`ಭೋಗ ಭೂಮಿ ಗೋಂಯ' ಮ್ಹಣ್ಚೆ ಪ್ರಖ್ಯಾತ ಆದ್ಗತಿ ಬದಲ ಕೊರನು ಹೇ ಏಕ ಪುಣ್ಯಭೂಂಯಿ, ತ್ಯಾಗ ಭೂಂಯಿ, ಸಾತ್ವಿಕ ಭೂಂಯಿ ಜಾವನು ಪರಿವರ್ತಿತ ಕೊರಚಾಕ ಪರ್ತಗಾಳಿ ಮಠಾಚೆ ಶ್ರೀಮದ್ ವಿದ್ಯಾಧೀಶ ತೀರ್ಥಾನಿಂ ಸಂಕಲ್ಪ ಘೆತ್ತಿಲೆ ಆಸ್ಸುನು, ಮುಖಾವಯ್ಲೆ ದಿವಸಾಂತು ತ್ಯಾ ಪರಿಪೂರ್ಣ ಜಾಂವೊ ಮ್ಹೊಣು ಜಗದ್ಗುರು ಪಲಿಮಾರು ಮಠಾಚೆ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾನಿಂ ಸಾಂಗ್ಲೆ. ತಾನ್ನಿ ಸಾರ್ಧಪಂಚ ಶತಮಾನೋತ್ಸವಾಚೆ ಪ್ರಯುಕ್ತ ಗೊಂಯ್ಚೆ ಪರ್ತಗಾಳಿಂತು ಚಲ್ತರಿ ಆಸ್ಸುಚೆ ೫೫೦ವೇಂ ವರ್ಷಾಚರಣೆಚೆ ಸಂಭ್ರಮಾರಿ ನವೆಂಬರ್ ೨೭ಕ ಚಲೀಲೆ ಧರ್ಮ ಸಭಾಂತು ಜಮೀಲೆ ಭಕ್ತಾಂಕ ಆಶೀರ್ವಚನ ದಿತ್ತಾ ಆಶ್ಶಿಲೆ.ಪಯ್ಲೆ ಪಳಯಿಲೆ ಪರ್ತಗಾಳಿ, ಆತ್ತ ಪಳಯಿಚೆ ಪರ್ತಗಾಳಿಂತು ಅಜಗಜಾಂತರ ಫರಕ ಆಸ್ಸಾ, ನವೀನ ಪರ್ತಗಾಳಿ ದಿವ್ಚೆ ಮುಖಾಂತರ ಗುರುವರ್ಯಾನಿ ಪರಿವರ್ತನೇಕ ನಾಂದಿ ಘಾಲ್ಲ್ಯಾ. ಶ್ರೀ ರಾಮಚಂದ್ರ ತೀರ್ಥಾನಿ ಮಾದವ ಮ್ಹಣ್ಚೆ ವಟುಕ ಸನ್ಯಾಸ ಧೀಕ್ಷಾ ಮಾತ್ರ ನ್ಹಂಹಿಸಿ ಪೀಠಾಧಿಪತ್ಯ ದಿವನು ನಾರಾಯಣ ತೀರ್ಥ ಜಾವ್ನು ಅನುಗ್ರಹ ಕೆಲ್ಲೆ. ಜಗಾಂತು ಅತ್ಯುನ್ನತ ಜಾಲೀಲೆ ಬದರಿ ತಸ್ಸಾಲೆ ಶ್ರೇಷ್ಠ ಪುಣ್ಯ ಕ್ಷೇತ್ರಾಂತು ಪ್ರಣವ ಮಂತ್ರೋಪದೇಶ ಕೊರನು, ಸಂನ್ಯಾಸತ್ವ ದಿಲೀಲೆ ಸಮಾಜಾಕ ಮೆಳೀಲೆ ವ್ಹಡ ಭಾಗ್ಯ. ನಾರಾಯಣ ತೀರ್ಥಾನಿ ಥಂಯಿ ಕಶ್ಶಿ ಆಶ್ರಮ ಸ್ಥಾಪನ ಕೆಲ್ಲಿಕಿ, ತಶೀಚಿ ಆಮ್ಗೆಲೆ ವಿದ್ಯಾಧೀಶ ತೀರ್ಥಾನಿ ದಿಗ್ವಿಜಯ ರಾಮಾಕ ಶಿಮವತ್ ಪರ್ವತಚಾನ ಶೂರ ಕೊರನು ದಕ್ಷಿಣಾಚೆ ಕಡೇರ್ಚೆ ಪ್ರದೇಶಾ ಪರ್ಯಂತ ಆಪೋನು ಹಾಡ್ನು ಶ್ರೀ ರಾಮದೇವಾಲೆ ಪ್ರತಿಷ್ಟಾ ಕರತಾತಿ ಮ್ಹಳಯಾರಿ ತಾಂಕಾ ಮಠ ಪರಂಪರೆಚೆ ಸರ್ವ ೨೩ ಯತಿವರ್ಯಾಂಗೆಲೆ ಅನುಗ್ರಹ ಜಾಲ್ಲ್ಯಾ. ಪಾಂಚ ಗಂಗಾ ಮೆಳ್ಚೆ ಜಾಗೆಂತು ಮಠ ಪ್ರಾಪ್ತ ಜಾಲೀಲೆ ಆಸ್ಸುನು, ಹೇ ಪಂತಾ ಥಂಯಿ ಚಾತುರ್ಮಾಸ ಚಲೋನು ಸರ್ವ ಭಕ್ತಾನಿ ಥೈಕ ಯವ್ನು ಸಾಲಿಗ್ರಾಮಾಚೆ ಸ್ಪರ್ಶ ಕೊರಚೆ ಅವಕಾಶ ಕೊರನು ದಿವನು ಧಾರ್ಮಿಕ ಪ್ರಜ್ಞಾ ಜಾಗೃತ ಕೆಲ್ಲ್ಯಾ.
ಅಯೋಧ್ಯೆಂತು ಕೋಣ ರಾಮಾಕ ಪ್ರತಿಷ್ಟಾ ಕೆಲ್ಲ್ಯಾಂಕಿ ತಾನ್ನೀಚಿ ಪರ್ತಗಾಳಿಂತು ೭೭ ಫೀಟ್ ಉಂಚ ಶ್ರೀ ರಾಮಾಲೆ ವಿಗ್ರಹ ಅನಾವರಣ ಕರತಾಲೆಂ. ೭ ಮ್ಹಳಯಾರಿ ರಾಮಾಲೆ ಅಂಕಡೆ. ರಾಮಾಯಣಾಂತು ೭ ಕಾಂಡ ಆಸ್ಸಾ. ತ್ಯಾ ಉಡಗೋಸು ಕೊರಚೆ ೭ ಆನಿ ೭ ಫೀಟ್ ರಾಮಾಲೆ ಪ್ರತಿಮಾ ಅನಾವರಣ ಜಾವ್ಚೆ ಆಸ್ಸಾ. ರಾಮಾಲೆ ಹಾತ್ತಾಂತು ಧನುರ್ಧರ ಆನೀ ಬಾಣ ಆಸತಾ. ಏಕ್ಪಟಿ ಬಾಣ ಉಬರಲ್ಯಾರಿ ಕೋಣ್ತರಿ ಪಡಕಾಂಚೀಚಿ. ಕೋಣ ಪಡ್ಕಾ ಮ್ಹಳಯಾರಿ ತಾಂಡವ ನೃತ್ಯ ಕೊರಚೆ, ಉಗ್ರ ಕೃತ್ಯಾಕ ದೆಂವ್ವಿಲೆ ಸಮುದಾಯ ಸಕ್ಕಲ ಪಡ್ಕಾ, ಸನಾತನ ಧರ್ಮ ದೂಷಣ ಕೊರಚೆ ತಸ್ಸಾಲೆ ದುಷ್ಟ ಶಕ್ತಿಂಚೆ ಧಮನ ಜಾವ್ಕಾ. ರಾಮಾಲೆ ಮುಖಾರಿ ಧರ್ಮಧ್ವಜ ಉಡ್ತಾ ಆಸ್ಸಾ ಮ್ಹಳಯಾರಿ ಆನಿ ಭಾರತಾಕ ಭಯನಾ. ಪರ್ತಗಾಳಿಂತು ರಾಮ ಧನುರ್ಧರ ಬಾಣ ಧೊರನು ಸನಾತನ ಧರ್ಮಾಕ ರಾಕ್ವಣ ಕೊರೊ. ಉಗ್ರಾಲೊ ಮಾಥ್ಥಿ ಫುಟ್ಟೂನು ವಚ್ಚೊ, ಸಮಾನ ನಾಗರಿಕಾ ಸಂಹಿತಾ ಆನ್ನೇಕ ವೇಳ ಯವೋ, ಮ್ಹೊಣು ಆಶಯ ಕರ್ತಾ. ಸಕ್ಕಡ ಕಾರ್ಯಾಕ ೫೫೦ ವರ್ಷಾಚೆ ಉತ್ಸವು ನಾಂದಿ ಜಾಂವೊ ಮ್ಹೊಣು ಭಕ್ತಾಂಕ ಆಶೀರ್ವಚನ ದಿಲ್ಲೆ.
ಸುರವೇಕ ಪಲಿಮಾರು ಮಠಾಚೆ ಪಟ್ಟಶಿಷ್ಯ ಶ್ರೀಮದ್ ವಿದ್ಯಾರಾಜೇಶ್ವರ ಸ್ವಾವಿಮ್ಯಾನಿಂ ಆಶೀರ್ವಚನ ದೀವ್ನು “ಪರ್ತಗಾಳಿ ಮ್ಹಣ್ಚೆ ಏಕ ಪವಿತ್ರ ವಾರೆಂ(ಗಾಳಿ) ಜಾಲ್ಲ್ಯಾ. ಹಾಂಗಾ ರಾಮಾಲೆ ವಾಸ, ಮಠಾಚೆ ದೇವಾಲೊಂ ೫೫೦ ವರ್ಷಾಚೊ ಸಂಭ್ರಮಾಚರಣ ಚಲ್ತಽ ಆಸ್ಸಾ. ಜಿಎಸ್ ಬಿ ಸಮಾಜಾಕ ಮುಖಾರ್ಸುನು ವ್ಹರಚೆ ಗುರೂನಿ ಏಕ ಆದೇಶ ಕೆಲಯಾರಿ ಸಮಾಜ ಬಾಂಧವ ಪಾಲನ ಕರತಾತಿ. ಆಂವ್ಗಲೆಚೆ ರಂಗ ಕಶ್ಶಿ ವಿಂಗಡ ಕೊರಚಾಕ ಜಾಯನಾಂಕಿ ತಶೀಚಿ ಉಭಯ ಮಠಾಂಚೆ ಬಾಂಧವ್ಯ ವೃದ್ದಿ ಜಾತ್ತಾ;; ಮ್ಹೊಣು ಆಶೀರ್ವಚನಾಂತು ಸಾಂಗ್ಲೆ.
ಅಖೇರಿಕ ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಮಠಾಚೆ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮಿಜೀನಿ ಆಶೀರ್ವಚನ ದಿವನು ಪಲಿಮಾರು ಮಠಾಚೆ ಉಭಯ ಸ್ವಾಮ್ಯಾಂಗೆಲೆ ಸಂಗಮ ಮಾತ್ರ ನ್ಹಂಹಿಸಿ ಉಭಯ ಮಠಾಂಚೆ ಆರಾಧ್ಯ ದೇವಾಲೊ ಸಂಗಮ ಜಾಲ್ಲ್ಯಾ. ಪ್ರಧಾನಿ ನರೇಂದ್ರ ಮೋದಿನಿ ಅಯೋಧ್ಯೆಂತು ಶ್ರೀ ರಾಮಾಲೆಂ ಪ್ರತಿಷ್ಟಾ ಕರತಾನಾ ಅಷ್ಟಮಠಾಚೆ ಯತಿಂತು ಏಕಳೆ ಜಾಲೀಲೆ ಪೇಜಾವರ ಮಠಾಚೆ ಯತಿವರ್ಯ ಥಂಯಿ ಆಶ್ಶಿಲೆ. ಹಾಂಗಾಚಿ ರಾಮಾಲೆ ಪ್ರತಿಮಾ ಅನಾವರಣ ಕರತಾನಾ ಅಷ್ಟಮಠಾಚೆ ಉಭಯ ಗುರುವರ್ಯಾಂಗೆಲೆ ಆಗಮನ ಜಾಲೀಲೆ ಹೇ ಏಕ ಸುಯೋಗ. ನರೇಂದ್ರ ಮೋದಿ ಶ್ರೀ ಕೃಷ್ಣಾಲೆ ದರ್ಶನ ಘೇವ್ನು ಮೂರ್ತಿ ಅನಾವರಣ ಕರತಾತಿ. ಪಲಿಮಾರು ಮಠಾ ತಾಕುನೂಯಿ ಪರ್ತಗಾಳಿ ಮಠಾಚೆ ಪಾಳ ಸೂರು ಜಾಲೀಲೆ, ಪಯ್ಲೆಚೆ ಗೌರವು ಪಲಿಮಾರು ಮಠಾಕ ಮೆಳ್ಕಾ ಮ್ಹಣ್ಚೆ ಉದ್ದೇಶಾನಿ ಪಯಲೇಚೆ ಧರ್ಮ ಸಭಾಂತು ಗುರೂಂಗೆಲೆ ಅನುಗ್ರಹ ಜಾಲ್ಲ್ಯಾ. ಮುಖಾರಿಚಿ ಹೇ ಪುಣ್ಯಭೂಂಯಿ ಜಾವ್ಕಾ ಮ್ಹೊಣು ಜಾಲಯಾರಿ ಗುರೂಂಗೆಲೆ ಆಗಮನ ಜಾತ್ತಽಚಿ ವ್ಹರ್ಕಾ ಮ್ಹಣ್ಚೆ ಆಮಂತ್ರಣ ದಿಲ್ಲೆ.
ಹೇ ವೇಳ್ಯಾರಿ ಗಣ್ಯ ಜಾಲೀಲೆ ಶಿವಾನಂದ ಸಾಲಗಾಂವಕರ್, ಪ್ರದೀಪ ಪೈ, ಮುಕುಂದ ಪೈ, ಟಿ.ವಿ ಮೋಹನದಾಸ ಪೈ, ಕೆ ಉಲ್ಲಾಸ ಕಾಮತ ಆಶ್ಶಿಲೆ. ರಾಮಕೃಷ್ಣ ಭಟ್ ಬ್ರಹ್ಮಾವರ ಹಾನ್ನಿ ಪ್ರಾಸ್ತಾವಿಕ ಜಾವ್ನು ಉಲಯಿಲೆ. ಹಳದಿಪುರ್ಚೆ ಎಚ್ ಎನ್ ಪೈ ತಾನ್ನಿ ಕಾರ್ಯಕ್ರಮಾಚೆ ನಿರ್ವಹಣ ಕೆಲ್ಲಿ. ಸಕ್ಕಾಣಿ ಶ್ರೀ ರಾಮನಾಮ ಜಪ ಹವನ ಆದಿ ಕಾರ್ಯಕ್ರಮ ಚಲ್ಲೆ.