ಜಿ.ಎಸ್.ಬಿ ಸಮಾಜ ಹುಬ್ಬಳ್ಳಿ ಹಾಜ್ಜೆ ಸಮಾಜ ಡೇ ಕಾರ್ಯಕ್ರಮ ಜೂನ್ ೨೪ಕ ಸರಸ್ವತಿ ಸದನಾಂತು ಮಸ್ತ ವೈಭವಾರಿ ಚಲ್ಲೆ. ಪುಟಾಣಿ ವೇಧಾಕ್ಷ ಕಾಮತ ಹಾಣೆ ಸ್ವಾಗತ ಗೀತಾ ಮ್ಹಳ್ಳೆ. ಹುಬ್ಬಳ್ಳಿ ಜಿ.ಎಸ್.ಬಿ ಸಮಾಜಾಚೆ ಉಪಾಧ್ಯಕ್ಷ ಶ್ರೀ ಶ್ರೀಕಾಂತ ಮಹಲೆ ತಾನ್ನಿ ಯೇವ್ಕಾರ ಕೆಲ್ಲೊ. ಕಾರ್ಯದರ್ಶಿ ಶ್ರೀ ಪ್ರಮೋದ ಕಾಮತರ ತಾನ್ನಿ ಹುಬ್ಬಳ್ಳಿ ಜಿ.ಎಸ್.ಬಿ. ಸಮಾಜಾಚೆ ೮೦ ವರ್ಷಾಚೆ ಸಾಧನಾ ಸಾಂಗೂನು ಹಾಕ್ಕಾ ಕಾರಣೀಭೂತ ಜಾಲೀಲೆ ಮ್ಹಾಲ್ಗಡ್ಯಾಲೆ ಸ್ಮರಣ ಕೆಲ್ಲಿ. ಮಾತ್ರನ್ಹಂಹಿ ಸಮಾಜಾಚೆ ರಾಜೀವಲೋಚನ ಜಪ ಕೇಂದ್ರಾಂತು ಸಾತ ಕೋಟಿ ಪಶಿ ಚ್ಹಡ ಶ್ರೀ ರಾಮನಾಮ ತಾರಕ ಮಂತ್ರಜಪ ಪಠಣ ಜಾಲೀಲೆ ಸಂತೋಷಾಚೆ ಖಬ್ಬರಯಿ ಸಾಂಗ್ಲೆ. ಮಹಿಳಾ ವಿಭಾಗಾಚೆ ವರದಿ ಮಹಿಳಾ ವಿಭಾಗಾಚೆ ಕಾರ್ಯದರ್ಶಿ ಶ್ರೀಮತಿ ಜಯಾ ಪೈ ತಾನ್ನಿ ಪ್ರಸ್ತುತ ಕೊರನು ಜಿ.ಎಸ್.ಬಿ. ಸಮಾಜಾಂತು ಬಾಯ್ಲಮನ್ಶೆಂಕ ಮೆಳ್ಚೆ ತಸ್ಸಾಲೆ ಗೌರವು ದುಸರೇ ಖಂಯಿಚಿ ಮೇಳ್ನಾ ಮ್ಹೊಣು ಸಾಂಗ್ಲೆ.
ಮುಖ್ಯ ಸೊಯರೆ ಬೆಂಗಳೂರ್‍ಚೆ ಪೈ ಗ್ರೂಪ್ ಆಪ್ ಹೋಟೆಲ್ಸ್ ಹಾಜ್ಜೆ ಅಧ್ಯಕ್ಷ ಆನಿ ಆಡಳಿತ ನಿರ್ದೇಶಕ ಶ್ರೀ ಜಗನ್ನಾಥ ಪೈ ತಾಂಗೆಲೆ ಪರಿಚಯ ಶ್ರೀ ಮಹೇಶ ಕಾಮತ್ ತಾನ್ನಿ ಕೊರನು ದಿಲ್ಲಿ. ತಾಂಕಾ ಪ್ರತಿಷ್ಠಿತ ಕೆಂಪೇಗೌಡ ಪ್ರಶಸ್ತಿ ಸಹಿತ ಸಬಾರ ಪ್ರಶಸ್ತಿ ಮೆಳೀಲೆ ಸಾಂಗೂನು ಶ್ರೀ ಜಗನ್ನಾಥ ಪೈ ಮಾಮ್ಮಾಲೆ ಪ್ರಾಮಾಣಿಕಪಣ, ಟೈಮ್ ಮ್ಯಾನೇಜಮೆಂಟ್, ಆನಿ ಕಾರ್ಯತತ್ಪರತಾ ತಾಂಗೆಲೆ ಯಶಾಕ ಕಾರಣ ಮ್ಹೊಣು ಸಾಂಗ್ಲೆ. ಮಾಗಿರಿ ಸಮಾಜಾಧ್ಯಕ್ಷ ಶ್ರೀ ರಮೇಶ ಪಿ. ನಾಯಕ ಸಹಿತ ಆಡಳಿತಮಂಡಳಿಚೆ ಪದಾಧಿಕಾರಿನಿ ಮೇಳ್ನು ಶ್ರೀ ಜಗನ್ನಾಥ ಪೈಂಕ ಮೈಸೂರು ಪೇಟ ಘಾಲ್ನು, ಶಾಲು ಪಾಂಗೂರ್ನು, ಮಾಳ ಘಾಲ್ನು, ಪಂಚಫಳ ಆನಿ ಸ್ಮರಣಿಕಾ ದಿವನು ಸನ್ಮಾನ ಕೆಲಯಾರಿ ತಾಂಗೆಲಿ ಬಾಯ್ಲ ಶ್ರೀಮತಿ ಶಾಂತಾ ಜೆ. ಪೈ ಹಾಂಕಾ ಜಿ.ಎಸ್.ಬಿ ಸಮಾಜಾಚೆ ಮಹಿಳಾ ವಿಭಾಗಾಚೆ ತರಪೇನಿ ಹೋಂಟಿ ಭೊರನು ಸನ್ಮಾನ ಕೆಲ್ಲಿ.
ಮಾಗಿರಿ ಸಮಾಜಾಚೆ ಸಂಪ್ರದಾಯ ಪ್ರಮಾಣೆ ಸಮಾಜಾಚೆ ಮ್ಹಾಲ್ಗಡೆ ಸದಸ್ಯಾಲೆಂ ಸನ್ಮಾನ ಚಲ್ಲೆ. ಹೇ ವೇಳ್ಯಾರಿ ಶ್ರೀ ವಿವೇಕ ಎಸ್. ಪೈ ಆನಿ ಶ್ರೀಮತಿ ರೇವತಿ ಪೈ ದಂಪತಿಂಕ, ಶ್ರೀ ಕೇಶವ ಮಂಜುನಾಥ ಶಾನುಭಾಗ ಬುರ್ಡೆಕರ ಆನಿ ಶ್ರೀಮತಿ ಶಾಂತೇರಿ ಕೇಶವ ಶಾನಭಾಗ ಬುರ್ಡೆಕರ ದಂಪತಿಂಕ ತಶೀಚಿ ಶ್ರೀ ಸುರೇಶ ಎನ್. ಕಾಮತ್ ಆನಿ ಶ್ರೀಮತಿ ಶೀತಲ ಎಸ್. ಕಾಮತ್ ದಂಪತಿಂಕ ಸನ್ಮಾನ ಚಲ್ಲೆ. ಹೇ ವರ್ಷಾಚೆ ಬೆಸ್ಟ್ ಫೆಮೇಲ್ ವಾಲಿಂಟಿಯರ ಪ್ರಶಸ್ತಿ ಜಿಕ್ಕಿಲೆಂ ಶ್ರೀಮತಿ ರಮ್ಯಾ ಕಾಮತ ಹಾನ್ನಿ ದಿ| ಶ್ರೀ ರಂಗಪ್ಪಾ ಪಾಂಡುರಂಗ ಕಾಮತ್ ರೋಲಿಂಗ್ ಶೀಲ್ಡ್ ಸಹಿತ ಪುರಸ್ಕೃತ ಜಾಲ್ಲೆ. ಆನಿ ಶ್ರೀ ಶ್ರೀನಿವಾಸ ಎಮ್. ಕಾಮತ ತಾಂಕಾ ದಿ. ಶ್ರೀ ಶೇಷಗಿರಿ ಪಾಂಡುರಂಗ ಕಾಮತ ರೋಲಿಂಗ್ ಶೀಲ್ಡ್ ಸಹಿತ ಸನ್ಮಾನ ಕೊರನು ಬೆಸ್ಟ ಮೇಲ್ ವಾಲಿಂಟಿಯರ್ ಪ್ರಶಸ್ತಿ ದಿಲ್ಲಿ. ಆನಿ ಸೊಯರ್‍ಯಾನಿಂ ಸಮಾಜಾಚೆ ದತ್ತುನಿಧಿ ವಿದ್ಯಾರ್ಥಿ ವೇತನ ತಶೀಚಿ ಎಸ್.ಎಸ್.ಎಲ್.ಸಿ. ಆನಿ ಪಿ.ಯು.ಸಿಂತು ೯೦% ಪಶಿ ಚ್ಹಡ ಅಂಕ ಘೆತ್ತಿಲೆ ಸಮಾಜಾಚೆ ಪ್ರತಿಭಾವಂತ ವಿದ್ಯಾರ್ಥ್ಯಾಂಕ ಬಹುಮಾನ ವಾಂಟಿಲೆ. ವಿದ್ಯಾರ್ಥಿವೇತನ ಘೆತ್ತಿಲ್ಯಾಲೆ ನಾಂವ ಶ್ರೀ ಗಣಪತಿ ಶಾನಭಾಗ ತಾನ್ನಿ ವಾಜ್ಜಿಲೆ. ಎಸ್.ಎಸ್.ಎಲ್.ಸಿ. ಆನಿ ಪಿ.ಯು.ಸಿ.ಂತು ಅತ್ಯಧಿಕ ಅಂಕ ಘೇವ್ನು ಬಹುಮಾನ ಘೆತ್ತಿಲೆ ಪ್ರತಿಭಾವಂತ ವಿದ್ಯಾರ್ಥ್ಯಾಂಗೆಲೆ ನಾಂವ ಶ್ರೀ ಸದಾನಂದ ನಾಯಕ್ ತಾನ್ನಿ ವಾಚ್ಚಿಲೆ.
ಹುಬ್ಬಳ್ಳಿ ಸಮಾಜಾಚೆ ಇತಿಹಾಸಾಂತೂ ಪಯಲೆ ಪಂತಾ ಸಮಾಜಡೇ ಕಾರ್ಯಕ್ರಮಾಂತು ಏಕ ವಿನೂತನ ಪ್ರಯೋಗ ಕೆಲೀಲೆ. ಶ್ರೀಮತಿ ಸ್ವಾತಿ ಸದಾನಂದ ಕಾಮತ ತಾನ್ನಿ ಮುಖೇಲ ಸೊಯರೆ ಶ್ರೀ ಜಗನ್ನಾಥ ಪೈ ತಶೀಚಿ ಶ್ರೀಮತಿ ಶಾಂತ ಪೈ ದಂಪತಿ ಬರಶಿ ವೈಶಿಷ್ಠ್ಯಪೂರ್ಣ ಜಾವನು ಪರಿಸಂವಾದ ಚಲೋನು ನೂತನ ಪರಂಪರೆಕ ಶ್ರೀಕಾರ ಘಾಲ್ಲಿ. ಆಪಣೇಲೆ ವಗವೆಗಳೆ ಸ್ಥಿತ್ಯಂತರಾಚೆ ಮಾಹಿತಿ ದಿಲೀಲೆ ಶ್ರೀ ಜಗನ್ನಾಥ ಪೈ ಮಾಮ್ಮಾನಿ ಆಪ್ಪಣ ರುಪ್ಯಾ ಚಮಚೊ ತೊಂಡಾಂತು ದವರೂನು ಜನ್ಮ್ಯಿಲೊ ನ್ಹಂಹಿ ಎಸ್.ಎಸ್.ಎಲ್.ಸಿ. ಶಿಕ್ಕೂನು ಭವಿಷ್ಯ ಸೊದ್ದುನು ಹುಬ್ಳಿಕ ಯವ್ನು ದಿ|| ರಂಗಪ್ಪಾ ಕಾಮತ್ ಮಾಮ್ಮಾಲೆ ಎಸ್.ಟಿ. ಕ್ಯಾಂಟಿನ್ನಾಂತು ನೌಕರಿಕ ಸೇರ್‍ವಲೊ. ಮಾಗಿರಿ ಬೆಂಗಳೂರಾಕ ವಚ್ಚುನು ಥಂಯಿ ವರೇನ ಸ ವರ್ಷ ಕಾಮ ಕೆಲ್ಲೆ. ಮಾಗಿರಿ ಬೆಂಗಳೂರ್‍ಚೆ ಗಾಂಧಿ ನಗರಾಂತು ಸ್ವಂತ ಹೊಟೇಲ್ ಆರಂಭ ಕೆಲ್ಲೆ. ಶಾಂತಾಕ ವ್ಹರಡಿಕ ಜಾಲ್ಲ ನಂತರ ಡಬಲ್ ರೋಡಾಂತು ಆರಂಭ ಕೆಲೀಲೆ ಹೊಟೇಲ್ಲಽಚಿ ಮೆಗೆಲೆ ಟರ್ನಿಂಗ ಪಾಯಿಂಟ್. ಐಷರಾಮಿ ಹೊಟೇಲ್ ಕೊರಕಾ ಮ್ಹಣ್ಚೆ ಆಶಾ ಮಾಕ್ಕಾ ಆಶ್ಶಿಲೆ. ಬೆಂಗಳೂರಾಂತು ಪಾಂಚ ತಸ್ಸಾಲೇಚಿ ತೀನ ಹೋಟೆಲ್ ದುಸರೆ ಗಾಂವಾಂತು ಕೊರನು ಒಟ್ಟು ಆಠ ಹೋಟೆಲ್ ಆರಂಭ ಕೆಲ್ಲ್ಯಾ. ಬೆಂಗಳೂರು ನ್ಹಂಹಿಸಿ ಹುಬ್ಬಳ್ಳಿ, ಮೈಸೂರು ಆನಿ ತಿರುಪತಿಂತು ಆಮ್ಗೆಲೆ ಗ್ರೂಪಾಚೆ ಹೋಟೆಲ್ಸ್ ಆಸ್ಸಾ ಮ್ಹೊಣು ಸಾಂಗ್ಲೆ. ಆನಿ ಕಠಿಣ ಪರಿಶ್ರಮ ಸೋಡ್ನು ಯಶ ಪಾವಚಾಕ ವೆಗಳೆ ವಾಟ ನಾ. ಪರಿಶ್ರಮ ಬರಶಿ ಪ್ರಾಮಾಣಿಕಪಣ, ಟೈಮ್ ಕೀಪಿಂಗ್ ಆನಿ ಸಾಂಗಿಲೆ ಉತ್ರಾ ಪ್ರಮಾಣೆ ಚೊಲ್ಚೆ ಗುಣ ಆಸ್ಸುಕಾ ಮ್ಹಳ್ಳೆ. ತಾಂಗೆಲೆ ಬಾಯ್ಲ ಶ್ರೀಮತಿ ಶಾಂತಾ ಪೈ ಮಾಮಿನಿ ಕೋಣಾಂಕ ಜಾಲಯಾರೀಚಿ ಮನ ಸ್ವಸ್ಥ ದವರೂನು ಘೆತಲೇರಿ ಖಂಚೇ ವಯಾಂತು ಯಶ ಪಾವಚಾಕ ಸಾಧ್ಯ ಆಸ್ಸಾ ಮ್ಹೊಣು ಸಾಂಗ್ಲೆ.
ಪರಿಸಂವಾದಾಚೆ ಉಪರಾಂತ ಸಮಾಜಾಧ್ಯಕ್ಷ ಶ್ರೀ ರಮೇಶ ಪಿ. ನಾಯಕ ತಾನ್ನಿ ಆಪಣೇಲೆ ಅಧ್ಯಕ್ಷಿಯ ಭಾಷಣ ಕೊರನು ಸಮಾಜಾಚೆ ಮ್ಹಾಲ್ಗಡ್ಯಾಲೆ ಸೇವಾ ಆನಿ ದಾನಾನಿ ಹುಬ್ಳಿ ಸಮಾಜ ಇತ್ಲೆ ಉನ್ನತ ಜಾವ್ನು ರಾಬ್ಲ್ಯಾ ಮ್ಹೊಣು ಯಾದ ಕೊರನು ಘೆತ್ಲೆ. ಅಖೇರಿಕ ಶ್ರೀ ಸದಾನಂದ ಕಾಮತ್ ತಾನ್ನಿ ಆಬಾರ ಮಾನಲೆ
ಫೋಟೊ ಕೃಪೆ : ಶ್ರೀ ಸುದರ್ಶನ ಕಾಮತ, ಹುಬ್ಬಳ್ಳಿ