ಕಾಸರಗೋಡು ಚಿನ್ನಾ ತಾಂಗೆಲೆ ಪರಿಕಲ್ಪನೆಚೆ `ಘರ್ ಘರ್ ಕೊಂಕಣಿಚೆ ೧೫೧ ವೇಂ ಕಾರ್ಯಕ್ರಮ ಮಣಿಪಾಲ್ಚೆ ಸಾಯಿರಾಧಾ ಗ್ರೀನ್ ವೇಲಿಯ ಹಾಂಗಾ ಖ್ಯಾತ ಸಾಹಿತಿ, ಶ್ರೀ ಕಾಡಬೆಟ್ಟು ಮನೋಹರ ನಾಯಕ್ ಆನಿ ಶ್ರೀಮತಿ ಶೀಲಾ ನಾಯಕ್ ಹಾಂಗೆಲೆ ಆತಿಥ್ಯಾರಿ ಆರತ ಎ.೧೩ಕ ಸಂಪನ್ನ ಜಾಲ್ಲೆ.
ದಿವಲಿಂ ಜಳೋನು ಕಾರ್ಯಕ್ರಮ ಉದ್ಘಾಟನ ಕೆಲೀಲೆ ಘರ್ ಘರ್ ಕೊಂಕಣಿ ಹಾಜ್ಜೆ ರೂವಾರಿ ಕಾಸರಗೋಡು ಚಿನ್ನಾ ತಾನ್ನಿ ಉಲೋನು ಮಾತೃ ಭಾಷೆಚಿ ಅತ್ಯಂತ ಶ್ರೇಷ್ಟ ಜಾಲೀಲೆ ಭಾಸ, ತ್ಯಾ ಶಿಖಯಿಲಿ ಆವಯಿಚಿ ಹೇ ಜಗಾಚೆ ಅತ್ಯಂತ ಶ್ರೇಷ್ಟ ದೇವು. ತಾಂಗೆಲೆ ದೊಗ್ಗಾಲೆ ಋಣ ಪಾರಿಗತ ಕೊರಚಾಕ ಸಾಧ್ಯ ನಾ. ಕಡೇಪಕ್ಷ ಘರ್‍ಕಡೆ ಆವಯಿ ಭಾಷೆ ಖಾತ್ತಿರಿ ದೀವೊಂ ಲಾವಚೆ ಕಾಮ ಕೊರಕಾ ಮ್ಹೊಣು ಸಾಂಗಲೆ. ಕಾಸರಗೋಡು ಚಿನ್ನಾ ತಾನ್ನಿ ಕೊಂಕಣಿ ಅಕಾಡೆಮಿಚೆ ಅಧ್ಯಕ್ಷ ಜಾವ್ನಾಶ್ಶಿಲೆ ತೆದ್ದನಾ ಸೂರು ಕೆಲೀಲೆ ಕೊಂಕಣಿ ಭಾಷೆಚೆ ಅಭಿವೃದ್ಧಿ ಖಾತ್ತಿರಿ ಆನಿ ಭಾಷಾ ಪ್ರೀತಿ ವೃದ್ಧಿ ಕೊರಚೆ ತಸ್ಸಾಲೆ ಅದ್ಭುತ ಪರಿಕಲ್ಪನೆಚೆ ಹೇಘರ್ ಘರ್ ಕೊಂಕಣಿ ಮ್ಹಣ್ಚೆ ವಿನೂತನ ತಶೀಚಿ ಅದ್ಭುತ ಸಾಂಸ್ಕೃತಿಕ ಕಾರ್ಯಕ್ರಮಾಂತು ತರಂಗ ವಾರ ಪತ್ರಿಕೆ ಸಂಪಾದಕಿ ಶ್ರೀಮತಿ ಸಂಧ್ಯಾ ಪೈ , ಖ್ಯಾತ ಸಂಗೀತಗಾರ ತೋನ್ಸೆ ರಂಗ ಪೈ, ರಂಗ ಕಲಾವಿದ ಶಶಿಭೂಷಣ ಕಿಣಿ, ನಿರ್ಮಾಪಕ ಟಿ.ಎ. ಶ್ರೀನಿವಾಸ ಉಪಸ್ಥಿತ ವ್ಹರಲೀಲೆ. ಮನೋಹರ್ ನಾಯಕ್ ತಾನ್ನಿ ರಚಯಿಲೆ ಆಮಚಗೇಲೆ ಕೊಂಕಣಿ ವ್ಹರಡಿಕೇಚೆ ತಶೀಚಿ ಬಾಳಗೀತಾಂಚೆ ವಿಡಿಯೋ ಚಿತ್ರೀಕರಣ ಹೇಂಚಿ ಸಂದರ್ಭಾರಿ ಚಲ್ಲೆ. ಕೊಂಕಣಿ ಭಾಷಿಗ ಪಂಗಡಾಂಚೆ ವೈವಿಧ್ಯಮಯ ಆಕರ್ಷಕ ಸಾಂಸ್ಕೃತಿಕ ಕಾರ್ಯಕ್ರಮ ಚೋಲ್ನು ಜಮೀಲೆ ಲೋಕಾಂಗೆಲೆ ಮನಾಕ ಖುಷಿ ದಿಲ್ಲೆ. ಚೇಂಪಿ ರಾಮಚಂದ್ರ ಭಟ್ ತಾನ್ನಿ ಸೂತ್ರಸಂಚಲನ ಕೆಲ್ಲಿ. ಸಾಂಜವಾಳಾಚೆ ಸಭಾ ಕಾರ್ಯಕ್ರಮ ಮಣಿಪಾಲ್ಚೆ ಹೊಟೇಲ್ ಮಧುವನ್ ಸೆರಾಯ್ ಹಾಜ್ಜೆಮಧುರಾ ಸಭಾಂಗಣಾಂತು ಗಡ್ಜಾರಿ ಚಲ್ಲೆ. T M A ಪೈ ಪೌಂಡೇಶೆನ್ ಚೆ ಶ್ರೀ ಟಿ. ಅಶೋಕ್ ಪೈತಾನ್ನಿ ದೀವೊ ಜಳೋನು ಉದ್ಘಾಟನ ಕೆಲ್ಲಿ.ಕೊಂಕಣಿ ಭಾಸ ಘರಾಕ ಮಾತ್ರ ಸೀಮಿತ ಜಾಯನಾಶಿ ದೇವಳ, ವೆಗಳೆ ಸಭಾ ವೇದಿಕೆರಿ ಪೂರ್ಣ ಪ್ರಮಾಣಾರಿ ವಾಪರ್‍ಲಿ ತೆದ್ದನಾ ಭಾಸ ವಾಡತಾ, ವ್ಹರತಾ ಮ್ಹೊಣು ಸಾಂಗೂನು ದೇವು ಬರೆಂ ಕೊರೊಂ ಮ್ಹಳ್ಳೆ.
ವೇದಿಕೆರಿ ವಿಶ್ವ ಕೊಂಕಣಿ ಕೇಂದ್ರ ಅಧ್ಯಕ್ಷ ನಂದಗೋಪಾಲ್ ಶೆಣೈ , ವೈಶ್ಯವಾಣಿ ಸಮಾಜ ಅಧ್ಯಕ್ಷ ವಸಂತ ನಾಯಕ್ , ಕುಡಾಳ್ ಸಮಾಜ ಅಧ್ಯಕ್ಷ ರಾಧಾಕೃಷ್ಣ ಸಾವಂತ್ , ಕೊಂಕಣಿ ಸಾಹಿತ್ಯಕಾರ ಡಾ ಜೆರಾಲ್ಡ್ ಪಿಂಟೋ , ಸಮಾಜ ಸೇವಕ ವಿಶ್ವನಾಥ ಶೆಣೈ , ಶ್ರೀ ದುರ್ಗಾಂಭ ದೇವಳಾಚೆ ಶಿವಾನಂದ ಭಟ್ , ಖಾರ್ವಿ ಸಮಾಜಾಚೆ ಲಾವಕಾರ ಖಾರ್ವಿ , ದೈವಜ್ಞ ಸಮಾಜ ಅಧ್ಯಕ್ಷ ಸುಬ್ರಹ್ಮಣ್ಯ ಶೇಟ್ , ಶ್ರೀಮತಿ ಪಲ್ಲವಿ ಮಡಿವಾಳ ಕುಮಟಾ , ಮನೋಹರ ನಾಯಕ್ ಮತ್ತು ಶೀಲಾ ನಾಯಕ್ ಉಪಸ್ಥಿತ ವ್ಹರಲೀಲೆ. ಕೊಂಕಣಿ ಅಕಾಡೆಮಿಯ ಮಾಜಿ ಅಧ್ಯಕ್ಷ ಜಾಲೀಲೆ ಕಾಸರಗೋಡು ಚಿನ್ನಾ ತಾಂಕಾ ಸತ್ಕಾರ ಕೊರನು ಗೌರವ ಕೆಲ್ಲೆ. ಉಪರಾಂತ ಉಡುಪಿ ಪರಿಸರಾಚೆ ವೆಗವೆಗಳೆ ಕ್ಷೇತ್ರಾಂತು ವಿಶೇಷ ಸಾಧನ ಕೆಲೀಲೆ ೧೨ ಲೋಕ ಸಾಧಕಾಂಕ ಗುರ್‍ತು ಕೊರನು , ಸನ್ಮಾನ ಕೆಲ್ಲಿ. ತಶೀಚಿ ದೊಗ್ಗ ಯುವ ಪ್ರತಿಭಾನ್ವಿತಾಂಕ ಯುವ ಪುರಸ್ಕಾರ ಪ್ರಶಸ್ತಿ ಪ್ರಧಾನ ಕೆಲ್ಲಿ. ಸಭಾಂತು ರಾಜಪುರ ಸಾರಸ್ವತ ಬ್ರಾಹ್ಮಣ. ಕುಡಾಳ ದೇಶಸ್ಥ ಆದ್ಯ ಗೌಡ ಬ್ರಾಹ್ಮಣ ಸಮಾಜ , ವೈಶ್ಯವಾಣಿ ಸಮಾಜ, ಕ್ಯಾಥೊಲಿಕ್, ಮಡಿವಾಳ, ದೇಶ್ ಭಂಡಾರಿ, ದೈವಜ್ಞ ಬ್ರಾಹ್ಮಣ, ಜಿ.ಎಸ್.ಬಿ., ಖಾರ್ವಿ ಪಂಗ್ಡಾಚೆ ಸಬಾರ ಮುಖೇಲ, ಸಮಾಜ ಬಾಂದವ ಉಪಸ್ಥಿತ ವ್ಹರಲೀಲೆ. ವಿಧ್ವಾನ್ ಹರಿ ಪ್ರಸಾದ್ ಶರ್ಮಾ , ತಶೀಚಿ ಚೇಂಪಿ ರಾಮಚಂದ್ರ ಭಟ್ ತಾನ್ನಿ ಸೂತ್ರ ಸಂಚಲನ ಕೆಲ್ಲಿ. ಉಪರಾಂತ ವಿವಿಧ ಪಂಗ್ಡಾಚೆ ಸಮಾಜ ಬಾಂದವ ತಾಕೂನು ಸಾಂಸ್ಕೃತಿಕ ಕಾರ್ಯಕ್ರಮ ಚಲ್ಲೆ. ಅಖೇರಿಕ ಮುಲ್ಕಿ ರವೀಂದ್ರ ಪ್ರಭು ಹಾಂಗೆಲೆ ಶುಶ್ರಾವ್ಯ ಸಂಗೀತ ಕಾರ್ಯಕ್ರಮ ಚೋಲ್ನು ೧೫೧ವೇ ಘರ್ ಘರ್ ಕೊಂಕಣಿ ಕಾರ್ಯಕ್ರಮ ಸಂಪನ್ನ ಜಾಲ್ಲೆ.
ವರದಿ : ದೇವದಾಸ ಕಾಮತ್
ಹೇ ಜಾಲತಾಣಾಚೆ Konkani Flip E-BOOKS ವಿಭಾಗಾಂತು ಆಸ್ಸುಚೆ ಕೊಂಕಣಿ ಸಬಾರ ಇ-ಬುಕ್ಸ್ ಉಚಿತ ಜಾವ್ನು ವಾಚ್ಚಿಯಾ. ಕೊಂಕಣಿ ಫುಲಯಾ.