ಮುಂಬೈಚೆ ಜಿ.ಎಸ್.ಬಿ. ಸೇವಾ ಮಂಡಳ, ಸಾಯಿನ್ ಮುಂಬೈ ಹಾನ್ನಿ ವಿಜೃಂಭಣೆರಿ ಮುಂಬೈಚೆ ಕಿಂಗ್ಸ್ ಸರ್ಕಲಾಂತು ಆಯೋಜನ ಕೊರನು ಘೇವ್ನು ಆಯಲೀಲೆ ಶ್ರೀ ಗಣೇಶೋತ್ಸವಾಚೆ 71ವೇಂ ವರಸಾಚೆ ಆಚರಣ ಅಗಸ್ಟ್ 27 ತಾಕೂನು 31 ಪರಿಯಂತ ಚಲ್ತಾ ಮ್ಹಣಚೆ ಮಾಹಿತ ಮೆಳ್ಳಾ. ಹೇ ಶ್ರೀ ಗಣಪತಿ ದೇಶಾಚೆ ಶ್ರೀಮಂತ ಗಣೇಶ ಮೂರ್ತಿ ಮ್ಹೊಣು ನಾಂವ ಪಾವಲಾ. ಹೇ ಮೂರ್ತಿಕ ಶ್ರೀ ಗಣೇಶೋತ್ಸವ ವೇಳ್ಯಾರಿ ೬೯ ಕೆ.ಜಿ. ಬಾಂಗ್ರಾಚೆ ಆಭರಣ ಆನಿ ೩೩೬ ಕೆ.ಜಿಚೆ ರುಪ್ಯಾಚೆ ಆಭರಣ ಘಾಲ್ನು ಅಲಂಕಾರ ಕರತಾತಿ. ಪ್ರತಿ ದಿವಸು ಗಣೋಮು, ಸಹಸ್ರ ಮೋದಕ ಹವನ, ಭಾಗೀರಥಿ ಅಭಿಷೇಕ, ತುಲಾಭಾರ ಸೇವಾ, ಧೂರ್ವಾರ್ಚನ ಸೇವಾ, ಮಧ್ಯಾಹ್ನ ಪೂಜಾ, ಅನ್ನದಾನ ಸೇವಾ, ಸಹಸ್ರ ಭೋಜನ ಸೇವಾ, ಮೂಡಗಣಪತಿ ಪೂಜಾ, ದೀಪಾರಾಧನ ಪೂಜಾ, ರಂಗಪೂಜಾ, ಫುಲ್ಲಾ ಪೂಜಾ, ರಾತ್ರಿ ಪೂಜಾ ಆದಿ ಧಾರ್ಮಿಕ ಕಾರ್ಯಕ್ರಮ ಬರಶಿ ಶ್ರೀ ಗಣೇಶೋತ್ಸವು ಚಲ್ತಾ. ಶ್ರೀ ಗಣೇಶೋತ್ಸವ ವೇಳ್ಯಾರಿ ಪ್ರತಿ ದಿವಸು ಸಕ್ಕಾಣಿ ೭.೩೦ಕ ವ್ಯಾಸೋಪಾಸನ ಆಸ್ತಾ ಆನಿ ರಾತ್ತಿಚೆ ೯ ಘಂಟ್ಯಾಕ ವಿವಿಧ ವಿನೋದಾವಳಿ ಚಲ್ತಾ. ಹಾಜ್ಜೆ ಮಧೇ ಅ.೨೮ಕ ಚಿತ್ರಕಲಾ ಸ್ಪರ್ಧಾ, ಗಾನ ಕುರ್ಚಿ(ಮ್ಯೂಜಿಕಲ್ ಚೇರ್) ಸ್ಪರ್ಧಾ, ಭಜನಾ, ಪ್ರತಿಭಾವಂತ ವಿದ್ಯಾರ್ಥ್ಯಾಲೆ ಪ್ರತಿಭಾ ಪುರಸ್ಕಾರ ಕಾರ್ಯಕ್ರಮ ಚಲ್ತಾ. ಅ.೨೯ಕ ಭಜನಾ, ಗೀತಾ ಸ್ಪರ್ಧಾ, ಹಳದಿ ಕುಂಕುಮ ಕಾರ್ಯಕ್ರಮ ಚಲ್ತಾ. ಅ.೩೦ಕ ಭಜನಾ ಸ್ಪರ್ಧಾ, ರಕ್ತ ದಾನ ಕ್ಯಾಂಪ್, ಛದ್ಮವೇಷ ಸ್ಪರ್ಧಾ, ಸುಧನ್ವ ಮೋಕ್ಷ ಕನ್ನಡ ಯಕ್ಷಗಾನ ಆದಿ ಕಾರ್ಯಕ್ರಮ ಚಲ್ತಾ. ಅ.೩೧ಕ ಸಾಂಜವಾಳಾ ೪ ಘಂಟ್ಯಾಕ ಸಾಮೂಹಿಕ ದೇವಮಾಗಣಿ ಆನ ವಿಸರ್ಜನಾ ಪೂಜಾ ಚಲ್ತಾ. ಚೋಲ್ನು ಮಾಗಿರಿ ಅವುಂದೂಚೆ ಶ್ರೀ ಗಣೇಶ ಮೂರ್ತಿಚೆ ಜಲಸ್ತಂಭನಾ ಕಾರ್ಯ ಚಲ್ತಾ.
ಜಿ.ಎಸ್.ಬಿ. ಸೇವಾ ಮಂಡಲ ಹಾನ್ನಿ ಮುಂಬೈಚೆ ಕಿಂಗ್ಸ್ ಸರ್ಕಲ್ ಹಾಂಗಾ ಆಯೋಜನ ಕೊರಚೆ ಸಾರ್ವಜನಿಕ ಗಣೇಶೋತ್ಸವ ಪ್ರಯಕ್ತ ನ್ಯೂ ಇಂಡಿಯಾ ಅಶ್ಯೂರೆನ್ಸ್ ಕಂಪನಿಂತು ೪೭೪.೪೬ ಕೋಟಿ ರೂಪ್ಪಯಾಕ ಇನ್ಸೂರ ಕರಯಿಸಿಲಾ ಕಂಯಿ. ಘೆಲೀಲೆ ವರ್ಷಾ ಕೆಲೀಲೆ ೪೦೦.೫೮ ಕೋಟಿ ರೂಪ್ಪಯಾಚೆ ಇನ್ಸೂರಾ ಪಶಿ ಹೇ ಸುಮಾರ ೭೪ ಕೋಟಿ ರೂಪ್ಪಯಿ ಚ್ಹಡ. ಇನ್ಸೂರಾಕ ಜಿ.ಎಸ್.ಬಿ. ಸೇವಾ ಮಂಡಲ ಹಾನ್ನಿ ಇನ್ಸೂರೆನ್ಸ್ ಪ್ರಿಮೀಯಂ ಭರಲಾ. ಹಾಂತು ಬಾಂಗಾರ ಆನಿ ರುಪ್ಯಾಚೆ ಆಭರಣಾಕ ಲುಕ್ಸಾನ ಜಾಲಯಾರಿ ಜಾಂವೊ ಚೋರಿ ಜಾಲಯಾರಿ ತ್ಯಾ ೬೭.೦೩ ಕೋಟಿ ರೂಪಾಯಿ ಮೆಳ್ತಾ. ವೇದಿಕೆರಿ ಅಗ್ನಿ ಅನಾಹುತ ಘೆಲೇರಿ ಎರಡು ಕೋಟಿ ರೂಪ್ಪಯಿ ಪರಿಹಾರ ಮೆಳ್ತಾ, ಶ್ರೀ ಗಣೇಶಾಲೆ ದರ್ಶನಾ ಖಾತೇರಿ ಯವ್ಚೆ ಭಕ್ತಾಂಗೆಲೆ ಖಾತೇರಿ ೩೦ ಕೋಟಿ ರೂಪಾಯಿ ಮೊತ್ತಾಚೆ ಇನ್ಸೂರ ಕರಯಲಾ. ಸ್ವಯಂಸೇವಕ, ಭದ್ರತಾ ಸಿಬ್ಬಂದಿ, ವೆಗಳೆ ಕಾಮಗಾರಿ ಲೋಕಾಂಕ ಅಪಘಾತ, ಜೀವಹಾನಿ ಜಾಲಯಾರಿ ಮ್ಹೊಣು ೩೭೫ ಕೋಟಿ ರೂಪ್ಪಯಾಚೆ ಇನ್ಸೂರ ಕರಯಲಾ. ಹೇ ಗಣೇಶ ಪೆಂಡಲಾಂತು ಅ.೨೭ಚಾನ ೩೧ ಪರ್ಯಂತ ಪಾಂಚ ದಿವಸು ಭರ್ತಿ ಚೋವೀಸ ತಾದ ಪೂಜಾ, ಅರ್ಚನ, ಸೇವಾ, ಅನ್ನದಾನ, ದೇವದರ್ಶನ ಆಸತಾ. ಹೇ ವೇಳ್ಯಾರಿ ಶ್ರೀ ಗಣೇಶೋತ್ಸವಾಕ ಖರ್ಚುನ ವ್ಹರಚೆ ದುಡವಾನಿ ಗರೀಬ ವಿದ್ಯಾರ್ಥ್ಯಾಂಕ ಶೈಕ್ಷಣಿಕ ಮದತ್, ವಿಶ್ವ ದರ್ಜೆಚೆ ಆಸ್ಪತ್ರೆ ಬಾಂದಚೆ, ಗರೀಬಾಂಕ ಮದತ್, ಸುಧೀಂದ್ರ ಅಕಾಡೆಮಿ ಆಪ್ ಗ್ಲೋಬಲ್ ಎಜುಕೇಶನ್ ಸಹಿತ ಸಬಾರ ಸಮಾಜಮುಖಿ ಕಾರ್ಯಕ್ರಮ ಜಿ.ಎಸ್.ಬಿ. ಸೇವಾ ಮಂಡಲಚಾನಿ ಘಾಲ್ನು ಘೆತ್ಲ್ಯಾ. ಹೇ ಸಕ್ಕಡ ಕಾರ್ಯಾಕ ಆಸಕ್ತ ಸಮಾಜಾಚೆ ಗಣ್ಯ ಆನಿ ದಾನಿ ಲೋಕಾನಿ ದಾರಾಳ ಮನಾನಿ ದೇಣಿಗಾ ದಿವಯೇತ.
ಚಡ್ತೆ ಮಾಹಿತಿಕ :
Shree Guru Ganesh Prasad, Bhookailash Nagar, Near Sion Fort, Sion (E), Mumbai – 400 022.
Ph : 022 24078147 / 022 24078226
info@gsbsevamandal.org
Seva Booking
https://web.gsbsevamandal.org/sevas/booking
ವಿ.ಸೂ. ಹಾಂತು ವಾಪರ್‍ಲಿಲೆ ಫೋಟೊ ಮಾಕಶಿ ವರಸಾಂತು ಜಿ.ಎಸ್.ಬಿ. ಸೇವಾ ಮಂಡಲಚಾನಿ ಚಲೀಲೆ ಶ್ರೀ ಗಣೇಶೋತ್ಸವಾಚೆ ಜಾವ್ನಾಸ್ಸ.