ಗುರು. ಏಪ್ರಿಲ್ 3rd, 2025
    Kapu 1
    Spread the love

    Hale Mariyamma 1
    Hale Mariyamma 2

    ಸುಮಾರ ೨೫೦ ವರ್ಷಾ ಪಶಿ ಮಾಕಶಿ ಪ್ರತಿಷ್ಠಾ ಜಾವನು ಭಕ್ತಾಂಗೆಲೆ ತಾಕೂನು ಕಾಪು ಶಹರಾಚಿ ಆವಯಿ,ಮರಿಯಮ್ಮ, ದಂಡಿನ ಮಾರಿ ಮ್ಹೊಣು ಸಕ್ಕಡ ಆಪೋನು ಘೆತ್ತಾಶ್ಶಿಲಿ ಕಾಪು ಶ್ರೀ ಮಾರಿಯಮ್ಮ ದೇವಾಲೆ ಕಾಲಾವಧಿ ಸುಗ್ಗಿ ಮಾರಿಪೂಜಾ ಉತ್ಸವು ಮಾರ್ಚ್ ೨೫ ಆನಿ ೨೬ಕ ವಿಜೃಂಭಣೆರಿ ಚಲ್ಲೆ. ಕಾಪು ಶ್ರೀ ಹಳೇ ಮಾರಿಯಮ್ಮ ಕ್ಷೇತ್ರ ಇತಿಹಾಸ ಪ್ರಸಿದ್ಧ ಕಾರಣಿಕ ಶಕ್ತಿ ಕೇಂದ್ರ ಜಾವ್ನಾಶ್ಶಿಲೆ. ಕಾಲಾವಧಿ ಸುಗ್ಗಿ ಮಾರಿಪೂಜಾ ವೇಳ್ಯಾರಿ ಶ್ರೀ ಹಳೇ ಮಾರಿಯಮ್ಮ ದೇವಿಲೆ ಸನ್ನಧಿಂತು ಕಾಪು ಶ್ರೀ ವೆಂಕಟರಮಣ ದೇವಳಾಚಾನ ಸ್ವರ್ಣಾಭರಣ ಸಹಿತ ರಜತ ರಥೋತ್ಸವಾಚೆ ಮೆರವಣಿಗಾ ಚಲ್ಲೆ. ಮಾಗಿರಿ ರುಪ್ಯಾ ಉಯ್ಯಾಲೆಂತು ಗೋಪುರೋತ್ಸವ, ತಮಾಶಾ ವಾಕ್ದ ಲಾಸ್ಸುಚೆ ಪ್ರದರ್ಶನ, ಮಹಾಪೂಜಾ, ದರ್ಶನ ಸೇವಾ, ಅಭಯ ಪ್ರಸಾದ ಸಹಿತ ವೆಗವೆಗಳೆ ಕಾರ್ಯಕ್ರಮ ಚಲ್ಲೆ. ಕಾಪು ಶ್ರೀ ಹಳೇ ಮಾರಿಯಮ್ಮ ದೇವಳಾಂತು ಪ್ರತಿ ಮಂಗಳವಾರ ಧೋಂಪಾರಾ ದೇವಾಲೆ ದರ್ಶನ ತಶೀಚಿ ಅನ್ನ ಸಂತರ್ಪಣ ಆಸತಾ. ಶ್ರೀ ಹಳೇ ಮಾರಿಯಮ್ಮ ದೇವಳಾಚೆ ಜೀರ್ಣೋದ್ಧಾರ ಮಹಾಸಂಕಲ್ಪ ಪೂರ್ವಭಾವಿ ಜಾವನು ಘಾಲ್ನು ಘೆತ್ತಿಲೆಸಮಗ್ರ ಜೀರ್ಣೋದ್ಧಾರ ಮಹಾಸಂಕಲ್ಪ ಮೂಲನಿಧಿ ಸಮರ್ಪಣಾ ಮಹಾ ಅಭಿಯಾನ, ಲಾಂಛನ ಅನಾವರಣ ಆನಿ ಭಕ್ತಾಂಕ ಕಾಣಿಕಾ ಡಬ್ಬಿ ವಿತರಣಾ ಧಾರ್ಮಿಕ ಸಭಾ ಕಾರ್ಯಕ್ರಮ ಆರತಾ ದೇವಳಾಚೆ ಪ್ರಧಾನ ಅರ್ಚಕ ವೇ| ಮೂ| ಕೆ. ಕಮಲಾಕ್ಷ ಭಟ್ ತಾನ್ನಿ ವ್ಹರಲೀಲೆ ಗಣ್ಯಾಂಗೆಲೆ ಬರಶಿ ಮೇಳ್ನು ಉದ್ಘಾಟನ ಕೆಲ್ಲಿ.


    ಲಾಂಛನ ಅನಾವರಣ ಮಂಗಳೂರು ವೆಂಕಟರಮಣ ದೇವಳಾಚೆ ಧಾರ್ಮಿಕ ವಿದ್ವಾಂಸ ಡಾ| ಎಂ. ಪಂಡಿತ್ ನರಸಿಂಹ ಆಚಾರ್ಯ ತಾನ್ನಿ ಕೆಲ್ಲಿ. ಕಾಪುಚೆ ಮಸ್ತ ಇತ್ಲೆ ದೇವಳಾಚೆ ಜೀರ್ಣೋದ್ದಾರ ಘಡ್ಲೆ ಮಾಗಿರಿ ಹಳೇ ಮಾರಿಯಮ್ಮ ದೇವಳಾಚೆ ಸಮಗ್ರ ಜೀರ್ಣೋದ್ದಾರಾಕ ವರೇನ ಮುಹೂರ್ತ ಕೂಡೂನು ಆಯ್ಲೆ ಮ್ಹೊಣು ಸಾಂಗ್ಲೆ.
    ಕಾಪು ಶ್ರೀ ಹಳೇ ಮಾರಿಯಮ್ಮ ದೇವಿಲೆ ಕೃಪೇನಿ ಜೀವನಾಂತು ಯಶ, ಸಂಪತ್ತಿ, ನಾಂವ ಸಕ್ಕಡ ಜೊಡಲೀಲೆ ಶಾಸಕ ಗುರ್ಮೆ ಸುರೇಶ ಶೆಟ್ಟಿ ತಾನ್ನಿ ಉಲೋನು ೪೨ ವರಸಾ ಮಾಕಶಿ ಗಾಂವ ಸೋಡ್ನು ವೆಗಳೆ ಗಾಂವಾಕ ವತ್ತನಾ ಹಾತ್ತಾಂತು ಆಶ್ಶಿಲೆ ಶ್ರೀ ಮಾರಿಯಮ್ಮ ದೇವಿಲೆಂ ಪ್ರಸಾದ ಮಾತ್ರ, ತ್ಯಾ ಪ್ರಸಾದಚಿ ಆಜಿ ಮಾಕ್ಕಾ ಇತ್ತುಲೆ ಎತ್ರಾಕ ವಾಡ್ಡಯಲಾ, ಕಾಪು ಅವಯಿ ಮುಖಾರ್‍ಸುನು ವ್ಹರತಾ ಮ್ಹಣ್ಚೆ ವಿಶ್ವಾಸಾರಿ ಮುಖಾರ ಸೊರ್‍ಯಾ, ಆಮ್ಮಿ ಸಕ್ಕಡ ಮೇಳ್ನು ಸಂಕಲ್ಪ ಕೊರ್‍ಯಾ, ಶ್ರೀ ಹಳೇ ಮಾರಿಯಮ್ಮ ದೇವಿಲೆ ಜೀಣೋದ್ಧಾರ ತ್ಯಾ ಅವಯಿಲೆ ನೇತೃತ್ವಾರಿ ಚಲ್ತಾ ಮ್ಹಳ್ಳೆ.
    ಶ್ರೀ ಹಳೇ ಮಾರಿಗುಡಿಚೆ ಜೀರ್ಣೋದ್ಧಾರಾಕ ಮೂಲನಿಧಿ ಸಂಗ್ರಹಣಾ ಅಭಿಯಾನಾಕ ಚಾಲನಾ ದಿತ್ತಾ ಆಸ್ಸುಚೆ ಆಮ್ಗೆಲೆ ಸಕಡಾಲೆ ಸೌಭಾಗ್ಯ ಮ್ಹೊಣು ಸಾಂಗಿಲೆ ಮಾಜಿ ಸಚಿವ ವಿನಯ್ ಕುಮಾರ್ ಸೊರಕೆ ತಾನ್ನಿ ಮುಖಾರಿ ಉಲೋನು ಕರ್ನಾಟಕ ಕರಾವಳಿಂತು ಶೈಕ್ಷಣಿಕ, ಧಾರ್ಮಿಕ ಆನಿ ವೈದ್ಯಕೀಯ ರಂಗಾಚೆ ಉದರ್ಗತಿಕ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೆ ಲೋಕಾನಿ ದಿಲೀಲೆ ದೇಣಿಗಾ ಅಪಾರ ಜಾವ್ನಾಸ್ಸಾ. ಮ್ಹೊಣು ತಾರೀಪು ಕೊರನು ಶ್ರೀ ಮಾರಿಯಮ್ಮಲೆ ಸನ್ನಿಧಿಂತು ಮೂಲಧನ ಸಂಗ್ರಹ ಅಭಿಯಾನ ಅತ್ಯಂತ ಯಶಸ್ವಿ ಜಾವನು ಚಲೊ ಮ್ಹೊಣು ಶುಭಹಾರೈಕೆ ಕೆಲ್ಲೆ.


    ದೇವಳಾಚೆ ಆಡಳಿತ ಮೊಕ್ತೇಸರ ಪ್ರಸಾದ್ ಗೋಕುಲ್ ದಾಸ್ ಶೆಣೈ ತಾನ್ನಿ ಪ್ರಸ್ತಾವಿಕ ಜಾವ್ನು ಉಲೋನು ಶ್ರೀ ಕಾಶೀ ಮಠಾಧೀಶ ಜಾಲೀಲೆ ಶ್ರೀ ಸಂಯಮೀಂದ್ರತೀರ್ಥ ಶ್ರೀಪಾದ ಸ್ವಾಮ್ಯಾಂಗೆಲೆ ಆಶೀರ್ವಾದ ಬರಶಿ ೨೦೨೩ ಇಸ್ವೆಂತು ಶ್ರೀ ಹಳೇ ಮಾರಿಯಮ್ಮ ಸನ್ನಿಧಾನಾಚೆ ಜೀರ್ಣೋದ್ಧಾರ ಆನಿ ಸುತ್ತುಪೌಳಿ ಪುನರ್ ನಿರ್ಮಾಣಾಕ ಮುಷ್ಟಿಕಾಣಕಾ ಸಮರ್ಪಣೆ ಮುಖಾಂತರ ಚಾಲನಾ ದಿಲೀಲೆ. ಕಾಪು ಲೋಕಾಂಗೆಲೆ ಮಸ್ತ ಕಾಲಾಚೆ ಸಪನಾ ವರಿ ಜೀರ್ಣೋದ್ದಾರಾಚೆ ಸಂಕಲ್ಪ ದವರೂನು ಘೇವ್ನು ಮೂಲನಿಧಿ ಸಮರ್ಪಣಾ ಮಹಾ ಅಭಿಯಾನಕ ಆಜಿ ಚಾಲನಾ ದಿಲ್ಲ್ಯಾ. ಐತಿಹಾಸಿಕ ಸಾನಿಧ್ಯಾಚೆ ಜೀರ್ಣೋದ್ದಾರಾಕ ಪೂರಕ ಜಾವನು ಸಮಸ್ತ ಭಕ್ತಾಂಕ ಕಾಣ್ಕೆ ಡಬ್ಬೋ ವಾಂಟಿತಾತಿ ಮ್ಹಳ್ಳೆ.
    ಶ್ರೀ ವೆಂಕಟರಮಣ ದೇವಳಾಚೆ ಜೀರ್ಣೋದ್ದಾರ ಸಮಿತಿ ಅಧ್ಯಕ್ಷ ಶ್ರೀ ಗೋಕುಲ್ ದಾಸ್ ಆನಂದ್ರಾಯ ಶೆಣೈ ತಾನ್ನಿ ಅಧ್ಯಕ್ಷಪಣ ಘೆತ್ತಿಲೆ. ಮಾಜಿ ಆಡಳಿತ ಮೊಕ್ತೇಸರ ಶ್ರೀಧರ ಆನಂದ್ರಾಯ ಶೆಣೈ, ಶಾಸಕ ಪ್ರತಾಪ್ ಸಿಂಹ ನಾಯಕ್, ಮಾಜಿ ಶಾಸಕ ಲಾಲಾಜಿ ಆರ್. ಮೆಂಡನ್, ಜಿ‌ಎಸ್‌ಬಿ ಸರ್ವ ದೇವಳಾಚೆ ಒಕ್ಕೂಟಾಚೆ ಅಧ್ಯಕ್ಷ ಅಜಿತ್ ಕುಡ್ವ ಮೂಲ್ಕಿ, ಶ್ರೀ ಹೊಸ ಮಾರಿಗುಡಿ ದೇವಸ್ಥಾನ ಅಭಿವೃದ್ಧಿ ಸಮಿತಿ ಅಧ್ಯಕ್ಷ ಕೆ. ವಾಸುದೇವ ಶೆಟ್ಟಿ , ಶ್ರೀ ಲಕ್ಷ್ಮೀ ಜನಾರ್ದನ ದೇವಳಾಚೆ ಆಡಳಿತ ಮೊಕ್ತಸರ ಮನೋಹರ್ ಎಸ್. ಶೆಟ್ಟಿ, ಮಾಜಿ ಆಡಳಿತ ಮೊಕ್ತಸರ ಮೋಹನ್ ಬಂಗೇರ, ಕಾಪು, ಬಿಲ್ಲವರ ಸಂಘಾಚೆ ಅಧ್ಯಕ್ಷ ವಿಕ್ರಂ ಕಾಪು, ಲಕ್ಷ್ಮೀನಾರಾಯಣ ನಾಯಕ್, ಡಾ| ಕೆ. ನಾಗಾನಂದ ಭಟ್ ಸೊಯರೆ ಜಾವನು ವಾಂಟೊ ಘೆತ್ತಿಲೆ. ದೇವಳಾಚೆ ಸಹಮೊಕ್ತೇಸರ ಆನಿ ಆಡಳಿತ ಮಂಡಳಿ ಸದಸ್ಯ ಉಪಸ್ಥಿತ ವ್ಹರಲೀಲೆ. ಆಡಳಿತ ಮೊಕ್ತೇಸರ ಪ್ರಸಾದ್ ಗೋಕುಲ್ ದಾಸ್ ಶೆಣೈ ತಾನ್ನಿ ಯೇವ್ಕಾರು ಕೆಲ್ಲಿ. ಟ್ರಸ್ಟಿ ರಾಮ ನಾಯಕ್ ತಾನ್ನಿ ಆಬಾರ ಮಾನಲೆ. ಡಾ| ಕೆ. ಸದಾನಂದ ಭಟ್ ತಾನ್ನಿ ಸ್ವರಸಂಚಾಲನ ಕೆಲ್ಲಿ. ಉಪರಾಂತ ಜಮಿಲೆ ಭಕ್ತಾಂಕ ಕಾನ್ಕೆ ಡಬ್ಬೊ ವಾಂಟಿಲೆ.


    Spread the love

    ನಿಮ್ಮದೊಂದು ಉತ್ತರ

    ನಿಮ್ಮ ಮಿಂಚೆ ವಿಳಾಸ ಎಲ್ಲೂ ಪ್ರಕಟವಾಗುವುದಿಲ್ಲ. ಅತ್ಯಗತ್ಯ ವಿವರಗಳನ್ನು * ಎಂದು ಗುರುತಿಸಲಾಗಿದೆ

    error: Content is protected !!
    Chat on Whatsapp
    1
    Scan the code
    Hello 👋
    How can we help you?