ಸಮಾಧಾನ, ಸಹನೆನ ಚಮ್ಕಿಲ್ಯಾರಿ ಸಂಘ-ಸಂಸ್ಥೋ ಉದರ್ಗತಿ ಪಾವ್ತಾ. ಸಕಡಾನಿ ಸಾನ ಮನ ಸೋಡ್ನು ವಿಶಾಲ ಮನಾನಿ ಸಕ್ರಿಯ ಜಾವನು ವಾಂಟೊ ಘೆತಲೇರಿ ಖಂಚೇಯಿ ಸಂಘಟನ ಸದೃಢ ಜಾತ್ತಾ, ಆಮ್ಗೆಲೆ ದಾವಣಗೆರೆ ಜಿ.ಎಸ್.ಬಿ. ಸಮಾಜಾಂತು ಘೆಲೀಲೆ ೫೦ ವರಸಾ ಮಾಕಶಿ ಕೀರ್ತಿಶೇಷ ಜಾಲೀಲೆ ಪಾಂಡುರಂಗರಾವ್ ಶಿರೂರು, ಡಾ|| ಆರ್.ಎನ್.ಶೆಣೈ, ಜಿ.ಪಿ.ಕಾಮತ್, ಎಂ.ಜಿ.ಕಿಣಿ, ರಾಧಾಕೃಷ್ಣನಾಯಕ್ ಆದಿ ಗಣ್ಯ ಲೋಕಾನಿ ಆಮ್ಗೆಲೆ ಸಮಾಜಾಚೆ ಅಭಿವೃದ್ಧಿ ಖಾತೇರಿ ಸ್ವಯಂ ಅಪಾರ ಸೇವಾ ಪಾವಯಿಲೆ ಸ್ಮರಣಣ ಕೊರನು ಘೆವ್ಕಾ ಅಶ್ಶಿ ಮ್ಹೊಣು ಮ್ಹಾಲ್ಗಡೆ ಸಮಾಜ ಬಾಂದವ ದಾವಣಗೆರೆಚೆ ಬಿ.ಡಿ.ಟಿ. ಕಾಲೇಜಾಚೆ ವೃತ್ತ ಪ್ರಾಚಾರ್ಯ ಡಾ|| ಕೋಟ ಮೋಹನ್‌ದಾಸ್ ಹೆಗಡೆ ತಾನ್ನಿ ಅ.೨೭ಕ ದಾವಣಗೆರೆಚೆ ಗೌಡ ಸಾರಸ್ವತ ಸಮಾಜಾಚೆ ೫೦ವೇಂ ವರಸಾಚೆ ಸ್ವರ್ಣ ಚೌತಿ ಮಹೋತ್ಸವ ಸಮಾರಂಭ ದ್ವೀಪ ಪ್ರಜ್ವಲನ ಕೊರಚೆ ಮುಖಾಂತರ ಉದ್ಘಾಟನ ಕೊರನು ಸಮಾಜಾಚೆ ಲಾಂಛನ ಲೋಕಾರ್ಪಣ ಕೊರನು ಉಲಯತಾಲೆ.
ದಾವಣಗೆರೆ ಎಂ.ಸಿ.ಸಿ.ಎ ಬ್ಲಾಕ್‌ ಶ್ರೀ ಸುಕೃತೀಂದ್ರ ಕಲಾ ಮಂದಿರಾಂತು ಚಲೀಲೆ ಸಮಾರಂಭಾಚೆ ಅಧ್ಯಕ್ಷಪಣ ಸಮಾಜಾಧ್ಯಕ್ಷ ಜಾಲೀಲೆ ಶ್ರೀಮತಿ ಅಮಿತಾ ಡಾ. ವೇಣುಗೋಪಾಲ್ ಪೈ ತಾನ್ನಿ ಉಲೋನು `ದಾವಣಗೆರೆ ಸಮಾಜ ಖಂಚೇಯಿ ಸಾರ್ವಜನಿಕ ದೇಣಿಗಾ ನಾಶಿ, ಸರ್ಕಾರಾಚೆ ಜಾಂವೊ ಖಂಚೇಯಿ ಇಲಾಖೆಚೆ ಏಕಚೂರು ಅನುದಾನ ನಾಶಿ ಆಮ್ಗೆಲೆ ಸಮಾಜ ಬಾಂದವಾಲೊ ತನು, ಮನ, ಧನಾಚೆ ಸಹಕಾರ, ಸಹಯೋಗಾನಿ ಉದರ್ಗತಿ ಪಾವ್ತಾ ಆಸ್ಸುಚೆ ಖುಷಿಚೆ ವಿಷಯು, ಮುಖಾವಯ್ಲೆ ದಿವಸಾಂತು ಸಮಾಜಾಚೆ ಯುವಕಾರಾನಿ ಸಮಾಜಾಚೆ ಶ್ರೇಯೋಭಿವೃದ್ಧಿ ಖಾತೇರಿ ಹಾತು ಮೆಳಯಕಾ ಮ್ಹಳ್ಳೆ. ಸಮಾಜಾಚೆ ಮಾಜಿ ಅಧ್ಯಕ್ಷ ಕಿರಣ್ ಪಾಂಡುರಂಗ ವಾಲವಾಲ್ಕರ್, ಸಮಾಜಾಚೆ ಮಹಿಳಾ ವಿಭಾಗಾಚೆ ಅಧ್ಯಕ್ಷ ಶ್ರೀಮತಿ ಉಷಾ ಉದಯ ವಾಲವಾಲ್ಕರ್, ಮ್ಹಾಲ್ಗಡೆ ಚೇತನ ಶ್ರೀಮತಿ ವಸಂತಿ ವಿಠಲ್‌ದಾಸ್ ಶೆಣೈ, ಮುಖೇಲ ಸೊಯರೆ ಜಾವ್ನು ಯವ್ನು ವೇದಿಕೆರಿ ಉಪಸ್ಥಿತ ವ್ಹರನುದಾವಣಗೆರೆ ಸಮಾಜಾಚೆ ಸಮಾಜಮಂದಿರ ಶ್ರೀ ಸುಕೃತೀಂದ್ರ ಕಲಾಮಂದಿರ ಅಭಿವೃದ್ಧಿ, ನವೀಕರಣ ಕಲೀಲೆ ಏಕಳೆ ಬಾಯ್ಲಮನ್ಶೆ ಜಾಲೀಲೆ ಶ್ರೀಮತಿ ಅಮಿತಾ ಪೈ ತಾಂಗೆಲೆ ಕಠಿಣ ಪರಿಶ್ರಮ ಶ್ಲಾಘನೀಯ ಮ್ಹೊಣು ತಾರೀಪಯ ಕೆಲ್ಲೆ.
ಶ್ರೀಮತಿ ಕವಿತಾ ಕಿರಣ್ ವಾಲವಾಲ್ಕರ್ ತಾಂಗೆಲೆ ಪ್ರಾರ್ಥನೆ ಬರಶಿ ಸೂರು ಜಾಲೀಲೆ ಸಮಾರಂಭಾಂತು ಶ್ರೀಮತಿ ಶಾರದಾ ಕೃಷ್ಣಪ್ರಭು ತಾನ್ನಿ ಯೇವ್ಕಾರ ಕೆಲ್ಲಿ. ಗೌಡ ಸಾರಸ್ವತ ಸಮಾಜಾಚೆ ನಿಕಟಪೂರ್ವ ಅಧ್ಯಕ್ಷ ಸಾಲಿಗ್ರಾಮ ಗಣೇಶ್ ಶೆಣೈ ತಾನ್ನಿ ಕಾರ್ಯಕ್ರಮ ನಿರೂಪಣೆ ಬರಶಿ ಪ್ರಾಸ್ತಾವಿಕ ಜಾವನು ಉಲಯಿಲೆ. ದಾವಣಗೆರೆ ಸಮಾಜಾಚೆ ಇತಿಹಾಸ ಪರಂಪರಾ ಸಭಾಕ ಕಳೋನು, ಅಖೇರಿಕ ಆಬಾರ ಮಾನಲೆ.
ಉಪರಾಂತ ದಾವಣಗೆರೆ ಗೌಡ ಸಾರಸ್ವತ ಸಮಾಜಾಚೆ ಶ್ರೀ ಗಣೇಶೋತ್ಸವಾಚೆ ಸುವರ್ಣ ಮಹೋತ್ಸವ ವಿಜೃಂಭಣೆರಿ ಅ.೨೭ ತಾಕೂನು ಅ.೩೧ ಪರಿಯಂತ ೫ ದಿವಸ ಕಾಳ ಚಲ್ಲೆ. ಶಹರಾಚೆ ಶ್ರೀ ಸುಕೃತೀಂದ್ರ ಕಲಾ ಮಂದಿರಾಂತು ಸಮಾಜಾಚೆ ಬಾಯ್ಲಮನ್ಶೆಲೆ, ದಾರಲ್ಯಾಲೆ, ಚರಡುಂವಾಲೆ ತಾಕೂನು ನಾಟಕ, ನೃತ್ಯ, ಸಂಗೀತ, ಸಾಂಸ್ಕೃತಿಕ ಕಾರ್ಯಕ್ರಮ, ಪ್ರತಿಭಾವಂತ ಚರಡುವಾಂಕ ಪ್ರತಿಭಾ ಪುರಸ್ಕಾರ, ಸಮಾಜ ಬಾಂದವಾಂಕ ಕ್ರೀಡಾ, ಛದ್ಮವೇಷ ಸಹಿತ ವಿವಿಧ ಸ್ಪರ್ಧಾ, ವಿಜೇತಾಂಕ ಬಹುಮಾನ ವಾಂಟಪ ಯಶಸ್ವಿ ಜಾವನು ಚಲ್ಲೆ ಮ್ಹೊಣು ಸಮಾಜಾಧ್ಯಕ್ಷಿಣಿ ಶ್ರೀಮತಿ ಅಮಿತಾ ಡಾ. ವೇಣುಗೋಪಾಲ್ ಪೈತಾನ್ನಿ ಕಳಯಲಾ.
ಆಗಸ್ಟ್ ೨೭ ಕ ಸಮಾಜಾಚೆ ಸುವರ್ಣ ಮಹೋತ್ಸವ ಉದ್ಘಾಟನ, ಸಮಾಜಾಚೆ ಲಾಂಛನ ಲೋಕಾರ್ಪಣ ಚಲಯಾರಿ, ಆಗಸ್ಟ್ ೩೧ ಆಯ್ತವಾರು ರಾತ್ತಿಕ ಶ್ರೀ ಗಣಪತಿ ವಿಸರ್ಜನ ಚಲ್ಲೆ. ಅಂತರಾಷ್ಟ್ರೀಯ ಖ್ಯಾತ ಸಂಗೀತಗಾರ ಜಾಲೀಲೆ ಬೆಂಗಳೂರ್‍ಚೆ ಶಂಕರ ಶ್ಯಾನಭಾಗ ತಾನ್ನಿ ದೋನಿ ಘಂಟೊ ಕಾಳ ಭಜನ, ಭಕ್ತಿಗೀತಾ, ರಾಷ್ಟ್ರಗೀತಾ, ಸುಗಮ ಸಂಗೀತ ಕಾರ್ಯಕ್ರಮ ಚಲೋನು ದಿಲ್ಲೆ. ೫ ದಿವಸೂ ಪ್ರತೀದಿವಸು ನಿತ್ಯಪೂಜಾ, ಗಣೋಮು, ರಂಗಪೂಜಾ, ಮೂಡಗಣಪತಿ ಪುಲ್ಲಾ ಅಲಂಕಾರ ಪೂಜಾ, ಅನ್ನಸಂತರ್ಪಣ, ಸಾಲಿಗ್ರಾಮ ಗಣೇಶ್ ಶೆಣೈಂಗೆಲೆ ತಾಕೂನು ಮಹಾಭಾರತ, ರಾಮಾಯಣ ಖಾತೇರಿ ಉಪನ್ಯಾಸ ಜಮೀಲೆ ಪ್ರೇಕ್ಷಕಾಂಕ ಖುಷಿ ದಿಲ್ಲೆ.