ಖಂಚೇಯಿ ಏಕ ರಾಷ್ಟ್ರಾಂತು ಜಾಂವೊ ರಾಜ್ಯಾಂತು ಜನ್ಮುನು ನಾಮಾಧಿಕ ಜಾಲೀಲೆ ಮನುಷ್ಯಾಕ ಪಳೋನು ಸಗಳೇ ದೇಶ ಜಾಂವೊ ರಾಜ್ಯ ಹಾನ್ನಿ ಆಮ್ಗೆಲಿಂ… ಆಮ್ಗೆಲಿಂ… ಮ್ಹೊಣು ಅಭಿಮಾನ ಪಾವ್ತಾತಿ. ತಶೀಚಿ ಆಮ್ಗೆಲೆ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಂತು ಜನ್ಮೂನು ದಾನ-ಧರ್ಮಾಂತು ಸರ್ವಾಪಶಿ ಚ್ಹಡ ನಾಂವ ಪಾವಲೀಲೆ ಏಕಳೀ ಕೊಂಕಣಿ ಮನೀಷು ಬೆಂಗಳೂರ್‍ಚೆ ಡಾ|| ಪಿ. ದಯಾನಂದ ಪೈ ಮಾಮು ಮ್ಹಣಚೆ ಆಮಕಾ ಸಕಡಾಂಕ ಗರ್ವಾಚೆ ವಿಷಯು. ಆರತ ಮಂಗಳೂರಾಂತು 134 ವರ್ಷಾಚೆ ಇತಿಹಾಸ ಆಸ್ಸುಚೆ ಮಂಗಳೂರ್‍ಚೆ ಕೆನರಾ ಶಿಕ್ಷಣ ಸಮಿತಿಚಾನ ಮೆಡಿಕಲ್ ಕಾಲೇಜ್ ಆರಂಭ ಕೊರಚಾಕ ಭಾಯರ ಸರಲೇರಿ ೫೦೦ ಬೆಡ್ಡಾಚೆ ಆಸ್ಪತ್ರೆಕ ಜಾಯಿ ಜಾಲೀಲೆ 2,೦೦,೦೦೦ ಸ್ಕ್ವೇರ್‌ಫೀಟ್ ಇಮಾರತ್ ಬಾಂದಚಾಕ ಜಾಯಿ ಜಾಲೀಲೆ ಪನ್ನಾಸ ಕೋಟಿ ರೂಪ್ಪಯಿ ಆಪ್ಪಣ, ಆಪಣೇಲೆ ಬಾಂವು ಸತಿಶ ಪೈ ಆನಿ ಕುಟುಂಬಾಚಿ ಮೇಳ್ನು ದಿತ್ತಾತಿ ಮ್ಹೊಣು ಡಾ|| ಪಿ. ದಯಾನಂದ ಪೈ ಮಾಮ್ಮಾನಿ ವಾಗ್ಧಾನ ದಿಲೀಲೆ ಸಕಡಾಂಕ ಗೊತ್ತಾಸ್ಸ. ತಶೀಚಿ ಮಂಗಳೂರಾಂತು ಆಸ್ಸುಚೆ ವಿಶ್ವಕೊಂಕಣಿ ಕೇಂದ್ರಾಚಾನಿ ತಾಂಗೆಲೆ ಜಾಯಿದಿವಸಾ ಖಾತೇರಿ ಪ್ರತಿವರ್ಷ ಫೆಬ್ರವರಿ 8 ಆನಿ 9 ತಾರೀಖೆಕ ವಿಶ್ವಕೊಂಕಣಿ ನಾಟಕೋತ್ಸವ ಆಯೋಜನ ಕೊರನು ಹೇ ವೇಳ್ಯಾರಿ ಡಾ|| ಪಿ. ದಯಾನಂದ ಪೈ ವಿಶ್ವಕೊಂಕಣಿ ರಂಗಶ್ರೇಷ್ಠ ಆನಿ ಅನುವಾದ ಪುರಸ್ಕಾರ ವರೇನ ದಿವಚಾಕ ಲಾಗ್ಲಿಂತಿ. ಕೊಂಕಣಿ ಭಾಸ, ಸಾಹಿತ್ಯ, ಸಾಂಸ್ಕೃತಿಕ, ಧಾರ್ಮಿಕ. ಸಾಮಾಜಿಕ ಖಂಚೇಯಿ ನಮೂನ್ಯಾಚೆ ಕಾರ್ಯ ಆಸಲೇರಿಚಿ ಘೆಲೀಲೆ ಸಬಾರ ವರಸಾಚಾನ ಡಾ|| ಪಿ. ದಯಾನಂದ ಪೈ ಮಾಮ್ಮಾನಿ ಅಹರ್ನಿಶಿ ತಾಕ್ಕಾ ಮದತ್ ದಿತ್ತಾ ಆಯ್ಯಿಲೆ ಆಸ್ಸಾ. ಹಾನ್ನಿ ಹರ್‍ಯೇಕ ಕೊಂಕಣಿ ಜಿ.ಎಸ್.ಬಿ. ಮನುಷ್ಯಾನಿ ಅಭಿಮಾನ ಪಾವ್ಚೆ ತಸ್ಸಾಲೆ ಮಹಾದಾನಿ ಆಸ್ಸಾತಿ. ಡಾ|| ಪಿ. ದಯಾನಂದ ಪೈ ಮಾಮ್ಮಾಲೆ 8೦ವೇಂ ವರ್ಷಾಚೆ ಜಲ್ಮ ದಿನೋತ್ಸವಾಚೆ ಹೇ ಸಂದರ್ಭಾರಿ ತಾಂಕಾ ಜಲ್ಮದಿನೋತ್ಸವಾಚೆ ಶುಭಾಶಯ ಪಾವಯತಾ. ತಾಂಗೆಲೆ ಒಳಕ ಅಬಾಲವೃದ್ಧ ಸಹಿತ ಸಕಡಾಂಕ ಗೊತ್ತಾಸ್ಸ, ಜಾಲಯಾರಿ ಸೇವಾ, ದಾನ ಕಾರ್ಯ ಖಾತೇರಿ ತಾಂಗೆಲೆ ಮನೋಭಾವ ಕಸ್ಸಲೆ ಮ್ಹಣಚಾಕ ತೀನ ವರಸಾ ಮಾಕಸಿ ಮಂಗಳೂರ್‍ಚೆ ವಿಶ್ವಕೊಂಕಣಿ ಕೇಂದ್ರಾಂತು ಚಲೀಲೆ ತಾಂಗೆಲೆ ಜಲ್ಮ ದಿವಸಾಚೆ ಸಮಾರಂಭಾಚೆ ವರದಿ ಪುನರಪಿ ತುಮ್ಗೆಲೆ ಸಮಕ್ಷಮ ದವರತಾ ಆಸ್ಸಾ.
ಡಾ|| ದಯಾನಂದ ಪೈ ಮಾಮು ದಕ್ಷಿಣ ಕನ್ನಡಾಚೆ ಪಾಣೆ ಮಂಗಳೂರ್‍ಚೆ ಏಕ ಮಧ್ಯಮದರ್ಜೆಚೆ ಕುಟುಂಬಾಂತು ಜನ್ಮುನು ವೆಗವೆಗಳೆ ಉನ್ನತ ವ್ಯಾಸಾಂಗ ಕೆಲ್ಲೆ ಉಪರಾಂತಚಿ ಭೂವ್ಯವಹಾರಾಕ ದೇಂವಲೆ. ತಾಂತು ಕೊಣೇಯಿ ಊಹನ ಕೊರಚಾಕ ಜಾಯನಾತ್ತಿಲೆ ತಿತ್ತುಲೆ ಯಶ ತಾಂಕಾ ಮೆಳ್ಳೆ. ತಾಜೇನ ವೆಗವೆಗಳೆ ಶೈಕ್ಷಣಿಕ ಸಂಸ್ಥೋ, ಆಸ್ಪತ್ರೋ, ವಿಮಾ, ಆಡಮಾನ, ಗ್ರಾಹಕ ಉತ್ಪನ್ನ, ತಾಂತ್ರಿಕ ಕೇಂದ್ರ, ಹೊಟೇಲ್, ಕ್ರೀಡಾ ಕ್ಷೇತ್ರ, ಧಾರ್ಮಿಕ ಸಂಸ್ಥೋ, ದೇವಳ ಅಶ್ಶಿ ಸರ್ವ ಕ್ಷೇತ್ರಾಕ ತಾನ್ನಿ ಸೇವಾ ಪಾವಯಲಾ. ಪನ್ನಾಸಾ ಪಶಿ ಚ್ಹಡ ಪಂತಾ ವಿದೇಶಾಚೆ ಪರ್ಯಟನ ಕೊರನು ಅಪಾರ ಜೀವನಾನುಭವ ವರೇನ ತಾನ್ನಿ ಜೊಡನು ಘೆತ್ಲ್ಯಾ.
೧೯೯೧ಂತು ಕರ್ನಾಟಕ ಉದ್ಯೋಗ ರತ್ನ, ೨೦೦೫ ಇಸ್ವೆಂತು ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚಾನ ಮಹಾನ್ ಮನೀಸ ಪ್ರಶಸ್ತಿಕ ವಿಂಚ್ಲೆ. ಮಂಗಳೂರು ವಿಶ್ವವಿದ್ಯಾಲಯಚಾನ ೨೦೦೯ ಇಸ್ವೆಂತು ಗೌರವ ಡಾಕ್ಟರೇಟ್ ಪ್ರಶಸ್ತಿ ದಿಲ್ಲೊ. ೨೦೧೦ ಇಸ್ವೆಂತು ಕನಾಟಕ ಸರಕಾರಾನಿ ರಾಜ್ಯೋತ್ಸವ ಪ್ರಶಸ್ತಿ ದಿಲ್ಲೊ. ಗೋಕರ್ಣ ಪರ್ತಗಾಳಿ ಮಠಾಚೆ ವಿದ್ಯಾಧಿರಾಜ ಪುರಸ್ಕಾರ, ನವರತ್ನ ಪ್ರಶಸ್ತಿ, ಸುವರ್ಣ ಕರ್ನಾಟಕ ಶಿವರಾಮ ಕಾರಂತ ಪ್ರಶಸ್ತಿ ಅಶ್ಶಿ ಡಾ|| ದಯಾನಂದ ಪೈ ಮಾಮ್ಮಾಂಕ ಅಸಂಖ್ಯಾತ ಪ್ರಶಸ್ತಿಯೋ, ಪುರಸ್ಕಾರ ಮೆಳ್ಳಿಲೆ ಹಾಂಗಾ ಯಾದ ಕೊರನು ಘೆವ್ಯೇತ. ತಾಂಗೆಲೆ ೭೭ವೇಂ ಜಾಯಿ ದಿವಸ ಆಚರಣ ವಿಶ್ವಕೊಂಕಣಿ ಕೇಂದ್ರಾಂತು ದಿನಾಂಕ. ೦೮-೦೨-೨೦೨೨ ದಿವಸು ಚಲೀಲೆ ಸಂದರ್ಭಾರಿ ಮಂಗಳೂರು ವಿ.ವಿ.ಚೆ ಉಪಕುಲಪತಿ ಪ್ರೊ| ಬಿ.ಎಸ್.ಯಡಪಡಿತ್ತಾಯ ತಾನ್ನಿ ಡಾ|| ಪಿ. ದಯಾನಂದ ಪೈ ಮಾಮ್ಮಾಂಕ ಶಾಲ ಪಾಂಗೂರ್ನು ಗೌರವ ಕೆಲಯಾರಿ ಶ್ರೀ ಗಿಲ್ಬಟ್ ಡಿಸೋಜಾನಿ ಫುಲ್ಲಾ ಮಾಳ ಘಾಲ್ಲೆ. ಕೊಂಕಣಿ ಕಾವಿಕಲೇಚೆ ಸರಸ್ವತಿ ದೇವಿಲೆ ವಿಗ್ರಹ ಶ್ರೀ ಕುಡ್ಪಿ ಜಗದೀಶ ಶೆಣೈ ತಾನ್ನಿ ದಿಲ್ಲೆ. ಕೊಂಕಣಿ ಕೋಪಿ ಟೆಬಲ್ ಬೂಕ್ ಡಾ|| ಮೋಹನ ಪೈನಿ ದಿಲ್ಲೆ. ತಾಂಗೆಲೆ ಬಾಯ್ಲ ಶ್ರೀಮತಿ ಮೋಹಿನಿ ದಯಾನಂದ ಪೈ ಹಾಂಕಾ ಉಡುಪಿ ಮಗ್ಗಾಚೆ ವಿಶೇಷ ಕಾಪ್ಪಡ ಶ್ರೀಮತಿ ಶಕುಂತಲಾ ಆರ್. ಕಿಣಿ ತಾನ್ನಿ ದಿವನು ಗೌರವ ಕೆಲ್ಲಿ. ಹೇ ವೇಳ್ಯಾರಿಕೊಂಕಣಿ ಸರಸ್ವತಿಲೀ ಆರಾಧನ ಚೊಲಚೆ ವಿಶ್ವ ಕೊಂಕಣಿ ಕೇಂದ್ರಾಂತು ಆಪಲೆ ೭೭ವೇಂ ಜಾಯಿದಿವಸು ಆಚರಣ ಘಡ್ತಾ ಆಸ್ಸುಚೆ ಖಾತ್ತಿರಿ ಹರ್ಷ ವ್ಯಕ್ತ ಕೆಲೀಲೆ ಡಾ| ಪಿ. ದಯಾನಂದ ಪೈ ಮಾಮ್ಮಾನಿ “ಹಾಂವೆ ಆಜ ಪರ್ಯಂತ ಜಾಯಿ ದಿವಸು ಆಚರಣ ಕರ್ನಿ, ಆಜಿ ಹಾಂಗಾ ಮೆಗೆಲೆ ೭೭ ವರಸಾಚೆ ಪ್ರತಿಜ್ಞಾ ಭಂಗ ಜಾಲ್ಲಾ. ಹಾಂವ ಕಿತಯಾಕ ಜಾಯಿದಿವಸು ಆಚರಣ ಕೊರನು ಘೇನಾ ಮ್ಹಳಯಾರಿ ತೆದ್ನಾ ಸಕ್ಕಡ ಸಂತೋಷ ಪಾವತಾತಿ ಜಾಲಯಾರಿ ಮಾಕ್ಕಾ ಮೆಗೆಲೆ ಜೀವನಾಚೆ ಆನ್ನೇಕ ವರ್ಷ ಸಂಪೂನು ಘೆಲ್ಲಮೂ ಮ್ಹೊಣು ಬೇಜಾರ ಜಾತ್ತಾ. ಜಾಲಯಾರೀಚಿ ತುಮಗೆಲೆ ಸಕಡಾಲೆ ಮ್ಹೋಗು ಆನಿ ವಿಶ್ವಾಸ ಹಾಂವ ವಿನಮ್ರತೇನಿ ಸ್ವೀಕಾರ ಕರತಾ. ಹಾಂವ ಕೋಣಾಂಕ ಮದತ್ ಕೆಲಯಾರೀಚಿ ಉಡಗೋಸು ದವರೂನು ಘೆವಚೆ ಅಭ್ಯಾಸು ನಾ; ಆಜಿ ಮೆಗೆಲೆ ತಾಕೂನು ಇತ್ಲೆ ಸಕ್ಕಡ ಚಾಂಗ ಕಾರ್ಯ ಘಡಲಾ ಮ್ಹಣಚೆ ಆಯಕೂನು ಮಸ್ತ ಆನಂದ ಜಾಲ್ಲೆ. ಸಕಡಾಂಕ ಪರಮಾತ್ಮು ಅನುಗ್ರಹ ಕರನಾ. ದೇವು ಥೊಡೆ ಲೋಕಾಂಕ ಮಾತ್ರ ದುಡ್ಡು ಜೊಡಚಾಕ ಅನುಗ್ರಹ ಕರತಾ. ತಶ್ಶಿ ಜೋಡಲೀಲೆ ದುಡ್ಡು ತಾಣೆ ಸಮಾಜಾಕ ಆನಿ ಲೋಕಾಂಕ ಸೇವಾ ಕೊರಚೆ ಖಾತ್ತಿರಿ ದೇವಾನಿ ದಿಲ್ಲಾ ಮ್ಹಣಚೆ ಭಾವನಾ ಆಮ್ಮಿ ವಾಡ್ಡೊನು ಘೆವ್ಕಾ. ಆಮ್ಮಿ ಆಮ್ಗೆಲೆ ಖಾತ್ತಿರೀಚಿ ವಾಂಚಲೇರಿ ಆಮ್ಗೆಲೆ ಬರಶಿ ತ್ಯಾ ವಚ್ಚುನು ಸೊಡ್ತಾ. ದುಸರ್‍ಯಾ ಖಾತ್ತಿರಿ ವಾಂಚಲೇರಿ ಆಮ್ಗೆಲೆ ಸೇವಾ ಕೆದನಾಂಯಿ ವಾಂಚೂನು ಉರತಾ. ಸಮಾಜಾಚೆ ಸೇವಾ ಕರತಲ್ಯಾಂಕ ದೈವಬಳ ಆಸ್ತಾ. ಕೆದನಾಂಯಿ ಆಮ್ಮಿ ಆಶಾವಾದಿ ಜಾವ್ನು ಆಸ್ಸುಕಾ, ನಿರಾಶವಾದಿ ಜಾವಚಾಕ ನಜ್ಜ. ನಿರಾಶಾವಾದಿ ಜಾಲಯಾರಿ ಮೂಲ್ಲೆಕ ಪಡತಾತಿ. ಆಪಲೆ ಚರಡುವಾನಿ ವರೇನ ಹೇ ದಾನಕಾರ್‍ಯ ಮುಖಾರ್‍ಸುನು ವ್ಹರಕಾ ಮ್ಹಣಚೇಚಿ ಮೆಗೆಲೆ ಇಚ್ಚಾ ಮ್ಹೊಣು ಮ್ಹಳ್ಳೆ. ತಶೀಚಿ ವಿಶ್ವಕೊಂಕಣಿ ಕೇಂದ್ರ ಸ್ಥಾಪನ ಕೊರಚಾಕ ಬಸ್ತಿ ವಾಮನ ಶೆಣೈ ಮಾಮ್ಮಾನಿ ಘೊಳ್ಳಿಲೆ ಕಷ್ಟ ಯಾದ ಕೊರನು ಘೆತ್ಲೆ. ಆನಿ ವಿಶ್ವಕೊಂಕಣಿ ಕೇಂದ್ರಾಕ ತಾಂಗೆಲೆ ಚಟುವಟಿಕಾ ವಿಸ್ತಾರ ಕೊರನು ಘೆವಚಾಕ ಏಕ ಕೋಟಿ ರೂಪಯಿ ದೇಣಿ ದಿವಚೆ ಘೋಷಣಾ ತ್ಯಾ ದಿವಸು ತಾನ್ನಿ ಕೆಲ್ಲಿ.
ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ ಶ್ರೀ ಸಿ‌ಎ ನಂದಗೋಪಾಲ ಶೆಣೈ ತಾನ್ನಿ ಯೇವ್ಕಾರ ಕೊರನು ಪ್ರಾಸ್ತಾವಿಕ ಜಾವ್ನು ಉಲಯಿಲೆ. ಆನಿ ಡಾ|| ದಯಾನಂದ ಪೈ ಮಾಮ್ಮಾಲೆ ಜಾಯಿದಿವಸು ಜಾಲೀಲೆ ಫೆಬ್ರುವರಿ ೮ಕ ಪ್ರತಿ ವರ್ಷ ತಾಂಗೆಲೆ ನಾಂವಾಂತು ವಿಶ್ವಕೊಂಕಣಿ ಕೇಂದ್ರ ತರಪೇನ ಡಾ|| ದಯಾನಂದ ಪೈ ವಿಶ್ವಕೊಂಕಣಿ ಅನುವಾದ ಪ್ರಶಸ್ತಿ ಆನಿ ಡಾ|| ದಯಾನಂದ ಪೈ ವಿಶ್ವಕೊಂಕಣಿ ರಂಗಶ್ರೇಷ್ಠ ಪ್ರಶಸ್ತಿ ದಿವಚಾಕ ಠರಯಲಾ ಮ್ಹಣಚೆ ಘೋಷಣ ಕೆಲ್ಲೆ. ತಾಕ್ಕಾ ಸಂಬಂಧ ಪಾವ್ವಿಲೆ ಕಾರ್‍ಯಕ್ರಮ ಮಂಗಳೂರ್‍ಚೆ ವಿಶ್ವಕೊಂಕಣಿ ಕೇಂದ್ರಾಂತು ಪ್ರತಿ ವರ್ಷ ಫೆ.೮ ಆನಿ ೯ ತಾರೀಖೆಕ ಚಲ್ತಾ.