ವಿಶ್ವಕೊಂಕಣಿ ಕೇಂದ್ರಾಂತ ಚೆರ್ಡುಂವಾಂಗೆಲೆ ಸುವಾಳೊ
ವಿಶ್ವ ಕೊಂಕಣಿ ಕೇಂದ್ರ ‘ವರ್ಧನಿ’ ಆನಿ ಸಾಧನಾ ಬಳಗ ಸಹಕಾರಾನ ಆಯೋಜನ ಕೆಲೆಲೆ “ನಿನಾದ” 3 ದಿವಸಾಚೆ ಭುರ್ಗ್ಯಾಂಕ ಮುಫತ ಜಾವನು ಆಶಿಲೆ ತರಬೇತ ಶಿಬಿರಾಚೆ ಸಮಾರೋಪ ಸುವಾಳೊ ತಾ. 27-09-2025 ಕ ಚಲ್ಲೆಂ.
ವಿಶ್ವ ಕೊಂಕಣಿ ಕೇಂದ್ರಾಚೆ ಉಪಾಧ್ಯಕ್ಷ ಡಿ ರಮೇಶ ನಾಯಕ್ ಹಾನಿ ಆಯಿಲೆ ಸೊಯರೆಂಕ ಸ್ವಾಗತ ಕರನು. ಸಂಗೀತ, ನೃತ್ಯ ಭಾವಗೀತಾ, ಭಕ್ತಿಗೀತಾ ಆನಿ ವೆವೆಗಳೆ ಕೌಶಲ್ಯ ಕಲೆಚಾ ತರಬೇತ ಅಭ್ಯಾಸ ಕೆಲ್ಯಾರಿ ಚೆರ್ಡುವಾಂಗೆಲೆ ವಾಡಾವಳೀಕ ಸಹಾಯ ಜಾತ್ತಾ. ತಶೀಂಚಿ ಚೆರ್ಡುಂವಾನಿ ಶಿಬಿರಾಚೆ ಉತ್ತಮ ಪ್ರಯೋಜನ ಘೆವನು ಶಿಬಿರಾಂತ ಶಿಕಿಲೆ ಹರ ಏಕ ವಿದ್ಯಾ ಜೀವನಾಂತ ವಾಪರಕಾ ಅಶಿಂ ಸಾಂಗಲೆಂ.
ಮುಖೇಲ ಸೊಯರೆ ಜಾವನು ಆಯಿಲೆ ಎಸ್ ಡಿ ಎಂ ಕಾಲೇಜ್ ಆಫ್ ಬಿಸ್ನೆಸ್ ಮ್ಯಾನೇಜ್ ಮೆಂಟ್ ಪ್ರಾಂಶುಪಾಲ ಪ್ರೊ. ಅರುಣಾ ಕಾಮತ ಹಾನ್ನಿ ಶಿಬಿರಾರ್ಥಿಂಕ ಉದ್ದೇಶಿಸುನ ಆಯಚೆ ತಂತ್ರಜ್ನಾನ ಯುಗಾಂತ ಅಸಲೆ ಚಟುವಟಿಕಾ ಆಧಾರಿತ ಶಿಬಿರ ಚೆರ್ಡುವಾಂಕ ಅತೀ ಅಗತ್ಯ ಜಾವನು ಆಸಾ. ಹಾಜೆ ನಿಮಿತ್ತ ಚೆರ್ಡುಂವಾಂಗೆಲೆ ಮನೋಸಾಮರ್ಥ್ಯ ಚಡ ಜಾತ್ತಾ ಆನಿ ಮೊಬೈಲ್ ವಾಪರಚೆ ದಾಕುನ ದೂರ ಆಸತಾತಿ ಅಶಿಂ ಉಲಯತಚಿ, ಶಿಬಿರ ಆಯೋಜನ ಕೆಲೆಲೆ ವಿಶ್ವ ಕೊಂಕಣಿ ಕೇಂದ್ರಾಕ ಪ್ರಶಂಶಾ ವ್ಯಕ್ತ ಕೆಲೆಂ.
ಹೆಂ ವಿಶೇಷ ಶಿಬಿರಾಂತ ಭಾಗಿ ಜಾಲೆಲೆ ಸುಮಾರ 60 ಭುರ್ಗ್ಯಾಂನಿ ಜೆವಣ, ಖಾಣ. ರಾವಪಾಚೆ ಸುವಿಧಾ ಸಾಂಗತಾಕ, ಸಂಗೀತ, ಭಾವಗೀತಾ, ಭಕ್ತಿಗೀತಾ, ನೃತ್ಯ, ಕೋಲಾಟ ಅಶಿಂ ವೆವೆಗಳೆ ಕಲಾಚೆ ತರಬೇತ ಘೆತಲೆಂ. ಸಾಧನಾ ಬಳಗಾಚೆ ಮುಖೇಲ ಪ್ರಕಾಶ್ ಶೆಣೈ ಹಾನ್ನಿ ಶಿಬಿರ ಆಯೋಜನ ಕೆಲೆಲೆ ವಿಶ್ವ ಕೊಂಕಣಿ ಕೇಂದ್ರಾಕ ಅಭಿನಂದನ ಕೆಲೆಂ. ವಿಶ್ವ ಕೊಂಕಣಿ ಕೇಂದ್ರ ಮುಖೇಲ ಉಸ್ತುವಾರಿ ಡಾ. ಬಿ ದೇವದಾಸ ಪೈ ಹಾನಿ ಮುಖೇಲ ಸೊಯರೆಂಕ ಯಾದಸಿಕಾ ದಿವನು ದೆವು ಬರೆಂ ಕೊರೊ ಸಾಂಗಲೆಂ. ವಿದ್ವಾನ ಯೋಗೀಶ್ ಕಿಣಿ, ನಾಗೇಶ್ ಪ್ರಭು, ವಿದುಷಿ ವೃಂದಾ ನಾಯಕ್, ಭಾವನಾ ಪ್ರಭು, ಕುಡ್ಪಿ ವಿದ್ಯಾ ಶೆಣೈ ಹಾನಿ ವೆವೆಗಳೆ ಕೌಶಲ್ಯ ಚಟುವಟಿಕಾಚೀ ತರಬೇತ ದಿಲೆಂ. ವಿಶ್ವ ಕೊಂಕಣಿ ಕೇಂದ್ರಾಚೆ ಲಕ್ಷ್ಮೀ ಕಿಣಿ ಹಾನಿ ಕಾರ್ಯಕ್ರಮ ನಿರೂಪಣ ಕೆಲೆಂ. ಲ್ಹಾನ ಲ್ಹಾನ ಶಿಬಿರಾಚೆ ಚೆರ್ಡುವಾಂನಿ ಸಭೆಂತ ತಾಂಗೆಲೆ ಅನುಭವ ವಾಂಟುನ ಘೆತಲೆಂ. ಸರ್ವ ಶಿಬಿರಾರ್ಥಿಂಕ ಪ್ರಮಾಣಪತ್ರ ದಿವನು ಅಭಿನಂದನ ಕೆಲೆಂ.