ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಆನಿ ಜಿ.ಎಸ್.ಬಿ. ಮಹಿಳಾ ಮಂಡಳಿ, ಪುತ್ತೂರು ಹಾನ್ನಿ ಮೇಳ್ನು ದಿನಾಂಕ ೧೪.೦೯.೨೦೨೫ಕ ಕೊಂಕಣಿ ರಂಗ ತರಂಗ ಆನಿ ಸಾಹಿತ್ಯ ಸಂಭ್ರಮ-೩ ಕಾರ್ಯಕ್ರಮ ಪುತ್ತೂರ್‍ಚೆ ಸುಕೃತೀಂದ್ರ ಕಲಾಮಂದಿರಾಂತು ಆಯೋಜನ ಕೆಲೀಲೆ.
ಕಾರ್ಯಕ್ರಮಾಚೆ ಅಧ್ಯಕ್ಷಪಣ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಶ್ರೀ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ತಾನ್ನಿ ಘೇವ್ನು ರವರು, ತಮ್ಮ ಪ್ರಾಸ್ತಾವಿಕ ಉತ್ರ ಉಲಯಿಲೆ.
ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಳಾಚೆ ಧರ್ಮದರ್ಶಿ ವ್ಯವಸ್ಥಾಪಕ ಡಾ| ಆಶೋಕ್ ಪ್ರಭು ತಾನ್ನಿ ದ್ವೀಪ ಪ್ರಜ್ವಲನ ಕೊರಚೆ ಮುಖಾಂತರ ಕಾರ್ಯಕ್ರಮಾಚೆ ಉದ್ಘಾಟನ ಕೆಲ್ಲಿ. ‘ಪ್ರಸ್ತುತ ಕಾಲಾಂತು ಕೊಂಕಣಿ ಭಾಸ ವಾಪರಚೆ ಕಮ್ಮಿ ಜಾಲ್ಲ್ಯಾ. ತಾಜ್ಜ ಖಾತೇರಿ ಕೊಂಕಣಿ ಉಲಯಚೆ ಘರ್‍ಚಾನಿ ಸೂರು ಕೊರಕಾ, ತೆದ್ನಾ ಮಾತ್ರ ಕೊಂಕಣಿ ಭಾಸ ಅಭಿವೃದ್ಧಿ ಕೊರಯೇತ ಮ್ಹಳ್ಳೆ. ಮುಖೇಲ ಸೊಯರೆ ಜಾವನು ಆಯ್ಯಿಲೆ ಕುಡಾಲ ದೇಶಸ್ಥ ಗೌಡ ಬ್ರಾಹ್ಮಣ ಸಮಾಜದ ಮುಖೇಲ ಜಾಲೀಲೆ ಡಾ| ವೈ. ಉಮಾನಾಥ ಶೆಣೈ ತಾನ್ನಿ ಕೊಂಕಣಿ ಚೋಲ್ನು ಆಯಲೀಲೆ ವಾಟ, ಕೊಂಕಣಿ ಇತಿಹಾಸಾ ಖಾತೇರಿ ಚಲೀಲೆ ಅಧ್ಯಯನ ಖಾತೇರಿ ಉಲಯಿಲೆ.
ಅಕಾಡೆಮಿಯ ಸಾಹಿತ್ಯ ಸಂಭ್ರಮ’ ಕಾರ್ಯಕ್ರಮಾಂತು ಕೊಂಕಣಿಚೆ ನಾಮಾಧಿಕ ಆನಿ ಮ್ಹಾಲ್ಗಡೊ ಸಂಗೀತಗಾರ ಶ್ರೀ ಪಾಂಡುರಂಗ ನಾಯಕ್ ಬರಶಿ ಶ್ರೀ ಪತಂಜಲಿ ಯೋಗ ಶಿಕ್ಷಣ ಸಮಿತಿ ಕಲಾವಿದ ಶ್ರೀ ಕೃಷ್ಣಾನಂದ ನಾಯಕ್ ತಾನ್ನಿ ಸಂವಾದ ಚಲಯಿಲೆ. ಶ್ರೀ ಪಾಂಡುರಂಗ ನಾಯಕ್ ಮಾಮ್ಮಾನಿ `ಆಪಣೇಲೆ ಆವಡ, ಸಂಗೀತ ಕ್ಷೇತ್ರಾಂತು ಅಭಿವೃದ್ಧಿ ಪಾವ್ವಿಲೆ ನಮೂನೋ ಕಶ್ಶಿ ಮ್ಹೊಣು ಸಾಂಗ್ಲೆ.
ಕಾರ್ಯಕ್ರಮಾಂತು ಆಹಾರೋತ್ಸವ, ಕರಕುಶಲ ವಸ್ತು ಪ್ರದರ್ಶನ, ಸಾಂಸ್ಕೃತಿಕ ಕಾರ್ಯಕ್ರಮ ಚಲ್ಲೆ. ಅಖೇರಿಕ ‘ಪಾಟ್ಟೊ ನಾತ್ತಿಲ್ಲೆ ರೈಲ್’ ಹಾಸ್ಯ ನಾಟಕ ಪ್ರದರ್ಶಿತ ಜಾಲ್ಲೆ.
ಅಕಾಡೆಮಿ ತರಪೇನಿ ಪ್ರತಿ ಮ್ಹಹಿನೋ ಏಕೇಕ ಕೊಂಕಣಿ ಸಾಹಿತಿಂಕ ಸನ್ಮಾನ ಕರೀತ ಆಸ್ಸುನು, ಹೇ ಈ ಕಾರ್ಯಕ್ರಮಾಂತು ಮ್ಹಾಲ್ಗಡೆ ಸಾಹಿತಿ ಜಾಲೀಲೆ ಶ್ರೀ ಉಲ್ಲಾಸ್ ಕೆ. ಪೈ ತಾಂಕಾ ಸನ್ಮಾನ ಕೆಲ್ಲಿ. ಆನಿ ಜಿ.ಎಸ್.ಬಿ. ಮಹಿಳಾ ಮಂಡಳಿ ತರಪೇನಿ ಪ್ರತಿಭಾವಂತಾಂಕ ಸನ್ಮಾನ ಕೆಲ್ಲಿ.
ಕಾರ್ಯಕ್ರಮಾಂತು ಜಿ.ಎಸ್.ಬಿ. ಮಹಿಳಾ ಮಂಡಳಿ ಅಧ್ಯಕ್ಷಿಣಿ ಶ್ರೀಮತಿ ವಿದ್ಯಾ ಎಮ್. ಭಟ್, ಅಕಾಡೆಮಿ ಸದಸ್ಯ ಸಮರ್ಥ್ ಭಟ್, ನವೀನ್ ಲೋಬೊ ಹಾಜರಾಶ್ಶಿಲೆ. ಶ್ರೀಮತಿ ಪೂರ್ಣಿಮಾ ಮಲ್ಯ ತಾನ್ನಿ ಕಾರ್ಯಕ್ರಮಾಚೆ ನಿರೂಪಣ ಕೆಲಯಾರಿ, ಶ್ರೀಮತಿ ವಿದ್ಯಾ ಭಟ್ ತಾನ್ನಿ ಆಬಾರ ಮಾನಲೆ.