ಉಡುಪಿ ಕ್ರಷ್ಣಾಲೆ ಮಹಾಪವಾಡಾನಿ ಗೌಡ ಸಾರಸ್ವತ ಸಮಾಜಾಕ ಮಹಾದೇಣಿಗಾ ಮ್ಹಣ್ಚೆವರಿ ಶ್ರೀ ಪರ್ತಗಾಳಿ ಜೀವೋತ್ತಮ ಮಠ ಅಸ್ತಿತ್ವಾಕ ಆಯ್ಲೆ. ಕಾಶಿಂತು ಆಪಣೇಲೆ ಮಹಾಮಹಿಮಾ ದಾಖೋನು ಮಠಾಚೆ ಪ್ರಥಮ ಗುರುವರ್‍ಯಾನಿ ಥಂಚೆ ರಾಯಾಲೆ ಮದತ್ ಘೇವನು ಕಾಶಿಂತು ಪಯಲೇಚೆ ಮಠ ಸ್ಥಾಪನ ಕೆಲ್ಲಿ. ತಾಂಕಾ ಮಠಾಚೆ ದುಸರೆಚೆ ಮಠ ಸ್ಥಾಪನ ಕೊರಚಾಕ ಮದದ್ ದಿಲೀಲೆ ಭಟಕಲಾಚೆ ಮಹಾಜನಾನಿ, ತಶೀಚಿ ಶ್ರೀ ಸಂಸ್ಥಾನ ಕಾಶೀಮಠ ಕಾಶಿಂತು ಅಸ್ತಿತ್ವಾಕ ಆಯ್ಲೆ. ತ್ಯಾ ಮಠಾಚೆ ಪಯಲೇಚೆ ಮಠಾಧಿಪತಿ ಶ್ರೀಮದ್ ಯಾದವೇಂದ್ರ ತೀರ್ಥ ಸ್ವಾಮ್ಯಾಂಕ ಭಟ್ಕಳ ಗಾಂವ್ಚೆ ಜೋಗಿ ಮಲ್ಯ ಮ್ಹಣ್ಚೆ ಮಹನೀಯಾನಿ ಜಾಗೆ ಸಮೇತ ತಿರುಮಲ ದೇವಳ ದಾನ ಕೆಲ್ಲಿ. ಹೇ ದೊನ್ನೀ ವಿಷಯು ತ್ಯಾ ತ್ಯಾ ಮಠಾಂಚೆ ದಾಖಲೇನ ಮೆಳ್ತಾ. ವೈಷ್ಣವ ಗೌಡ ಸಾರಸ್ವತ ಮಠ ಸ್ಥಾಪನೆ ತಾಕೂನೂಚಿ ಭಟ್ಕಳಾಚೆ ಮಹಾಜನಾಂಕ ಆನಿ ಮಠಾಂಕ ಅವಿನಾಭಾವ ಸಂಬಂಧ ಆಶ್ಶಿಲೆ ಮ್ಹಣ್ಚೆ ಹಾಜೇನಿ ಕಳೀತಾಕ ಯತ್ತಾ. ಖರೇಚಿ ಹೇ ಸರ್ವ ಭಟ್ಕಳಾಚೆ ಸಮಾಜ ಬಾಂಧವಾನಿ ಕೆದನಾಂಯಿ ಅಭಿಮಾನ ಪಾವ್ಚೆ ತಸ್ಸಾಲೆ ಗರ್ವಾಚೆ ವಿಷಯುಮ್ಹೊಣು ಸರಸ್ವತಿ ಪ್ರಭಾಚೆ ಸಂಪಾದಕ ಆರಗೋಡು ಸುರೇಶ ಶೆಣೈ ತಾನ್ನಿ ಸಾಂಗ್ಲೆ. ತಾನ್ನಿ ಜನವರಿ ೧೯ ತಾರಿಖೇಕ ಭಟ್ಕಳಾಚೆ ನಾಗಯಕ್ಷೇ ಧರ್ಮಾರ್ಥ ಸಭಾಭವನಾಂತು ಭಟ್ಕಳ ಗೌಡ ಸಾರಸ್ವತ ಬ್ರಾಹ್ಮಣ ಕಲ್ಯಾಣ ಸೇವಾ ಸಮಿತಿ ತರಪೇನಿ ಚಲೀಲೆ ವಾರ್ಷಿಕೋತ್ಸವ ಸಮಾರಂಭಾಕ ಮುಖೇಲ ಸೊಯರೆ ಜಾವ್ನು ಯವ್ನು ಉಲಯತಾಲೆ. ಮುಖಾರಿ ಉಲಯಿಲೆ ತಾನ್ನಿ ಭಟ್ಕಳಾಂತು ದಂಗೋ ಚಲೀಲೆ ಉಪರಾಂತ ಜಿ.ಎಸ್.ಬಿ. ಲೋಕಾಂಗೆಲೆ ಸಂಘಟನಾ ಬರಶಿ ಧಾರ್ಮಿಕ, ಶೈಕ್ಷಣಿಕ, ಜೌದ್ಯೋಗಿಕ ಉದರ್ಗತಿ ಖಾತೇರಿ ಜಲ್ಮಿಲೆ ಕಲ್ಯಾಣ ಸಮಿತಿ ನಿಮಿತ್ತ್ಯಾನಿ ಘಾಲ್ನು ಘೆತ್ತಿಲೆ ಹರ್‍ಯೇಕ ಕಾರ್ಯ ಅತ್ಯುತ್ಕಷ್ಟ ಮ್ಹಣ್ತಾ ತಾಜ್ಜೆ ಮಹತ್ತ್ವ ಸಭಾಕ ಕಳಯಿಲೆ ಆನಿ ಭಟ್ಕಳಾ ಸಕ್ಕಡ ಸಮಾಜ ಬಾಂಧವಾನಿ ಹಾಂತು ಸಕ್ರಿಯ ಜಾವ್ನು ವಾಂಟೊ ಘೆವ್ಕಾ ಮ್ಹಣ್ಚೆ ಆಪೋವ್ನಿ ದಿಲ್ಲಿ. ಹೇ ವೇಳ್ಯಾರಿ ವೇದಿಕೆರಿ ಜಿ.ಎಸ್.ಬಿ. ಕಲ್ಯಾಣ ಸೇವಾ ಸಮಿತಿಚೆ ಅಧ್ಯಕ್ಷ ಗಿರಿಧರ ನಾಯಕ, ಗೌರವಾಧ್ಯಕ್ಷ ಪದ್ಮನಾಭ ಪೈ, ಭಟ್ಕಳ ದಾಜನ ಜಿ.ಎಸ್.ಬಿ. ಸಮಾಜಾಧ್ಯಕ್ಷ ನಾಗೇಶ ಪಿ. ಕಾಮತ್, ಉಪಾಧ್ಯಕ್ಷ ನರೇಂದ್ರ ನಾಯಕ ಆನಿ ಮಹಿಳಾ ಮಂಡಳಿಚೆ ಅಧ್ಯಕ್ಷ ಶ್ರೀಮತಿ ಸುನೀತಾ ಎಸ್. ಪೈ ಉಪಸ್ಥಿತ ವ್ಹರಲೀಲೆ. ಹೇ ಸಂದರ್ಭಾರಿ ಶ್ರೀಮತಿ ಉಷಾ ಉಲ್ಲಾಸ ಪೈ ಹಾಂಕಾ ಆದರ್ಶ ಸದ್ಘಹಿಣಿ ಪುರಸ್ಕಾರ ಪ್ರಾಧಾನ ಕರತಾನಾ ದಂಪತಿಂಕ ಆಪೋನು ಸತ್ಕಾರ ಕೆಲ್ಲೊ. ತಶೀಚಿ ಸೇವಾ ಸಾಧನ ಪುಸ್ಕಾರ ತ್ರಿವಿಕ್ರಮ ನಾಯಕ ಆನಿ ಸಾಧಕ ಪುರಸ್ಕಾರ ಪದ್ಮನಾಭ ನಾಯಕ ತಾಂಕ ಪ್ರದಾನ ಕೊರನು ದಂಪತಿ ಸಮೇತ ಸನ್ಮಾನು ಕೆಲ್ಲೊ. ಬರಶಿ ಶಾಂತಿ ಅನಿಲ ನಾಯಕ ತಾಂಕಾಯಿ ಸನ್ಮಾನು ಕೆಲ್ಲೊ. ಹೇಂಚಿ ಸಂದರ್ಭಾರಿ ಕೆಂದ್ರ ಸರಕಾರಾನಿ ಸತ್ತರ ವರಸಾಚೆ ವೈಚೆ ಮ್ಹಾಲ್ಗಡೆ ನಾಗರಿಕ ಖಾತೇರಿ ಜಾರಿಕ ಹಾಡಲೀಲೆಆಯುಷ್ಯಮಾನ ಕಾರ್ಡ ಯೋಗ್ಯಾಂಕ ಪಾವಯಚೆ ಖಾತೇರಿ ತಾಜ್ಜೆ ಲೋಕಾರ್ಪಣ ವರೇನ ಘಡಲೆ.
ಸುರವೇಕ ದೀಪಕ ನಾಯಕ ತಾನ್ನಿ ಸ್ವಾಗತ ಕೆಲ್ಲಿ. ಅಧ್ಯಕ್ಷ ಗಿರಿಧರ ನಾಯಕ ತಾನ್ನಿ ಪ್ರಾಸ್ತಾವಿಕ ಜಾವ್ನು ಉಲೋನು ಜಿ.ಎಸ್.ಬಿ. ಕಲ್ಯಾಣ ಸೇವಾ ಸಮಿತಿಚೆ ಕಾರ್ಯಚಟುವಟಿಕೆಚೆ ಮಾಹಿತಿ ಕೊರನು ದಿಲ್ಲಿ. ಅಖೇರಿಕ ಸತೀಶ ಪೈ ತಾನ್ನಿ ಆಬಾರ ಮಾನಲೆ.
ತ್ಯಾ ದಿವಸು ಸಾಂಜವಾಳಾ ಸಾಡಿ ಚಾರ ಘಂಟ್ಯಾಚಾನ ವಾರ್ಷಿಕೋತ್ಸವ ಕಾರ್ಯಕ್ರಮ ಆರಂಭ ಜಾಲ್ಲೆ. ಸುರವೇಕ ಛದ್ಮವೇಷ ಸ್ಪರ್ಧಾ ಚಲಯಾರಿ, ಉಪರಾಂತ ವಿವಿಧ ವಿನೋದಾವಳಿ ಮನರಂಜನಾ ಕಾರ್ಯಕ್ರಮಾಂತು ಸಮಾಜ ಬಾಂಧವ ಮಸ್ತ ಉಮೇದಾರಿ ವಾಂಟೊ ಘೆತ್ಲೆ. ತಾಂಗೆಲೆ ಪ್ರತಿಭಾ ಜಮೀಲೆ ಅಪಾರ ಲೋಕಾಂಕ ಮಸ್ತ ಹರ್ಷ ಹಾಡಲೆ. ಛದ್ಮವೇಷ ಆನಿ ಕ್ರೀಡಾ ಸ್ಪರ್ಧೆಂತು ಜಿಕ್ಕಿಲ್ಯಾಂಕ ಬಹುಮಾನ ವಿತರಣ ಆನಿ ಮನರಂಜನಾ ಕಾರ್ಯಕ್ರಮ ದಿಲೀಲೆ ಸಕಡಾಂಕ ಸ್ಮರಣಿಕಾ ದಿವನು ಪ್ರೋತ್ಸಾಹ ಕೆಲ್ಲೆ.
