ಶಿವಮೊಗ್ಗ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೆ ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಳಾಂತು ಪ್ರತಿಷ್ಠಾಪನ ಕೆಲೀಲೆ ೬೦ವೇಂ ವರ್ಷಾಚೆ ಶ್ರೀ ಗಣೇಶೋತ್ಸವು ಅಗಸ್ಟ್ ೨೭ ತಾಕೂನು ಅಗಸ್ಟ್ ೩೧ ಪರಿಯಂತ ವಿಜೃಂಭಣೆರಿ ಚಲ್ಲೆ. ಹೇ ಸಂದರ್ಭಾರಿ ಶ್ರೀ ಗಣೇಶಮೂರ್ತಿ ಪ್ರತಿಷ್ಠಾಪನೆಚೆ ಉಪರಾಂತ ವೇದೋಕ್ತ ಜಾವ್ನು ಪಾಂಚ ದಿವಸೂ ತ್ರಿಕಾಲ ಪೂಜಾ, ಭಜನಾ ಚಲ್ಲೆ. ಅ.೨೮ ಕ ಗಣೋಮು, ಸಮಾಜ ಬಾಂದವಾಲೆ ಖಾತೇರಿ ಛದ್ಮವೇಷ ಸಹಿತ ವಿಶೇಷ ಸ್ಪರ್ಧಾ, ಸಾಂಜವಾಳಾ ಜಾದುಗಾರ ಶ್ರೀ ಪ್ರಶಾಂತ ಹೆಗಡೆ ಹಾಂಗೆಲೆ ಜಾದು ಪ್ರದರ್ಶನ ಚಲ್ಲೆ. .೨೯ಕ ಗಣೋಮು, ಭಜನಾ ಆನಿ ಸಾಂಜವಾಳಾ ಶಿವಮೊಗ್ಗಾಚೆ ಹವ್ಯಾಸಿ ಕಲಾವಿದ ತಾಕೂನು `ಭೀಷ್ಮಪರ್ವಯಕ್ಷಗಾನ ತಾಳಮದ್ಲೆ ಚಲ್ಲೆ. ಅ.೩೦ಕ ಗಣೋಮು, ಭಜನಾ ಕಾರ್ಯಕ್ರಮ ಬರಶಿ ಸಾಂಜವಾಳಾ ಚಲೀಲೆ ಸಭಾ ಕಾರ್ಯಕ್ರಮಾಂತು ವಿದ್ಯಾನಿಧಿ ಕಾರ್ಯಕ್ರಮು ಆನಿ ಛದ್ಮವೇಷ ವಿಜೇತಾಂಕ ಬಹುಮಾನ ವಾಂಟಪ ಚಲ್ಲೆ. ಹೇ ಸಮಾರಂಭಾಕ ಮುಖೇಲ ಸೊಯರೆ ಜಾವನು ಡಾ. ವಾಮನ ಎಮ್. ಶಾನಭಾಗ ತಾನ್ನಿ ಆಯ್ಯಿಲೆ.
ಅ.೩೧ಕ ಗಣೋಮು, ಭಜನಾ, ಶ್ರೀ ಗಣೇಶೋತ್ಸವ ಫಲಾವಳಿ ಏಲಂ ಧೋಂಪಾರಾ ಚಲಯಾರಿ ಸಾಂಜವಾಳಾ ವಿಜೃಂಭಣೆರಿ ಶ್ರೀ ದೇವಾಲೆ ರಾಜಬೀದಿ ಉತ್ಸವು (ಗಣಪತಿ ವಿಸರ್ಜನಾಪೂರ್ವ ಮೆರವಣಿಗಾ) ಚಲ್ಲೆ. ಹೇ ಮೆರ್‍ವಣೆಗೆಂತು ಧ್ವಜ, ಛತ್ರಚಾಮರ, ತಟ್ಟಿರಾಯ, ವಾಘಾವೇಸು ಸಹಿತ ವೆಗಳೆ ವೈವಿಧ್ಯಮಯ ವೇಷ, ಲೇಜಿಂ, ಬಾಯ್ಲಮನ್ಶೆ ತಾಕೂನು ಕೋಲಾಟ, ಭಜನ, ಚಾಮರವಾದ್ಯ, ವೆಗವೆಗಳೆ ವೇಷಭೂಷಣ ಘಾಲೀಲೆ ಸಾನ ಚರಡುಂವ, ಆನಿ ಸಬಾರ ಕಲಾತಂಡಾ ವಾಂಟೊ ಘೆತ್ತಿಲೆ.
ವಿಶೇಷ ಜಾವನು ಮೆರ್‍ವಣಿಗಾ ಪಳಯಚಾಕ ದೊನ್ನೀ ಬಗಲೇನ ರಾಬ್ಬಿಲೊ ಹಜಾರ ಬಽರಿ ಭಕ್ತ ಲೋಕಾಂಕ ಲಡ್ಡು ಪ್ರಸಾದ ವಾಂಟಿಲೆ. ಹೇ ಮೆರ್‍ವಣಿಗಾ ಓ.ಟಿ. ರಸ್ತೋ, ಎನ್.ಟಿ. ರಸ್ತೋ, ಅಶೋಕ ಸರ್ಕಲ್, ಎ.ಎ. ಸರ್ಕಲ್, ಕೋಟೆ ರಸ್ತೆ ಮೂಖಾಂತರ ಕೋರ್ಪಲಯ್ಯಲೆ ಛತ್ರಾಚೆ ಲಾಗ್ಗಿ ಆಸ್ಸುಚೆ ತುಂಗಾಮಂಟಪಾಂತು ಧಾರ್ಮಿಕ ವಿಧಿ-ವಿಧಾನಗ ಘಡೋನು ಮಾಗಿರಿ ಗಣಪತಿ ಮೂರ್ತಿ ವಿಸರ್ಜನಾ ಕಾರ್ಯಕ್ರಮ ಚಲ್ಲೆ. ಸಮಾಜಾಚೆ ಅಧ್ಯಕ್ಷ ಜಾಲೀಲೆ ಭಾಸ್ಕರ್ ಜಿ. ಕಾಮತ್ ಹಾಂಗೇಲೆ ಸಹಿತ ಸಮಾಜಾಚೆ ಸರ್ವ ಪದಾಧಿಕಾರಿ ಲೋಕಾಲೆ, ಮಹಿಳಾ ಮಂಡಳಿಚೆ ನೇತ್ರತ್ವಾರಿ ಸಕಡಾನಿ ತಾರೀಪು ಕೊರಚೆ ವರಿ ಚಲ್ಲೆ ಆನಿ ಶಿವಮೊಗ್ಗ ಜಿ.ಎಸ್. ಸಮಾಜಾಚೆ ಶ್ರೀ ಗಣೇಶೋತ್ಸವು ಮಸ್ತ ಕಾಳ ಲೋಕಾಲೆ ನಜರಾಂತು ವ್ಹರಚೆ ವರಿ ಜಾಲ್ಲೆ.