ಗಂಗೊಳ್ಳಿಚೆ ಜಿ‌ಎಸ್‌ಬಿ ಮಹಿಳಾ ಮಂಡಳಿ ತರಪೇನಿ ಸಾಮೂಹಿಕ ಚೂಡಿ ಪೂಜನ ಗಂಗೊಳ್ಳಿಚೆ ಮಲ್ಯರಮಠ ಶ್ರೀ ವೆಂಕಟರಮಣ ದೇವಳಾಂತು ಆಯ್ತವಾರ ಚಲ್ಲೆ. ಶ್ರಾವಣ ಮಾಸಾಂತು ಗೌಡ ಸಾರಸ್ವತ ಸಮಾಜಾಚೆ ಸುವಾಸಿನಿ ಬಾಯ್ಲಮನ್ಶೆಂಕ ಶ್ರೇಷ್ಠ ಆಚರಣೆಂತು ಏಕ ಜಾಲೀಲೆ ಚೂಡಿ ಪೂಜನ ರೀತಿ-ರಿವಾಜ ಪ್ರಕಾರ ಸಾಮೂಹಿಕ ಜಾವ್ನು ಚಲಯಿಲೆ. ತುಳಸಿ ಕಟ್ಟೆ ಮುಖಾರಿ ದೀವಲಿ (ನೀಲಾಂಜನ) ಲಾವ್ನು ದವರೂನು, ತುಳಸಿ ಮಾತೆಕ ಉದ್ದಾಕ ಘಾಲ್ನು ಹಳದಿ-ಕುಂಕುಮು, ಗಾಂಧ ಲಾವ್ನು, ಪಾನ್ನಾವೀಡೊ, ಘರ್‍ಚಾನ ಬಾಂದೂನು ಘೇವ್ನು ಆಯಲೀಲೆ ಆಕರ್ಷಕ ಚೂಡಿ ತುಳಸಿಕ ಸಮರ್ಪಣ ಕೆಲ್ಲಿ. ಮಾಗಿರಿ ನಾರ್‍ಲಕೇಳಿ, ಪಂಚ್ಕಾದಾಯಿ ನೈವೇದ್ಯ ಕೊರನು ಮಂಗಳಾರತಿ ಕೆಲ್ಲೆ. ಮಾಗಿರಿ ತುಳಸಿಕ ಪಾಂಚಪಾಂಚ ಪ್ರದಕ್ಷಿಣ ಘಾಲ್ನು, ಪ್ರತಿ ಪ್ರದಕ್ಷಿಣೆಂತು ತುಳಸಿಕ ತಶೀಚಿ ಸೂರ್ಯ ದೇವಾಕ ಅಕ್ಷತ ಸಮರ್ಪಣ ಕೊರನು ತಾಂಕಾ, ಘರಾಣಿಕ ಚಾಂಗ ಕೊರನು ದೀ ಮ್ಹೊಣು ಮಾಗ್ಲಿಂತಿ.
ಸಮಾಜಾಚೆ ಹರಯೇಕಾಂಕ ಆರೋಗ್ಯ, ಆಯುಷ್ಯ, ಗೃಹಿಣಿಂಕ ಅಖಂಡ ಸುವಾಸಿನಪಣ ಭಾಗ್ಯ ದಿವನು, ಕುಟುಂಬಾಚೆ ಪ್ರತಿ ಸದಸ್ಯಾಂತು ವಿಶ್ವಾಸ ಸಂಬಂಧ, ಸಂತೋಷ ನಿರಂತರ ಜಾವ್ನು, ಚಾಂಗ ಜಾವ್ನು ಉರೋ ಮ್ಹೊಣು ಸೂರ್ಯದೇವಾಲೆಂ ಆನಿ ತುಳಸೀ ಸನ್ನಿದಿಂತು ಕುಲ ದೇವಾಕ ಸ್ಮರಣ ಕರತಾ ಮಾಗಣಿ ಕೆಲ್ಲೆ.
ಜಿ‌ಎಸ್‌ಬಿ ಮಹಿಳಾ ಮಂಡಳಿ ಅಧ್ಯಕ್ಷೆ ವಿಜಯಶ್ರೀ ವಿ.ಆಚಾರ್ಯ, ಕಾರ್ಯದರ್ಶಿ ವೈಭವಿ ವಿ.ಶೆಣೈ, ದೇವಳಾಚೆ ಪ್ರಧಾನ ಅರ್ಚಕ ಎಸ್.ವೆಂಕಟರಮಣ ಆಚಾರ್ಯ, ದೇವಳಾಚೆ ಆಡಳಿತ ಮೊಕ್ತೇಸರ ಎನ್.ಸದಾಶಿವ ನಾಯಕ್, ಮಹಿಳಾ ಮಂಡಳಿ ಸದಸ್ಯ, ಸಮಾಜ ಬಾಂದವ ಹೇ ವೇಳ್ಯಾರಿ ಉಪಸ್ಥಿತ ವ್ಹರಲೀಲೆ.