1994 ಇಸ್ವೆಂತು ಸ್ಥಾಪಿತ ಭಟ್ಕಳಾಚೆ ವಡೇರ ಮಠಾಂತು ಆಸ್ಸುಚೆ ಗೌಡ ಸಾರಸ್ವತ ಸಮಾಜ ಕಲ್ಯಾಣ ಸೇವಾ ಸಮಿತಿ(ರಿ) ಹಾಜ್ಜೆ 31ವೇಂ ವಾರ್ಷಿಕೋತ್ಸವು ವೆಗವೆಗಳೆ ವೈಶಿಷ್ಠ್ಯಪೂರ್ಣ ಕಾರ್ಯಕ್ರಮ ಬರಶಿ ದಿನಾಂಕ. 19-01-2025 ದಿವಸು ಭಟ್ಕಳಾಚೆ ಶ್ರೀ ನಾಗಯಕ್ಷಿ ಧರ್ಮಾರ್ಥ ಸಭಾಭವನಾಂತು ಘಡೋನು ಹಾಡಲಾ.
ಭಟ್ಕಳಾಚೆ ಗೌಡ ಸಾರಸ್ವತ ಸಮಾಜ ಕಲ್ಯಾಣ ಸೇವಾ ಸಮಿತಿ ತರಪೇನಿ ಘೆಲೀಲೆ ಎಕ್ತೀಸ ವರಸಾಂತು ಭಟ್ಕಳಾಚೆ ಜಿ.ಎಸ್.ಬಿ. ಸಮಾಜ ಬಾಂಧವ ಖಾತೇರಿ ಮಸ್ತ ಜನೋಪಯೋಗಿ ಕಾರ್ಯ ಚಲಾಯಿಸೂನು ಆಯಲೀಲೆ ಹಾಂಗಾ ಯಾದ ಕೊರನು ಘೆವಯೇತ. ಸಮಾಜಾಚೆ ಪ್ರತಿಭಾವಂತ ಚರಡುವಾಂಕ ಶಿಕ್ಷಣಾಕ ಸಹಕಾರ, ಪ್ರತಿಭಾ ಪುರಸ್ಕಾರ, ನವೀನ ಜನಾಂಗಾಂತು ಧಾರ್ಮಿಕ ಜಾಗೃತಿ ಆಸ್ಸ ಕೊರಚಾಕ ವಿಭಿನ್ನ ಪ್ರಯತ್ನ, ಪ್ರತಿ ವರ್ಷ ಕ್ರೀಡಾ ಸ್ಪರ್ಧಾ, ಉಚಿತ ಆರೋಗ್ಯ ತಪಾಸಣಾ ಶಿಬಿರ, ಉಚಿತ ವಾಕ್ಕದ ವಿತರಣ, ರಕ್ತದಾನ ಶಿಬಿರ, ಸ್ವಚ್ಛತಾ ಜಾಗೃತಿ, ಸ್ಮಶಾನ ಚ್ಹೊಖ ಕೊರಚೆ ಕಾರ್ಯ, ಚರಡುವಾಂಕ ಕೌಶಲಾಭಿವೃದ್ಧಿ, ವ್ಯಕ್ತಿತ್ವ ವಿಕಸನಾಕ ಮದತ್ ಜಾವ್ಚೆ ತಸ್ಸಾಲೆ ಕಾರ್ಯಕ್ರಮ, ಆನ್‌ಲೈನ್ ಸಂವಹನ, ಯೂಟ್ಯೂಬ್ ಚಾನಲ್ ಆರಂಭ ಅಶ್ಶಿ ಅನೇಕ ಕಾರ್ಯಕ್ರಮ ಘಾಲ್ನು ತಾಜ್ಜೆ ಮುನಾಪೋ ಭಟ್ಕಳಾಚೆ ಸಮಾಜ ಬಾಂಧವಾಂಕ ಮೆಳ್ಚೆ ವರಿ ಕರತಾ ಆಸ್ಸಾತಿ.
ಅವುಂದೂಚೆ ವಾರ್ಷಿಕೋತ್ಸವಾಚೆ ಸಂಬಂಧ ಆಯ್ರವಾರ ಸಾಂಜವಾಳಾ ೪ ಘಂಟ್ಯಾಕ ವಾರ್ಷಿಕೋತ್ಸವ ಕಾರ್ಯಕ್ರಮು ಸಾಂಸ್ಕೃತಿಕ ಕಾರ್ಯಕ್ರಮ ಬರಶಿ ಆರಂಭ ಜಾತ್ತಾ. ಮಾಗಿರಿ ಪಾಂಚ ವಿಭಾಗಾಂತು ಛದ್ಮವೇಷ ಸ್ಪರ್ಧಾ ಚಲ್ತಾ. ಸಾಂಜವಾಳಾ ೫-೩೦ಕ ಸಭಾ ಕಾರ್ಯಕ್ರಮ ಚಲ್ತಾ ಮ್ಹೊಣು ಕೋಳನು ಆಯಲಾ.
