ಕಾಪು ಪೇಂಟಾಚೆ ಗೌಡ ಸಾರಸ್ವತ ಸಮಾಜಾಚೆ ಆಡಳಿತಾಂತು ಆಸ್ಸುಚೆ ಕಾಪು ಶ್ರೀ ಹಳೇ ಮಾರಿಯಮ್ಮ ಸನ್ನಿಧಾನ ಸಮಗ್ರ ಜೀರ್ಣೋದ್ದಾರ ಮಹಾ ಸಂಕಲ್ಪ ಪ್ರಯುಕ್ತ ” ಶ್ರೀ ದೇವಿಕ ನವರತ್ನ ಖಚಿತ ಸ್ವರ್ಣ ಸಿಂಹಾಸನ (ಗದ್ದಿಗೆ) ನಿರ್ಮಾಣ ಮಹಾ ಸಂಕಲ್ಪ – ಸ್ವರ್ಣ ಸಮರ್ಪಣಾ ಮಹಾ ಅಭಿಯಾನ” ಕಾರ್ಯಕ್ರಮ ಶ್ರೀ ಹಳೇ ಮಾರಿಯಮ್ಮ ದೇವಿಲೆ ಕಾಲಾವಧಿ ಸುಗ್ಗಿ ಜಾತ್ರೆಚೆ ಪರ್ವ ಕಾಲಾರಿ ಮಾರ್ಚ್ ೨೪, ೨೦೨೬ ದಿವಸು ರಾತ್ತಿಕ ಕಾಪು ಶ್ರೀ ವೆಂಕಟರಮಣ ತಶೀಚಿ ಶ್ರೀ ಹಳೆ ಮಾರಿಯಮ್ಮ ದೇವಳಾಚೆ ಪ್ರಧಾನ ಅರ್ಚಕ ವೇದಮೂರ್ತಿ ಶ್ರೀ ಕಮಲಾಕ್ಷ ಭಟ್ ಮಾಮ್ಮಾನಿ ರತ್ನಖಚಿತ ಗದ್ದುಗೆಚೆ ಚಿತ್ರ ಅನಾವರಣ ಕೊರನು, ಸ್ವರ್ಣ ಸಮರ್ಪಣ ಕೊರಚೆ ಮುಖಾಂತರ ಹೇ ಮಹಾ ಅಭಿಯಾನಾಕ ಸುರುವಾತ ದಿಲ್ಲೆ. ಹೇ ವೇಳ್ಯಾರಿ ಕಾಪು ಶ್ರೀ ವೆಂಕಟರಮಣ ದೇವ್ಳಾಚೆ ಭಂಡಾರಾ ತರಪೇನಿ ಸ್ವರ್ಣ ಗದ್ದುಗೇಕ ಸ್ವರ್ಣಾಭರಣ ಸಮರ್ಪಣ ಕೆಲ್ಲಿ.
ಹೇ ಸಮಾರಂಭ ಉದ್ಘಾಟನ ಕೊರನು ಉಲಯಿಲೆ ಚೇಂಪಿ ಶ್ರೀ ವೆಂಕಟರಮಣ ದೇವಳಾಚೆ ಪುರೇತು ಆನಿ ಅರ್ಚಕ ವಿದ್ವಾನ್ ಚೇಂಪಿ ಶ್ರೀಕಾಂತ್ ಭಟ್ ತಾನ್ನಿ ಉಲೋನು ದೇವಳಾಚೆ ಜೀರ್ಣೋದ್ದಾರಾಚೆ ಮಹತ್ಕಾರ್ಯಾಂತು ವಾಂಟೊ ಘೆವ್ಚೆ ಸದವಕಾಶ ಜೀವನಾಂತು ಏಕ್ಪಟಿ ಮಾತ್ರ ಮೆಳ್ತಾ, ತಶ್ಶಿ ಮ್ಹೊಣು ಸಕಡಾಂಕ ಮೇಳ್ನಾ, ಮ್ಹಾಲ್ಗಡ್ಯಾಲೆ ಪುಣ್ಯ, ದೇವಾಲೆ ಅನುಗ್ರಹಾನಿ ಮಾತ್ರ ಮೆಳಚಾಕ ಸಾಧ್ಯ ಜಾತ್ತಾ. ದೇವಾಕ ಸ್ವರ್ಣಾರ್ಪಣ ಕೊರಚೆ ತಾಕೂನು ಭಾಂಗ್ರಾ ತಸ್ಸಾಲೆ ಜೀವನ ಮೆಳ್ತಾ. ಮ್ಹಳ್ಳೆ. ಆಗಮ ತಶೀಚಿ ಜ್ಯೋತಿಷ್ಯ ವಿದ್ವಾನ್ ಕೊರಂಗ್ರಪಾಡಿ ಶ್ರೀ ಕೆ.ಪಿ. ಶ್ರೀನಿವಾಸ ತಂತ್ರಿ ಮಡುಂಬು ತಾನ್ನಿ ಉಲೋನುನವ ವಿಧ ಭಕ್ತಿಕ ನವರತ್ನ ವಿಷಯಾಂತು ಧಾರ್ಮಿಕ ಉಪನ್ಯಾಸ ದೀವ್ನು, ಖಂಚೆ ರತ್ನ ತಾಕೂನು, ಖಂಚೆ ದೇವಾಲೆ ಸೇವಾ ಕೊರಚೆ ಮುಖಾಂತರ ಅನುಗ್ರಹ ಘೆವ್ಯೇತ ಮ್ಹಣ್ಚೆ ಸಾಂಗ್ಲೆ.
ಕಾಪು ಶ್ರೀ ವೆಂಕಟರಮಣ ತಶೀಚಿ ಶ್ರೀ ಹಳೇ ಮಾರಿಯಮ್ಮ ದೇವಳಾಚೆ ಮಾಜಿ ಆಡಳಿತ ಮೊಕ್ತೇಸರ ಶ್ರೀ ಶ್ರೀಧರ್ ಆನಂದ್ರಾಯ ಶೆಣೈ ತಾನ್ನಿ ಸಮಾರಂಭಾಚೆ ಅಧ್ಯಕ್ಷಪಣ ಘೆತ್ತಿಲೆ. ಕಾಪು ದಂಡತೀರ್ಥ ಪ್ರತಿಷ್ಠಾನಾಚೆ ಅಧ್ಯಕ್ಷ ಶ್ರೀ ಸೀತಾರಾಮ್ ಭಟ್, ಕಟಪಾಡಿ ಎಸ್ ವಿಎಸ್ ವಿಧ್ಯಾವರ್ಧಕ ಶಿಕ್ಷಣ ಸಂಸ್ಥೆಚೆ ಸಂಚಾಲಕ ಉದ್ಯಮಿ ಶ್ರೀ ಸತ್ಯೇಂದ್ರ ಪೈ, ನಿವೃತ್ತ ಅಧ್ಯಾಪಕ ಉದ್ಯಮಿ ಶ್ರೀ ಅನಂತ ಪಡಿಯಾರ್ ಕಾಪು, ಕಾಪು, ಬಿಲ್ಲವ ಸಂಘಾಚೆ ಗೌರವಾಧ್ಯಕ್ಷ ಶ್ರೀ ಪ್ರಭಾಕರ ಪೂಜಾರಿ, ಬೆಂಗಳೂರು ಕಾಶಿಮಠಾಚೆ ಶ್ರೀ ನಾರಾಯಣ ಶೆಣೈ, ಕಾಪು ಮೊಗವೀರ ಮಹಾಸಭಾ ಅಧ್ಯಕ್ಷ ಶ್ರೀ ಕುಶ ಸಾಲ್ಯಾನ್, ಕಾಪು ಶ್ರೀ ಕಾಳಿಕಾಂಬ ದೇವಳಾಚೆ ಆಡಳಿತ ಮೊಕ್ತೇಸರ ಶ್ರೀ ಗಣೇಶ್ ಆಚಾರ್ಯ, ಕಾಪು ದೊರೆಕಲುಗುತ್ತು ಶ್ರೀ ಬಾಲಕೃಷ್ಣ ಶೆಟ್ಟಿ, ಶ್ರೀ ಕೃಷ್ಣಎಸ್ ಶೆಟ್ಟಿ, ಅಯೋಧ್ಯಾ ಕಾಪು ಹಾನ್ನಿ ಸಕಡ್ಯಾನಿ ವಾಂಟೊ ಘೆತ್ತಿಲೆ.
ಕಾಪು ಶ್ರೀ ವೆಂಕಟರಮಣ ತಶೀಚಿ ಶ್ರೀ ಹಳೆ ಮಾರಿಯಮ್ಮ ದೇವಳಾಚೆ ಆಡಳಿತ ಮೊಕ್ತಸರ ಪ್ರಸಾದ್ ಜಿ. ಶೆಣೈ ತಾನ್ನಿ ಪ್ರಾಸ್ತಾವಿಕ ಉತ್ರ ಉಲಯಿಲೆ ಆನಿ ಸಕಡಾಂಕ ಯೇವಕಾರ ಕೆಲ್ಲಿ. ಮೊಕ್ತೇಸರ ರಾಮ ಶಶಿಧರ ನಾಯಕ್ ತಾನ್ನಿ ಆಬಾರ ಮಾನಲೆ. ಡಾ. ಸದಾನಂದ ಭಟ್ ತಾನ್ನಿ ಕಾರ್ಯಕ್ರಮ ನಿರೂಪಣ ಕೆಲ್ಲಿ.
ಹಾಜ್ಜೆ ಪಯ್ಲೆ ಕಾಪು ಶ್ರೀ ವೆಂಕಟರಮಣ ದೇವ್ಳಾ ತಾಕೂನು ಶ್ರೀ ಹಳೇ ಮಾರಿಯಮ್ಮ ದೇವ್ಳಾ ಪರ್ಯಂತ ಶ್ರೀ ಮಾರಿಯಮ್ಮ ದೇವಿಲೊ ಬಿಂಬ ಆನಿ ಚಿನ್ನಾಭರಣ ವೈಭವಾಚೆ ಮೆರ್ವಣೀಗೇರಿ ಹಾಡ್ನು ಪೀಠಾ(ಗದ್ದುಗೆ) ವಯ್ರಿ ದವರೂನು ಮಾರಿಪೂಜೆಕ ಸುರುವಾತ ದಿಲ್ಲಿ. ಹೆರ್ದೀಸು (ಮಾ.೨೫) ಸಾಂಜವಾಳ ಪರ್ಯಂತ ಲಕ್ಷಂತರ ಲೋಕಾನಿ ಯವ್ನು ಶ್ರೀ ಮಾರಿಯಮ್ಮಾಲೆ ದರ್ಶನ ಘೇವ್ನು ಪುನೀತ ಜಾಲ್ಲೆ. ಮಾಗಿರಿ ಮಾರಿಯಮ್ಮ ದೇವಿಲೇ ಬಿಂಬ ವಿಸರ್ಜನ ಕೆಲ್ಲಿ. ಹೇ ಸಂದರ್ಭಾರಿ ಕಾಪೂಂತು ಆಸ್ಸುಚೆ ಶ್ರೀ ಹಳೇ ಮಾರಿಗುಡಿ, ಹೊಸ ಮಾರಿಗುಡಿ ಆನಿ ತೀಸರೆಚೆ ಮಾರಿಗುಡಿಂತು ಏಕ್ಕಾ ದಿವಸು ಸುಗ್ಗಿ ಜಾತ್ರಾ ಚಲೀಲೆ ಆಸ್ಸುನು ೫೦ ಹಜಾರಾ ಪಶಿ ಚ್ಹಡ ಗದ್ದಿಗೆ ಪೂಜಾ, ಕುಂಕುಮಾರ್ಚನ, ನಾರ್ಲಕೇಳಿ, ಫುಲ್ಲಾ ಪೂಜಾ ಚಲೀಲೆ ಮಾಹಿತಿ ಮೆಳ್ಳಾ. ಹೇ ಸಂದರ್ಭಾರಿ ಮಸ್ತ ಮಾರಗ ಆಸಲೇರಿಚಿ ಹಜಾರ ಬಽರಿ ಅಟ್ಟೆ ಮ್ಹೊಗರೆ ಫೂಲ ವಿಕ್ರಯ ಜಾಲೀಲೆ ಆನ್ನೇಕ ಮಹತ್ವಾಚೆ ವಿಷಯು. ಆನಿ ಭಕ್ತಬಾಂದವಾನಿ ಶ್ರೀ ಮಾರಿಯಮ್ಮಾಲೆ ವಯ್ರಿ ದವರಿಲೆ ಶೃದ್ಧಾ-ಭಕ್ತಿಕ ಸಾಕ್ಷಿ ಮ್ಹಣಯೇತ.