- ಶ್ರೀಮತಿ ಜ್ಯೋತಿ ಸುಧೀರ ಶೇಟಿಯಾ, ಹುಬ್ಬಳ್ಳಿ
ಡ್ರೈವರು ಆಯಲೊ ತಯಾರ ಆಸ್ಸಾತಿವೇ? ಮ್ಹಣತಾ. ಲತಾಕ್ಕಾ ವರೇನ ಆಯ್ಲಿ.. ಹಾಂವ ವರೇನವ್ಹಯಿ… ವ್ಹಯಿ… ಮ್ಹಣತಾ ಘರಾಕ ಬೀಗ ಘಾಲ್ನು ಭಾಯರ ಪಡಲಿ, ಪರ್ತಗಾಳಿಕ… ಸಾರ್ಧ ಪಂಚ ಶತಮಾನೋತ್ಸವಾಕ.
ನ.೨೭ ತಾಕೂನು ಡಿ. ೭ ಪರಿಯಂತ ೧೧ ದಿವಸು ಜೋರದಾರ ಪ್ರೋಗ್ರಾಂ ಆಸ್ಸಾ ಮ್ಹೊಣು ಆಯ್ಕಲ್ಲೆ. ತ್ಯಾ ದಿವಸಾ ತಾಕೂನು ಏಕ ದಿವಸು ಪೂಣಿ ವಚ್ಚುನು ಯವ್ಕಾ ಮ್ಹೊಣು ಠರೋನು ಆಶ್ಶಿಲಿ. ಅಂತೂ ಮೂರ್ತು ಕೂಡುನು ಆಯಲೊ. ೭೭ ಫೂಟಾಚಿ ಭವ್ಯ ರಾಮಾಲೆ ಮೂರ್ತಿ ಪ್ರಧಾನಿ ಶ್ರೀ ನರೇಂದ್ರ ಮೋದಿ ಹಾತ್ತಾನಿ ಅನಾವರಣ ಜಾಲ್ಲೆ. ಶ್ರೀ ಪರ್ತಗಾಳಿ ಮಠ, ಕುಶಾವತಿ ನಂಯಿ, ತಾಜ್ಜೆ ಸುತ್ತಾಸ್ಸುಚೆ ಸುಂದರ ಪ್ರಕೃತಿ ಸೌಂದರ್ಯ, ಅಖಂಡ ಇಕ್ರ ದಿವಸು ಚಲ್ತಾ ಆಸ್ಸುಚೆ ಧಾರ್ಮಿಕ ವಿಧಿ-ವಿಧಾನ ಸಕ್ಕಡ ಸಾಕ್ಷಾತ ಜಾವ್ನು ಪಳೋನು ದೋಳೆ ಭೊರನು ಘೆವಚೆ ಉಮೇದಾನಿ ಭಾಯರ ಸರಲಿ.
ಸಕ್ಕಾಳಿ ೬-೩೦ ಘಂಟೆ ಮ್ಹಳಯಾರಿ ಕಾರ ಭಾಯರ ಸರಲೆ. ಮನಾಂತು ಶೃದ್ಧೆಚೆ ಮುಸ್ಕುಟೊ, ತ್ಯಾ ಉತ್ಸವ ಪಳೋನು ದೋಳೆ ಭೊರನು ಘೆವ್ಕಾ ಮ್ಹಣ್ಚೆ ಉಮೇದಿ. ವೇಳ್ಯಾಕ ಸಮ್ಮ ಜಾವ್ನು ವಚ್ಚುನು ಪಾವ್ತಕಿ ನಾಂಕಿ, ಮಸ್ತ ವೆಹಿಕಲ್ಸ್ ಯವ್ನು ಆಸ್ತ ನ್ಹಂಹಿವೇ ಆಮ್ಗೆಲೆ ಕಾರ ಕಿತ್ಲೆ ದೂರ ರಾಬ್ಬೊನು ಚಮಕೂನು ವಚಕಾಕೀ ಮ್ಹಣ್ಚೆ ಯೆಚ್ಚನ. ಮಧೇ ಮಧೇ ಥಂಚೆ ವಾತಾವರಣ ಕಶ್ಶಿ ಉರ್ತಲೆ ಮ್ಹಣಚೆ ಖಾತ್ತಿರಿ ವೆಗವೆಗಳೆ ಊಹನಾ. ಹೇ ಮನೋಭೂಮಿಕೆಂತು ವಿಹಾರ ಕರತಾ ಆಸ್ಸುಚೆ ಮಾಕ್ಕಾ ಕಾರ್ವಾರ ದಾಂಟೂನು ಆಯಲೀಲೆ ವರೇನ ಕಳ್ನಿ. ತೆದ್ನಾ ಲತಾಕ್ಕಾ ಘರ್ಚಾನ ಬಾಂದೂನು ಹಾಡಲೀಲೆ ಖೊಟ್ಟೊ ಕಾವಚಾಕ ಜಾಗಯಿಲಿ. ತ್ಯಾ ಕಾವ್ನು ಪೊಟ್ಟಾಚೆ ಪೂಜಾಭೀ ಪೂರ್ತಿ ಕೆಲ್ಲಿ. ಪರ್ತಗಾಳಿಕ ಆನ್ನೀಕೆ ೧೫-೨೦ ಕಿ.ಮೀ. ದೂರ ಆಸ್ತಾನಾಂಚಿ ಕೇಸರಿ ಪತಾಕೋ ರಸ್ತ್ಯಾಚೆ ದೊನ್ನೀ ಬಾಜೂನ ದಿಸಚಾಕ ಲಾಗಲೆ. ತ್ಯಾ ಪತಾಕೋ ಅನಸರಸೂನು ಘೆಲ್ಲೆ, ಕಾರ ಸೀದಾ ಪರ್ತಗಾಳಿಕ ಪಾವಲೆ. ವಾಟ ಚುಕ್ಚೆ ಸಂಭವ ನಾ. ತಸ್ಸಾಲೆ ಅಚ್ಕಟ್ ಜಾಲೀಲೆ ವ್ಯವಸ್ಥಾ. ವ್ಹಾಹಾ… ಕಸಲೆ ತ್ಯಾ ಭವ್ಯ ಶೃಂಗಾರು… ಗಾಂವಾಕ ಆನಿ ಮಠಾಕ ದೊನ್ನೀಚಿ..! ಸ್ವಾಗತ ಕಮಾನ, ರಸ್ತ್ಯಾಚೆ ದೊನ್ನೀ ಬಗಲೇನ ಭಾವುಟ, ಸ್ವಾಮ್ಯಾಂಗೆಲೆ ಫೋಟೊ ದರ್ಶನ…. ಗಳೋ ದೀಗ ಕೊರನು ಸಕ್ಕಡ ಪಳಯತಾ ಪಾರ್ಕಿಂಗ ಸ್ಪಾಟಾಕ ಘೆಲ್ಲೆ. ಥಂಯಿಂಚಿ ಶ್ರೀ ರಾಮಾಲೆ ಭವ್ಯ ಮೂರ್ತಿಚೆ ಪ್ರಥಮ ದರ್ಶನ ಜಾಲ್ಲೆ. ತಾಜ್ಜೆ ತೊಂಡಾರಿ ಕಸ್ಸಲೆ ಏಕ ಸಾತ್ವಿಕ, ತೇಜಸ್ವಿ, ಸುಂದರ ಕಳೆ ಭರಿಲೆ.. ಬರಶಿ ಭವ್ಯ, ಬೃಹತ್ ಆಕಾರು… ವಿಶ್ವಾಂತೂ ಅತ್ಯಧಿಕ ಎತ್ರಾಚೆ ಮೂರ್ತಿ ಮ್ಹಣ್ಚೆ ನಂತರ ಕಳ್ಳೆ.
ಪಾವನ ಜಾಲ್ಲೆ ದೋಳೆ ಮ್ಹಣತಾ ಕಾರಾಂತುಲ್ಯಾನ ದೇಂವ್ಲಕೀ ಬಾಜೂನ ರಾಬೂನು ಆಶ್ಶಿಲೊ ಮಾಮು ಮ್ಹಳಾಲೋ ಚಲಾ... ಚಲಾ...ಮಠಾಕ ವಚ್ಚಾಕ ಟೆಂಪೊ, ಗಾಡಿ ತಯ್ಯಾರ ಆಸ್ಸಾತಿ. ಹಾಂಗಾಚಾನಚೀ ವಾಲಿಂಟೆಯರ್ ಆತಿಥ್ಯ ಚಾಲು ಜಾಲೀಲೆ ಪಳೋನು ಭಾರೀ ಖುಷಿ ಜಾಲ್ಲಿ. ಟೆಂಪೋಂತು ಬೈಸೂನು ಮಠಾಕ ಪಾವಲ್ಯಾರಿ ಥಂಚೆ ತ್ಯಾ ಶೃದ್ಧಾ-ಭಕ್ತಿ, ಶಾಂತಿ-ಸಮಾಧಾನ ಭರಿಲೆ ದೈವಿಕ ವಾತಾವರಣ ಪಳೋನೂಂಚಿ ಮನ ಭರಲೆ. ಧ್ವಜಸ್ತಂಭಾಚಾನ ತೊಗ್ಗು ದೇಂವತನಾ ತೋಂ ಅಲಂಕಾರ; ನಮ್ಮನಮೂನ್ಯಾಚೆ ಫುಲ್ಲಾ ಹಾರಾಚೊ ಡೆಕೋರೇಶನ್! ಪಳಯತಾ ಮುಖಾರಿ ಘೆಲಯಾರಿ ವಾತ್ತಾಂತು ಆಯ್ಲಿಂತಿ ಮ್ಹೊಣು ಜ್ಯೂಸಾಚೆ ಆತಿಥ್ಯ. ತ್ಯಾ ಜ್ಯೂಸ್ ಪೀವ್ನು ಮುಖಾರಿ ಘೆಲ್ಲೆ. ಥಂಚೆ ವೈಭವು ಸಾಂಗಚಾಕ ಶಬ್ಧಽಚಿ ನಾ. ದೇವಳಾಚೆ ಪ್ರಾಂಗಣಾಂತು ಕೆಲೀಲೆ ಚಾಂದಕಾಮ, ಬಾಗಲಾ ವಯ್ರಿ ಕೆತ್ವಲೀಲೆ ಶಿಲ್ಪಕಲಾ. ಮೇಲ್ಚಾವಣೆಚೆ ಚಂದಾಯಿ.. ಸಗಳೇ ಪೊಳೋನು ಮುಖಾರಿ ವತ್ತನಾ ಕೋದಂಡರಾಮಾಲೆ ದರ್ಶನ. ಥಂಯಿ ರಾಬ್ಬುನು ಪಾಯ ಪೋಡ್ನು, ತೀರ್ಥ ಪ್ರಸಾದ ಘೇವುನು ಮುಖಾರಿ ವಚಕಾ ಮ್ಹಣ್ಚೆ ಭಿತ್ತರಿತಾನ್ನೀಕ ಪಿಯ್ಯಾತಿ ಮ್ಹೊಣು ಸ್ವಯಂಸೇವಕಾನಿ ಭೋಜನಾಲಯಾಚಿ ವಾಟ ದಾಖಯಲಿ. ಖೊಟ್ಟೊ, ಚಟ್ನಿ, ಸಾಂಬಾರು, ಗೊಡಶೆ ಖಾವ್ನು, ಕಾಫಿ ಪೀವ್ನು ಭಾಯರಿ ಆಯ್ಲೆರಿ ಕುಶಾವತಿ ನಂಯಿ ಶಾಂತಜಾವ್ನು ಪೋವ್ತಾ ಆಸ್ಸುಚೆ ನೈಸರ್ಗಿಕ ಸೌಂದರ್ಯ ದಿಸಲಿ. ತಿಗೆಲೆ ಸನ್ನಿಧಿಕ ವಚ್ಚುನು ಮಾಥೆರಿ ಉದ್ದಾಕ ಪ್ರೋಕ್ಷಣ ಕೊರನು ಘೇವ್ನು ಶ್ರೀ ರಾಮನಾಮ ತಾರಕ ಮಂತ್ರ ಹವನ ಚೊಲ್ಚೆ ಹೋಮ ಕುಂಡಾಲಾಗ್ಗಿ ಆಯ್ಲೆ.
ಥಂಯಿ ೫೫ ಹೋಮಕುಂಡಾ ಲಾಗ್ಗಿ ರಿಂಗಂಗ ಕರತಾ (ಮೊಳಗತಾ) ಆಶ್ಶಿಲೆ ಮಂತ್ರಘೋಷ, ಭಕ್ತಿಭಾವನಾಚೆ ಶ್ರೀ ರಾಮನಾಮ ತಾರಕ ಮಹಾಮಂತ್ರಾಚೆ ಹವನ ಕರ್ತಾ ಆಶ್ಶಿಲೆ. ವೈದಿಕ ವರ್ಗ, ಯಜಮಾನ ವರ್ಗ ಆನಿ ಸುತ್ಲೂ ಬೈಸೂನು ಶೃದ್ಧಾ-ಭಕ್ತೀರಿ ತ್ಯಾ ಹವನ ಪಳಯತಾ ಆಶ್ಶಿಲೆ. ತಾಂತುಲಿ ಕೆಲವ ಲೋಕ ಥಂಯಿ ಶ್ರೀ ರಾಮ ತಾರಕ ಮಂತ್ರಾಚೆ ಜಪ ಪಠಣ ಕರತಾಲೆ. ಥಂಚೆ ದೈವಿಕ ಪರಿಸರ ಪಳೋನು ಮನ ಭಕ್ತಿ, ಸಂತೋಷು, ಸಮಾಧಾನಾನಿ ಭೋರ್ನು ಘೆಲ್ಲೆ. ಥಂಯಿ ಬಯಸೂನು ಹವನಾಚೆ ಪೂರ್ಣಾಹುತಿ, ಆರತಿ, ಸಗಳೆ ಪೊಳೋನು ಜನ್ಮ ಸಾರ್ಥಕ ಜಾಲ್ಲೆ.
ಆತ್ತ ಆನಿ ಪರತ ಭೋಜನಾಲಯಾಚೆ ಬಗಲೇನ ಪಾಯ ಭಾಯರ ಸರಲೆ. ಥಂಯಿ ವಿಸ್ತಾರ, ಪದ್ಧತಶೀರ, ಶಿಸ್ತುಬದ್ಧ ಜಾವ್ನು ಜವಣಾಚೆ ವ್ಯವಸ್ಥಾ.. ಕೇಳಿಪಾನ್ನಾರಿ ಬಯಸೂನು ಜವಚಾಕ ವ್ಯವಸ್ಥಾ, ಬಫೆ ಪದ್ಧತಿ, ವಯೋವೃದ್ಧಾಂಗೆಲೆ ಖಾತ್ತಿರಿ ಸಪರೇಟ ವ್ಯವಸ್ಥಾ. ಮಧೇ ಮಧೇ ಅಗತ್ಯ ಮಾರ್ಗದರ್ಶನ ದಿವಚೆ ಸ್ವಯಂಸೇವಕಾಲೊ ತಂಡ. ವಾಡತಾಲೆ ವಿಂಗಡ ವಾಲೆಂಟಿಯರ್ಸ್, ರಾಂದಪ ಕರತಾಲೆ ವಿಂಗಡ, ಹಾಡತಾಲೆ ವಿಂಗಡ.. ಕಸ್ಸಲೆ ಏಕ ಪೂರ್ವ ನಿಯೋಜಿತ ತಯ್ಯಾರಿ…ಖಂಚೆ ನಮೂನ್ಯಾಚೆ ಗಡ್ಬಿಡಿ, ಗೊಂದೋಳು ನಾ… ಆರಾಮಾರಿ ಖುಷಿ, ಖುಷೀನ ಸ್ವಾದಿಷ್ಟ ಉಪ್ಕರಿ, ರಾಂದಯಿ, ಹಾಪ್ಪೋಳು, ನೊಣಚೆ, ಕೊಳಂಬೊ, ಶೀತ, ಗೊಡಶೆ, ತಾಕ ಸಕ್ಕಟ ಆಶ್ಶಿಲೆ. ಜವಣ ಜಾಲ್ಲೆ, ಆತ್ತ ಕಸ್ಸಲೆ ಕೊರಚೆ ಮ್ಹಣಚೆ ತಶ್ಶಿ ನಾ. ಹೇ ಸಗಳ್ಯಾಕ ಮೂಲಸ್ವರೂಪ, ಮೂಲ ಪ್ರೇರಣಾ, ಮೂಲ ಆಧಾರ, ಮೂಲಕರ್ತ ಜಾಲೀಲೆ ತಸ್ಸಾಲೆ ಪರಮಪೂಜ್ಯ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾಂಗೆಲೆ ಹಾತ್ತಾನ ಫಲಮಂತ್ರಾಕ್ಷತಾ ಘೆವ್ಚೆ ಯೋಗು. ಥಂಯಿ ಜಾಲಯಾರೀಚಿ ಸ್ವಯಂಸೇವಕಾಂಗೆಲೊ ಯೋಗ್ಯ ಮಾರ್ಗದರ್ಶನಾ ನಿಮಿತ್ತ್ಯಾನ ವ್ಯವಸ್ಥಿತ ಜಾವ್ನು ಸ್ವಾಮ್ಯಾಲೆ ದರ್ಶನ, ಫಲ ಮಂತ್ರಾಕ್ಷತಾ… ಹಜಾರಬಽರಿ ಭಕ್ತಲೋಕಾಂಕ ಕಿಂಚಿತ್ ಭೀ ಧೂಖಯನಾಶಿ ಮಂದಹಾಸ ಭರಿಲೆ, ಸೌಮ್ಯ ವ್ಯಕ್ತಿತ್ವಾಚೆ ಸ್ವಾಮೆಂ ಅನುಗ್ರಹ ಕರತಾ ಆಶ್ಶಿಲೆ. ಬಾಜುನಽಚಿ ಶ್ರೀ ವೀರವಿಠ್ಠಲಾಲೆ ದಿವ್ಯ ದರ್ಶನ ಜಾಲ್ಲೆ. ಆರತಿ ವೇಳ್ಯಾರಿ ಬಾಯಲ್ಯಾನಚಿ ಕಿಟಕಿ ಥಾಕೂನು ಪೊಳೊಚಿ ಮೆಳ್ಳೆ, ಆತ್ತ ದೇವಾಲೆಂ ಎದರಾಕ ರಾಬ್ಬೂನು ದರ್ಶನ ಘೇವ್ನು ಜನ್ಮು ಪಾವನ ಜಾಲ್ಲೆ.
“ಹೇ ದೇವಾ…ತುಗ್ಗೆಲಿ ಮಹಿಮಾ ಅಪಾರ ಮ್ಹೊಣು ತಾಗೆಲೆ ಸ್ಮರಣ ಕರತಾ ಭಾಯ್ರಿ ಆಯಲೇರಿ ಸುಶ್ರಾವ್ಯ ಭಜನಾ ಕಾರ್ಯಕ್ರಮ. ಪೊಳೋನು, ಆಯಕೂನು, ಜೇವ್ನು ದೋಳೆ, ಕಾನ, ಮನ ಆನಿ ಮನ ಸಂತೃಪ್ತ ಜಾಲ್ಲಿಲೆ. ಮಠಾಚೆ ವಾತಾವರಣ ಶಾನಭೋಗ ಮಾಮಾ ಆನಿ ಮಂಡಳೀಚೆ ಭಜನೆಚೆ ಸುಮುಧುರ ನಾದಾನಿ ಭರಲೀಲೆ. ಭಜನಾ ಆಯಕತಾ ಆಯಕತಾ ದೋನ ತಾಸ ಭಕ್ತಿ ಲಹರಿಂತು ಬುಡ್ಡುನು ಘೆಲ್ಲೀ.. ಜೀವು ಭಾರೀ ಪುಣ್ಯ ಪಾವಲೆ ದೇವಾ… ಆಯಚೊ ದಿವಸು ಕಿತ್ಲೊ ಬರೇ ರೀತಿನ ಘೆಲ್ಲೊ ಮ್ಹೊಣು ಮನ ಖುಷಿ ಪಾವಲೆ. ತಿತ್ಲೆ ಭಿತ್ತರಿ ಸಾಂಜವಾಳೆಚೆ ತಾನ್ನಿಕ ತಯ್ಯಾರ ಜಾಲೀಲೆ. ಗರಾಂಗರಂ ದೋನ ನಮೂನ್ಯಾಚೆ ವಡೋ, ಮಾಲಪುರಿ, ಚಹಾ… ಕುಳಾರಾ ಘೆಲ್ಲೆ ನಮೂನೋ… ವೇಳವೇಳೆಚೆರಿ ಖಾಣ, ಜವಣ! ಹಜಾರ ಗಟ್ಲೆ ಲೋಕ ಯೆತ್ತಾ ಆಸ್ಸತಿ, ವತ್ತಾ ಆಸ್ಸಚಿ. ಖಂಯಿ ಕಸಲೇಯಿ ಗೊಂದೋಳು ನಾ, ಅವ್ಯವಸ್ಥಾ ನಾ… ಗ್ರೇಟ್ ಮ್ಹಳಯಾರಿ ಗ್ರೇಟ್…
ದೇವಳ್ಯಾಚೆ ಸುತ್ಲೂ ಕೆಲೀಲೆ ಕಾವಿಶಿಲ್ಪ(ಜಾನಪದ ಶಿಲ್ಪ) ಕಾರ್ಯ ಕುಶಲತಾ, ಸಭಾಗ್ರಹಾಚೆ ಮೇಲ್ಚಾವಣೆ, ಬಾಗಿಲ, ಸರ್ವ ಪೂಜ್ಯ ಸ್ವಾಮ್ಯಾಂಗೆಲೆ ವೃಂದಾವನಾ ಸುತ್ಲೂ ಪವಳಿಯೋ, ಕಿಚನ್ ಸಕ್ಕಡೆ ಥಂಚೆ ಅದ್ಭುತ ವ್ಯವಸ್ಥಾ, ಅಯೋಧ್ಯಾ ಮಂದಿರಾಚೆ ಪ್ರತಿಕೃತಿ ಸಕ್ಕಡ ಪಳೋನು ಘೆತ್ತಾ, ಹೆ ಸಗಳೆ ಸಾಧ್ಯ ಕೆಲ್ಲೆ. ಲೋಕಾಲೆ ಒಳಕ, ಉತ್ರ, ಗುರ್ತು ಕರತಾ ಕರತಾ ಕಾಳೋಕು ಜಾಲೀಲೆ ವರೇನ ಕಳನಾ. ಸಗಳೆ ಲೈಟಿಂಗ್ ಪಳಯತಾ ಪಳಯತಾ ಶ್ರೀ ರಾಮಾಲೆ ಭವ್ಯಮೂರ್ತಿ ಲಾಗ್ಗಿ ಪಾವಲೆ. ಹೆ ವೇಳ್ಯಾರಿ ಮೂರ್ತಿಚೆ ಭವ್ಯತಾ ವರ್ಣನಾತೀತ. ಅದ್ಭುತ. ದಿವ್ಸಾಂತು ದಿಶ್ಚೆ ಮೂರ್ತಿಪಶಿ ಕಿತ್ಲಕಿ ಪಟ್ಟ ಚ್ಹಡ ಚಂದಾಯಿ. ಸುತ್ಲೂ ಪಳಯಲ್ಯಾರಿ ಅಮರಾವತಿಂತು ಆಶ್ಶಿಲೆ ವರಿ ದಿಸ್ತಾಲೆ. ತೋಂ ವೈಭವು ಶಬ್ಧಾಂತು ಸಾಂಗಚಾಕ, ಬರೋಚಾಕ ಜಾಯನಾ. ಸ್ವತಾಃ ತೆ ಅನುಭವ ಘೆತ್ತಿಲೆಂ ಮಹಾ ಭಾಗ್ಯ.
ಹೇ ಸಗಳ್ಯಾ ಕಾರ್ಯಕ್ರಮು, ವೈಭವಾಚೆ ಮಾಕಶಿ ಆಶ್ಶಿಲೆ, ತೀ ಶಕ್ತಿ.. ಇತ್ಲೆ ಸಾನ ವಯಾರಿ ಇತ್ಲೆ ಜಾಣತೆ ವಿಚಾರ, ಮುಂದಾಲೋಚನಾ, ಸಗಳೆ ಆಮ್ಗೆಲೆ ಜಿ.ಎಸ್.ಬಿ. ಸಮಾಜಾಚೆ ಮಹತ್ವ ಪೂರ್ತಿ ಜಗಾಕ ಕಳಚೆ ತಶ್ಶಿ ಕೋರ್ನು, ಸಗಳ್ಯಾಂಕ ಏಕತ್ರಿತ ಕೆಲ್ಲೆ. ಸ್ವತಃ ಸಾದಾ ತಪಸ್ವಿ ಜಾವನು ಊರ್ನು, ಸಗಳ್ಯಾಚೆ ಉಸ್ತುವಾರಿ ಪೊಳೋನುಘೇವ್ನು ಇತ್ಲೆ ಚಂದಾಯಾರಿ ಹೇ ಉತ್ಸವು ಕರಯಶಿತಾ ಆಶ್ಶಿಲೆ. ಪರಮಪೂಜ್ಯ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾಂಗೆಲೆ ಹರ್ಷೋದ್ಗಾರ ಕೊರನು, ಮೂಲ ಪ್ರೇರಣಾ ದಿಲೀಲೆ ಶ್ರೀ ರಾಮಾನ ಆಮ್ಕಾ ಸಗಳ್ಯಾಂಕ ಹೇ ಸೌಭಾಗ್ಯ ಮೆಳೋಸೂನು ದಿಲ್ಲೆ. ದೇವು, ಗುರು ತಾಂಗೆಲೆ ಸಗಳೆ ಚರಣಾರವಿಂದ್ಯಾಕ ನತಮಸ್ತಕ ಪ್ರಣಾಮು, ವೈಯಕ್ತಿಕ ಜೀವನಾಂತುಲೆ ದುಖ್ಖಾಃಚಾನ ಏಕ ದಿವಸು ಭಾಯರ ಯೇವ್ನು ಮನ ಶಾಂತ ಕೋರ್ನು ಘೇವ್ನು ಪರತ ಗಾಂವಾಕ ಭಾಯ್ರಸರಲೆ.