ಬರೋಬ್ಬರಿ ಪಾಂಚ ಪೀಳ್ಗಿಚಾನ ಚೋಲ್ನು ಆಯಲೀಲೆ ಆರ್‍ಗೋಡು ಶೆಣೈ ಕುಟುಂಬಾಚಾಲೆ ಶ್ರೀ ಗೌರಿಗಣೇಶೋತ್ಸವಾಕ ಅವುಂದು 160 ವರ್ಷ. ಅ.೨೬ಕ ಕುಟುಂಬಾಚೆ ೨೫ ಪಶಿ ಚ್ಹಡ ಸುವಾಸಿನಿ ಬಾಯ್ಲಮನ್ಶೆನಿ ಮಾದೇವ, ಪಾರ್ವತಿ ಪೂಜಾ ಕೊರನು ವಾಯಣ ಪೂಜಾ ಕೆಲ್ಲಿ. ಭಜನಾ, ನೈವೇದ್ಯಾ, ಸಂತರ್ಪಣ, ರಾತ್ರಿ ಪೂಜಾ ಆದಿ ಕಾರ್ಯಕ್ರಮ ಚಲ್ಲೆ. ಅ.೨೭ಕ ಭಾದ್ರಪದ ಚೌತಿ ದಿವಸು ಶ್ರೀ ಗಣೇಶಮೂರ್ತಿ ಪ್ರತಿಷ್ಠಾಪನ, ಶೃಂಗಾರ, ವಿಶೇಷ ಪೂಜಾ, ನೈವೇದ್ಯ, ಮಹಾಮಂಗಳಾರತಿ, ಸಂತರ್ಪಣ, ಯಕ್ಷಗಾನ ತಾಲಮದ್ಲೆ ಚಲ್ಲೆ. ತಾಳಮದ್ಲೆಂತು ಹಿಮ್ಮೇಳಾಂತು ಚಿ|| ಜೀವೋತ್ತಮ ಕಾಮತ, ಶ್ರೀ ಸದಾನಂದ ಶೆಣೈ ಆನಿ ಶ್ರೀ ದೇವಿದಾಸ ಶೆಣೈ ಹಾನ್ನಿ ವಾಂಟೊ ಘೆತಲೇರಿ, ಅರ್ಥಧಾರಿ ಜಾವ್ನು ಶ್ರೀ ಮೋಹನದಾಸ ಶೆಣೈ, ಶ್ರೀ ಶಂಕರ ಶೆಣೈ ಆನಿ ಶ್ರೀ ಶ್ರೀಕಾಂತ ಶೆಣೈನಿ ವಾಂಟೊ ಘೆತ್ಲೆ.
ಮಾಗಿರಿ ಚಲೀಲೆ ಸಭಾ ಕಾರ್ಯಕ್ರಮಾಂತು ಯಕ್ಷಗಾನಾಂತು ಸಬಾರ ಕಾಳ ವೆಗವೆಗಳೆ ಮೇಳಾಂತು ಮದ್ಲೆ ವಾದಕ ಜಾವನು ಸೇವಾ ಪಾವಯಿಲೆ ಮ್ಹಾಲಗಡೆ ಕಲಾವಿದ ಶ್ರೀ ದೇವದಾಸ ಶೆಣೈ ಆನಿ ಸಬಾರ ಮೇಳಾಂತು ಭಾಗವತ ಜಾವನು ಸೇವಾ ಪಾವಯಿಲೆ ಶ್ರೀ ಸದಾನಂದ ಶೆಣೈ ಹಾಂಕಾ ಚೌತಿ ಚಲೋಚೆ ಮೋಹನದಾಸ ಶೆಣೈ ಆನಿ ಚರಡುಂವಾ ತರಪೇನಿ ಸಮಾರಂಭಾಕ ಆಯ್ಯಿಲೆ ಕುಟುಂಬಾಚೆ ಮ್ಹಾಲ್ಗಡ್ಯಾನಿ ಆನಿ ಸೊಯರ್‍ಯಾನ ಮೇಳ್ನು ದಂಪತಿ ಸಮೇತ ಶಾಲ, ಮಾಲಾರ್ಪಣ ಕೊರನು, ಸ್ಮರಣಿಕಾ, ಸನ್ಮಾನ ಪತ್ರ ಸಹಿತ ಸನ್ಮಾನು ಕೆಲ್ಲೊ. ತಾಂಗೆಲೆ ಬಾಯ್ಲಾಂಕ ಸ್ಮರಣಿಕಾ ದಿವನು, ಹೂಂಟಿ ಭರಲೆ. ಮಾಗಿರಿ ಭಜನಾ ಕಾರ್ಯಕ್ರಮ ಚಲ್ಲೆ, ಚಾರಿ ರಂಗಪೂಜಾ ಚಲ್ಲೆ. ಅ.೨೮ಕ ಧೋಂಪಾರಾ ಶ್ರೀ ಗಣಪತಿಲೆ ಸನ್ನಿಧಿರಿ ಶ್ರೀ ಸತ್ಯನಾರಾಯಣ ಪೂಜಾ ಚಲ್ಲೆ. ಆಯ್ಯಿಲೆ ಸುವಾಸಿನಿ ಬಾಯ್ಲಮನ್ಶೆಂಕ ಹೂಂಟಿ ಭರಲೆ. ಜವಣ ಜಾಲ್ಲ ನಂತರ ವೆಗವೆಗಳೆ ಮನರಂಜನಾತ್ಮಕ ಕ್ರೀಡಾ ಸ್ಪರ್ಧಾ ಚಲ್ಲೆ. ರಾತ್ತಿಕ ಭಜನಾ, ವಿಸರ್ಜನಾ ಪೂಜಾ ಚೋಲ್ನು ಶ್ರೀ ಗಣೇಶಮೂರ್ತಿಕ ಜಲಸ್ತಂಭನ ಕೆಲ್ಲಿ. ಅವುಂದು ವರ್ಷಾಚೆ ಶ್ರೀ ಗೌರಿ ಗಣೇಶೋತ್ಸವು ಶ್ರೀ ಆರಗೋಡು ಮೋಹನದಾಸ ಶೆಣೈ ಆನಿ ಚರಡುವಾಲೆ ನೇತೃತ್ವಾರಿ ಚಲ್ಲೆ.