ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮೀಜಿ
ಶ್ರೀ ಸಂಸ್ಥಾನ ಕಾಶೀಮಠಾಧೀಶ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ವಿಶ್ವಾವಸು ನಾಮ ಸಂವತ್ಸರಾಚೆ ಚಾತುರ್ಮಾಸು ಜುಲೈ ೧೫ಕ ಕೋಟೇಶ್ವರಾಚೆ ಶ್ರೀ ಪಟ್ಟಾಭಿರಾಮಚಂದ್ರ ದೇವಳಾಂತು ಆರಂಭ ಜಾಲ್ಲೆ. ತತ್ಸಂಬಂಧ ವ್ಯಾಸೋಪಾಸನಾ, ನಿರ್ಮಾಲ್ಯ ವಿಸರ್ಜನ ಪೂಜಾ, ಸರ್ವ ವಿಗ್ರಹಾಂಕ ಉದ್ವರ್ಚನ ಸೇವಾ, ಮಠಾಚೆ ಸರ್ವ ದೇವಾಂಕ ಪಂಚಾಮೃತಾಭಿಷೇಕ, ಶೀಯಾಳಾಭಿಷೇಕ, ಪವಮಾನಾಭಿಷೇಕ, ಕನಕಾಭಿಷೇಕ, ಲಘು ವಿಷ್ಣು ಅಭಿಷೇಕ, ಮುದ್ರಾಧಾರಣ, ಧೋಂಪಾರಾ ಪೂಜಾ, ಉಪರಾಂತ ಭಿಕ್ಷಾ, ಸಮಾರಾಧನಾ ಸೇವಾ, ಮೃತ್ತಿಕಾ ಪೂಜಾ ಆದಿ ಧಾರ್ಮಿಕ ಕಾರ್ಯಕ್ರಮ ಚಲ್ಲೆ. ಸಭಾ ಕಾರ್ಯಕ್ರಮಾಂತು ವೆಗವೆಗಳೆ ದೇವಳ ಆನಿ ಸಮಾಜಾ ತರಪೇನಿ ಪೂಜ್ಯ ಸ್ವಾಮ್ಯಾಂಕಮಾಲಾರ್ಪಣ ಚೋಲ್ನು ಅಖೇರಿಕ ಪೂಜ್ಯ ಸ್ವಾಮ್ಯಾನಿ ಆಶೀರ್ವಚನ ದಿಲ್ಲೆ.
ಶ್ರೀಮದ್ ಸುಕೃತೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪವಾಡ ಸಾಂಗೂನು ಶ್ರೀ ಸಂಸ್ಥಾನ ಕಾಶೀಮಠಾಕ ಆನಿ ಕೋಟೇಶ್ವರಾಚೆ ವೆಗವೆಗಳೆ ಸಮಾಜ ಬಾಂಧವಾಕ ಆಸ್ಸುಚೆ ಬಾಂದವ್ಯಾಚೆ ಉಡಗೋಸು ಕೊರನು ಘೆತ್ಲೆ. ಕಂಯಿ ತರಿ ಶಿಷ್ಯ ಜಾವ್ನು ಗುರೂಲೆ ಪಾದಪೂಜಾ ಕೊರನು ಮಾಗಿರಿ ಆಪಣೇಲೆ ಶಿಷ್ಯಾ ತಾಕೂನು ಪಾದಪೂಜಾ ಕೊರೋನು ಘೆತ್ತಿಲೆ ಏಕೈಕೆ ಉದಾಹರಣ ಆಸ್ಸುಚೆ ಕೋಟೇಶ್ವರಾಕ ಮಾತ್ರ. ಹಾಂಗಾ ಶ್ರೀಮದ್ ಸುಕೃತೀಂದ್ರ ತೀರ್ಥಾಂಗೆಲೆ ಪಾದಪೂಜಾ ತಾಂಗೆಲೆ ಶಿಷ್ಯ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾನಿ ಕೆಲ್ಲೆ. ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪಾದಪೂಜಾ ತಾಂಗೆಲೆ ಶಿಷ್ಯ ಹಾಂವೆ ಕೆಲ್ಲೆ. ಹೇ ವರೇನ ಏಕ ಯೋಗಾಯೋಗ. ಶ್ರೀ ವೇದವ್ಯಾಸಾಲೆ ಸನ್ನಿಧಿರಿ ೧೦೦ ದಿವಸಾಚೆ ಭಜನಾ ಚಲ್ತಾ ಆಸ್ಸುಚೆ ವರೇನ ಸಕಡಾಂಗೆಲೆ ಮಹಾಭಾಗ್ಯ. ಸಕಡಾನಿ ತಾಂತು ವಾಂಟೊ ಘೇವ್ನು ಪುನೀತ ಜಾವ್ಕಾ ಸಕ್ಕಡಾಲೆ ವಯ್ರಿ ವ್ಯಾಸ ರಘುಪತಿಲೆ ತಶೀಚಿ ಶ್ರೀ ಪಟ್ಟಾಭಿ ರಾಮಚಂದ್ರಾಲೆ ಪೂರ್ಣ ಕೃಪಾ ಆಸ್ಸೊ ಮ್ಹಳ್ಳೆ. ದೇಶಾದ್ಯಂತ ತಾಕೂನು ವ್ಹಡ ಅಂಕಡ್ಯಾರಿ ಭಕ್ತಲೋಕ ಕೋಟೇಶ್ವರಾಕ ಯವ್ನು ಹೇ ವಿಜೃಂಭಣೆಚೆ ಸಮಾರಂಭಾಂತು ವಾಂಟೊ ಘೆತ್ಲೆ. ಚಾತುರ್ಮಾಸ ವ್ರತ ಸ್ವೀಕಾರ ಖಾತೇರಿ ಪೂಜ್ಯ ಸ್ವಾಮ್ಯಾನಿ ಜುಲೈ೫ ಕೋಟೇಶ್ವರ ಪುರಪ್ರವೇಶ ಕೆಲೀಲೆ ತೆದ್ದನಾ ತಾಂಕಾ ಪೂಜ್ಯಕುಂಭ ಸ್ವಾಗತ ದಿವನು ವೈಭವಾರಿ ದೇವಳಾಕ ಆಪೋನು ಹಾಡಲೆ. ಜುಲೈ ೧೧ಕ ಶ್ರೀಮದ್ ಸುಕೃತೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪುಣ್ಯತಿಥಿ ಆರಾಧನೆ ಪ್ರಯುಕ್ತ ಪೂಜ್ಯ ಸ್ವಾಮ್ಯಾಂಗೆಲೆ ದಿವ್ಯ ಸಾನಿಧ್ಯಾರಿ ಲಘುವಿಷ್ಣು ಹವನ, ಅಭಿಷೇಕ, ಸನ್ನಿಧಿ ಹವನ, ಸ್ವರ್ಣ ಗರುಡ ವಾಹನ ಪೂಜಾ, ಗುರು ಪೂಜಾ, ಗುರು ಗುಣಗಾನ ಆದಿ ಕಾರ್ಯಕ್ರಮ ಚಲ್ಲೆ. ಜುಲೈ ೧೭ಕ ಶ್ರೀ ಕಾಶೀಮಠಾಚೆ ಇತಿಹಾಸಾಂತು ಪಯಲೆ ಪಂತಾ ಶ್ರೀ ವ್ಯಾಸರಘುಪತಿ ನರಸಿಂಹ ದೇವಾಲೆ ಸನ್ನಿಧಿರಿ ಶತನಮನ, ಶತ ಸ್ಮರಣ, ಶತ ದಿವಸಾಚೆ ಅಖಂಡ ಭಜನೆಕ ಪೂಜ್ಯ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾನಿ ದೀವೋ ಜಳೋನು ಉದ್ಘಾಟನ ಕೆಲ್ಲಿ. ಆತ್ತ ಪ್ರತಿ ದಿವಸು ನಿರಂತರ ಭಜನಾ ಚಲ್ತಾ ಆಸ್ಸಾ. ವೆಗವೆಗಳೆ ಗಾಂವ್ಚೆ ಭಜನಾ ಪಾಳಿ, ಭಜನಾ ಕಲಾವಿದ ಹೇ ಸಂಭ್ರಮಾಚೆ ಕ್ಷಣಾಂತು ವಾಂಟೊ ಘೇವ್ನು ಪುನೀತ ಜಾತ್ತಾ ಆಸ್ಸಾತಿ. ಅಗಸ್ಟ್ ೮ಕ ಶ್ರೀ ವರಮಹಾಲಕ್ಷ್ಮೀ ವ್ರತ ಚಲೀಲೆ ಸಂದರ್ಭಾರಿ ಸಾಮೂಹಿಕ ಕುಂಕುಮಾರ್ಚನ , ಶ್ರೀ ಗಣೇಶೋತ್ಸವಾಚೆ ಸಂದರ್ಭಾರಿ ಅಗಸ್ಟ್ ೨೯ಕ ಅಷ್ಟೋತ್ತರ ಶತ ನಾರಿಕೇಳ ಗಣಯಾಗ ಚಲ್ತಾ ಮ್ಹಣ್ಚೆ ಮಾಹಿತ ಮೆಳ್ಳಾ.
ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮೀಜಿ
ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾ ಧೀಶ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾಂಗೆಲೆ ಚಾತುರ್ಮಾಸು ಜುಲೈ ೧೭ಕ ವಾರಣಾಸಿಚೆ ಪಂಚಗಂಗಾ ಘಾಟಾಂತು ಆಸ್ಸುಚೆ ಶಾಖಾಮಠ ಶ್ರೀ ಲಕ್ಷ್ಮೀ ನಾರಾಯಣ ಮಂದಿರಾಂತು ಆರಂಭ ಜಾಲ್ಲೆ. ಪೂಜ್ಯ ಸ್ವಾಮ್ಯಾಂಗೆಲೆ ಚಾತುರ್ಮಾಸ ಸ್ವೀಕಾರ ಪ್ರಯುಕ್ತ ದೇಶಾದ್ಯಂತಚಾನ ಆಯ್ಯಿಲೆ ಅಪಾರ ಶಿಷ್ಯಕೋಟಿಚೆ ಉಪಸ್ಥಿತೀರಿ ಸಕಾಣ್ಚಾನ ಸಾಂಜವಾಳ ಪರ್ಯಂತ ಧಾರ್ಮಿಕ ಕಾರ್ಯಕ್ರಮ ಚಲ್ಲೊ. ದೇವಮಾಗಣಿ, ಗಣಪತಿ ಪೂಜನ, ಮೃತ್ತಿಕಾ ಪೂಜನ, ಅಭಿಷೇಕ, ಹವನ, ಭಿಕ್ಷಾ, ಪಾದಪೂಜಾ, ವ್ಯಾಸಪೂಜಾ ಚೋಲ್ನು ಸಾಂಜವಾಳಾ ಸಭಾಕಾರ್ಯಕ್ರಮ ಚಲ್ಲೆ. ವೆಗವೆಗಳೆ ದೇವಳ, ಶಾಖಾ ಮಠ, ಸಮಾಜ, ಗಣ್ಯಾ ತರಪೇನಿ ಪೂಜ್ಯ ಸ್ವಾಮ್ಯಾಂಕ ಮಾಲಾರ್ಪಣ ಚಲ್ಲಿ. ಮಾಗಿರಿ ಆಪಣೇಲೆ ಆಶೀರ್ವಚನಾಂತು ಸಕಡಾಂಕ ಆಶೀರ್ವಾದ ಕೆಲೀಲೆ ಪೂಜ್ಯ ಸ್ವಾಮ್ಯಾನಿ ಶ್ರೀ ವಾರಣಾಸಿ ಮಠ ಆನಿ ಕಾಶೀಕ್ಷೇತ್ರಾಚೆ ಮಾಹಿತ ದಿವನು. ತಾಜ್ಜೆ ರಾಕವಣಾ ಖಾತೇರಿ ಮಠ ಪರಂಪರೆಚೆ ೯ವೇಂ ಯತಿವರ್ಯ ಶ್ರೀಮದ್ ಲಕ್ಷ್ಮೀನಾರಾಯಣ ತೀರ್ಥ ಸ್ವಾಮ್ಯಾನಿ ಅಖಂಡ ಆಠ ವರ್ಷ ಕಾಳ ಹಾಂಗಾಚಿ ರಾಬ್ಬೂನು ಶಾಖಾಮಠಾಚೆ ಅಗತ್ಯ ಬಂದೋಬಸ್ತ ಕೆಲೀಲೆ ವಿಚಾರ ಸಾಂಗ್ಲೆ. ಆನಿ ಸಹಸ್ರ ಬ್ರಾಹ್ಮಣ ಭೋಜನ ಸೇವಾಚೆ ಮಾಹಿತ ತಶೀಚಿ ಶ್ರೀ ಸಂಸ್ಥಾನ ಗೋಕರ್ಣ ಮಠಾಚೆ ೫೫೦ ವರ್ಷಾಚರಣೆಚೆ ಮಾಹಿತ ವರೇನ ದಿಲ್ಲಿ. ಹೇ ದಿವಸು ಪೂಜ್ಯ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾಂಗೆಲೆ ಪಟ್ಟಾಭಿಷೇಕ ದಿವಸು ವರೇನ ಜಾವ್ನಾಶ್ಶಿಲೆ. ಸೆ.೭ಕ ಮೃತ್ತಿಕಾ ವಿಸರ್ಜನೆ ಬರಶಿ ಪೂಜ್ಯ ಸ್ವಾಮ್ಯಾಂಗೆಲೆ ಚಾತುರ್ಮಾಸು ಸಮಾಪ್ತಿ ಜಾತ್ತಾ.
ಶ್ರೀಮದ್ ಸದ್ಯೋಜಾತ ಶಂಕರಾಶ್ರಮ ಸ್ವಾಮೀಜಿ
ಶಿರಾಲಿ ಚಿತ್ರಾಪುರ ಮಠಾಧೀಶ ಶ್ರೀಮದ್ ಸದ್ಯೋಜಾತ ಶಂಕರಾಶ್ರಮ ಸ್ವಾಮ್ಯಾಂಗೆಲೆ ೨೦೨೫ ವರ್ಷಾಚೆ ಚಾತುರ್ಮಾಸು ಜುಲೈ ೧೦ ತಾರಿಖೇಕ ಆರಂಭ ಜಾಲ್ಲೆ. ತತ್ಸಂಬಂಧ ಸಕ್ಕಾಣಿ ಭವಾನಿ ಶಂಕರ ಸುಪ್ರಭಾತಂ, ಸಾಮೂಹಿಕ ದೇವಮಾಗಣಿ, ಸದ್ಭಕ್ತ ತಾಕೂನು ಭಜನಾ ಸೇವಾ, ಪೂಜ್ಯ ಸ್ವಾಮೀಜಿ ತಾಕೂನು ಮಂಡಲಪೂಜಾ, ವೇದವ್ಯಾಸ ಪೂಜಾ, ಮಹಾ ಪೂಜಾ, ಧರ್ಮಸಭಾ, ಚಾತುರ್ಮಾಸ ವ್ರತ ಕಮೀಟಿ ಕನ್ಮೀನರ್ ತಾಕೂನು ಯೇವ್ಕಾರ ಆನಿ ಪಾದುಕಾ ಪೂಜನ, ಪೂಜ್ಯ ಸ್ವಾಮೀಜಿ ತಾಕೂನು ಆಶೀರ್ವಚನ, ಬಿಕ್ಷಾ ಸೇವಾ, ತೀರ್ಥ ಪ್ರಸಾದ ವಾಂಟಪ, ಪಟ್ಟಕಾಣಿಕಾ ಅರ್ಪಣ, ದೀಪನಮಸ್ಕಾರ ಆದಿ ಧಾರ್ಮಿಕ ಕಾರ್ಯಕ್ರಮ ಚಲ್ಲೆ. ಆಪಣೇಲೆ ಆಶೀರ್ವಚನಾಂತು ಪೂಜ್ಯ ಸ್ವಾಮ್ಯಾನಿಸಂಸ್ಕಾರ ನಾತ್ತಿಲ್ಯಾಂಕ ಪಶು ಮ್ಹಣತಾತಿ. ಹರ್‍ಯೇಕ್ಲ್ಯಾನಿ ನಿರಂತರ ಸಂಸ್ಕಾರ ವೃದ್ಧಿ ಕೊರನು ಘೆತ್ತಾ ವಚ್ಕಾ. ಸುಖ-ದುಖ್ಖಃ ಭೊಗತಽಚಿ ಹೇ ಜೀವು ವಳವಳ್ತಾ ಆಸ್ತಾ. ಗುರೂಪದೇಶ ಆನಿ ಈಶ್ವರಾಲೆ ಕೃಪೇನಿ ಆಮ್ಮಿ ಉದರ್ಗತಿ ಪಾವ್ಕಾ. ದುಖ್ಖಾಃನಿ ಪಾರ ಪಡ್ಕಾ, ತಾಕ್ಕಾ ಸಂಸ್ಕಾರ ಘೆವ್ಚೆ ಗರಜ ಆಸ್ಸಾ ಮ್ಹೊಣು ಪರಂಪರೆಂತು ಸಾಂಗ್ಲ್ಯಾ. ಮ್ಹೊಣು ಸಾಂಗೂನು ಆತ್ಮಾಭಿವೃದ್ಧಿ ಆನಿ ಮಾನಸಿಕ ಶಾಂತಿ ಖಾತೇರಿ ಸಂಸ್ಕೃತಿ ಜಾಗೃತೇಂತು ದವರೂನು ಘೆವಚಾಕ ಮೌನ ಸಹಿತ ಶ್ವಾಸೋಚ್ಛಾಸ ವಯರಿ ಗಮನ ದವರಚೆ ಸಬಾರ ಉಪಾಸನಾ ವಿಧಾನ ಸಾಂಗ್ಲೆ. ದೇಶಾದ್ಯಂತ ತಾಕೂನು ಅಪಾರ ಪ್ರಮಾಣಾಚೆ ಶಿಷ್ಯಕೋಟಿ ಹೇ ವೇಳ್ಯಾರಿ ಉಪಸ್ಥಿತ ವ್ಹರಲೀಲೆ.
ಶ್ರೀಮದ್ ಶಿವಾನಂದ ಸರಸ್ವತಿ ಸ್ವಾಮೀಜಿ
ಸಂಸ್ಥಾನ ಗೌಡ ಪಾದಾಚಾರ್ಯ ಮಠಾಚೆ ಮಠಾಧಿಪತಿ ಶ್ರೀಮದ್ ಶಿವಾನಂದ ಸರಸ್ವತಿ ಸ್ವಾಮ್ಯಾಂಗೆಲೆ ವಿಶ್ವಾವಸು ನಾಮ ಸಂವತ್ಸರಾಚೆ ೩೧ವೇಂ ವರ್ಷಾಚೆ ಚಾತುರ್ಮಾಸು ಮುಂಬೈಚೆ ಶ್ರೀ ಸಂಸ್ಥಾನ ಗೌಡ ಪಾದಾಚಾರ್ಯ ಕವಳೇ ಮಠ, ವಾಲ್ಕೇಶ್ವರ ಹಾಂಗಾ ಗುರುಪೂರ್ಣಿಮಾ ದಿವಸು ಜುಲೈ ೧೦ ತಾರೀಖೆ ದಿವಸು ಆರಂಭ ಜಾಲ್ಲೆ. ತತ್ಸಂಬಂಧ ವ್ಯಾಸ ಪೂಜಾ, ಸ್ವಾಮ್ಯಾಂಗೆಲೆ ಭಿಕ್ಷಾ, ಪಾದಪೂಜಾ, ಸಭಾ ಕಾರ್ಯಕ್ರಮ ಸಹಿತ ಸಬಾರ ಧಾರ್ಮಿಕ ಕಾರ್ಯಕ್ರಮ ಚಲ್ಲೆ. ವೆಗವೆಗಳೆ ದೇವಳಾಚೆ, ಸಮಾಜಾಚೆ ಮುಖೇಲಾನಿ ಸಭಾ ಕಾರ್ಯಕ್ರಮಾಂತು ಪೂಜ್ಯ ಸ್ವಾಮ್ಯಾಂಕ ಮಾಲಾರ್ಪಣ ಕೊರನು ಗೌರವ ದಾಖಯಿಲಿ. ಪೂಜ್ಯ ಸ್ವಾಮ್ಯಾನಿ ತಾಂಕ ಸಕಡಾಂಕ ಪ್ರಸಾದ ದಿವನು ಆಶೀರ್ವಾದ ಕೆಲ್ಲಿ.
ಪೂಜ್ಯ ಶ್ರೀಮದ್ ಶಿವಾನಂದ ಸರಸ್ವತಿ ಸ್ವಾಮ್ಯಾಂಕ ಜುಲೈ ೯ ಕ ಉತ್ತರ ಕನ್ನಡ ಸಂಸದ ಆನಿ ಮಾಜಿ ಸಚಿವ (ಕರ್ನಾಟಕ ಸರ್ಕಾರ) ತಶೀಚಿ ಮಾಜಿ ಸ್ಪೀಕರ್ ಜಾವ್ನಾಶ್ಶಿಲೆ ಶ್ರೀ ವಿಶ್ವೇಶ್ವರ ಹೆಗಡೆ ಕಾಗೇರಿ ತಾನ್ನಿ ಭೆಟ್ಟೂನು ಆಶೀರ್ವಾದ ಘೆತ್ಲೆ. ಹೇ ವೇಳ್ಯಾರಿ ಪೂಜ್ಯ ಸ್ವಾಮ್ಯಾನಿ ಶ್ರೀ ಕಾಗೇರಿಕ ಶಾಲ ಪಾಂಗೂರ್ನು ಶ್ರೀ ಮಠಾಚೆ ಕಾಫಿ ಟೇಬಲ್ ಪುಸ್ತಕ ದಿವನು ಆಶೀರ್ವಾದ ಕೆಲ್ಲಿ.
ಜುಲೈ ೧೧ ತಾರೀಖೆಕ ಗೊಂಯ್ಚೆ ಸರಕಾರಾಚೆ ಪ್ರವಾಸೋದ್ಯಮ, ಐಟಿ, ಇ & ಸಿ, ಮುದ್ರಣ ಆನಿ ಲೇಖನ ಸಾಮಗ್ರಿಚೆ ಕ್ಯಾಬಿನೆಟ್ ಸಚಿವ ಶ್ರೀ ರೋಹನ್ ಖೌಂಟೆ ತಾನ್ನಿ ವರೇನ ಪೂಜ್ಯ ಸ್ವಾಮ್ಯಾಂಕ ಭೆಟ್ಟುನು ಆಶೀರ್ವಾದ ಘೆತ್ಲೆ. ಪೂಜ್ಯ ಸ್ವಾಮ್ಯಾನಿ ತಾಂಕ ವರೇನ ಶಾಲ ಪಾಂಗೂರ್ನು ಆಶೀರ್ವಾದ ಕೆಲ್ಲಿ. ಚಾತುರ್ಮಾಸ ಕಾರ್ಯಕ್ರಮಾಂತು ವಾಂಟೊ ಘೆವಚಾಕ ವಾಲ್ಕೇಶ್ವರಾಕ ಆಯ್ಯಿಲೆ ಪೂಜ್ಯ ಶಿವಾನಂದ ಸರಸ್ವತಿ ಸ್ವಾಮ್ಯಾಂಕ ಪೂರ್ಣಕುಂಭ ಸ್ವಾಗತ ದಿವನು ಸಂಭ್ರಮಾರಿ ಆಪೋನು ಘೆತ್ಲೆ. ಪ್ರತಿ ದಿವಸು ಮಠಾಚೆ ದೇವಾಲೆ ಬರಶಿ ಶ್ರೀ ಕಾಲೀಕಾ ದೇವಿಲೆ ಪೂಜಾ ವರೇನ ವಿಜೃಂಭಣೆರಿ ಚಲ್ತಾ. ಪ್ರತಿ ಶ್ರಾವಣ ಸೋಮಾರಾ ಸಕ್ಕಾಣಿ ಲಘುರುದ್ರ ಸ್ವಾಹಾಕಾರ ಚಲಯಾರಿ ಸಾಂಜವಾಳಾ ಪ್ರದೋಷ ಪೂಜಾ ಚಲ್ಲೆ. ಮುಖಾರಿ ವೈಭವಾರಿ ಶ್ರೀ ಗಣೇಶೋತ್ಸವು ಆನಿ ನವರಾತ್ರಿ ಮಹೋತ್ಸವು ಚೊಲ್ಚೆ ಆಸ್ಸಾ. ಅವುಂದೂಚೆ ಪೂಜ್ಯ ಶಿವಾನಂದ ಸರಸ್ವತಿ ಸ್ವಾಮ್ಯಾಂಗೆಲೆ ಚಾತುರ್ಮಾಸು ಸೆಪ್ಟಂಬರ್ ೦೭ ಪರ್ಯಂತ ಚಲ್ತಾ. ಚಾತುರ್ಮಾಸ ವೇಳ್ಯಾರಿ ಕನ್ನಡ, ಮರಾಠಿ, ಕೊಂಕಣಿ ಭಾಷೆಚೆ ವೈವಿಧ್ಯಮಯ ಮನರಂಜನಾ ಕಾರ್ಯಕ್ರಮ ಆನಿ ಭಜನಾ ಕಾರ್ಯಕ್ರಮ ಚಲ್ತಾ.
ಶ್ರೀ ಶ್ರೀ ಶ್ರೀ ಸಚ್ಚಿದಾನಂದ ಜ್ಞಾನೇಶ್ವರ ಮಹಾಸ್ವಾಮೀಜಿ
ದೈವಜ್ಞ ಬ್ರಾಹ್ಮಣ ಮಠಾಧೀಶ ಶ್ರೀ ಶ್ರೀ ಸಚ್ಚಿದಾನಂದ ಜ್ಞಾನೇಶ್ವರ ಭಾರತೀ ಮಹಾಸ್ವಾಮೆಂ ತಶೀಚಿ ತಾಂಗೆಲೆ ಶಿಷ್ಯ ಶ್ರೀ ಶ್ರೀ ಸುಜ್ಞಾನೇಶ್ವರ ಭಾರತೀ ಮಹಾಸ್ವಾಮೆಂಗೆಲೆ ವಿಶ್ವಾವಸು ನಾಮ ಸಂವತ್ಸರಾಚೆ ಚಾತುರ್ಮಾಸು ಜುಲೈ ೧೦ ದಿವಸು ದಾವಣಗೆರೆಚೆ ದೈವಜ್ಞ ಕಲ್ಯಾಣ ಮಂಟಪಾಂತು ಆರಂಭ ಜಾಲ್ಲೆ. ತತ್ಸಂಬಂಧ ಉಭಯ ಪೂಜ್ಯ ಸ್ವಾಮ್ಯಾನಿಂ ವ್ಯಾಸಪಂಚಕ ಪೂಜಾ ಮುಖಾಂತರ ಚಾತುರ್ಮಾಸ್ಯ ವ್ರತ ಆರಂಭ ಕೆಲ್ಲೆ. ಹೇ ವೇಳ್ಯಾರಿ ಸಮಾಜಾ ತರಪೇನಿ ಪೂಜ್ಯ ಸ್ವಾಮ್ಯಾಂಗೆಲೆ ಪಾದುಕಾ ಪೂಜನ, ಭಜನಾ, ಸಭಾ ಕಾರ್ಯಕ್ರಮ, ಸ್ವಾಮ್ಯಾಂಗೆಲೆ ತಾಕೂನು ಆಶೀರ್ವಚನ ಚಲ್ಲೆ. ಆಪಣೇಲೆ ಆಶೀರ್ವಚನಾಂತು ಪೂಜ್ಯ ಶ್ರೀ ಶ್ರೀ ಶ್ರೀ ಸಚ್ಚಿದಾನಂದ ಜ್ಞಾನೇಶ್ವರ ಭಾರತೀ ಮಹಾಸ್ವಾಮೆಂನಿ “ಸಗಟಾಂಕ ದಿತ್ತಾಲೊ ಪರಮಾತ್ಮುಚಿ ಜಾಲಯಾರಿ ಆಮ್ಮಿ ಕಶ್ಶಿ ಲೆಕತಾತಿ ಮ್ಹಳ್ಯಾರಿ ಆಪಣೇನಿ ಕಷ್ಟ ಪಾವ್ವಿಲ್ಯಾನ ಮೆಳ್ಳೆ, ತಾಣೆ ದಿಲೀಲ್ಯಾನಿ ಮೆಳ್ಳೆ, ಬಾಪ್ಪಾನ ಕೊರನು ದವರೀಲೆ ಮೆಳ್ಳೆ ಮ್ಹೊಣು ಪೂರಾ ಸಮಜಿತಾತಿ. ಜಾಲಯಾರಿ ಸರ್ವ ಲೋಕಾಂಕ ಪೊಸತಾಲೊ, ಸಕಡಾಂಕ ದಿತ್ತಾಲೊ ತೋಂ ಪರಮಾತ್ಮುಚಿ ಮ್ಹಣಚೆ ರಾಮ ಆನಿ ಕೃಷ್ಣ ಮ್ಹಣಚೆ ದೊಗ್ಗ ಲೋಕ ಮಾಗತಾಲೆ ಆನಿ ಆಪಣಾನಿ ದಿಲೀಲ್ಯಾನಿ ತಾಂಗೆಲೆ ಜೀವನ ಚಲ್ತಾ ಮ್ಹೊಣು ಗರ್ವ ಪಾವ್ವಿಲೆ ಏಕಳೋ ರಾಯಾಲೆ ಕಾಣಿ ಸಾಂಗೂನು ರಾಯಾನಿ ರಾಮಾಕ ಮ್ಹೊಣು ದಿಲಯಾರೀಚಿ ಕಶ್ಶಿ ತ್ಯಾ ದೈವಭಕ್ತ ಕೃಷ್ಣಾಕ ವಚ್ಚುನು ಪಾವ್ತಾ ಮ್ಹಣ್ಚೆ ಸಾಂಗೂನು ಹೇ ಭೂಂಯಿ, ಆಹಾರ, ವಾರೆಂ ಸಕ್ಕಡ ಪರಮಾತ್ಮಾನಿ ದಿವ್ಚೆ ತ್ಯಾ ಖಾತೇರಿ ನಿರಂತರ ಪರಮಾತ್ಮಾಕ ಕ್ಥತಜ್ಞತಾ ಪಾವಯಕಾ ಮ್ಹೊಣು ಆಪೋವ್ನಿ ದಿಲ್ಲಿ.
ಹಾಂಗಾ ಪ್ರತಿ ದಿವಸು ಸಕ್ಕಾಣಿ ಸಾಮೂಹಿಕ ಪಾದುಕಾ ಪೂಜನ, ಪೂಜ್ಯ ಸ್ವಾಮ್ಯಾಂಗೆಲೆ ತಾಕೂನು ವ್ಯಾಸಾಕ್ಷತಾ, ಧೋಂಪಾರ ೧೨-೩೦ಕ ಪೂಜ್ಯ ಸ್ವಾಮ್ಯಾಂಗೆಲೆ ದೇವಾಲೆ ಮಹಾ ಪೂಜಾ, ಮಹಾಪ್ರಸಾದ, ಸಾಂಜವಾಳಾ ೬-೩೦ ತಾಕೂನು ೭-೩೦ ಪರಿಯಂತ ಭಜನ, ಸಹಸ್ರನಾಮ ಪಠಣ ತಶೀಚಿ ಸಾಂಸ್ಕೃತಿಕ ಕಾರ್ಯಕ್ರಮ ಚಲ್ತಾ. ರಾತ್ತಿಕ ದೇವಾ ಪೂಜಾ, ಆಶೀರ್ವಚನ, ತೀರ್ಥಪ್ರಸಾದ ವಾಂಟಪ ಚಲ್ತಾ. ವಿಶೇಷ ದಿವಸು ವೆಗವೆಗಳೆ ವಿಶೇಷ ಕಾರ್ಯಕ್ರಮ ಚಲ್ತಾ. ಸೆ. ೭ಕ ಸೀಮೋಲ್ಲಂಘನ ಪೂರ್ವಕ ಚಾತುರ್ಮಾಸ ವ್ರತ ಸಮಾಪ್ತಿ ಜಾತ್ತಾ.