ಕೊಂಕಣಿ ಅಕಾಡೆಮಿ ವತೀನ ರಾಷ್ಟ್ರೀಯ ಸಂವಿಧಾನ ದಿನಾಚರಣ

ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚಾನ ಮಂಗಳೂರು ಧರ್ಮಪ್ರಾಂತ್ಯಾಚೆ ಶ್ರೀ ಸಾಮಾನ್ಯರ ಆಯೋಗಾಚೆ ಮೇಳಾವಟ್ಟಾನಿ ದಿನಾಂಕ ೨೬.೧೧.೨೦೨೫ ದಿವಸು ‘ಸಂಭ್ರಮ ಸಭಾಂಗಣ’ ಸಂತ ಅಂತೋಣಿ ಸೇವಾ ಸಂಸ್ಥೆ, ಜೆಪ್ಪು ಹಾಂಗಾ ರಾಷ್ಟ್ರೀಯ ಸಂವಿಧಾನ ದಿನಾಚರಣ ಘಡ್ಲೆ. ಸಂವಿಧಾನ ಪೀಠಿಕಾ ಗೀತಾ ಸಾಂಗೂನು, ಸಂವಿಧಾನಾಕ ಗೌರವ ಪಾವಯಚೆ ಬರಶಿ ಕಾರ್ಯಕ್ರಮ ಸೂರ ಜಾಲ್ಲೆ. ಕಾರ್ಯಕ್ರಮಾಚೆ ಅಧ್ಯಕ್ಷಪಣ ಘೆತ್ತಿಲೆ ಶ್ರೀ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ತಾನ್ನಿ ಪ್ರಾಸ್ತಾವಿಕ ಜಾವ್ನು ಉಲೋನು ಸಂವಿಧಾನ ದಿನಾಚರಣೆಚೆ ಇತಿಹಾಸ ಆನಿ ಡಾ| ಬಿ. ಆರ್. ಅಂಬೇಡ್ಕರ್ ತಾನ್ನಿ ಕೆಲೀಲೊ ವಾವರೋ, ಸವಾಲ ತಶೀಚಿ ಬೊಗ್ಗಿಲೆ ಕಷ್ಟ ಸಕ್ಕಡ ವಿವರ ಜಾವನು ಸಾಂಗೂನು ಸಕಡಾಂಕ ಯೇವಕಾರ ಕೆಲ್ಲಿ.
ಕೊಂಕಣಿಂತು ತಯಾರ ಕೆಲೀಲೆ ಸಂವಿಧಾನ ಪೀಠಿಕೆ, ಸಂವಿಧಾನ ಪುಸ್ತಕ, ಸಂವಿಧಾನಶಿಲ್ಪಿ ಬಾಬಾಸಾಹೇಬ್ ಡಾ| ಬಿ. ಆರ್. ಅಂಬೇಡ್ಕರ್ ತಾಂಗೆಲೆ ಫೋಟೊಕ ಮುಖೇಲ ಸೊಯರೆ ಜಾವ್ನು ಆಯಲೀಲೆ ಕೊಡಿಯಾಳಾಚೆ ನಾಮಾಧಿಕ ನ್ಯಾಯವಾದಿ ಶ್ರೀ ಕೆ.ಪಿ. ವಾಸುದೇವ ರಾವ್ ತಶೀಚಿ ವೇದಿಕೇರಿ ಆಸ್ಸುಚೆ ಗಣ್ಯಾನಿ ಪುಷ್ಪಾರ್ಚನ ಕೆಲ್ಲಿ. ವಂ.ಸ್ವಾ. ಬೇಸಿಲ್ ವಾಸ್ ತಾನ್ನಿ ಕೊಂಕಣಿಂತು ರಚಯಿಲೆ `ಸಂವಿಧಾನಶಿಲ್ಪಿ ಬಾಬಾಸಾಹೇಬ್ ಡಾ| ಬಿ. ಆರ್. ಅಂಬೇಡ್ಕರ್’ ಪುಸ್ತಕ ಲೋಕಾರ್ಪಣ ಕೆಲ್ಲಿ. ಸರಕಾರಿ ಪ್ರಥಮ ದರ್ಜೆ ಕಾಲೇಜು, ಯಲಹಂಕ, ಬೆಂಗಳೂರು ಹಾಜ್ಜೆ ಪ್ರಾಂಶುಪಾಲ, ಶ್ರೀ ಸ್ಟೀವನ್ ಕ್ವಾಡ್ರಸ್ ತಾನ್ನಿ ಕೊಂಕಣಿಂತು ಸಂವಿಧಾನ ಪೀಠಿಕಾ ವಾಚ್ಚಿಲೆ.

ಪ್ರಧಾನ ಭಾಷಣಕಾರ ಜಾವ್ನು ಪುತ್ತೂರು ಸರ್ಕಾರಿ ಮಹಿಳಾ ಕಾಲೇಜಾಚೆ ಸಹಪ್ರಾಧ್ಯಾಪಕ ಪ್ರೊ. ಐವನ್ ಪ್ರಾನ್ಸಿಸ್ ಲೋಬೊ ಆಯ್ಯಿಲೆ. ಸಮಾಜಸೇವಾ ಕ್ಷೇತ್ರಾಂತು ೨೦೨೫ವೇಂ ವರ್ಷಾಂತು ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಘೆತ್ತಿಲಿ ಶ್ರೀಮತಿ ಕೊರಿನ್ ರಸ್ಕಿನ್ಹಾ ತಾಂಕಾ ಹೇಂಚಿ ವೇಳ್ಯಾರಿ ಸನ್ಮಾನ ಕೆಲ್ಲಿ.
ಮುಖೇಲ ಸೊಯರೆ ಜಾವ್ನಾಶ್ಶಿಲೆ ಕೆ.ಪಿ. ವಾಸುದೇವ ರಾವ್ ತಾನ್ನಿ ಸಂದರ್ಭೋಚಿತ ಜಾವ್ನು ಉಲಯಿಲೆ. ಮಾನಾಚೆಂ ಸೊಯರೆ ಸಂತ ಅಂತೋಣಿ ಸೇವಾ ಸಂಸ್ಥೆಚೆ ವಂ. ಸ್ವಾ. ಪ್ರವೀಣ್ ಅಮೃತ್ ಮಾರ್ಟಿಸ್ ತಾನ್ನಿ ಶ್ರೀ ಎಡ್ವಿನ್ ಜೆ. ಎಫ್. ಡಿಸೋಜಾ ತಾನ್ನಿ ರಚಯಿಲೆ “ಉಣ್ಯಾ ಭಾವಾಡ್ತಾಚೆ’ ಇ- ಬುಕ್ ಪುಸ್ತಕಾಚೆ ಲೋಕಾರ್ಪಣ ಕೆಲ್ಲಿ. ಅಕಾಡೆಮಿಂತು ೩೦ ವರ್ಷ ಕಾಳ ಸೇವಾ ಪಾವೋನು ನಿವೃತ್ತಿ ಪಾವ್ವಿಲೀ ಶ್ರೀಮತಿ ಮೇರಿ ಡಿಸಿಲ್ವ ತಾಂಕಾ ಗೌರವ ಕೆಲ್ಲಿ.

ಕಾರ್ಯಕ್ರಮಾಂತು ಅಕಾಡೆಮಿ ಮಾಜಿ ಅಧ್ಯಕ್ಷ ಶ್ರೀ ರೋಯ್ ಕ್ಯಾಸ್ತೆಲಿನೊ, ಸದಸ್ಯಜಾಲೀಲೆ ನವೀನ್ ಲೋಬೊ, ಸಮರ್ಥ್ ಭಟ್, ರೊನಾಲ್ಡ್ ಕ್ರಾಸ್ತಾ, ಅಕ್ಷತಾ ನಾಯಕ್ ಉಪಸ್ಥಿತ ವ್ಹರಲೀಲೆ. ರಿಜಿಸ್ಟ್ರಾರ್ ರಾಜೇಶ್ ಜಿ. ತಾನ್ನಿ ಆಬಾರ ಮಾನಲೆ. ಶ್ರೀ ರೊಮನ್ಸ್ ಲೋಬೊ ತಾನ್ನಿ ಕಾರ್ಯಕ್ರಮ ನಿರೂಪಣ ಕೆಲ್ಲಿ.
‘ಉಣ್ಯಾ ಭಾವಾಡ್ತಾಚೆ’ ಇ- ಪುಸ್ತಕಾಚೆ ಲಿಂಕ್ https://play.google.com/store/books/details?id=7KSaEQAAQBAJ