ತಾ. 27-12-2025 ವಿಶ್ವ ಕೊಂಕಣಿ ಕೇಂದ್ರ ಶಕ್ತಿನಗರ, ಮಂಗಳೂರ ಸಹಯೋಗಾನ ದ.ಕ.ಜಿಲ್ಲಾ ಚಪ್ಟೇಗಾರ ಸಮಾಜ ಸುಧಾರಕ ಸಂಘ (ರಿ) ಮಂಗಳೂರ ವಿದ್ಯಾರ್ಥಿಂಕ ವಿದ್ಯಾರ್ಥಿ ವೇತನ ವಿತರಣಾ, ಪೂರ್ವಭಾವಿ ಕೌಶಲ್ಯ ತರಬೇತಿ “ವಿಕಾಸ-2025” ಕಾರ್ಯಕ್ರಮ ಆಯೋಜನ ಕೆಲೆಲೆಂ. ಸುಮಾರು ಐವತ್ತು ವಿದ್ಯಾರ್ಥಿಂಕ ರೂಪಯಿ ಪಾಂಚ ಲಾಖ ವಿದ್ಯಾರ್ಥಿ ವೇತನ ‘ವಿದ್ಯಾಕಲ್ಪಕ’ ವಿದ್ಯಾರ್ಥಿ ವೇತನ ನಿಧಿ ತಾಕುನ ವಿತರಣ ಕೆಲೆಂ. ಚಪ್ಟೇಗಾರ ಸಮಾಜ ಸುಧಾರಕ ಸಂಘಾಚೆ ಅಧ್ಯಕ್ಷ ಶ್ರೀ ರವೀಂದ್ರ ನಾಯಕ್ ಹಾನ್ನಿ ಸ್ವಾಗತ ಕೆಲೆಂ.
ಮುಖೇಲ ಸೊಯೆರೆ ಜಾವನ ಉಪಸ್ಥಿತ ಆಶಿಲೆ, ಪಿ ಎ ಕಾಲೇಜ್ ಆಫ್ ಫಾರ್ಮಸಿ ಮಂಗಳೂರು ಹಾಂಗಾಚೆ ಡಾ ಮನೋಹರ ನಾಯಕ್ ಹಾನಿ ದಿವೊ ಲಾವನು ಕಾರ್ಯಕ್ರಮ ಉಗ್ತಾವಣ ಕೆಲೆಂ. ನಂತರ ವಿದ್ಯಾರ್ಥಿಂಕ ಉದ್ದೇಶಿಸುನು ವಕದ ವಿಜ್ನಾನಾ ಕ್ಷೇತ್ರಾಚೆ ಶಿಕ್ಷಣ ಆನಿ ಉದ್ಯೋಗ ಅವಕಾಶ ಬದ್ದಲ ಮಾಹಿತ ದಿಲೆಂ.
ವಿಶ್ವಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ ಮಾನೆಸ್ತ್ ಸಿ ಎ ನಂದಗೋಪಾಲ್ ಶೆಣೈ ಹಾನಿ ಕಾರ್ಯಕ್ರಮಾಚೆ ಅಧ್ಯಕ್ಷಪಣ ಘೆವನ ವಿದ್ಯಾರ್ಥಿಂಕ ಉದ್ದೇಶಿಸುನ “ಆಯಚೆ ದಿವಸಾಂತ ಶಿಕ್ಷಣಾಚೆ ಮುಖಾಂತರ ಕೌಶಲ್ಯ ತರಬೇತಿ ದಿವಚೆ ಅಗತ್ಯ ಜಾವನ ಆಸಾ. ಅಸಲೆ ತರಬೇತಿ ದಿವಚೆ ಶಿಬಿರ ಚಪ್ಟೇಗಾರ ಸಂಘಾಚೆ ವಿದ್ಯಾರ್ಥಿಂಕ ವಿಶ್ವ ಕೊಂಕಣಿ ಕೇಂದ್ರಾಂತ ಮಾಂಡುನ ಹಾಳ್ಳಾ ಹಾಜೆ ಸದುಪಯೋಗ ಘೆವಕಾ. ಆನಿ ಮನೋಸಾಮರ್ಥ್ಯ ಆಪಣಾವನ ಘೆವನ ವಾಡೆಚೆ ರುಕ್ಕಾ ಮ್ಹಣಕೆ, ವಿಶಾಲ ಜಾವನು ವಾಡ್ಡುನ ಸರ್ವಾಂಗೆಲೆ ಸಾಂಗಾತಾಕ ಆತ್ಮವಿಶ್ವಾಸಾನ ಸಮಾಜಾಂತ ಕಾರ್ಯಪ್ರವ್ರತ್ತ ಜಾವಕಾ” ಅಶಿಂ ಸ್ಫೂರ್ತಿದಾಯಕ ಸಂದೇಶ ದಿಲೆಂ.
ಪ್ರೇರಣಾ ಕೌಶಲ್ಯ ಸಂಭಂಧ ಪಾವಿಲೆ ತರಬೇತ ಕಾರ್ಯಾಗಾರ ಕುಡ್ಪಿ ವಿದ್ಯಾ ಶೆಣೈ ಹಾನಿ ಚಲಾಯಸುನ ದಿಲೆಂ . ತ್ರಿಶಾ ಕ್ಲಾಸಸ್ ಸ್ಥಾಪಕ ಮಾನೆಸ್ತ್ ಸಿ ಎ ಗೋಪಾಲಕೃಷ್ಣ ಭಟ್ ಹಾನಿ ಕಾಮರ್ಸ್ ಕ್ಷೇತ್ರಾಚೆ ಶಿಕ್ಷಣ- ಉದ್ಯೋಗ ಅವಕಾಶ ಬದ್ದಲ ಮಾಹಿತಿ ದಿಲೆಂ. ಮಾನೆಸ್ತ್ ಗೋಪಾಲಕೃಷ್ಣ ನಾಯಕ್ ಹಾನ್ನಿ ಯಕ್ಷಗಾನ, ಕಲಾ, ಹವ್ಯಾಸ ಬದ್ದಲ ಮಾಹಿತಿ ದಿಲೆಂ. ಯೋಗಗುರು ಮಾನೆಸ್ತ್ ಕುಂಬಳೆಕಾರ ಮೋಹನ ಕುಮಾರ ಹಾನ್ನಿ ಸಂಸ್ಕೃತಿ ಆನಿ ರಾಷ್ಟ್ರೀಯತಾ ಬದ್ದಲ ತಿಳುವಳಿಕಾ ದಿಲೆಂ. ಮಾನೆಸ್ತ್ ಪ್ರಕಾಶ ಶೆಣೈ ಯು ಹಾಂಗೆಲೆ ಸಾಧನಾ ಬಳಗ ಪಂಗಡಾ ಥಾವನ ಕೊಂಕಣಿ ವೆವೆಗಳೇ ಸಾಂಸ್ಕೃತಿಕ ಖೇಳ್, ನೃತ್ಯ, ಕಲಾ ಅಭ್ಯಾಸ ದಿಲೆಂ. ವಿಶ್ವಕೊಂಕಣಿ ಕೇಂದ್ರಚೆ ಸಿ ಎ ಒ ಮಾನೆಸ್ತ್ ದೊ. ಬಿ ದೇವದಾಸ ಪೈ, ದಕ ಜಿಲ್ಲಾ ಚಪ್ಟೇಗಾರ ಸಮಾಜ ಸುಧಾರಕ ಸಂಘದ ಮಾಜಿ ಅಧ್ಯಕ್ಷ, ಸಾಂದೆ ಆನಿ ಹೆರ ಗಣ್ಯ ಲೋಕ ಸಮಾರಂಭಾಂತ ಉಪಸ್ಥಿತ ಆಶಿಲಿಂಚಿ. ಮಾನೆಸ್ತಿಣ್ ಲಕ್ಷ್ಮೀ ಕಿಣಿ ನ ಪ್ರಾರ್ಥನ ಕರನ್ ಕಾರ್ಯಾವಳೀಚೆ ನಿರೂಪಣ್ ಕೆಲೆಂ. ದಕ ಜಿಲ್ಲಾ ಚಪ್ಟೇಗಾರ ಸಮಾಜ ಸುಧಾರಕ ಸಂಘಾಚೆ ಮಾನೆಸ್ತ್ ಚಿದಾನಂದ ಎಮ್ ಹಾನಿ ಉಪಕಾರ ಆಟಯಲೆಂ.******
ಸಮಾರೋಪ ಸುವಾಳೊ
ದ.ಕ.ಜಿಲ್ಲಾ.ಚಪ್ಟೇಗಾರ ಸಮಾಜ ಸುಧಾರಕ ಸಂಘ (ರಿ) ಮಂಗಳೂರ ವಿದ್ಯಾರ್ಥಿಂಕ ವಿದ್ಯಾರ್ಥಿ ವೇತನ ವಿತರಣಾ , ಪೂರ್ವಭಾವಿ ದೋನಿ ದಿವಸಾಚೆ ಕೌಶಲ್ಯ ತರಬೇತ್ “ವಿಕಾಸ-2025” ಕಾರ್ಯಾವಳೀಚೆ ಸಮಾರೋಪ ಸುವಾಳೊ 28-12-2025 ತಾರ್ಕೆರ್ ವಿಶ್ವಕೊಂಕಣಿ ಕೇಂದ್ರಾಂತ ಚಲ್ಲೆಂ.
ಸಮಾರಂಭಾಚೆ ಮುಖೇಲ ಸೊಯರೆ ಮಾನೆಸ್ತ್ ಮಾನೆಸ್ತ್ ಗೌತಮ ನಾಯಕ್, ಕೊ ಫೌಂಡರ್, ಸಿ ಒ ಒ ಇನ್ ಯುನಿಟಿ ಪ್ರೈ.ಲಿಮಿಟೆಡ್ ಹಾನ್ನಿ ಶಿಬಿರಾರ್ಥಿಂಕ ಶಿಕ್ಷಣ ಕ್ಷೇತ್ರಾಚೆ ಆನಿ ಉದ್ಯೋಗ ಅವಕಾಶಾ ಬದ್ದಲ ಮಾಹಿತಿ ದಿಲೆಂ.
ಚಪ್ಟೇಗಾರ ಸಮಾಜ ಸುಧಾರಕ ಸಂಘಾಚೆ ಅಧ್ಯಕ್ಷ ಮಾನೆಸ್ತ್ ರವೀಂದ್ರ ನಾಯಕ್ ಹಾನ್ನಿ ಸಭಿಕಾಂಕ ಉದ್ದೇಶಿಸುನ ವಿಶ್ವ ಕೊಂಕಣಿ ಕೇಂದ್ರಾಚೆ ಕಾರ್ಯಾವಳೀಕ ಪ್ರಶಂಶಾ ದಿಲೆಂ. ಶಿಬಿರಾರ್ಥಿಂನಿ ಶಿಬಿರಾಂತ ಶಿಕಿಲೆ ಉತ್ತಮ ಮೌಲ್ಯ ಆಮಗೆಲೆ ಜೀವನಾಂತ ಅಪಣಾವನ ಘೆವಕಾ ಅಶಿಂ ಶುಭ ಸಾಂಗಲೆಂ.
ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ ಮಾನೆಸ್ತ್ ಸಿ ಎ ನಂದಗೋಪಾಲ್ ಶೆಣೈ ಹಾನ್ನಿ ಅಧ್ಯಕ್ಷಪಣ ಘೆವನು, ಛಾತ್ರಾಂಕ ಉದ್ದೇಶಿಸುನ “ಚೆರ್ಡುವಾಂನಿ ಖಂಚೇಯ ಬರೆಂ ಜಾಲಲೆ ಕಾಮ ಆರಂಭ ಕರಚಾಕ ಮಾಗಶಿ ಪಳಯನಾಶೀ ಆತ್ಮವಿಶ್ವಾಸಾನ ಆನಿ ನಂಬಿಕೇನ ಮುಖಾರ್ ಯೇವಕಾ. ನಂಬಿಕಚೀ ಕಾರ್ಯ ಸಾಧನಾಕ ಕಾರಣ ಜಾತ್ತಾ, ಖಂಯ ಗೆಲ್ಯಾರೀಯ್ ಆಮಗೆಲೆ ಮಾತೃಭೂಮಿ, ಮೂಳ್ ಸ್ಥಾನ ವಿಸರುಕ ನಜ್ಜ ಅಶಿಂ ಸಾಂಗಲೆಂ.
ರಂಗ ಚಿನ್ನಾರಿ, ರಾಜ್ಯ ಪ್ರಶಸ್ತಿ ವಿಜೇತ ಕಾಸರಗೋಡು ಚಿನ್ನಾ ತಂಡಾನ, ನಾಟಕ ಕಲಾ ಅಭ್ಯಾಸ ಪೂರ್ವ ತರಬೇತ್ ದಿಲೆಂ. ಶಿಬಿರಾರ್ಥಿಂನಿ ಶಿಬಿರಾಚೆ ಅನುಭವ ಸಭೆಂತ ವಾಂಟುನ ಘೆತಲೆಂ. ಹ್ಯಾ ಸಂಧರ್ಭಾರ ಖೇಲೋ ಇಂಡಿಯಾ ಮಹಿಳಾ ಪ್ರೀಮಿಯರ್ ಲೀಗ ರಾಜ್ಯ ಮಟ್ಟಾಚೆ ಕಿಕ್ ಬಾಕ್ಸಿಂಗ್ಂತ ಭಾಂಗರಾಚೆ ಪದಕ ಘೆತ್ತಿಲ್ಯಾ ಶಿಬಿರಾರ್ಥಿ ಸ್ನೇಹಾ ನಾಯಕ ಹಾಂಕಾ ಸನ್ಮಾನ ಕೆಲೆಂ.
ವಿಶ್ವ ಕೊಂಕಣಿ ಕೇಂದ್ರಾಚೆ ಸಿ ಎ ಒ ಮಾನೆಸ್ತ ದೊ. ಬಿ ದೇವದಾಸ ಪೈ, ದಕ ಜಿಲ್ಲಾ ಚಪ್ಟೇಗಾರ ಸಮಾಜ ಸುಧಾರಕ ಸಂಘಾಚೆ ಅದಲೆ ಅಧ್ಯಕ್ಷ, ಸಾಂದೆ ಆನಿ ಇತರ ಮಾನೆಸ್ತ್ ಸಮಾರಂಭಾಂತ ಉಪಸ್ಥಿತ್ ಆಶಿಲಿಂಚಿ. ಮಾನೆಸ್ತಿಣ್ ಲಕ್ಷ್ಮೀ ಕಿಣಿ ನ ಕಾರ್ಯಾವಳೀಚೆ ನಿರೂಪಣ ಕೆಲೆಂ. ಚಪ್ಟೇಗಾರ ಸಮಾಜ ಸುಧಾರಕ ಸಂಘಾಚೆ ಮಾನೆಸ್ತ್ ಚಿದಾನಂದ ಎಮ್ ಹಾನಿ ದೇವು ಬರೆಂ ಕೊರೊ ಸಾಂಗಲೆಂ. ಸುಮಾರ ಪನ್ನಾಸ ಛಾತ್ರಾಂನಿ ‘ವಿದ್ಯಾಕಲ್ಪಕ’ ನಿಧಿ ಥಾವನ ವಿದ್ಯಾರ್ಥಿ ವೇತನ ಘೆತಲೆಂ ಆನಿ ದೋನ ದಿವಸ ಭರ ಚಲ್ಲೆಲೆ ಶಿಬಿರಾಚೆ ಪ್ರಯೋಜನ ಘೆತಲೆಂ.