ದುರ್ಗಾದೇವಿನಿ ಮೂಲದುರ್ಗಾ ಮ್ಹಣ್ಚೆ ನಾಂವಾನಿ ಅಗ್ನಿದುರ್ಗಾ, ಶಾಂತಾದುರ್ಗಾ ಇತ್ಯಾದಿ ನಾಮದೇಯ ಘೇವ್ನು ಭಕ್ತಾಂಕ ರಾಕ್ತಾ ಆಸ್ಸುಚೆ ಸಕಡಾಂಕ ಗೊತ್ತಾಶ್ಶಿಲೆ ಖಬ್ಬರ. ತಶೀಚಿ ಘೆಲೀಲೆ ಶಂಬರಬಽರಿ ವರ್ಷಾಚಾನ ಉಡುಪಿಚೆ ಮಲ್ಪೆಚೆ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾ ಬಾಂದವಾನಿ ಆರಾಧನ ಕೊರನು ಘೆತ್ತಾಶ್ಶಿಲಿ, ತಾಂಗೆಲೆ ಸಕ್ಕಡ ಇಷ್ಟಾರ್ಥ ಪೂರ್ಣ ಕರ್ತಾಲಿ, ಆಪಣೇಕ ನಂಬ್ಗಿಲೆ ಲೋಕಾಂಗೆಲೆ ಕಷ್ಟ ಕಾರ್ಪಣ್ಯ, ದಾರಿದ್ರ, ದುಃಖಾದಿ ನಿವಾರಣ ಕೊರನು ಧೈರ್ಯ, ಶಾಂತಿ ಆನ್ತಿ ಜ್ಞಾನ ದಿವಚಿ ಶ್ರೀ ನಾರಾಯಣಾಕೆ ಶಕ್ತಿ ಶ್ರೀಲಕ್ಷ್ಮೀ ಸ್ವರೂಪಿ ಜಾಲೇಲಿ ಶ್ರೀ ದುರ್ಗಾಪರಮೇಶ್ವರಿ ದೇವಿಲೀ ದೇವಳಾಕ ಶಂಬರ ಬಽರಿ ವರ್ಷಾಚೆ ಇತಿಹಾಸು ಆಸ್ಸಾ. ಹೇ ಮಲ್ಪೆಚೆ ಶ್ರೀ ದುರ್ಗಾಪರಮೇಶ್ವರಿ ಸಾನಿಧ್ಯ ಆಸ್ಸುಚೆ ದೇವಳಾಂತು ನೂತನ ಶಿಲಾಮಯ ಬಿಂಬದ ಪ್ರತಿಷ್ಠಾ ಮಹೋತ್ಸವು ದಿನಾಂಕ: 11-೦2-2026, ಬುಧ್ವಾರು ಸಕ್ಕಾಣಿ ೧೦:೧೦ ಘಂಟ್ಯಾಕ ಶ್ರೀಮತ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯಾನುಗ್ರಹ ಆಶೀರ್ವಾದಾನಿ ಸಂಪನ್ನ ಜಾವಚೆ ಆಸ್ಸಾ ಮ್ಹಣ್ಚೆ ಮಾಹಿತ ಮೆಳ್ಳಾ.
ತತ್ಸಂಬಂಧ ಶ್ರೀ ದುರ್ಗಾ ಪರಮೇಶ್ವರಿ ದೇವಿಲೆ ನವೀನ ಶಿಲಾಮಯ ಮೂರ್ತಿಚೆ ಪ್ರತಿಷ್ಠಾಪನಾ ಮಹೋತ್ಸವು ೨೦೨೬ಚೆ ಫೆಬ್ರವರಿ ೭ ತಾಕೂನು ೧೧ ಪರ್ಯಂತ ವೆಗವೆಗಳೆ ಧಾರ್ಮಿಕ ತಥಾ ಸಾಂಸ್ಕೃತಿಕ ಕಾರ್ಯಾವಳಿ ಬರಶಿ ಚಲ್ತಾ ಮ್ಹಣ್ಚೆ ಮಾಹಿತಿ ಮೆಳ್ಳಾ.
ಫೆ.೭ಕ ದೇವಮಾಗಣಿ, ಆದ್ಯ ಗಣಯಾಗ, ಪಾಚವೀಚಾರಾಚೀ ಅರ್ಪಣ (ಹಸಿರು ಹೊರೆಕಾಣಿಕೆ)ಧೋಂಪಾರಾ ಆನಿ ರಾತ್ರಿ ಪೂಜಾ, ಸಮಾರಾಧನ, ಫೆ.೮ಕ ಸಕ್ಕಾಣಿ ವಿಷ್ಣು ಸಹಸ್ರನಾಮ ಹೋಮು, ಸಾಂಜವಾಳಾ ವಾಸ್ತು ಹೋಮು, ರಾಕ್ಷೆಘ್ನ ಹೋಮು, ದಿಶಾ ಬಲಿದಾನ, ರಾಕ್ಷೆಘ್ನ ಹವನ ಚಲ್ತಾ.
ಫೆ.೯ಕ ಮಹಾ ಮಾಗಣಿ, ಧ್ವಜಾರೋಹಣ, ಅಂಕುರಾರ್ಪಣ, ಅಗ್ನಿಪ್ರತಿಷ್ಠಾ, ಲಘು ಪೂರ್ಣಾಹುತಿ, ಬಿಂಬಶುದ್ಧಿ, ಸಪ್ತಾದಿವಾಸ, ಗರ್ಭಾಗಾರಾಂತು ವಾಸ್ತು ರಾಕ್ಷೆಘ್ನ ಹವನ, ಪೂಜಾ, ಸಮಾರಾಧನ ಚಲ್ತಾ.
ಫೆ.೧೦ಕ ಸಾನಿಧ್ಯ ಹವನ, ಶ್ರೀ ದೇವಾಕ ಪಂಚಾಮೃತಾಭಿಷೇಕ, ಶತಕಲಶಾಭಿಷೇಕ, ಕನಕಾಭಿಷೇಕ, ಗಂಗಾಭಿಷೇಕ, ಬ್ರಹ್ಮಕಲಶಾಭಿಷೇಕ, ಲಘು ಪೂರ್ಣಾಹುತಿ, ಪೂಜಾ, ಸಮಾರಾಧನ, ರಾತ್ತಿಕ ಶಯ್ಯಾ ಕಲ್ಪನ ಚಲ್ತಾ.
ಫೆ.೧೧ಕ ಪ್ರತಿಷ್ಠಾ ಕಲಶ ಸ್ಥಾಪನ, ಪ್ರಧಾನ ಹವನ, ಮಹಾ ಪೂರ್ಣಾಹುತಿ, ದ್ವಾರಲಕ್ಷ್ಮೀ ಪೂಜೆ, ಮುಹೂರ್ತ ನಿರೀಕ್ಷಣ, ೧೦.೧೦ಚೆ ಮೀನ ಲಗ್ನಾಂತು ಶ್ರೀ ದುರ್ಗಾ ಪರಮೇಶ್ವರಿ ದೇವಿಲೊ ನೂತನ ಶಿಲಾಬಿಂಬ ಪ್ರತಿಷ್ಠಾ, ಬ್ರಹ್ಮ ಕಲಶಾಭಿಷೇಕ, ಪ್ರಸನ್ನ ಪೂಜಾ, ಅಷ್ಟಮಂಗಲ ದ್ರವ್ಯ, ಧೋಂಪಾರಾಚೆ ಮಹಾಪೂಜಾ, ಬ್ರಾಹ್ಮಣ, ದಂಪತೀ, ಸುವಾಸೀನಿ ಪೂಜಾ, ಮಹಾಸಮಾರಾಧನ, ವಿಪ್ರಾಶೀರ್ವಾದ ಆದಿ ಧಾರ್ಮಿಕ ಕಾರ್ಯಕ್ರಮ ಚಲ್ತಾ.
ಸಾಂಜವಾಳಾ ೪-೦೦ ಘಂಟ್ಯಾಕ ಪೂಜ್ಯ ಪೂಜ್ಯ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ದಿವ್ಯ ಆಗಮನ, ತಾಂಕಾ ಪೂರ್ಣಕುಂಭ ಸ್ವಾಗತ, ಪೂಜ್ಯ ಸ್ವಾಮ್ಯಾಂಗೆಲೆ ಅಮೃತ ಹಸ್ತಾನಿ ದೇವಿಕ ಪ್ರಸನ್ನ ಪೂಜಾ, ಸಾಂಜವಾಳಾ ೭-೦೦ ಘಂಟ್ಯಾಕ ಸಭಾ ಕಾರ್ಯಕ್ರಮು, ಪಾದಪೂಜಾ, ಪೂಜ್ಯ ಸ್ವಾಮ್ಯಾಂಗೆಲೆ ತಾಕೂನು ಆಶೀರ್ವಚನ, ಫಲಮಂತ್ರಾಕ್ಷತ ವಾಂಟಪ ಚೋಲ್ನು ಪೂಜ್ಯ ಸ್ವಾಮೆಂ ಆಪಣೇಲೆ ಮೊಕ್ಕಾಮಾಕ ಭಾಯರಸೊರನು ವತ್ತಾತಿ. ರಾತ್ತಿಕ ಶ್ರೀ ದೇವಿಕ ರಾತ್ರಿಪೂಜಾ, ನಗರೋತ್ಸವು, ಡೋಲೋತ್ಸವು, ಅಷ್ಟಾವಧಾನ ಆದಿ ಕಾರ್ಯಕ್ರಮ ಚಲ್ತಾ.
ಪ್ರತಿಷ್ಠಾ ಮಹೋತ್ಸವು ಆನಿ ಸೇವಾ ವಿವರ ಖಾತ್ತಿರಿ ಖಂಚೇಯಿ ಚಡ್ತೆ ಸೇವಾ ಮಾಹಿತಿಕ ಶ್ರೀ ಎಂ. ಶಾಂತಾರಾಮ ಪೈ, ಸಮಿತಿ ಅಧ್ಯಕ್ಷ (ಮೊ : ೯೬೩೨೪೪೩೯೯೨), ಶ್ರೀ ಎ. ಉಮೇಶ್ ನಾಯಕ್ ಕಾರ್ಯದರ್ಶಿ (ಮೊ : ೯೦೩೫೧೬೦೪೫೭/೭೨೦೪೯೫೩೯೦೨) ನಾಂವೆ ಶ್ರೀ ಎಂ. ಗಣಪತಿ ಪೈ, ಖಜಾಂಚಿ (ಮೊ : ೯೩೪೨೭೪೯೨೨೨) ಹಾಂಕಾ ಸಂಪರ್ಕ ಕೊರಯೇತ.