ಶ್ರೀ ದುರ್ಗಾಂಬಾ ಮಂದಿರ ಮಣಿಪಾಲ ಹಾಜ್ಜೆ ೨೨ ವೇಂ ವರ್ಷಾಚೆ ಪ್ರತಿಷ್ಠಾ ವರ್ಧಂತಿ ಪ್ರಯುಕ್ತ ಶ್ರೀದೇವಿಯ ಸನ್ನಿಧಿಂತು ಪಂಚದುರ್ಗಾ ಹವನ ಎಪ್ರಿಲ್ ೧೨ಚೆ ಆಯ್ತವಾರು ಚಲ್ಲೆ. ಶ್ರೀ ದೇವಿಲೆ ಸನ್ನಿಧಿರಿ ಸಾಮೂಹಿಕ ಕುಂಕುಮಾರ್ಚನ, ಶ್ರೀದೇವಿಕ ಮ್ಹೊಗರೆಂ ಫುಲ್ಲಾಚೆ ವಿಶೇಷ ಅಲಂಕಾರ, ಮಹಾಪೂಜೆ ಉಪರಾಂತ ಸಾರ್ವಜನಿಕ ಅನ್ನಸಂತರ್ಪಣ ಚಲ್ಲೆ. ದೇವಳಾಚೆ ವರ್ಧಂತಿಚೆ ಪರ್ವಕಾಲಾರಿ ಶ್ರೀಮದ್ ಶ್ರೀ ಕೈವಲ್ಯ ಮಠ ಸಂಸ್ಥಾನ ಮಠಾಧಿಪತಿ ಶ್ರೀಮದ್ ಶಿವಾನಂದ ಸರಸ್ಪತಿ ಸ್ವಾಮ್ಯಾನಿಂ ದೇವಳಾಕ ಭೆಟ್ಟುನು, ದೇವದರ್ಶನ ಕೊರನು, ಆಶೀರ್ವಚನ ಕೆಲ್ಲಿ.
ದೇವಳಾಚೆ ತರಪೇನಿ ಪೂಜ್ಯ ಸ್ವಾಮ್ಯಾಂಕ ಮಂಗಳವಾದ್ಯ ತಶೀಚಿ ಪೂರ್ಣ ಕುಂಭ ಸ್ವಾಗತ ದಿವನು ಆಪೋನು ಘೆತ್ಲೆ. ಪಾದ ಪೂಜೆ ಕೊರನು ಫಲ ಪುಷ್ಪ, ಕಾಣಿಕಾ ಸಮರ್ಪಣ ಕೊರನು ಗೌರವ ಕೆಲ್ಲಿ. ಪೂಜ್ಯಸ್ವಾಮೆಂನಿ ಶ್ರೀ ದುರ್ಗಾಂಬಾ ದೇವಿಕ ಆರ್ತಿ ಕೆಲ್ಲಿ. ಆನಿ ಆಪಣೇಲೆ ಅನುಗ್ರಹ ಆಶೀರ್ವಚನಾಂತು “ಮ್ಹಾಲ್ಗಡ್ಯಾಲೆ ಪೂರ್ವ ಜನ್ಮಾಚೆ ಸುಕೃತ ಫಲಾನಿ ಹೇ ದೇವಳ ನಿರ್ಮಾಣ ಜಾಲ್ಲ್ಯಾ. ನಿರಂತರ ಭಗವಂತಾಲೆ ಆರಾಧನೇನಿ ಮುಕ್ತಿ ಪ್ರಾಪ್ತಿ, ಗುರೂಲೆ ಆನಿ ಶ್ರೀ ದೇವಾಲೆ ವಿಶೇಷ ಅನುಗ್ರಹ ತುಮಗೆಲೆ ಸಕಡಾಲೆ ವಯ್ರಿ ಆಸ್ಸೊ ಮ್ಹೊಣು ಅನುಗ್ರಹ ಕೆಲ್ಲಿ. ದೇವಳಾಚೆ ಮುಖೇಲ ಅರ್ಚಕ ವೇದಮೂರ್ತಿ ಶಿವಾನಂದ ಭಟ್ ನೇತೃತ್ವಾರಿ ಪಂಚದುರ್ಗಾ ಹವನ ಚಲ್ಲೆ. ಸೇವಾದಾರ ಶ್ರೀಮತಿ ಉಷಾ ಪೈ, ಶ್ರೀಧರ್ ಪೈ ತಾನ್ನಿ ಸಹಕಾರ ದಿಲ್ಲೆ. ಸಮಾರಂಭಾಂತು ವೇದ ಮೂರ್ತಿ ಜಗದೀಶ್ ಭಟ್ ಕುಂದಾಪುರ, ವಿಘ್ನೇಶ್ ಭಟ್, ವಾಸುದೇವ ಭಟ್, ವೆಂಕಟರಮಣ ಭಟ್, ರಾಜೇಶ್ ಭಟ್, ನಾಗೇಶ್ ಭಟ್, ಶೈಲೇಶ್ ಭಟ್ ಮಲ್ಪೆ, ಶ್ರೀದುರ್ಗಾಂಬಾ ಟ್ರಸ್ಟ್ ಸದಸ್ಯ ಸಿ ಆರ್ ಪೈ, ಗಣಪತಿ ಕಾಮತ್, ದಿವಾಕರ್ ಕಿಣೆ, ಗಣೇಶ್ ಪೈ, ಆತ್ಮರಾಮ ನಾಯಕ್, ಜಗದೀಶ್ ಪೈ, ಗುರುರಾಜ್ ನಾಯಕ್, ಶ್ರೀಮತಿ ಲಕ್ಷ್ಮೀ ಭಟ್, ಸಂತೋಷ್ ವಾಗ್ಲೇ, ಸಂದೀಪ್ ಭಟ್, ಟ್ರಸ್ಟ್ ಪಧಾದಿಕಾರಿ ಲೋಕ, ತಶೀಚಿ ಶ್ರೀದುರ್ಗಾಂಬಾ ಮಹಿಳಾ ಮಂಡಳಿ ಸದಸ್ಯ, ಗಾಂವ್ಚೆ ಧಾ ಸಮಸ್ತ, ಶಂಬರಬಽರಿ ಸಮಾಜ ಭಾಂದವ ಉಪಸ್ಥಿತ ವ್ಹರಲೀಲೆ.