ಶ್ರೀ ಪಟ್ಟಾಭಿರಾಮಚಂದ್ರ ದೇವಳ ಕೋಟೇಶ್ವರ, ಶ್ರೀ ಚಾತುರ್ಮಾಸ್ಯ ಸಮಿತಿ ಕೋಟೇಶ್ವರ, ತಶೀಚಿ ಅನಂತ ವೈದಿಕ ಕೇಂದ್ರ, ಉಡುಪಿ ಹಾಂಗೆಲೆ ಮೇಳಾವಟ್ಟಾಂತು ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಜನ್ಮ ಶತಮಾನೋತ್ಸವ ತಶೀಚಿ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಚಾತುರ್ಮಾಸ್ಯ ವ್ರತ ಪ್ರಯುಕ್ತ ಹಿಮಾಲಯ ಯೋಗ ಕ್ರಿಯಾ ತಶೀಚಿ ಸಂಹಿತಾ ಪ್ರಾಣಾಯಾಮ ಧ್ಯಾನ ಕಾರ್ಯಾಗಾರಅ ೪ ಆನಿ ೫ ಕ ಕೋಟೇಶ್ವರ ಶ್ರೀ ಪಟ್ಟಾಭಿರಾಮಚಂದ್ರ ದೇವಳಾಂತು ಚಲ್ಲೆ.
ಹೇ ಕಾರ್ಯಾಗಾರ ಅಂತಾರಾಷ್ಟ್ರೀಯ ಖ್ಯಾತಿಚೆ ಯೋಗಗುರು ಡಾ. ಕಾರ್ಕಳ ರಾಘವೇಂದ್ರ ರಂಗನಾಥ ಪೈ (ಶ್ರೀ ವೇದವ್ಯಾಸ ಯೋಗ ಪ್ರತಿಷ್ಠಾನ, ಮೈಸೂರು) ತಾಂಗೆಲೆ ಮಾರ್ಗದರ್ಶನಾರಿ ಆಯೋಜನ ಕೆಲೀಲೆ. ತಾಂಗೆಲೆ ಬರಶಿ ಶ್ರೀಮತಿ ಭವಾನಿ ಆರ್. ಪೈ ತಶೀಚಿ ಗುರುಪ್ರಸಾದ ಆಚಾರ್ಯ ಸಹ ತರಬೇತುದಾರ ಜಾವನು ವಾಂಟೊ ಘೆತ್ತಿಲೆ.
ಪೂಜ್ಯ ಶ್ರೀ ಸಂಯಮೀಂದ್ರ ತೀರ್ಥ ಸ್ವಾಮ್ಯಾನಿ ತಾಂಗೆಲೆ ಆಶೀರ್ವಚನಾಂತು ಯೋಗ ಆನಿ ಧ್ಯಾನ ಮನುಷ್ಯಾಲೆ ಜೀವನಾಚೆ ಅವಿಭಾಜ್ಯ ಅಂಶ. ಭಾರತೀಯ ವಿದ್ಯೆಚೆ ಅಗಾಧ ಜ್ಞಾನಭಂಡಾರ ಜಾಲ್ಲಾ; ತಾಂತು ಭೊರನು ಆಸ್ಸುಚೆ ತತ್ತ್ವ, ಸಂಶೋಧನಾ‌ಆನಿ ಅನುಭವಪಾಠ ಆಧುನಿಕ ಸಮಾಜಾಕ ಹುಜವಾಡೊ ದಿತ್ತಾ, ಸನಾತನ ವಿದ್ಯಾ ಕೇವಲ ಪೌರಾಣಿಕತೆ ಮ್ಹೊಣು ಲೇಕನಾಶಿ, ತಾಂತುಲೆ ವೈಜ್ಞಾನಿಕ ಅರ್ಥ ಕೋಳ್ನು ಘೆವ್ಕಾ ಮ್ಹಳ್ಳೆ. ಕಾರ್ಯಾಗಾರಾಚೆ ಪ್ರಾತಃಕಾಲಾರಿ ಯೋಗಾಭ್ಯಾಸಿ ಸರಳ ಯೋಗ ವ್ಯಾಯಾಮ, ಹಿಮಾಲಯ ಯೋಗ ಕ್ರಿಯಾ, ಸೂರ್ಯನಮಸ್ಕಾರ, ಯೋಗ ಚಮಕಣಿ, ಸಂಹಿತಾ ಧ್ಯಾನ, ಯೋಗನಿದ್ರಾ, ಪ್ರಾಣಾಯಾಮ, ವಿಠ್ಠಲಭಾತಿ ತಂತ್ರ ಆನಿ ಸೀತಾ ಧ್ಯಾನ ಸಹಿತ ಅನೇಕ ಯೋಗ ತಂತ್ರಾಂಚೆ ಅಭ್ಯಾಸು ಕೆಲ್ಲೆ. ಸುಮಾರ ೨೦೦ ಪಶಿ ಚ್ಹಡ ಲೋಕಾನಿ ಹಾಂತು ವಾಂಟೊ ಘೆತ್ತಿಲೆ.
ಕಾರ್ಯಾಗಾರ ಸಮೂಹ ಪ್ರಾರ್ಥನಾ ಆನಿ ಧ್ಯಾನ ಸಮಾಪನೆಬರಶಿ ಸಂಪನ್ನ ಜಾಲ್ಲೆ. ಚರಡುವಾಂಕ ಯೋಗಾಚೆ ಮಹತ್ವ ತಶೀಚಿ ಆಹಾರ ಸೇವನಾ ಆನಿ ಆಮ್ಗೆಲೆ ದಿನ ನಿತ್ಯಾಚೆ ಆಚರಣೆ ಖಾತೇರಿ ಯೋಗ ರಾಘವೇಂದ್ರ ಪೈ ಆನಿ ತಾಂಗೆಲಿ ಧರ್ಮಪತ್ನಿ ಶ್ರೀಮತಿ ಭವಾನಿ ಪೈನಿ ಚರಡುವಾಂಕ ಕಳಯಿಲೆ. ಕಾರ್ಯಗಾರ ಚಲೋನು ದಿಲೀಲೆ ಯೋಗಗುರು ಡಾ. ರಾಘವೇಂದ್ರ ಪೈ, ಶ್ರೀಮತಿ ಭವಾನಿ ಪೈ, ಆನಿ ಗುರುಪ್ರಸಾದ ಆಚಾರ್ಯ ತಾಂಕಾ ಪೂಜ್ಯ ಗುರುವರ್ಯಾನಿ ಗೌರವಾರ್ಪಣ ಕೊರನು, ಫಲ ಮಂತ್ರಾಕ್ಷತ ದೀವ್ನು, ಹೇ ಈ ಯೋಗ ಸಂಸ್ಕೃತಿ ಅಶೀಚಿ ಪೋವ್ತಾ ಮುಖಾರೋ ಮ್ಹೊಣು ಆಶೀರ್ವಾದ ಕೆಲ್ಲೆ.