ್ಯಾಸಿಂಕ ಚಾತುರ್ಮಾಸ ವ್ರತ ಏಕ ಮಹತ್ವಾಚೆ ಆನಿ ಅನಿವಾರ್‍ಯ ವಿಧಿ. ಮಠಾಚೆ, ಭಕ್ತ ಲೋಕಾಂಕ ಆನಿ ಅನುಯಾಯಿ ಲೋಕಾಂಗೆಲೆ ಬರಶಿ ಸುಮಧುರ ಸಂಬಂಧ ವಾಡ್ಡೊನು ಘೆವಚೆ ರಾಜಮಾರ್ಗ. ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾಂಗೆಲೆ ಪಯಲೇಚೆ ೧೯೬೭ ಆನಿ ೧೯೬೮ ಹೇ ದೋನ ವರಸಾಚೆ ಚಾತುರ್ಮಾಸ ವ್ರತ ಗುರುವರ್ಯ ಶ್ರೀಮದ್ ದ್ವಾರಕಾನಾಥ ತೀರ್ಥ ಸ್ವಾಮ್ಯಾಂಗೆಲೆ ಬರಶಿ ಶ್ರೀ ಸಂಸ್ಥಾನಾಚೆ ಕೇಂದ್ರ ಮಠ ಆಸ್ಸುಚೆ ಪರ್ತಗಾಳಿಂತೂ ಚಲ್ಲೆ.
ಪೀಠಾರೋಹಣ : ೧೯೬೭ ಇಸ್ವೆಂತು ಶಿಷ್ಯ ಸ್ವೀಕಾರ ಜಾಲ್ಲೆ ಉಪರಾಂತ ಖಾಲಿ ಸ ವರ್ಷಾಂತೂಚಿ ಗುರು ಶ್ರೀಮದ್ ದ್ವಾರಕಾನಾಥ ತೀರ್ಥ ಸ್ವಾಮ್ಯಾಂಗೆಲೊ ನಿರ್ಯಾಣ ಜಾಲ್ಲೆ. ಉಪರಾಂತ ಗುರುವಾರ ತಾ, ೫-೪-೧೯೭೩ ದಿವಸು ಶ್ರೀಮಠಾಚೆ ೨೩ವೇಂ ಗುರುವರ್ಯ ಜಾವ್ನು ಶ್ರೀ ಪರ್ತಗಾಳಿ ಮಠಾಂತು ಶ್ರೀಮದ್ ವಿದ್ಯಾಧಿರಾಜ ತೀರ್ಥಾಂಗೆಲೆ ಗುರು ಪೀಠಾರೋಹಣ ವಿಜೃಂಭಣೆರಿ ಶುಭ ಮುಹೂರ್ತಾರಿ ಸಂಪನ್ನ ಜಾಲ್ಲೆ. ಸಂನ್ಯಾಸ ದೀಕ್ಷಾ, ಚಾತುರ್ಮಾಸ, ವೃಂದಾವನ ಪ್ರವೇಶ ಸಮಾರಂಭ ಖಂಯಿ ಜಾವ್ಕಾ ಜಾಲಯಾರೀ ಚಲಯಚಾಕ ಜಾತ್ತಾ. ಜಾಲಯಾರಿ ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಚೆ ಸಂಪ್ರದಾಯ ಪ್ರಮಾಣೆ ಪೀಠಾರೋಹಣ ಸಮಾರಂಭ ಪರ್ತಗಾಳಿ ಮೂಲಮಠಾಂತುಲೆ ರಾಜ ಸಿಂಹಾಸನ ವಯರೀಚಿ ಘಡೋಕಾ. ಮಠ ಪರಂಪರೆಚೆ ಗುರುವರ್ಯಾನಿ ನ್ಹಂಹಿಸಿ ವಿಂಗಡ ಕೊಣೇಯಿ ಪೂರ್ವಾಭಿ ಮುಖ ಜಾವನು ದವರೀಲೆ ಹೇ ರಾಜಸಿಂಹಾಸನ ಚೊಡಚೆ ತಶ್ಶಿ ನಾ. ಆನಿ ಹೇ ರಾಜಸಿಂಹಾಸನ ದವರೀಲೆ ಜಾಗಾ ತಾಕೂನು ತೆಕ್ಕಡೆ ಹೆಕ್ಕಡೆ ಹಾಲಯಚಾಕ ವರೇನ ನಾ ಮ್ಹಣಚೆ ನೇಮು ಆಸ್ಸಾ. ಅಸ್ಸಾಲೆ ಪರಂಪರ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಂತು ಕೇವಲ ಪರ್ತಗಾಳಿ ಮಠಾಂತು ಮಾತ್ರ ಆಸ್ಸಾ ಮ್ಹಣಚೆ ಆನ್ನೇಕ ವಿಶೇಷ ಜಾವ್ನಾಸ್ಸ.
ತ್ರಿವಿಧ ಮಹತ್ವ : ಪಾಯಿಶಿ (೫೦೦) ವರ್ಷಾಂ ಮಾಕಶಿ ಹೇಂಚಿ ತಿಥಿ ದಿವಸು (ಚೈತ್ರಶುದ್ಧ ದ್ವಿತೀಯಾ) ಶ್ರೀಮಠಾಚೆ ಆದ್ಯ ಗುರುವರ್ಯ ಜಾಲೀಲೆ ಶ್ರೀಮದ್ ನಾರಾಯಣ ತೀರ್ಥ ಸ್ವಾಮ್ಯಾಂನಿ ಸಂನ್ಯಾಸ ದೀಕ್ಷಾ ಘೆತ್ಲಿ. ಆನಿ ಶ್ರೀ ಗೋಕರ್ಣ ಮಠಾಚೆ ಸಂಸ್ಥಾಪನಾ ದಿವಸು. ಆನಿ ಶ್ರೀಮದ್ ವಿದ್ಯಾಧಿರಾಜ ತೀರ್ಥಾಂಗೆಲೆಂ ಗುರುಪೀಠಾರೋಹಣ ವರೇನ ತ್ಯಾಂಚಿ ತಿಥಿ ದಿವಸು ಜಾವಚಾ ವೊಚ್ಚುನು ತ್ಯಾ ತಿಥಿಕ ತ್ರಿವಿಧ ಮಹತ್ವ ಆಸ್ಸಾ.
ತಾಜ್ಜ ಉಡಗಾಸಾಕ ಪ್ರಶಸ್ತಿ : ಹೇಂಚಿ ತ್ರಿವಿಧ ಮಹತ್ವಾಚೆ ಶುಭದಿವಸೂಚಿ ಆಮ್ಗೆಲೆ ಸಾರಸ್ವತ ಸಮಾಜಾಕ ಅಪಾರ ಸೇವಾ ಪಾವೋನು, ಸಮಾಜಾಚೆ ಖ್ಯಾತಿ ಉಜ್ವಲ ಕೆಲೀಲೆ ಸದ್ಘ್ರಹಸ್ಥಾಂಕ ಪೂಜ್ಯ ಸ್ವಾಮ್ಯಾ ತಾಕೂನು ಶ್ರೀವಿದ್ಯಾಧಿರಾಜ ಪುರಸ್ಕಾರ ದಿವಚೆ ಪರಂಪರಾ ೧೯೭೭ ಇಸ್ವೆಚಾನ ಆರಭ ಜಾಲ್ಲೆ. ಪ್ರಥಮ ವರ್ಷ ವಿದ್ಯಾಧಿರಾಜ ಪುರಸ್ಕಾರ ಮರಣೋತ್ತರ ಜಾವ್ನು ವೈ ಪುರುಷೋತ್ತಮ ರಾಮನಾಥ ಕಿಣಿ ತಾಂಕಾ ದಿಲ್ಲೆ. ಹೆರವರ್ಷ (೧೯೭೮) ಮಣಿಪಾಲಾಚೆ ಡಾ|| ತೋನ್ಸೆ ಮಾಧವ ಅನಂತ ಪೈ ತಾಂಕಾ ಪಾವಿತ ಜಾಲ್ಲೆ. ಅವುಂದು ಹೇ ಪ್ರಶಸ್ತಿ ಮೈಸೂರಾಚೆ ವ್ಹಡ ಉದ್ಯಮಿ ಆನಿ ಮಹಾದಾನಿ ಡಾ|| ಎಂ. ಜಗನ್ನಾಥ ಶೆಣೈ ತಾಂಕಾ ದಿನಾಂಕ. ೨೩-೦೩-೨೦೨೩ ದಿವಸು ಪರ್ತಗಾಳಿಂತು ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾನಿ ಪಾವಿತ ಕೆಲ್ಲೆ. ತಾಜ್ಜ ಭರಶಿ ಶ್ರೀ ಮಠಾಚೆ ಉದರ್ಗತಿಕ ಶಮ ಘಾಲೀಲೆ ಸಮಾಜ ಬಾಂಧವಾಂಕ ಜೀವೋತ್ತಮ ಪ್ರಶಸ್ತಿ ವರೇನ ಶ್ರೀ ಪರ್ತಗಾಳಿ ಮಠಾ ತರಪೇನಿ ದಿತ್ತಾ ಆಯಲಿಂತಿ. ಹಾಜೇನ ಸಮಾಜಾಚೆ ಹರ್‍ಯೇಕ ಬಾಂದವಾಂತು ಸೇವಾ ಭಾವನಾ ಉದ್ಧೀಪನ ಜಾವ್ನು ತಾಂಗೆಲೆ ತಾಕೂನು ದುರ್ಬಲಾಂಕ ಮದದ್ ಮೆಳೊ, ಉಪಕಾರು ಜಾವೊ ಮ್ಹಣಚೆ ಮಹಾ ಉದ್ದೇಶ ಪೂಜ್ಯ ಸ್ವಾಮ್ಯಾಂಗೆಲೆ ಆಸ್ಸುಚಾಕ ಪುರೊ. ಪ್ರಪ್ರಥಮ ಸಾರ್ವಜನಿಕ ಕಾರ್ಯಕ್ರಮ : ಪೀಠಾರೋಹಣಾಚೆ ಉಪರಾಂತ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾನಿ ವಾಂಟೊ ಘೆತ್ತಿಲೆ ಪ್ರಪ್ರಥಮ ಸಾರ್ವಜನಿಕ ಕಾರ್ಯಕ್ರಮ ಖಂಡೋಲೆಚೆ ಶ್ರೀಗಣಪತಿ ದೇವಳಾಚೆ ಸಭಾಮಂಟಪಾಚೆ ಉದ್ಘಾಟನ. ಧಾರ್ಮಿಕ ಜಾಗೃತಿ : ಗುರೂಂಗೆಲೆ ಮೂಲ ಉದ್ದೇಶು ಶಿಷ್ಯವರ್ಗಾಂತು ಧಾರ್ಮಿಕ ಆನಿ ಆಧ್ಯಾತ್ನಿಕ ಜಾಗೃತಿ ಕೊರಚೆ. ತ್ಯಾ ಖಾತ್ತಿರಿ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾನಿ ಪೀಠಾರೋಹಣ ಜಾಲೀಲೆ ತಾಕೂನು ನಿರ್ಯಾಣ ಜಾವಚೆ ಪರ್ಯಂತ ವೆಗವೆಗಳೆ ದೇವಳ, ಸಮಾಜಾ ಮಂದಿರಾಂತು ಮಠಾನುಯಾಯಿ ಭಕ್ತ ವರ್ಗ ನಿಮಿತ್ಯ ಧಾರ್ಮಿಕ ಹೋಮಹವನ, ಉತ್ಸವು, ಪ್ರತಿಷ್ಠಾ ವರ್ಧಂತಿ ಚಲಯಿಲೆ. ಹಾಂತು ಸಹಸ್ರಕುಂಭ ಮಹಾವಿಷ್ಣು, ಅತಿವಿಷ್ಣು ಮಹಾಸುದರ್ಶನ, ಅತಿರುದ್ರ, ಶತಕೋಟಿ ರಾಮನಾಮ ಮಹಾರುದ್ರ, ಶತಚಂಡಿ, ರಕ್ಷತ್ರಯ ಹವನ ಇತ್ಯಾದಿ ಯಜ್ಞ ಅಪಾರ ಧಾರ್ಮಿಕ ಕಾರ್ಯ ಘಡೋಚೆ ವರಿ ಕೆಲ್ಲೆ. ಪೊರನೆ ಮಠಾಂಚೆ ಜೀರ್ಣೋದ್ಧಾರ, ವಿಸ್ತರಣ, ನವೀನ ಮಠ ಸ್ಥಾಪನ, ದೇವಳಾಚೆ ಜೀರ್ಣೋದ್ಧಾರ, ಪುನಃ ಪ್ರತಿಷ್ಠಾ, ಥಂಯಿ ಪೂಜಾ-ಪುನಸ್ಕಾರು ಚೊಲ್ಚೆ ವರಿ, ಪರಭೆಕ ವಿಶೇಷ ಉತ್ಸವು ಘಡಚೆ ವರಿ ಕೆಲ್ಲೆ. ಆಪಣೇಲೆ ಆಶೀರ್ವಚನಾಂತು ಬಾಂಧವಾಂಕ ಕುಲದೇವು, ಗುರುಮಠಾಚೆ ವಯ್ರಿ ಶೃಧ್ದಾ-ಭಕ್ತಿ ವಾಡಚೆ ವರಿ ಕೆಲ್ಲೆ. ಸನ್ಯಾಸ ಜೀವನಾಕ ಸಂಬಂಧ ಪಾವ್ವಿಲೆ ಸರ್ವ ವೃತೋಪಾಸ ಕರ್ತವ್ಯನಿಷ್ಠೆನಿ ಪಾಲನ ಕೊರಚೆ ಮೂಖಾಂತರ ಸಮಾಜ ಬಾಂಧವಾಂತು ಧಾರ್ಮಿಕ ಜಾಗೃತಿ ಜಾವಚೆ ವರಿ ಪಳೋನು ಘೆತ್ಲ್ಯಾ. ಪ್ರವಾಸು : ಪೀಠಾಧಿಕಾರಿ ಜಾಲೀಲೆ ತಶ್ಶೀಚಿ ಪಯಲೇಕ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾನಿ ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠ ಪರಂಪರೆಚೆ ಸರ್ವ ಯತಿವರ್ಯಾಂಗೆಲೆ ದಿನಚರಿ ಅಭ್ಯಾಸು ಕೆಲ್ಲೆ. ಅಸೇತು ಹಿಮಾಲಯ ಪರ್ಯಂತ ಪಸರೂನು ಆಸ್ಸುಚೆ ಶಾಖಾ ಮಠ ಆನಿ ಮಠಾಕ ಸಂಬಂಧ ಪಾವ್ವಿಲೆ ದೇವಳಾಕ ಭೇಟಿ ದಿಲ್ಲಿ. ಶಿಷ್ಯಕೋಟಿಕ ಭೆಟ್ಟುನು ಥಂಚೆ ಮಾಹಿತಿ ಕಳೀತಾಕ ಹಾಡ್ನು ಘೆತ್ಲಿ. ಗೌಡಸಾರಸ್ವತ ಬ್ರಾಹ್ಮಣ ಸಮಾಜಾಚೆ ಆಡಳಿತ ಆಸ್ಸುಚೆ ಸಮಾಜ ಮಂದಿರಾಂತು, ದೇವಳಾಂತು ಮೊಕ್ಕಾಂ ಕೆಲ್ಲಿ. ಹಾಜೇನ ಥಂಚೆ ಧಾರ್ಮಿಕ ಜಾಗೃತಿಚೆ ಪರಿಸ್ಥಿತಿ ಕೋಳ್ನು ಘೆವಚಾಕ ಸುಲಭ ಜಾಲ್ಲಿ. ಆಮ್ಚಗೇಲೆ ವೆಗವೆಗಳೆ ದೇವಾಲೆ ಕಲಾಭಿವೃದ್ಧಿ ತಶೀಚಿ ಶಿಷ್ಯಪರಿವಾರಾಚೆ ಧಾರ್ಮಿಕ, ಸಾಂಸ್ಕೃತಿಕ ಆನಿ ಆರ್ಥಿಕ ಉದರ್ಗತಿ ಖಾತ್ತಿರಿ ಹೋಮ, ಹವನ, ಉತ್ಸವು, ಪ್ರವಚನ, ಆಶೀರ್ವಚನ... ಅಶ್ಶಿ ಹಜಾರೋಬಽರಿ ಧಾರ್ಮಿಕ ಕಾರ್ಯ ಕೊರೋನು ಸಮಾಜಾಂತು ಧಾರ್ಮಿಕ, ಆಧ್ಯಾತ್ಮಿಕ ಜಾಗೃತಿ ಜಾವ್ಚೆ ವರಿ ಕೆಲ್ಲಿಂತಿ. ಅಭಿವೃದ್ಧಿ ಪರ್ವ : ಪೀಠಾರೋಹಣ ಜಾವ್ನು ವರ್ಷಾ ಭಿತ್ತರಿ ಸ್ವಾಮ್ಯಾಂಗೆಲೆ ಅಭಿವೃದ್ಧಿ ಪರ್ವ ಆರಂಭ ಜಾಲ್ಲೆ. ಪಯಲೇಕ ಭಟ್ಕಳಾಂತು ಶ್ರೀಮದ್ ಜೀವೋತ್ತಮ ತೀರ್ಥ ಸ್ವಾಮ್ಯಾಂಗೆಲೆ ತಶೀಚಿ ಶ್ರೀಮದ್ ನಾರಾಯಣ ತೀರ್ಥ ಸ್ವಾಮ್ಯಾಂಗೆಲೆ ವೃಂದಾವನ ಜೀರ್ಣೋದ್ಧಾರ ಕರಯಿಲೆ (೧೯೭೪) ತಾಜ್ಜ ಬರಶಿ * ವಾರಣಾಸಿ (೧೯೭೫), * ಬಸ್ರೂರು, ಕಾರವಾರ, ವೆಂಕಟಾಪುರ (೧೯೭೯), * ಗೋಕರ್ಣ (೧೯೮೧), * ಭಟ್ಕಳ (೧೯೮೧), * ಪರ್ತಗಾಳಿ ಮಠ (೧೯೮೪, ೧೯೮೬, ೧೯೯೯), * ಅಂಕೋಲಾ (೧೯೮೮), * ಮಂಗಳೂರು (ನವಗ್ರಹ ಪ್ರತಿಷ್ಠಾ) (೧೯೯೧), * ಗಂಗೊಳ್ಳಿ (೧೯೮೮), * ಬೆಂಗಳೂರ್‍ಚೆ ಬಸವನಗುಡಿಂತು ಆಸ್ಸುಚೆ ಶ್ರೀ ದ್ವಾರಕಾನಾಥ ಭವನಾಚೆ ಕಲ್ಯಾಣ ಮಂಟಪಾಚೆ ನವೀಕರಣ, ಶ್ರೀ ವಿದ್ಯಾಧಿರಾಜ ಸಭಾಗೃಹಾಚೆ ಉದ್ಘಾಟನ(೧೯೮೫). ಗೊಂಯ್ಚೆ ವಾಸ್ಕೋಚೆ ಮಠವಾಸ್ತು ಲಾಗ್ಗಿ ಭವ್ಯ ಬಹುಮಹಡಿ ಭವ್ಯ ಕಟ್ಟಡ (೧೯೯೮) ಇತ್ಯಾದಿ ಜೀಣೋದ್ಧಾರ ಆನಿ ನವೀಕರಣ ಕೊರನು ಮಠಾಚೆ ಪ್ರತಿಷ್ಠಾ ಚ್ಹಡ ಕೆಲ್ಲಿಂತಿ. ನವೀನ ಶಾಖಾ ಮಠ ನಿರ್ಮಾಣ: ೧. ಯಲ್ಲಾಪುರ (೧೯೮೩) (ಸ್ಥಳಾಂತರ) , ೨. ಮಂಕಿ (೧೯೮೩) (ಸ್ಥಳಾಂತರ), ೩. ಅಮರಗೋಳ, ಹುಬ್ಬಳ್ಳಿ (೧೯೮೯), ೪. ಬದರಿಕಾಶ್ರಮ (೧೯೮೯), ೫. ಬೆಳಗಾವಿ (೧೯೯೦), ೬. ದಾಂಡೇಲಿ (೧೯೯೨), ೭. ಮಡಗಾಂವ್ (೧೯೯೩), ೮. ಪರ್ವರಿ (೨೦೦೦), ೯. ಭದ್ರಾವತಿ (೨೦೦೩), ೧೦. ನಾಸಿಕ (೨೦೦೨), ೧೧. ಕಂಡ್ಲೂರ (೨೦೦೨). ಶಾಖಾ ಮಠಾಂತು ಸಭಾಗ್ರಹ ಆನಿ ಕಲ್ಯಾಣ ಮಂಟಪಾಂಚೆ ನಿರ್ಮಾಣ : * ಶ್ರೀನಾರಾಯಣತೀರ್ಥ ಕಲ್ಯಾಣ ಮಂಟಪ (ಭಟ್ಕಳ - ೧೯೮೧). * ಶ್ರೀದ್ವಾರಕಾನಾಥ ಭವನ (ಮಂಗಳೂರು -೧೯೮೨). * ಶ್ರೀ ರಾಮಚಂದ್ರ ತೀರ್ಥ ಮಂಟಪ (ರೇವಣ - ೧೯೮೪). * ಶ್ರೀದ್ವಾರಕಾನಾಥ ತೀರ್ಥ ಸಭಾಂಗಣ ( ಗಂಗೊಳ್ಳಿ - ೧೯೮೪). * ಶ್ರೀವಿದ್ಯಾಧಿರಾಜ ಸಭಾಂಗಣ ( ಬೆಂಗಳೂರು - ೧೯೮೫). * ಶ್ರೀವಿದ್ಯಾಧಿರಾಜ ಸಭಾಂಗಣ ( ಅಂಕೋಲಾ - ೧೯೮೯). * ಶ್ರೀ ಅಣುಜೀವೋತ್ತಮತೀರ್ಥ ಮಂಟಪ (ಡಿಚೋಲಿ - ೧೯೯೬). * ಶ್ರೀ ಇಂದಿರಾಕಾಂತ ಸಭಾಂಗಣ (ಕಾರವಾರ -೨೦೦೧). ಚಾತುರ್ಮಾಸ್ಯ ನೆವನಾಂತು ಸೌಲಭ್ಯ : ಸಮಾಜ ಬಾಂಧವಾಂತು ಏಕತ್ರ ಹಾಡ್ನು, ಸಂಘಟನ ವಾಡಯಚಾಕ ಪ್ರತಿ ವರ್ಷ ವೆಗಳೆ ವೆಗಳೆ ಗಾಂವಾಂತು ಚಾತುರ್ಮಾಸ ವೃತ ಆಚರಣ ಕೊರನು ಸಮಾಜಾಕ ಉಪಯೋಗ ಜಾವಚೆ ತಸ್ಸಾಲೆ ಸಭಾಭವನ, ಪಾಕಶಾಲಾ, ವೆಗಳೆ ಗಾಂವಾ ತಾಕೂನು ಯವಚೆ ಭಕ್ತಾಧಿಂಕ ಜಾವಕಾ ಜಾಲೀಲೆ ವಸತಿ ನಿರ್ಮಾಣ ಆದಿ ಸ್ಥಿರ ಸೌಲಭ್ಯ ಪ್ರಾಪ್ತ ಜಾವಚಾಕ ಕಾರಣೀಭೂತ ಜಾಲ್ಲಿಂತಿ. ತೀರ್ಥಯಾತ್ರಾ : ಪೂಜ್ಯ ಶ್ರೀ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾನಿ ಅಸೇತು ಹಿಮಾಲಯ ಪರ್ಯಂತ ಆಸ್ಸುಚೆ ಸರ್ವ ಕ್ಷೇತ್ರಾಚೆ ತೀರ್ಥಯಾತ್ರಾ ಕೆಲ್ಲಾ. ೧೩ ಪಂತಾ ಕಾಶಿಯಾತ್ರಾ, ಕಾಶಿಚೆ ಪಂಚಗಂಗಾ ಬಿಂಧುಮಾಧವಾಲೊ ಸನ್ನಿದಿಂತು ೩ ಪಂತಾ ಚಾತುರ್ಮಾಸ, ೨ ಪಂತಾ ಪಂಚಗಂಗಾ ಘಾಟಾಂತು ಕಾರ್ತಿಕ ನ್ಹಾಣ ಕೆಲೀಲೆ ಪೂಜ್ಯ ಸ್ವಾಮ್ಯಾನಿ ಹಿಂದೂಸ್ಥಾನಾಚೆ ಚಾರೀ ದಿಕ್ಕಾಂತು ಮ್ಹಳಯಾರಿ ಉತ್ತರಾಚೆ ಹಿಮಾಲಯ, ಬದರಿನಾಥ, ಪೂರ್ವಾಚೆ ಪೂರಿ ಜಗನ್ನಾಥ, ದಕ್ಷಿಣಾಚೆ ರಾಮೇಶ್ವರ, ಪಶ್ಚಿಮಾಚೆ ದ್ವಾರಕಾ ಅಶ್ಶಿ ಚಾರಧಾಮ ಯಾತ್ರಾ ಕೆಲ್ಲಾ. ಬರಶಿ ಅತೀ ಪುಣ್ಯದಾಯಕ ಮ್ಹಣೊನು ಘೆವ್ಚೆ ಸಪ್ತ ಮೋಕ್ಷದಾಯಕ ಪುರಿ(ಅಯೋಧ್ಯಾ, ಮಥುರಾ, ಮಾಯಾ, ಕಾಶೀ, ಕಾಂಚಿ, ಅವಂತಿಕಾ, ದ್ವಾರಾವತಿ) ಯಾತ್ರಾ, ತಿರುಪತಿ, ಶ್ರೀರಂಗಮ, ಶ್ರೀಮುಷ್ಣಮ, ತೋತಾದ್ರಿ, ಬದರಿಕಾಶ್ರಮ, ಪುಷ್ಕರ, ನೈಮಿಷಾರಣ್ಯ ತಶೀಚಿ ಸಾಲಿಗ್ರಾಮ ಕ್ಷೇತ್ರಾಂಚೆ ಅಷ್ಟ ವೈಕುಂಠ ಯಾತ್ರಾ ಪೂರ್ತಿ ಕೆಲ್ಯಾ. ಹಿಮಾಲಯಾಚೆ ಗಂಗಾ ನಂಯ್ಚೆ ಉಗಮ ಸ್ಥಾನಾಕ ಪಾದಯಾತ್ರಾ ಕೊರನು ಗೋಮುಖಾಚೆ ಬರ್ಪಾಂ ಉದ್ಕಾಂತು ಗಂಗಾಸ್ನಾನ ಕೊರಚೆ ಬರಶಿ; ಗಂಗಾ ನಂಯಿ ಸಮುದ್ರಾಕ ವಚ್ಚುನು ಪಾವಚೆ ಸಂಗಮಾಂತು ವರೇನ ಪುಣ್ಯ ಸ್ನಾನ ಕೆಲ್ಲಿಂತಿ. ದ್ವಾದಶ ಜ್ಯೋತಿರ್ಲಿಂಗ ದರ್ಶನ ಘೆತ್ತಿಲೆ ಪೂಜ್ಯ ಸ್ವಾಮ್ಯಾಂನಿ ದಕ್ಷಿಣ ಭಾರತಾಚೆ ಮದುರೈ, ಬೃಹದೇಶ್ವರ, ಮಹಾಬಲಿಪುರಮ್, ತಿರುವನಂತ ಪುರಮ್, ಗುರುವಾಯನೂರು, ಕುಂಭಕೋಣಂ ಕ್ಷೇತ್ರ ದರ್ಶನ ಕೆಲ್ಯಾ. ಹಿಮಾಲಯಾಚೆ ಪಂಚಪ್ರಯಾಗಾಂತು ಸಂಗಮ ಸ್ನಾನ, ಕನ್ಯಾಕುಮಾರಿಚೆ ಸಾಗರತ್ರಯಾಂತು ಸಂಗಮ ಸ್ನಾನ, ನಾಸಿಕಾಂತು ಚೊಲಚೆ ಕುಂಭಮೇಳಾಂತು ದೋನ ಪಂತಾ ಪವಿತ್ರ ಸ್ನಾನ ಕೆಲ್ಯಾ. ಸಕ್ಕಡಾ ಪಶಿ ಕಷ್ಟಸಾಧ್ಯ ಜಾಲೀಲೆ ಸಾಮಾನ್ಯ ಲೋಕಾಂಕ ಅಸಾಧ್ಯ ಜಾಲೀಲೆ ಗಂಡಕೀ ಯಾತ್ರಾ ಪೂಜ್ಯ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾನಿ ಲೀಲಾಜಾಲ ಜಾವ್ನು ಪೂರ್ಣ ಕೊರನು ಸಮಾಜ ತಶೀಚಿ ಶಿಷ್ಯ ಕೋಟಿಂಕ ತಾಜ್ಜೆ ಫಲ ಮೆಳಚೆ ವರಿ ಕೊರನು ಆಶೀರ್ವಾದ ಕೆಲ್ಯಾ. ಕಲ್ಪವಾಸ : ಶ್ರೀ ಕಾಶಿ ಕ್ಷೇತ್ರಾಚೆ ದರ್ಶನ ಮಾತ್ರಾನಿ ಅಪಾರ ಪುಣ್ಯ ಪ್ರಾಪ್ತ ಜಾತ್ತ ಮ್ಹೊಣು ಸ್ಕಂದ ಪುರಾಣಾಂತು ಸಾಂಗಲಾ. ಥಂಯಿ ಕಾರ್ತಿಕಾಂತು ಚೊಲಚೆಕಲ್ಪವಾಸ ಮಸ್ತ ನಾಮಾಧಿಕ. ರಾಮಾಯಣಾಚೆ ಜನಕ ಮಹಾರಾಜಾಲೆ ಕಾಲಾಚಾನ ಕಾಶಿಂತು ಚೋಲ್ನು ಆಯ್ಯಿಲೆ ಕಲ್ಪವಾಸ ಆಚರಣ ಏಕ ನಮೂನ್ಯಾಚೆ ತಪಸ್ಸಾ ವರಿ. ಪುರಾಣಾಂತು ಶ್ರೀ ರಾಮಚಂದ್ರು, ಲಕ್ಷ್ಮಣು ಆನಿ ವಿಶ್ರಾಮಿತ್ರ ಹಾನ್ನಿ ಕಾರ್ತಿಕ ಏಕ ಮ್ಹಹಿನೋ ಗಂಗಾ ತಟಾರಿ ಕಾಡಿಲೆ ಉಲ್ಲೇಖ ಮೆಳ್ತಾ. ಆತ್ತಯಿ ಹರ ವರ್ಷ ಹಜಾರಗಟ್ಲೆ ಲೋಕ ಕಾರ್ತಿಕ ಮ್ಹಹಿನ್ಯಾಂತು ಹಾಂಗಾಕ ಯವ್ನು ತಣಾಚೆ ಘರಾಂತು ತಾಪಸಿ ಲೋಕಾ ವರಿ ಉರತಾತಿ. ಮಾತಿಯಾಚೆ ರಾನ್ನಿ ವಯರಿ ರಾಂದಪ ಕೊರನು ಜವತಾತಿ. ದಿವಸಾಕ ಏಕ್ಪಟಿ ಮಾತ್ರ ಜವತಾತಿ. ತೀನ್ಪಟಿ ಗಂಗಾ ನಂಯಿಂತು ಬುಡತಾತಿ (ಶಾಳುದ್ದಕ ನಾತ್ತಾತಿ). ನಿರಂತರ ದೇವಾಲೆ ಸ್ಮರಣ, ಸ್ತುತಿ, ಭಜನ ಕರತಾ ಉರತಾತಿ. ಸರಳ ಜೀವನ ಚಲಯತಾತಿ. ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾನಿ ವರೇನ ೨೦೦೮ ಇಸ್ವೆಚೆ ಚಾತುರ್ಮಾಸ ಸಹಿತ ಕಾರ್ತಿಕ ಮ್ಹಹಿನ್ಯಾಚೆ ದಿವ್ಯ ಕಲ್ಪವಾಸ ದಿನಾಂಕ. ೨೩-೦೭-೨೦೦೮ ತಾಕೂನು ೧೫-೧೧-೨೦೦೮ ಪರ್ಯಂತ ಹಾಂಗಾಚೆ ಸ್ವಮಠ ಶ್ರೀ ಲಕ್ಷ್ಮೀನಾರಾಯಣ ಮಂದಿರ, ಜೀವೋತ್ತಮ ಕಟೀರಾಂತು ಉರ್ನು ತೀರ್ಥಸ್ನಾನ, ಜಪ-ತಪ ಅನುಷ್ಟಾನ ಶಾಸ್ತ್ರೋಕ್ತ ಜಾವ್ನು ಕೆಲ್ಲೆ. ಜಿ.ಎಸ್.ಬಿ. ದೇವಳಾಂಕ ದತ್ತಿ ಶಾಸನಾಚಾನ ವಿಮುಕ್ತಿ ದಿವಯಿಲೆ : ಉತ್ತರ ಕನ್ನಡ ಜಿಲ್ಲೆಚೆ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೆ ಆಡಳಿತ ಆಸ್ಸುಚೆ ಮಸ್ತ ಇತ್ಲೆ ದೇವಳಾಂಕ ಕರ್ನಾಟಕ ಸರಕಾರಾಚೆ ಏಕರೂಪಿ ದತ್ತಿಶಾಸನ ತಾಕೂನು ವಿಮೋಚನ ದಿವಯಿಲೆ ಮಹತ್ಕಾರ್ಯ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾಂಗೆಲೆ ತಾಕೂನು ಘಡಲೊ. ಮಾತ್ರ ನ್ಹಂಹಿ ತ್ಯಾ ದೇವಳಾಚೆ ಜೀಣೋದ್ಧಾರ ಆನಿ ಅಭಿವೃದ್ಧಿ ಖಾತ್ತರಿಚಿ ಅಗತ್ಯ ಸಲ್ಲೊ, ಮಾರ್ಗದರ್ಶನ ದಿವನು ಪೂಜ್ಯ ಸ್ವಾಮ್ಯಾನಿ ಆಶೀರ್ವಾದ ಕೆಲ್ಲಾ. ಜೀವೋತ್ತಮ ಜೀವನ ಸಾಥಿ ಸಾಪ್ಟವೇರ್: ಸಾರಸ್ವತ ಸಮಾಜಾಂತು ವೈವಾಹಿಕ ಸಮಸ್ಯೆ ಭೂತಾಕಾರ ಜಾವ್ನು ವಾಡಲಾ. ಥೊಡೆ ವರಸಾ ಮಾಕಸಿ ಚೆಲ್ಲಿಯಾ ಚರಡುವಾಂಕ ಸೊಯರಿಕ ಸೊದ್ದುಚೆ, ಚಾಲ್ಲಿಯಾಕಾರಾಚಾನ ನಿಮ್ಗಿಲಿ ತಿತ್ತುಲೆ ವರದಕ್ಷಿಣ, ಭಾಂಗಾರ ದಿವಚಾಂತು ಕನ್ಯಾಪಿತೃ ಥಕ್ಕೂನು ವತ್ತಾ ಆಶ್ಶಿಲೆ. ಆತ್ತ ಚಾಲ್ಲಿಯಾ ಚರಡುವಾಂಕ ಸೊಯರಿಕ ಸೊಚ್ಚಾಕ ತಸ್ಸಲೇಚಿ ಪರಿಸ್ಥಿತಿ ಆಯಲಾ. ಯೋಗ್ಯ ಚರಕ್ಯಾಂಕ ಸೊಯರಿಕ ಸೊಚ್ಚೇಚಿ ಮಸ್ತ ಕಷ್ಟಾಚೆ ಕಾಮ ಜಾಲ್ಯಾ. ಹೇ ಕಳಿತಾಕ ಹಾಡ್ನು ಸನ್ಯಾಸಿ ಜಾಲಯಾರೀಚಿ ಸಂಸಾರಿ ಗೃಹಸ್ಥಾಲೆ ಸಮಸ್ಯಾ ನಿವಾರಣ ಜಾವ್ಕಾ ಮ್ಹಣ್ಚೆ ಸದುದ್ದೇಶಾನಿ ಶ್ರೀಮದ್ ವಿದ್ಯಾಧಿರಾಜ ತೀರ್ಥಾನಿ ಜೀವೋತ್ತಮ ಜೀವನ ಸಾಥಿ ಮ್ಹಣಚೆ ಸಾಪ್ಟವೇರ ಡೆವಲಪ್ ಕೊರೋನು ಕರ್ನಾಟಕ, ಗೋಂಯ ಆನಿ ಮಹಾರಾಷ್ಟ್ರಾಚೆ ಇಂಟರ್‌ನೆಟ್ ಆಧಾರಿತ ೩೨ ಕೇಂದ್ರಾಂತು ಸುಲಭಾರಿ ಸಕ್ಕಡಾಂಕ ಏಕ್ಕಡೆಚಿ ಲಗ್ನಾಕ ತಯಾರ ಆಸ್ಸುಚೆ ಚಾಲ್ಲೊ ಆನಿ ಚೆಲ್ಲಿಯೇಲೆ ಮಾಹಿತಿ ಮೆಳ್ಚೆ ವರಿ ಕೆಲ್ಲಿಂತಿ. ಜೀವೋತ್ತಮ ಜೀವನ ಸಾಥಿಂತು ಜಾತ್ಕಾಚೆ ಮೇಳಾಮೇಳಿ ವರೇನ ಜಾವ್ನು ತಾಂಗತಾಂಗೆಲೆ ಇಚ್ಛೆ ಪ್ರಮಾಣೆ ಸೊಯರಿಕ ಕೊರನು ಘೆವಚಾಕ ಅನ್ಕೂಲ ಜಾತ್ತಾ. ಪೂಜ್ಯ ಸ್ವಾಮ್ಯಾ ತಾಕೂನು ಸಮಾಜಾಕ ಉಡ್ಗಿರೆ ಜಾವ್ನು ಮೆಳ್ಳಾ. ಜೀವೋತ್ತಮ ವೈದಿಕ ಪಾಠಶಾಳಾ : ಪರ್ತಗಾಳಿ ಮಠಾಂತು ಜೀವೋತ್ತಮ ವೈದಿಕ ಪಾಠಶಾಳಾ ಶಿಸ್ತುಬದ್ಧ ಅಭ್ಯಾಸಕ್ರಮಾ ಮೂಖಾಂತರ ವೇದ, ಸಂಸ್ಕೃತ, ಧರ್ಮಶಾಸ್ತ್ರ, ಜ್ಯೋತಿಷ ಇತ್ಯಾದಿ ಶಿಕಯತಾ. ಥಂಯಿ ಮೆಳಚೆ ಶಿಕ್ಷಣಾಚೆ ಕ್ವಾಲಿಟಿ ಚ್ಹಡ ಕೊರನು ಧಾರ್ಮಿಕ ಕ್ರಿಯಾ ಮಸ್ತ ಶಿಸ್ತುಬದ್ಧ ಜಾವ್ನು ಘಡಚಾಕ ಪೂಜ್ಯ ಸ್ವಾಮ್ಯಾನಿ ಮಸ್ತ ಕಾಳಜಿ ಘೆತ್ಲ್ಯಾ.. ಹಾಜೇನ ಧಾರ್ಮಿಕ ಕಾರ್ಯಾಚೆ ಪೂರ್ಣ ಫಲ ತ್ಯಾ ಕರಯಲ್ಯಾಕ ಮೆಳ್ತಾ. ಹ್ಯಾ ಖಾತ್ತಿರಿ ಶ್ರೀಮದ್ ವಿದ್ಯಾಧಿರಾಜ ತೀರ್ಥಾನಿ ಮಸ್ತ ನಜರ ಘಾಲ್ನು ಪರ್ತಗಾಳಿಚೆ ವೈದಿಕ ಪಾಠಶಾಳಾ ಜಗಾಂತೂ ವಿಶಿಷ್ಠ ಆನಿ ನಾಮಾಧಿಕ ಜಾವಚೆ ವರಿ ಕೆಲ್ಯಾ. ಪಾಂಚ ವರಸಾಚೆ ಅಭ್ಯಾಸ ಕ್ರಮ ಆಸ್ಸುಚೆ ಹೇ ಪಾಠಶಾಳಾಚಾನ ಪ್ರತಿ ವರ್ಷ ಪನ್ನಾಸ ವಿದ್ಯಾರ್ಥಿ ಲೋಕ ಆಪಲೆ ಶಿಕ್ಷಣ ಪೂರ್ಣ ಕೊರನು ಭಾಯ್ರಿ ಪಡತಾತಿ. ಆನಿ ಹೇ ದೇಶಾದ್ಯಂತ ನಾಮಾಧಿಕ ಜಾಲ್ಲ್ಯಾ. ಗ್ರಂಥ ಭಂಡಾರ : ಸಂಸ್ಥಾನ ಶ್ರೀ ಗೋಕರ್ಣ ಪರ್ತಗಾಳಿ ಮಠಾಚೆ ಶ್ರೀ ಕಮಲನಾಥ ತೀರ್ಥ ಗ್ರಂಥ ಭಂಡಾರ ವಾಚನಾಲಯಾಂತು ೩೦ ಹಜಾರಾ ಪಶಿ ಚ್ಹಡ ಅಂಕಡ್ಯಾಂತು ಗ್ರಂಥ ಆಸ್ಸಾ. ಹಾಂಗಾ ಪ್ರಾಚೀನ ವಸ್ತು ಸಂಗ್ರಹಾಲಯ ವರೇನ ಆಸ್ಸಾ. ಚಾರಿಟೇಬಲ್ ಟ್ರಸ್ಟ್ : ಸಮಾಜಾಂತು ಆಸ್ಸುಚೆ ದುಖ್ಖಃ-ದುಮ್ಮಾನ ದೂರ ಕೊರಕಾ ಮ್ಹಣಚೆ ಖಾತ್ತಿರಿ ಸ್ವಾಮಿ ದ್ವಾರಕಾನಾಥ ವಿಷ್ವಸ್ ಮಂಡಲಿ ಆನಿ ಶ್ರೀ ವಿದ್ಯಾಧಿರಾಜ್ ಧರ್ಮದಾಯ ವಿಶ್ವಸ್ಥ ಮಂಡಳಿ ಮ್ಹಣಚೆ ದೋನ ಚಾರಿಟೇಬಲ್ ಟ್ರಸ್ಟ ಸ್ವಾಮ್ಯಾನಿ ಸ್ಥಾಪನ ಕೆಲ್ಯಾ. ಹೇ ಟ್ರಸ್ಟಾ ನಿಮಿತ್ತಿ ಶಿಕ್ಷಣ, ಆರೋಗ್ಯ, ಸಾಮಾಜಿಕ ಸಂಸ್ಕಾರ ಆದಿ ಕ್ಷೇತ್ರಾಂತು ಸಮಾಜಾಕ ಮದತ್ ಮೆಳ್ತಾ ಆಸ್ಸಾ. ವಯೋವೃದ್ಧಾಂಕ ಸೌಲಭ್ಯ : ಆಜಿ ಪರ್‍ದೇಶಿ ಸಂಸ್ಕೃತಿಚಾನ ಪ್ರಭಾವಿತ ಜಾವ್ನು ಜಾಂವೊ ಆನಿ ದುಡ್ಡು ಜೊಡಚೆ ಅಭಿಲಾಷೆನಿ ಚರಡುಂವ ತಾಕೂನು ದೂರ ಆಸ್ಸುನು ಒಂಟಿ ವೇಧನಾ ಭೊಗಚೆ ವಯೋವೃದ್ಧಾಂಗೆಲೊ ಅನ್ಕೂಲಾ ಖಾತ್ತಿರಿ ಸರ್ವ ಸೌಲಬ್ಯಾನಿ ಸುಸಜ್ಜಿತ ಜಾಲೀಲೆ ಶಾಂತಿಕುಂಜ ಸೇವಾಶ್ರಮ ಪನವೇಲುಂತು ಕೆಲಯಾರಿ ಮಂಗಳೂಳಾಂತು ಪೂರ್ಣಪ್ರಜ್ಞ ವಸತಿ ನಿಲಯಚೆ ಶೂರ ಕೆಲ್ಲಾ. ಶಿಕ್ಷಣಾಕ ವೆಗವೆಗಳೆ ಸೌಲಭ್ಯ : ಪೂಜ್ಯ ಸ್ವಾಮೆಂ ವಿದ್ಯಾಕ ಚಡ್ತೆ ಮಹತ್ವ ದಿಲ್ಲಿಂತಿ. ಸರ್ವ ಸಮಾಜಾಚೆ ಚರಡುಂವ ಖಾತ್ತಿರಿ ಪ್ರಾಥಮಿಕ ಶಾಳಾ, ವಸತಿ ನಿಲಯ ಬಾಂದೂಸೂನು ಚರಡುವಾಲೆ ವಿದ್ಯಾಭ್ಯಾಸಕ ಅನ್ಕೂಲ ಕೊರನು ದಿಲ್ಲ್ಯಾ. ಹುಬ್ಬಳ್ಳಿ ಅಮರಗೋಳಾಂತು ವಿದ್ಯಾರ್ಥಿ ವಸತಿ ನಿಲಯ ಆನಿ ಬೆಂಗಳೂರಾಂತು ಲೇಡಿಸ್ ಹಾಸ್ಟೆಲ್ ಆಸ್ಸಾ. ತಾಜ್ಜ ಬರಶಿ ವೆಗಳೆ ಸಬಾರ ಪ್ರತಿಷ್ಠಾನ ತರಪೇನಿ ಸಮಾಜಾಚೆ ದುರ್ಬಲ ವಿದ್ಯಾರ್ಥ್ಯಾಂಕ ವಿದ್ಯಾರ್ಥಿ ವೇತನ, ಉನ್ನತ ವ್ಯಾಸಂಗಾಕ ಮದದ್, ವೈದ್ಯಕೀಯ ಸೌಲಭ್ಯ ಮೆಳಚೆ ವರಿ ಕೆಲ್ಲಾ. ಸಾಮೂಹಿಕ ಉಪನಯನ ಸಂಸ್ಕಾರ ತಸ್ಸಾಲೆ ಸಬಾರ ಸಮಾಜೋಪಯೋಗಿ ಕಾರ್ಯ ಕೆಲ್ಲ್ಯಾ. ವೆಗಳೆ ಮಠಾಧಿಪತಿ ಬರಶಿ ಅನ್ಯೋನ್ಯತಾ : ಪರಿಸರಾಚೆ ವೆಗಳೆ ಸರ್ವ ಮಠಾಧಿಂಕ ಭೆಟ್ಟುನು; ತಾಂಕಾ ಆಪಲೆ ಮಠಾಕ ಆಪೋನು, ಮಠಮಠಾಂತು ಅನ್ಯೋನ್ಯತಾ, ಪ್ರೇಮ ಉಜ್ವಲ ಜಾವ್ಚೆ ವರಿ ಕೆಲ್ಲಾ. ೧೯೮೪ ಇಸ್ವೆಂತು ಪರ್ತಗಾಳಿಚೆ ಶ್ರೀಮಠಾಚೆ ಆಧುನಿಕ ವಾಸ್ತು, ವೈದಿಕ ಪಾಠಶಾಳಾ ಲೋಕಾರ್ಪಣ ಶ್ರೀ ಕವಳೆ ಮಠಾಧೀಶ ಶ್ರೀಮದ್ ಸಚ್ಚಿದಾನಂದ ಸರಸ್ವತಿ ಹಾಂಗೆಲೆ ದಿವ್ಯ ಉಪಸ್ಥಿತೀರಿ ಸಂಪನ್ನ ಜಾಲ್ಲೆ. ೧೯೮೬ ಇಸ್ವೆಂತು ಪರ್ತಗಾಳಿಚೆ ದೊನ್ನಿ ಹಂತಾಂತು ಬಾಂದಿಶಿಲೆ ವಾಸ್ತು , ಗುರುನಿವಾಸ, ಅತಿಥಿಗ್ರಹ ಉದ್ಘಾಟನ ಪೇಜಾವರ ಮಠಾಧೀಶ ಆನಿ ಪುತ್ತಿಗೆ ಮಠಾಧೀಶಾಂಗೆಲೆ ಉಪಸ್ಥಿತೀರಿ ಘಡಲೆ. ದಿನಾಂಕ ೧೮-೦೨-೧೯೯೨ ಇಸ್ವೆಂತು ಪೂಜ್ಯ ಸ್ವಾಮ್ಯಾಂಗೆಲೆ ದೀಕ್ಷಾ ರಜತ ಮಹೋತ್ಸವ ಸಮಾರಂಭಾಚೆ ಪಯಲೆ ದಿವಸು ಧರ್ಮಸ್ಥಳಾಚೆ ಧರ್ಮಾಧಿಕಾರಿ ಡಾ|| ಡಿ. ವೀರೇಂದ್ರ ಹೆಗ್ಗಡೆ, ಉಡುಪಿ ಫಲಿಮಾರು ಮಠಾಧೀಶ ಶ್ರೀಮದ್ ವಿದ್ಯಾಮಾನ್ಯ ತೀರ್ಥ ಸ್ವಾಮಿ ಆಯ್ಯಿಲೆ. ತಾಜೆ ಸಮಾರೋಪ ಸಮಾರಂಭಾಕ ಎಡನೀರು ಮಠಾಧೀಶ ಶ್ರೀಮದ್ ಕೇಶವಾನಂದ ಭಾರತಿ ಸ್ವಾಮ್ಯಾಂಗೆಲೆ ಉಪಸ್ಥಿತಿ ಆಶ್ಶಿಲೆ. ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾನಿ ಪಾದಯಾತ್ರೆಂತೂ ವಚ್ಚುನು ಸಮುದ್ರಾಮಟ್ಟಾಚಾನ ೨೦,೦೦೦ ಫೀಟ್ ಊಂಚಾಯೇರಿ ಆಸ್ಸುಚೆಗಂಡಕೀ ಯಾತ್ರಾ ಯಶಸ್ವಿ ಜಾವ್ನು ಪೂರ್ಣ ಕೊರನು ದಾಮೋದರ ಕುಂಡಾಂತು ನಾವ್ನು ಆಯ್ಯಿಲೆ ಉಪರಾಂತ ಉಡುಪಿ ಶ್ರೀ ಕೃಷ್ಣ ಮಠಾಚೆ ಪರ್ಯಾಯ ಶ್ರೀ ಕಾಣಿಯೂರು ಮಠಾಧೀಶ ಶ್ರೀಶ್ರೀ ವಿದ್ಯಾವಲ್ಲಭ ತೀರ್ಥ ಸ್ವಾಮ್ಯಾನಿ ಶ್ರೀ ಕೃಷ್ಣಮಠಾಕ ಆಮಂತ್ರಣ ದೀವ್ನು ಅಲಂಕೃತ ಉಡುಪಿ ಮಠಾಚೆ ಹಸ್ತಿ ಆನಿ ಗಾಂವ್ಚೆ ಗಣ್ಯ ಸಹಿತ ಆಪಣಚಿ ರಾಬ್ಬೂನು ಭವ್ಯ ಸ್ವಾಗತ ಕೊರನು, ಆಪಣೇಲೆ ಹಸ್ತಾನಿ ಮ್ಹೊಗರೆ ಫುಲ್ಲಾನಿ ಶ್ರೀ ವಿದ್ಯಾಧಿರಾಜ ತೀರ್ಥಾಂಕ ಪುಷ್ಪವೃಷ್ಟಿ ಕೊರನು, ಸತ್ಕಾರ ಕೊರನು ಅಭಿನಂದನಾ ಪತ್ರ ದಿಲೀಲೆ ಶ್ರೀ ವಿದ್ಯಾಧಿರಾಜ ತೀರ್ಥ ಸ್ವಾಮೆಂ ವೆಗಳೆ ಸ್ವಾಮ್ಯಾ ಬರಶಿ ಕಿತ್ಲೆ ಅನ್ಯೋನ್ಯತೆಂತು ಆಶ್ಶಿಲೆ ಮ್ಹಣಚಾಕ ಸಾಕ್ಷಿ ಮ್ಹಣಯೇತ. ಚಾತುರ್ಮಾಸ ಘಡೀಲೆ ಗಾಂವ : ೧. ೧೯೬೭-ಪರ್ತಗಾಳಿ. ೨. ೧೯೬೮-ಪರ್ತಗಾಳಿ. ೩. ೧೯೬೯-ಪುತ್ತೂರು. ೪. ೧೯೭೦- ಕುಮಟಾ. ೫. ೧೯೭೧-ವೆಂಕಟಾಪುರ. ೬. ೧೯೭೨-ವಡಾಳ, ಮುಂಬಯಿ. ೭. ೧೯೭೩-ವಡಾಳ, ಮುಂಬಯಿ. ೮. ೧೯೭೪- ಪರ್ತಗಾಳಿ. ೯. ೧೯೭೫-ಪರ್ತಗಾಳಿ(ಗೋವಾ). ೧೦. ೧೯೭೬- ಕಾಯಂಕುಲಂ. ೧೧. ೧೯೭೭-ಗೋಕರ್ಣ. ೧೨. ೧೯೭೮-ವಾರಣಾಸಿ. ೧೩. ೧೯೭೯-ಬೆಂಗಳೂರು. ೧೪. ೧೯೮೦-ರಾಮನಾಥಿ. ೧೫. ೧೯೮೧-ಉಡುಪಿ. ೧೬. ೧೯೮೨-ಕುಂದಾಪುರ. ೧೭. ೧೯೮೩-ಹುಬ್ಬಳ್ಳಿ. ೧೮. ೧೯೮೪-ಗಂಗೊಳ್ಳಿ. ೧೯. ೧೯೮೫-ಬೆಳಗಾಂವ. ೨೦. ೧೯೮೬-ಬದ್ರಿನಾಥ. ೨೧. ೧೯೮೭-ಭಟ್ಕಳ . ೨೨. ೧೯೮೮-ರಿವಣ. ೨೩. ೧೯೮೯-ಅಂಕೋಲಾ. ೨೪. ೧೯೯೦-ಉಡುಪಿ. ೨೫. ೧೯೯೧-ಗಂಗೊಳ್ಳಿ. ೨೬. ೧೯೯೨-ಮಂಗಳೂರು. ೨೭. ೧೯೯೩-ಕುಮಟಾ. ೨೮. ೧೯೯೪-ಕಲ್ಯಾಣಪುರ. ೨೯. ೧೯೯೫-ಡಿಚೋಲಿ. ೩೦. ೧೯೯೬-ಶಿರಸಿ. ೩೧. ೧೯೯೭-ಮುಂಬಯಿ. ೩೨. ೧೯೯೮-ಮಂಕಿ. ೩೩. ೧೯೯೯-ಬಸರೂರು. ೩೪. ೨೦೦೦- ನಾಸಿಕ. ೩೫. ೨೦೦೧-ಕಾರವಾರ. ೩೬. ೨೦೦೨-ಧಾರವಾಡ. ೩೭. ೨೦೦೩-ಯಲ್ಲಾಪುರ. ೩೮. ೨೦೦೪-ಪಂಢರಪುರ. ೩೯. ೨೦೦೫-ಪೋಂಡಾ. ೪೦. ೨೦೦೬-ಹೊನ್ನಾವರ. ೪೧. ೨೦೦೭- ಶಿರಾಲಿ. ೪೨. ೨೦೦೮-ವಾರಣಾಸಿ. ೪೩. ೨೦೦೯-ಮುಡಿಪು, ಬಂಟವಾ. ೪೪. ೨೦೧೦-ಸಿದ್ದಾಪುರ(ಉ.ಕ.). ೪೫. ೨೦೧೧- ಅಯೋಧಾ . ೪೬. ೨೦೧೨-ಬೆಳಗಾಂವಿ. ೪೭. ೨೦೧೩-ಮಡಗಾಂವ. ೪೮. ೨೦೧೪-ಸಾಗರ. ೪೯. ೨೦೧೫-ವಾರಣಾಸಿ. ೫೦. ೨೦೧೬-ಮಂಗಳೂರು. ೫೧. ೨೦೧೭-ಪರ್ತಗಾಳಿ. ೫೨. ೨೦೧೮-ಅಮರಗೋಳ ಹುಬ್ಬಳ್ಳಿ. ೫೩. ೨೦೧೯-ಬದರಿ. ೫೪. ೨೦೨೦-ಪರ್ತಗಾಳಿ. ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾನಿ ಸಾರಸ್ವತ ಸಮಾಜ ವ್ಹಡ ಅಂಕಡ್ಯಾರಿ ನಾಶ್ಶಿಲೆ ಪಂಡರಪುರ, ಅಯೋಧ್ಯಾ, ಬದ್ರಿ ಇತ್ಯಾದಿ ಗಾಂವಾಂತು ಚಾತುರ್ಮಾಸ ಕೊರನು ರಾಷ್ಟ್ರಾದ್ಯಂತಾಚೆ ಸಮಾಜ ಬಾಂಧವಾಂಕ ಥೈಕ ಆಪೋನು ಪುಣ್ಯಕ್ಷೇತ್ರಾಚೆ ದರ್ಶನ ಭಾಗ್ಯ ಮೆಳ್ಷೆವರಿ ಕೆಲ್ಲೆ. ಶಿಷ್ಯ ಸ್ವೀಕಾರ : ದಿನಾಂಕ. ೦೯-೦೨-೨೦೧೭ ದಿವಸು ಪರ್ತಗಾಳಿಂತು ಬೆಳಗಾಂವಿಚೆ ಶ್ರೀ ಉದಯ ಭಟ್ಟ ಶರ್ಮ ತಾಂಕಾ ಸಂನ್ಯಾಸ ದೀಕ್ಷಾ ದೀವ್ನು, ಪ್ರಣವಮಂತ್ರ ಉಪದೇಶ ಕೊರನುಶ್ರೀಮದ್ ವಿದ್ಯಾಧೀಶ ಮ್ಹಣ್ಚೆ ನಾಮಾಭಿದಾನ ಕೊರನು ಶಿಷ್ಯ ಸ್ವೀಕಾರ ಕೆಲ್ಲಿಂತಿ. ಪೂಜ್ಯ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮ್ಯಾನಿ ೧೯-೦೭-೨೦೨೧ ನಿರ್ಯಾಣ ಪಾವ್ಲೆ ಉಪರಾಂತ ದಿನಾಂಕ. ೩೦-೦೭-೨೦೨೧ ದಿವಸು ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮೆಂ ಶ್ರೀಮಠಾಚೆ ೨೪ವೇಂ ಗುರುವರ್ಯ ಜಾವ್ನು ಪೀಠಾರೋಹಣ ಕೆಲ್ಲಿಂತಿ.
ಒಟ್ಟು 75 ವರ್ಷ 1೦ ಮ್ಹಹಿನೋ 27 ದಿವಸಾಚೆ ಅಪಣೇಲೆ ಜೀವಿತಾವಧಿಂತು 48 ವರ್ಷ 3 ಮ್ಹಹಿನೋ 14 ದಿವಸು ಶ್ರೀ ಪರ್ತಗಾಳಿ ಜೀವೋತ್ತಮ ಮಠಾಚೆ ಪೀಠಾಧಿಕಾರಿ ಜಾವ್ನಾಶ್ಶಿಲೆ. ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಸ್ವಾಮೆಂ ಸ್ವ ಮಠ ಆನಿ ಜಿ‌ಎಸ್‌ಬಿ ಸಮಾಜಾಕ ಕೆಲೀಲೆ ಸೇವಾ ಮಠಾಚೆ ಇತಿಹಾಸಾಂತೂ ಸುವರ್ಣಾಕ್ಷರಾಂತು ಬರೋನು ದವರಕಾ ಜಾಲೀಲೆ ಮ್ಹಳಯಾರಿ ಚ್ಹೂಖ ಜಾಯಸನಾ. ತಾಂಗೆಲೆ ತೀಸರೆಚೆ ಪುಣ್ಯತಿಥಿ ಆರಾಧನೆಚೆ ಸಂದರ್ಭಾರಿ ಹೇ ಮೂಖಾಂತರ ಸರಸ್ವತಿ ಪ್ರಭಾ ಕೊಂಕಣಿ ಮಾಸಿಕ ಪೂಜ್ಯ ಸ್ವಾಮ್ಯಾಂಕ `ಅಕ್ಷರ ನಮನ ಪಾವಯತಾ ಆಸ್ಸಾ. *