ಕೊಂಕಣಿ ಸಾಹಿತ್ಯ್‌ ಅಕಾಡೆಮಿ ಥಾವ್ನ್‌ ಸಾಹಿತ್ಯ್‌ ಸಂಭ್ರಮ್‌ ಆನಿ ಕವಿಗೋಷ್ಟಿ ಕಾರ್ಯೆಂ

ಕರ್ನಾಟಕ ಕೊಂಕಣಿ ಸಾಹಿತ್ಯ್‌ ಅಕಾಡೆಮಿನ್‌ 03.08.2025ವೆರ್‌ ಕಾರ್ಕಳ್‌ ನಕ್ರೆಚೊ ಮಾಲ್ಗಡೊ ಸಾಹಿತಿ ಮಾನೆಸ್ತ್‌ ಜೋರ್ಜ್‌ ಕ್ಯಾಸ್ತೆಲಿನೊ ಹಾಂಚ್ಯಾ ಘರ್ಚ್ಯಾ ಆಂಗ್ಣಾಂತ್ ಕಲಾಂಜಲಿ ವೆದಿರ್ ʼಸಾಹಿತ್ಯ್‌ ಸಂಭ್ರಮ್-2‌ʼ ಆನಿ ʼಕಾವ್ಯಾಂ- ವ್ಹಾಳೊ-5ʼ ಕಾರ್ಯೆಂ ಸಾದರ್‌ ಕೆಲೆಂ. ಕಾರ್ಯಾಚೆ ಅಧ್ಯಕ್ಷ್‌ ಸ್ಥಾನ್‌ ಸೊಬಯಿಲ್ಲ್ಯಾ ಅಕಾಡೆಮಿ ಅಧ್ಯಕ್ಷ್ ಮಾನೆಸ್ತ್ ಜೋಕಿಂ ಸ್ಟ್ಯಾನಿ ಆಲ್ವಾರಿಸಾನ್‌ ಆಪ್ಲ್ಯಾ ಪ್ರಾಸ್ತಾವಿಕ್‌ ಉಲೊವ್ಪಾಂತ್, ʼಸಾಹಿತ್ಯ್‌ ಸಂಭ್ರಮ್‌ ಆಮ್ಚ್ಯಾ ಜೀವನಾಚೊ ಸಂಭ್ರಮ್‌ ಜಾಯ್ಜೆ. ಸಗ್ಳ್ಯಾಂನೀ ಕೊಂಕ್ಣಿಚೊ ಗಾಜ್‌ ಆಯ್ಕಾಜೆ.ʼ ಮ್ಹಣ್‌ ಉಲೊ ದೀವ್ನ್ ಜಮ್ಲಲ್ಯಾ ಸರ್ವಾಂಕ್‌ ಬರೊ ಯೆವ್ಕಾರ್‌ ಮಾಗ್ಲೊ.

ಮುಕೆಲ್‌ ಸಯ್ರೊ ಮಾ|ಬಾ| ಲುವಿಸ್‌ ಡೆಸಾ ಉಲೊವ್ನ್‌, ʼಕೊಂಕ್ಣಿ ಆಮ್ಚೊ ಜೀವ್‌ ಜಾಯ್ಜಯ್.‌ ಸಾಹಿತ್ಯ್‌ ರಚ್ತೆಲೆ ಸಬಾರ್‌ ಜಣ್‌ ಆಸ್ಲ್ಯಾರ್‌ಯೀ, ವಾಚ್ತೆಲೆ ಭೋವ್‌ ಉಣೆಂ ಆಸಾತ್.‌ ಆಮ್ಚ್ಯಾ ಮಾಂಯ್‌ಭಾಶೆಂತ್‌ ಸಾಹಿತ್ಯ್‌ ವಾಚುನ್‌, ಸಮ್ಜೊನ್‌ ಕಾಣ್ಘೆಂವ್ಚೆ ಪ್ರೇತನ್‌ ಕರಿಜಾಯ್ʼ ಮ್ಹಣ್‌ ಉಲೊ ದಿಲೊ.

ಹ್ಯಾ ಸಂದರ್ಭಾರ್‌ ವಿವಿಧ್‌ ಭಾಸಾಂನಿಂ ರಾಮಾಯಣ್‌ ಬರಯಿಲ್ಲ್ಯಾ ಫಾಮಾದ್‌ ಸಾಹಿತಿ ಆನಿ ಛಂದೋಶಾಸ್ತ್ರ್‌ ತಜ್ಞ್‌ ಮಾನೆಸ್ತ್‌ ನಾರಾಯಣ ಎಸ್.‌ ಗವಾಳ್ಕರ್‌ ಹಾಂಕಾ ಸನ್ಮಾನ್‌ ಕೆಲೊ.

ಹ್ಯಾ ಕಾರ್ಯಾವೆಳಿಂ ಪಾಟ್ಲ್ಯಾ ದಿಸಾಂನಿಂ ದೆವಾಧಿನ್‌ ಜಾಲ್ಲ್ಯಾ ಅಕಾಡೆಮಿ ಮಾಜಿ ಅಧ್ಯಕ್ಷ್‌ ಡಾ| ಜಗದೀಶ್‌ ಪೈ ಹಾಂಕಾ ಶೃದ್ದಾಂಜಲಿ ಅರ್ಪಿಲಿ. ಅಕಾಡೆಮಿಚೊ ಮಾಜಿ ಸಾಂದೊ ಮಾನೆಸ್ತ್‌ ಅರುಣ್‌ ಜಿ. ಶೇಟ್‌ ಹಾಂಣಿಂ ಉತ್ರಾಂಜಲಿ ಅರ್ಪುನ್‌ ಸಾಸಣ್‌ ವಿಶೆವ್‌ ಮಾಗ್ಲೊ. ಹಾಂಚ್ಯಾ ತಸ್ವೀರೆಕ್‌ ಜಗದೀಶ್‌ ಮಾಮಾಚಿ ಪತಿಣ್‌ ಡಾ| ನಂದಾ ಪೈ, ಪೂತ್‌ ಅಜಯ್‌ ಪೈ, ಅಕಾಡೆಮಿ ಅಧ್ಯಕ್ಷ್‌, ಸಾಂದೆಂ ಆನಿ ಇತರ್‌ ಗಣ್ಯ್‌ ವ್ಯಕ್ತಿಂನಿಂ ಫುಲಾಂ ಅರ್ಪುನ್‌ ಶೃದ್ದಾಂಜಲಿ ಭೆಟಯ್ಲಿ. ಉಪ್ರಾಂತ್‌ ಡಾ|ನಂದಾ ಪೈ ಉಲೊವ್ನ್‌ ಆಪ್ಲ್ಯಾ ಪತಿಚ್ಯಾ ಜಿಣ್ಯೆ ವಿಶ್ಯಾಂತ್‌ ಕಾಳ್ಜಾಚಿ ಭೊಗ್ಣಾಂ ಉಚಾರ್ಲಿಂ.

ಮಾಲ್ಗಡೊ ಸಾಹಿತಿ ಆನಿ ನಿವೃತ್‌ ಶಿಕ್ಷಕ್‌ ರಾಷ್ಟ್ರಪತಿ ಪ್ರಶಸ್ತಿ ವಿಜೇತ್‌ ಮಾನೆಸ್ತ್‌ ಜೋರ್ಜ್‌ ಕ್ಯಾಸ್ತೆಲಿನೊ ಹಾಂಚೆಂ ಸಂಗಿಂ ಮಾನೆಸ್ತ್‌ ಎಲ್ಸನ್‌ ಡಿಸೋಜ, ಹಿರ್ಗಾನ್‌ ಹಾಂಣಿಂ ಸಂವಾದ್‌ ಚಲೊವ್ನ್‌ ವೆಲೊ.

ʼಕಾವ್ಯಾಂ- ವ್ಹಾಳೊ-5ʼ ಕವಿಗೋಷ್ಟಿಂತ್‌ ಫಾಮಾದ್‌ ಕೊಂಕ್ಣಿ ಕವಿಂನಿಂ ಆಪ್ಲ್ಯೊ ಕವಿತಾ ವಾಚನ್‌ ಕೆಲ್ಯೊ. ಮಾನೆಸ್ತಿಣ್‌  ಲವೀಟಾ ಡಿಸೋಜ, ನಕ್ರೆ ಹಿಣೆಂ ಕವಿಗೋಷ್ಟಿ ಚಲೊವ್ನ್‌ ವೆಲಿ. ಮಾನೆಸ್ತ್‌ ರಾಮಚಂದ್ರ ಪೈ, ಮಾನೆಸ್ತಿಣ್ ಪ್ರಮೀಳಾ ಫ್ಲಾವಿಯಾ, ಕಾರ್ಕಳ್‌,  ಮಾನೆಸ್ತ್‌ ರಾಘವೇಂದ್ರ ಪ್ರಭು, ಕರ್ವಾಲು, ಮಾನೆಸ್ತ್‌ ಓಜ್ವಾಲ್ಡ್ ಮರಿಯನ್ ಡಿಸೋಜ, ಡಾ| ಸುಮತಿ ಪಿ., ಮಾನೆಸ್ತ್‌ ಪ್ರಕಾಶ್ ಮಾರ್ಟಿಸ್, ಮಾನೆಸ್ತ್‌ ಕಾಂತಾವರ ಶಿವಾನಂದ ಶೆಣೈ, ಮಾನೆಸ್ತ್‌ ರೋಬರ್ಟ್ ಮಿನೇಜಸ್ ಕಣಜಾರ್, ಮಾನೆಸ್ತಿಣ್ ಸೀಮಾ ಕಾಮತ್, ಮಾನೆಸ್ತ್‌ ಪ್ರಕಾಶ್ ಡಿಸೋಜ ಅಜೆಕಾರ್-‌ ಹಾಂಣಿಂ ಆಪಾಪ್ಲ್ಯೊ ಕವಿತಾ ಸಾದರ್‌ ಕೆಲ್ಯೊ.

ಕಾರ್ಯಾಚೊ ಸದಸ್ಯ್‌ ಸಂಚಾಲಕ್‌ ದಯಾನಂದ್‌ ಮಡ್ಕೇಕರ್‌ ಆನಿ ಅಕಾಡೆಮಿ ಸಾಂದೊ ನವೀನ್‌ ಲೋಬೊ ಹಾಜರ್‌ ಆಸ್‌ಲ್ಲೆ. ಮಾನೆಸ್ತ್‌ ಜೆರಾಲ್ಡ್‌ ಪ್ರಕಾಶ್‌ ಮಾರ್ಟಿಸ್‌ ಹಾಂಣಿಂ ಕಾರ್ಯೆಂ ಚಲೊವ್ನ್‌ ವೆಲೆಂ.