ಬಂಟ್ವಾಳಾಚೆ ಲಾಗ್ಗಿಚೆ ಬರಿಮಾರು ಮಹಾಮಾಯಾ ದೇವಳಾಚೆ ಮೈದಾನಾಂತು ೭ವೇಂ ವರ್ಷಾಚೆ ಜಿ ಎಸ್ ಬಿ ಸಮಾಜ ವೈದಿಕ ಕ್ರೀಡೋತ್ಸವ ಆರ್ತಾ ಸಂಪನ್ನ ಜಾಲ್ಲೆ.
ಕ್ರಿಕೆಟ್ ಟೂರ್ನಿಚೆ ೭ ವೇಂ ಆವೃತ್ತಿ ಮೈದಾನಾಂತು ಸಕ್ಕಾಣಿ ಸೂರು ಜಾವ್ನು ಚಾನ್ನಿ ಹುಜವಾಡಾಂತು ಮಸ್ತ ಯಶಸ್ವಿ ಜಾವ್ನು ಸಂಪನ್ನ ಜಾಲ್ಲೆ.
ಹೇಂ ಕ್ರೀಡೋತ್ಸವಾಂತು ವಾಂಟೊ ಘೆವಚಾಕ ರಾಜ್ಯಾಚೆ ವೆಗವೆಗಳೆ ಜಿಲ್ಲ್ಯಾಚಾನ ಆಯ್ಯಿಲೆ ವೈದಿಕ ಅಪಾರ ಉಮೇದಾನಿ ಖೇಳು ಖೆಳ್ಳೆ.
ಒಟ್ಟು ಆಠ ಪಂಗಡ ವಾಂಟೊ ಘೆತ್ತಿಲೆ ಅವಂದೂಚೆ ವೈದಿಕ ಕ್ರೀಡೋತ್ಸವ ಹೇಂ ಟೂರ್ನಿಂತು ಅನೇಕ ರಣರೋಚಕ ಪಂದ್ಯ ಚೋಲ್ನು, ಅಖೇರಿಕ ಫೈನಲ್ ಪಂದ್ಯಾಂತು ಸುಧೇಶ್ ಭಟ್ ತಾಂಗೆಲೆ ಸಮರ್ಥ ನಾಯಕತ್ವಾರಿ ಖೆಳ್ಳಿಲೆ ಭಟ್ಜಿಸ್ ಸೂಪರ್ ಕಿಂಗ್ಸ್ ಪಂಗಡ ಸಾರಸ್ವತ್ ವೈದಿಕ್ಸ್ ಪಂಗಡಾಕ ಹಾರೋನು ವೈದಿಕ ಕ್ರೀಡೋತ್ಸವಾಚೆ ೭ಚೆ ಆವೃತ್ತಿಂತು ೫ ವೇಂ ಪಂತಾ ಚಾಂಪಿಯನ್ಸ್ ಜಾಲ್ಲೆ. ಸಾರಸ್ವತ್ ವೈದಿಕ್ಸ್ ಪಂಗಡ ರನ್ನರ್-ಅಪ್ ಪ್ರಶಸ್ತಿಕ ತೃಪ್ತಿ ಪಾವ್ಲೆ.
ಟೂರ್ನಿಂತು ಸಾರಸ್ವತ್ ವೈದಿಕ್ಸ್ ಪಂಗ್ಡಾಚೆ ಜಿ.ಕೆ ಭಟ್ ತಾನ್ನಿ ಸರಣಿ ಶ್ರೇಷ್ಠ ಪ್ರಶಸ್ತಿ, ಭಟ್ಜಿಸ್ ಸೂಪರ್ ಕಿಂಗ್ಸ್ ಪಂಗ್ಡಾಚೆ ಸುಧೇಶ್ ಭಟ್ ತಾಂಕಾ ಬೆಸ್ಟ್ ಬ್ಯಾಟ್ಸಮನ್ ಪ್ರಶಸ್ತಿ ಮೆಳ್ಳೆ. ತ್ಯಾಂಚಿ ಪಂಗ್ಡಾಚೆ ವೇದಾಂತ್ ಭಟ್ ತಾನ್ನಿ ಕ್ರಿಕೆಟ್ ಟೂರ್ನಿಚೆ ಬೆಸ್ಟ್ ಬೌಲರ್ ಪ್ರಶಸ್ತಿಕ ಭಾಜನ ಜಾಲ್ಲೆ.
ಟೂರ್ನಿಂತು ಮಹಾಮಾಯಾ ಬರಿಮಾರು ಪಂಗಡ ತೀಸರೇಚೆ ತಶೀಚಿ ರಾಯಲ್ ಚಾಲೆಂಜರ್ಸ್ ಪಂಗಡ ಚಾರೀಚೆ ಸ್ಥಾನ ಘೆತ್ಲೆ.
ಹೇ ಟೂರ್ನಿಚೆ ಮಧೇಂತು ಮಂಗಳೂರ್ಚೆ ವೀರ ವೆಂಕಟೇಶ ದೇವಳಾಚೆ ಸ್ವಯಂ ಸೇವಕ ತಶೀಚಿ ವೈದಿಕಾಂಗೆಲೆ ಪಂಗ್ಡಾ ಮಧೇ ಪ್ರದರ್ಶನ ಪಂದ್ಯ ಚಲ್ಲೆ.
ಕಾರ್ಯಕ್ರಮಾಚೆ ವೇಳ್ಯಾರಿ ವಾಂಟೊ ಘೆತ್ತಿಲೆ ಎರ್ಸ ಖೇಳಗಾರಾಂಕ ಆನಿ ಪ್ರೇಕ್ಷಕಾಂಕ ರುಚಿಕರ ಜಾಲೀಲೆ ಜವಣ-ಖಾಣ ಆನಿ ಥಂಡ ಪಾನೀಯಾಚೆ ವ್ಯವಸ್ಥಾ ಕೆಲೀಲೆ.
ವೈದಿಕ ಕ್ರೀಡೋತ್ಸವ ಮುಖಾಂತರ ಏಕತಾ, ಮೈತ್ರ ಆನಿ ವೈದಿಕ ಲೋಕಾಂಗೆಲೆ ಮಧೇಚೆ ಬಾಂಧವ್ಯ ಆನಿ ಇತ್ಲೆ ಚ್ಹಡ ಕೊರಚಾಂತು ಹೇ ಈ ಕ್ರೀಡೋತ್ಸವು ಮುಖೇಲ ಪಾತ್ರ ಘೆತಲ್ಯಾ ಮ್ಹೊಣು ಉಪಸ್ಥಿತ ಲೋಕಾನಿ ಅಭಿಪ್ರಾಯ ಪಾವ್ಲೆ.
ಪಂದ್ಯಾಟಾಚೆ ಅಖೇರಿಕ ಚಲೀಲೆ ಬಹುಮಾನ ವಿತರಣಾ ಕಾರ್ಯಕ್ರಮಾಂತು ವೈದಿಕ ಕ್ರೀಡೋತ್ಸವಾಚೆ ಮುಖೇಲ ಸಂಯೋಜಕ ಜಾಲೀಲೆ ಕಾಶೀನಾಥ್ ಆಚಾರ್ಯ ಮಂಗಳೂರು, ಬರಿಮಾರು ಮಹಾಮಾಯಾ ದೇವಳಾಚೆ ಧರ್ಮದರ್ಶಿ ಜಾಲೀಲೆ ರಾಕೇಶ್ ಪ್ರಭು ತಶೀಚಿ ರವೀಶ್ ಪ್ರಭು ಬರಿಮಾರು ತಾನ್ನಿ ಬಹುಮಾನ ವಾಂಟಿಲೆ. ಗೋಪಿ ಭಟ್ ತಾನ್ನಿ ಕಾರ್ಯಕ್ರಮಾಚೆ ನಿರೂಪಣ ಕೆಲ್ಲಿ.. ಸಾತ್ವಿಕ್ ಪ್ರಭು, ದೇವಣ್ಣ ಭಟ್ ತಾನ್ನಿ ಸಹಕಾರ ದಿಲ್ಲಿ.