ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್, 05 ಜುಲೈ 2025ವೆರ್ ಅಕಾಡೆಮಿ ಸಭಾಸಾಲಾಂತ್ ʼಕಾವ್ಯಾಂ ವ್ಹಾಳೊ-4ʼ ನಾಂವಾಖಾಲ್ ಕವಿಗೋಷ್ಟಿ ಆಸಾ ಕೆಲ್ಲಿ. ಅಕಾಡೆಮಿ ಅಧ್ಯಕ್ಷ್ ಮಾನೆಸ್ತ್ ಜೋಕಿಂ ಸ್ಟ್ಯಾನಿ ಆಲ್ವಾರಿಸಾನ್‌ ಕಾರ್ಯಾಚೆಂ ಅಧ್ಯಕ್ಷ್ ಸ್ಥಾನ್‌ ಸೊಬವ್ನ್, ಜಮ್ಲಲ್ಯಾ ಸರ್ವಾಂಕ್‌ ಸ್ವಾಗತ್‌ ಕೆಲೆ. ಕಾರ್ಯಾಚ್ಯಾ ಪಯ್ಲೆಂ ಮಾಲ್ಗಡೊ ಬರವ್ಪಿ ಮಾನೆಸ್ತ್ ಎಡ್ವಿನ್‌ ನೆಟ್ಟೊ (ಎಡಿ ನೆಟ್ಟೊ)ಚಿ ಭಲಾಯ್ಕಿ ಬರಿ ನಾತ್‌ಲ್ಲ್ಯಾ ನಿಮ್ತಿಂ, ತಾಚ್ಯಾ ಘರಾ ಭೆಟ್‌ ದೀವ್ನ್‌ ಸನ್ಮಾನ್‌ ಕೆಲೊ. ಮಾನೆಸ್ತ್ ಅರುಣ್‌ ಜಿ. ಶೇಟ್‌ರವರು ಮುಖೆಲ್‌ ಸಯ್ರೊ ಜಾವ್ನ್‌ ಹಾಜರ್‌ ಆಸೊನ್, ʼವಿವಿಧ್‌ ಬೊಲಿ ಆಸ್ಚಿ ಆಮ್ಚಿ ಕೊಂಕ್ಣಿ ಭಾಸ್, ಹ್ಯಾ ಭಾಶೆಕ್‌ ವಿವಿಧ್‌ ವೈವಿಧ್ಯತಾ ಆಸಾ. ಅಕಾಡೆಮಿ ಥಾವ್ನ್ ಪ್ರಶಸ್ತಿ ಆಪ್ಣಾಂವ್ಚೆಂ ಜಿವಿತಾಚೆಂ ವ್ಹಡ್ಲೆಂ ಸಾಧನ್ʼ ಮ್ಹಣಾಲೊ. ಪ್ರಮುಖ್ ಉಲೊವ್ಪಿ ಮಂಗ್ಳುರ್ ವಿಶ್ವವಿದ್ಯಾಲಯಾಚೊ ಪ್ರಾಧ್ಯಾಪಕ್‌ ಜಾವ್ನಾಸ್ಚೊ ಮಾಣೆಸ್ತ್ ವೆಂಕಟೇಶ್‌ ನಾಯಕ್‌, ಸಾಹಿತ್ಯ್, ಕವಿತಾ ಆನಿ ಅಕಾಡೆಮಿ ವಿಶ್ಯಾಂತ್‌ ಆಪ್ಲಿ ಭೊಗ್ಣಾಂ ಉಚಾರ್ಲಿಂ.
ಮಾನೆಸ್ತಿಣ್ ಫೆಲ್ಸಿ ಲೋಬೊ, ದೆರೆಬೈಲ್‌ ಹಿಣೆಂ ಕವಿಗೋಷ್ಟಿ ಚಲೊವ್ನ್‌ ವೆಲಿ. ಮಾನೆಸ್ತಿಣ್ ಜೋಯ್ಸ್‌ ಕಿನ್ನಿಗೋಳಿ, ಮಾನೆಸ್ತ್ ಹೆನ್ರಿ ಮಸ್ಕರೇನ್ಹಸ್‌, ಮಾನೆಸ್ತ್ ಎಡ್ವರ್ಡ್‌ ಲೋಬೊ, ಮಾನೆಸ್ತ್ ಲಾರೆನ್ಸ್ ಬ್ಯಾಪ್ಟಿಸ್ಟ್, ಮಾನೆಸ್ತಿಣ್ ಜೂಲಿಯೆಟ್‌ ಫೆರ್ನಾಂಡಿಸ್‌, ಮಾನೆಸ್ತ್ ರಾಬರ್ಟ್‌ ಡಿಸೋಜ, ಮಾನೆಸ್ತ್ ವಾಸುದೇವ ಶ್ಯಾನ್‌ಭಾಗ್‌, ಮಾನೆಸ್ತಿಣ್ ಕುಸುಮಾ ಕಾಮತ್‌, ಮಾನೆಸ್ತ್ ಮೆಲ್ವಿನ್‌ ವಾಸ್‌ ನೀರ್‌ಮಾರ್ಗ ಹಾಂಣಿಂ ಆಪಾಪ್ಲ್ಯೊ ಕವಿತಾ ಸಾದರ್‌ ಕೆಲ್ಯೊ.
ಅಕಾಡೆಮಿ ಸಾಂದೊ ಮಾನೆಸ್ತ್ ಸಮರ್ಥ್‌ ಭಟ್ ಹಾಣಿಂ ಧನ್ಯವಾದ್ ಅರ್ಪಿಲೆಂ. ಅಕಾಡೆಮಿ ಸಾಂದೊ ನವೀನ್‌ ಲೋಬೊ, ದಯಾನಂದ ಮಡ್ಕೇಕರ್‌, ಮಾನೆಸ್ತಿಣ್ ಸಪ್ನಾ ಮೇ ಕ್ರಾಸ್ತಾ ಹಾಜರ್‌ ಆಸ್‌ಲ್ಲಿಂ. ಸಾಂದೊ ರೊನಾಲ್ಡ್‌ ಕ್ರಾಸ್ತಾ ಹಾಣಿಂ ಕಾರ್ಯೆಂ ನಿರ್ವಹಣ್‌ ಕೆಲೆಂ.